တၢ်လၢ ပှၤစဲအ့ၣ်ဖိတဖၣ် တသ့ၣ်ညါဝဲဘၣ်

ဘၣ်ဃးဒီး မူခိၣ်ဟီၣ်ခိၣ်ဒီး တၢ်အိၣ်လၢအပူၤန့ၣ် ဖျါလီၤဂာ်လၢ ပှၤစဲအ့ၣ်ဖိတဖၣ် ဃုသ့ၣ်ညါမၤလိဝဲ ဒီးသ့ၣ်ညါဘၣ်ဝဲ တၢ်ဂ့ၢ်အါမးလံ. သနာ်က့ တၢ်သံကွၢ်အရ့ဒိၣ်လၢ အဝဲသ့ၣ် တသ့ၣ်ညါ အတၢ်စံးဆၢဘၣ်န့ၣ် အိၣ်ဒီဒူၣ်ဒံး.

မူခိၣ်ဟီၣ်ခိၣ်ဒီး တၢ်အိၣ်လၢအပူၤ ဒီးတၢ်သးသမူ ဟဲအိၣ်ထီၣ်ဒ်လဲၣ်န့ၣ် ပှၤစဲအ့ၣ်ဖိတဖၣ် သ့ၣ်ညါဝဲဧါ. တသ့ၣ်ညါဝဲဘၣ်. ဘၣ်ဃးဒီး မူခိၣ်ဟီၣ်ခိၣ်ဒီး တၢ်အိၣ်လၢအပူၤ ဟဲအိၣ်ထီၣ်ဒ်လဲၣ်န့ၣ် ပှၤတနီၤတဲဝဲလၢ ပှၤကူၣ်ဘၣ်ကူၣ်သ့လၢ အဃုသ့ၣ်ညါ မူခိၣ်ဟီၣ်ခိၣ်ဒီး တၢ်အိၣ်လၢအပူၤအဂ့ၢ် သ့ၣ်ညါဝဲတၢ်စံးဆၢ. အဒိ မးစဲလူ ကလ့စံၤယၢၤ လၢအကဲ သရၣ်လၢအသိၣ်လိ ဘၣ်ဃးဒီး ပှၤဃုသ့ၣ်ညါ မုၢ်, လါ ဒီးဆၣ်တဖၣ်အဂ့ၢ်လၢ ဒၣ်သမီၣ် ခီလ့ၣ်ကၠိန့ၣ် အတနာ်လၢ တၢ်ဘၣ်တ့ကစၢ်အိၣ်ဘၣ်. ဒီးအတဲဝဲလၢ “မူခိၣ်ဟီၣ်ခိၣ်ဒီး တၢ်အိၣ်လၢအပူၤ ဟဲအိၣ်ထီၣ်ဒ်လဲၣ်န့ၣ် ပတၡဲပၠးဘၣ် ပှၤကၠိဖိ နီတဘျီဘၣ်.”

တကးဒံးဘၣ် ဘၣ်ဃးဒီး တၢ်သးသမူ ဟဲအိၣ်ထီၣ်ဒ်လဲၣ်န့ၣ် မဲးကစံတဘ့ၣ် လၢအမ့ၢ် Science News ပာ်ဖျါထီၣ်ဝဲလၢ “တၢ်သးသမူ ဟဲအိၣ်ထီၣ်လၢ ဟီၣ်ခိၣ်ချၢဒ်လဲၣ်န့ၣ် ပှၤတဲလီၤတံၢ် တဘၣ်ဘၣ်. တၢ်မုၢ်တၢ်ဘိ, ဆၣ်ဖိကီၢ်ဖိ ဒီးတၢ်သးသမူ အခီၣ်ထံးခီၣ်ဘိ လၢအဃ့ထီ ဒီးကဲထီၣ်က့ၤ လၢၢ်တဖၣ်အဂီၤ မ့ၢ်အိၣ်ဘၣ်ဖုးဒံးန့ၣ် ဘၣ်သ့ၣ်သ့ၣ် ပှၤၡဲပၠး တၢ်သးသမူ ဟဲအိၣ်ထီၣ်သး အဂ့ၢ်ကသ့. ဘၣ်ဆၣ် တၢ်သ့ၣ်တဖၣ်န့ၣ် တအိၣ်လၢၤဘၣ်.” အဃိ ဘၣ်ဃးဒီး မူခိၣ်ဟီၣ်ခိၣ်ဒီး တၢ်အိၣ်လၢအပူၤ ဒီးတၢ်သးသမူ ဟဲအိၣ်ထီၣ်ဒ်လဲၣ်န့ၣ် ဖျါလၢ ပှၤစဲအ့ၣ်ဖိ တသ့ၣ်ညါဝဲ တၢ်စံးဆၢဒံးဘၣ်.

