ပှၤသးစၢ်တဖၣ်အတၢ်သံကွၢ်
တၢ်လၢယဘၣ်သးမၤန့ၣ် ဘၣ်မနုၤအဃိ ယမိယပါ တပျဲယမၤအီၤ နီတမံၤဘၣ်လဲၣ်
နသကိးတဖၣ် ကွဲနၤလၢ နကလဲၤဖၤထံၤ ဒီးအီၣ်သကိးအီသကိးတၢ်ဒီးအဝဲသ့ၣ်လၢ မုၢ်ဃုနံၤ အိၣ်ဘှံးနံၤ. အဃိ နဃ့နမိနပါအခွဲးလၢ နကလဲၤ သနာ်က့ အဝဲသ့ၣ် တဟ့ၣ်နၤအခွဲးလၢ နကလဲၤဘၣ်. ညီနုၢ်န့ၣ် အဝဲသ့ၣ် တဟ့ၣ်နၤအခွဲးဘၣ်အဃိ ခဲအံၤ အဝဲသ့ၣ် တဟ့ၣ်နၤအခွဲးဘၣ်န့ၣ် တလီၤဆီဘၣ်နၤ နီတမံၤဘၣ်.
လၢတၢ်မၤလိအံၤအပူၤ ပကတဲသကိး
ဘၣ်မနုၤအဃိ ယမိယပါ တဟ့ၣ်ယၤအခွဲး နီတဘျီဘၣ်လဲၣ်
နတူၢ်ဘၣ်လၢ နမိနပါတဟ့ၣ်နၤအခွဲးလၢ နကမၤတၢ်လၢ နဘၣ်သးမၤတဖၣ် နီတဘျီဘၣ်အဃိ နဆိကမိၣ်လၢ အဝဲသ့ၣ် တအဲၣ်ဒိးလၢ နကမၤတၢ်လၢ အမၤမုာ်နသး ဒီးတအဲၣ်ဒိးလၢ နသးခုနီတဘျီဘၣ်.
မရံ လၢအမ့ၢ် ပှၤသးစၢ်တဂၤန့ၣ် ဖဲအန့ၢ်ဘၣ် ဖိ (phone) သီသီအခါ အတူၢ်ဘၣ်ဝဲဒ်န့ၣ်. အဝဲတဲဝဲလၢ “ယပါပာ်လီၤန့ၢ်ယၤ တၢ်သိၣ်တၢ်သီဒီဒူၣ် အဒိ ဒ်သိးဒီး ယတဘၣ်သူ အဲး (app) မနုၤမနုၤဘၣ်လဲၣ်, ယဘၣ်ဆဲးကျိာ်ထဲ မတဂၤလဲၣ် ဒီးယဘၣ်တဲတၢ်ဒီးအဝဲသ့ၣ် ယံာ်ထဲလဲၣ်. မ့မ့ၢ်ယသကိးတဖၣ်န့ၣ် အမၤဝဲ တၢ်လၢအဘၣ်သးမၤဝဲ န့ၢ်ခဲလၢာ်.”
တၢ်လၢနကဘၣ် ဆိကမိၣ်ထံအီၤ– မရံအပါန့ၣ် တအဲၣ်ဒိးလၢ အဖိမုၣ် ကမၤမုာ်မၤဖှံသး နီတစဲးဘၣ်န့ၣ်ဧါ. ဘၣ်သ့ၣ်သ့ၣ် အဝဲကဘၣ်ယိၣ်န့ၢ်တၢ်လၢ အဖိမုၣ်အဂီၢ်ဒ်လဲၣ်.