ဘၣ်သ့ၣ်သ့ၣ် နကဆိကမိၣ်လၢ ‘တၢ်သးသမူလၢ ဟီၣ်ခိၣ်ချၢအံၤ ပှၤမ့ၢ်ရဲၣ်ကျဲၤဝဲဝံၤမၣ် တ့လီၤဝဲန့ၣ် မတဂၤရဲၣ်ကျဲၤဝဲ ဒီးတ့လီၤဝဲလဲၣ်.’ ဒီးနကဆိကမိၣ် စ့ၢ်ကီးလၢ ‘တၢ်ဘၣ်တ့ကစၢ် လၢအအိၣ်ဒီး တၢ်အဲၣ် ဒီးတၢ်ကူၣ်သ့ မ့ၢ်အိၣ်န့ၣ် ဘၣ်မနုၤအဃိ အပျဲဝဲလၢ ပှၤဟီၣ်ခိၣ်ဖိ လၢအတ့လီၤဝဲန့ၣ် ကထံၣ်ဘၣ် တၢ်နးတၢ်ဖှီၣ်လဲၣ်. ဘၣ်မနုၤအဃိ အပျဲဝဲလၢ တၢ်ဘူၣ်တၢ်ဘါ ကအိၣ်ထီၣ် ဒီဒူၣ်ညါလဲၣ်. ဘၣ်မနုၤအဃိ အပျဲဝဲလၢ ပှၤလၢ အဘူၣ်ထီၣ်ဘါထီၣ်အီၤန့ၣ် ကမၤ တၢ်အၢတၢ်သီ အါမးလဲၣ်.’

ပှၤစဲအ့ၣ်ဖိတဖၣ် တသ့ၣ်ညါဝဲ တၢ်သံကွၢ်တဖၣ်အံၤ အတၢ်စံးဆၢဘၣ်. သနာ်က့ ပဃုသ့ၣ်ညါ တၢ်စံးဆၢလၢ အလီၤသူၣ်မံသးမုာ်သ့. တကးဒံးဘၣ် ပှၤအါဂၤ ထံၣ်န့ၢ်ဝဲ တၢ်စံးဆၢလၢ အလီၤသူၣ်မံသးမုာ် လၢလံာ်စီဆှံအပူၤ.

ပှၤစဲအ့ၣ်ဖိတနီၤန့ၣ် အဝဲသ့ၣ် မၤလိလံာ်စီဆှံ ဒီးနာ်ဝဲလၢ တၢ်ဘၣ်တ့ကစၢ်အိၣ်ဝဲ. နမ့ၢ်ဘၣ်သး သ့ၣ်ညါလၢ ဘၣ်မနုၤအဃိ အဝဲသ့ၣ် နာ်ဝဲလၢ တၢ်ဘၣ်တ့ကစၢ် အိၣ်လဲၣ်န့ၣ် လဲၤကွၢ်လၢ jw.org အပူၤ ဒီးဃုကွၢ် တၢ်ဂ့ၢ်ခိၣ်တီ လၢအမ့ၢ် “တၢ်ထံၣ်ဘၣ်ဃးဒီး သးသမူအဂံၢ်ခီၣ်ထံး.”