ကါကျဲ တၢ်သိၣ်တၢ်သီ အိၣ်ဝဲအဃိ နနီကါ ချ့ထဲသိးဒီး နအဲၣ်ဒိးနီ တသ့ဘၣ်. သနာ်က့ တၢ်သိၣ်တၢ်သီတဖၣ်အံၤန့ၣ် အကဲထီၣ် တၢ်ဒီသဒၢလၢနဂီၢ်. မိပါအတၢ်သိၣ်တၢ်သီတဖၣ်စ့ၢ်ကီး ဒ်န့ၣ်အသိးလီၤ
မၤကွၢ်ဒ်အံၤ– ဆိကမိၣ်လၢ နကဲမိပါ ဒီးနအိၣ်ဒီး နဖိသးစၢ်တဂၤလၢ အန့ၢ်ဘၣ် ဖိ (phone) သီသီတဖျၢၣ်. နကဘၣ်ယိၣ်တၢ်လၢ အဂီၢ်ဒ်လဲၣ်. ဒ်သိး နကဒီသဒၢအီၤအဂီၢ် နကပာ်လီၤ တၢ်သိၣ်တၢ်သီမနုၤလဲၣ်. ဒီးအဝဲမ့ၢ်တဲနၤလၢ နတအဲၣ်ဒိးလၢ အကမၤတၢ်လၢ အဘၣ်သးမၤဝဲ နီတမံၤဘၣ် ဒီးနတအဲၣ်ဒိးလၢ အဝဲကဒိးန့ၢ်ဘၣ် တၢ်သးခုဘၣ်န့ၣ် နကတဲအီၤဒ်လဲၣ်.
“ထီဘိန့ၣ် ယပါတဲယၤလၢ အိၣ်ကွၢ်လၢယလီၢ်မီၤ. ဒီးယအိၣ်ကွၢ်လၢ အလီၢ်အဃိန့ၣ် ယနၢ်ပၢၢ်ထီၣ်လၢ ဘၣ်မနုၤအဃိ အဝဲပာ်လီၤန့ၢ်ယၤ တၢ်သိၣ်တၢ်သီလဲၣ်. ဒီးယဆိကမိၣ်ဘၣ်လၢ ယဖိမ့ၢ်အိၣ်နာ်က့န့ၣ် ယကအဲၣ်ဒိး ပာ်လီၤန့ၢ်အီၤ တၢ်သိၣ်တၢ်သီ ဒ်န့ၣ်စ့ၢ်ကီး.”—ထဲညၤ.
ဒ်သိး ယမိယပါ ကဟ့ၣ်ယၤအခွဲးအဂီၢ် ယဘၣ်မၤဒ်လဲၣ်
“နမ့ၢ်ကိးဃါတၢ်န့ၣ် တကဲဘျုးနီတမံၤဘၣ်. နသးကလီၤဘှံး ဒီးနမိနပါစ့ၢ်ကီး အသးကလီၤဘှံးဝဲ. နမ့ၢ်ကဒူးကဒ့ၣ်တၢ်န့ၣ် နမိနပါ ကထံၣ်နၤဒ် ပှၤသးတဆးဒံးဘၣ် ဒီးအဟ့ၣ်နၤ တၢ်သဘျ့တဘူၣ်ဒံးဘၣ်.”—ရံခၠၢၤ.
“ညီနုၢ်န့ၣ် မိပါတဖၣ် ပာ်လီၤတၢ်သိၣ်တၢ်သီန့ၣ် အအိၣ်ဒီး တၢ်တိာ်ပာ်လၢအဂ့ၤလၢနဂီၢ် ခဲလၢာ်လီၤ. ယမိယပါ တြီယၤန့ၣ် တမ့ၢ်လၢ အဝဲသ့ၣ် တအဲၣ်ဒိးလၢ ယကအိၣ်ဒီးတၢ်သးခုန့ၣ်ဘၣ်. အဝဲသ့ၣ် အဲၣ်ဒိးလၢ ယကဃုထၢ တၢ်သးခုလၢ အတဒုးအိၣ်ထီၣ် တၢ်ကီတၢ်ခဲ ဒီးအကမၤဘၣ်ဒိယၤဘၣ်.”—အဲဖံၤ.
လံာ်စီဆှံ အတၢ်ဟံးစုနဲၣ်ကျဲ– “ပှၤဟးဂီၤဖိတဖၣ်န့ၣ် ပာ်ဖျါထီၣ် အတၢ်သူၣ်ဒိၣ်သးဖျိး ခဲလၢာ်, မ့မ့ၢ် ပှၤကူၣ်တၢ်သ့တဂၤန့ၣ် ပၢၤအသး ဒီးပာ်အသး မုာ်မုာ်ခုၣ်ခုၣ်လီၤ.”—ကတိၤဒိ ၂၉:၁၁.
“ဘၣ်ဃးဒီး ဖိ (phone) န့ၣ် ယပါမ့ၢ်တထံၣ်ဘၣ်န့ၣ် ယတမၤထွဲ အတၢ်သိၣ်တၢ်သီဘၣ်. ယဆှၢခူသူၣ် လံာ်လၢယသကိးတဖၣ်အအိၣ် လၢမုၢ်နၤတၢ်ခံး မ့တမ့ၢ် ယသူ အဲး (app) လၢအတဟ့ၣ်ယၤအခွဲးဘၣ်. လၢခံအဝဲသ့ၣ်ညါဘျီ အဝဲတနာ်အီၣ်ယၤလၢၤဘၣ် ဒီးအဝဲမၤဃံးထီၣ် တၢ်သိၣ်တၢ်သီ. အဃိ နမ့ၢ်မၤခူသူၣ်တၢ်လၢ နမိနပါအလီၢ်ခံန့ၣ် အတဂ့ၤနီတစဲးဘၣ်.”—မရံ.
“ဒ်သိး နမိနပါ ကဆီတလဲ အတၢ်သိၣ်တၢ်သီအဂီၢ် အဝဲသ့ၣ် ကဘၣ်အိၣ်ခိးကွၢ် နတၢ်အိၣ်သး အဃိ အကလိၣ်ဘၣ် တၢ်ဆၢကတီၢ်. အဃိ နကဘၣ်အိၣ်ဒီး တၢ်ဝံသးစူၤ. နမိနပါ မ့ၢ်ထံၣ်လၢ နမၤထွဲအတၢ်သိၣ်တၢ်သီန့ၣ် အဝဲသ့ၣ် ကဟ့ၣ်အါထီၣ်နၤ တၢ်သဘျ့.”—မလံဒၤ.
လံာ်စီဆှံ အတၢ်ဟံးစုနဲၣ်ကျဲ– “ဖိသၣ်သ့ၣ်ဧၢ, ဒိကနၣ် သုမိၢ်သုပၢ်လၢ တၢ်ကိးမံၤဒဲး အပူၤတက့ၢ်.”—ကလီးစဲ ၃:၂၀.
“နမ့ၢ်ဃ့ဝံၤဃ့က့ၤတၢ်န့ၣ် တမ့ၢ်လၢအကကဲဘျုးလၢနဂီၢ် နီတမံၤဘၣ် ဒီးတမ့ၢ် လၢနကန့ၢ်ဘၣ် တၢ်လၢနလီကီအီၤဘၣ်.”—နါတလံ.
“မိပါတဖၣ်နၣ် အဲၣ်ဒိးထံၣ်လၢ အဖိတဖၣ် ပဲာ်ထံနီၤဖးတၢ်သ့ဂ့ၤဂ့ၤ. အဃိ ဖဲယတဲသကိးတၢ်ဒီး ယမိယပါအခါ ယတပာ်ဆိ ယတၢ်တူၢ်ဘၣ် လၢညါဘၣ်. လၢတၢ်န့ၢ်အလီၢ် ယဆိကမိၣ်ထံ တၢ်လၢအကြၢး ဒီးတကြၢး ဒီးယတဲသကိးတၢ်ဒီး အဝဲသ့ၣ်. ဖဲယမၤဒ်န့ၣ်အခါန့ၣ် ယန့ၢ်အါထီၣ်ဘၣ်တၢ်သဘျ့ လၢယကမၤ တၢ်လၢယဘၣ်သးမၤ.”—ကၠိစဲး.
လံာ်စီဆှံ အတၢ်ဟံးစုနဲၣ်ကျဲ– “ယူးယီၣ်ပာ်ကဲ နမိၢ်ဒီးနပၢ်တက့ၢ်.”—အ့းဖ့းစူး ၆:၂.