စဲအ့ၣ်တၢ်ကူၣ်သ့ ဒီးလံာ်စီဆှံ တၢ်သိၣ်လိ ဒုးနာ်န့ၢ် အဝဲသ့ၣ်လၢ တၢ်ဘၣ်တ့ကစၢ်အိၣ်ဝဲ

ကၠီကၠံၤ အဲ ခွ့ဒဲၤ, ပှၤကူၣ်ဘၣ်ကူၣ်သ့လၢ အတ့ကသံၣ်

“ယတၢ်မၤန့ၣ် မ့ၢ်ဝဲ ယဘၣ်ပာ်ဖှိၣ်ထီၣ် မီၣ်လံၣ်ခယူ တပူၤဃီ. တၢ်မၤတခါန့ၣ် အလီၤဂာ် ဒ်သိးဒီး ပှၤလိာ်ကွဲခၠဲး. ဖဲနလိာ်ကွဲအခါ နကသုး ဖဲလဲၣ်တတီၤလဲၣ်န့ၣ် နကဘၣ် ဆိကမိၣ်ပာ်စၢၤအီၤ. ဒ်န့ၣ်အသိး ဖဲနပာ်ဖှိၣ်ထီၣ် မီၣ်လံၣ်ခယူအခါ နမ့ၢ်သးပ့ၤနီၣ် တၢ်လၢ နကဘၣ်မၤ ထဲတခါန့ၣ် မီၣ်လံၣ်ခယူ တဘုးတာ်လိာ်သးလၢၤဘၣ်. ယတၢ်မၤအံၤ အကီဒိၣ်မး. ဘၣ်ဆၣ် ယမ့ၢ်ထိၣ်သတြီၤဒီး တၢ်လၢ ဂာ်စီလၢအကထိတဖၣ် ဘၣ်မၤဝဲ လၢစဲအပူၤ ဒ်သိးမီၣ်လံၣ်ခယူ ကအိၣ်ထီၣ်အဂီၢ်န့ၣ် ယတၢ်မၤအံၤ အညီဒံး. အဃိ ယနာ်လၢ ကစၢ်ယွၤလၢ အသ့ၣ်ညါနၢ်ပၢၢ် မီၣ်လံၣ်ခယူအဂ့ၢ် အါန့ၢ်ပသ့ၣ်ညါဒံးန့ၣ် ကဘၣ်အိၣ်ဝဲ.

“ဖဲယမၤလိ လံာ်စီဆှံအခါ ယသ့ၣ်ညါဘၣ်လၢ လံာ်စီဆှံန့ၣ် အလီၤဆီန့ၢ်ဒံး လံာ်အဂၤ. ပှၤကွဲးအီၤဝံၤ ကအိၣ်ဘူးထီၣ်အနံၣ် ၂,၀၀၀ လံ သနာ်က့ ယထံၣ်ဘၣ်လၢ တၢ်ဟ့ၣ်ကူၣ်လၢ လံာ်စီဆှံ အပူၤန့ၣ် ကဲဘျုးတုၤလၢ ခဲအံၤဒံး. ပတၢ်ဂ့ၢ်ကီ မ့ၢ်အိၣ်ဒီး ပှၤလၢပခိၣ်ပဃၢၤ, လၢပဟံၣ်ဖိဃီဖိပူၤ ဒီးလၢတၢ်မၤလီၢ်န့ၣ် လံာ်စီဆှံ အတၢ်ဟ့ၣ်ကူၣ် မၤစၢၤပှၤသ့. ပှၤလၢ အဟ့ၣ်ပှၤ တၢ်ဟ့ၣ်ကူၣ်လၢ အကဲဘျုးဒ်အံၤန့ၣ် ကဘၣ်မ့ၢ်ပှၤလၢ အကူၣ်တၢ်သ့ ဒိၣ်န့ၢ်ဒံး ပှၤဟီၣ်ခိၣ်ဖိ.”

ယၢၤဒဆူ, ပှၤစဲအ့ၣ်ဖိလၢ အဃုသ့ၣ်ညါ ဖိသၣ်လၢ ဟဲအိၣ်ထီၣ်လၢ အမိဒၢလီၢ်ပူၤ သီသီအဂ့ၢ်

“ဖဲဖိသၣ်လၢ ဟဲအိၣ်ထီၣ်လၢ အမိဒၢလီၢ်ပူၤ သီသီ ဒိၣ်ထီၣ် ကယီကယီအခါ ဒ်သိးဖိသၣ်အနီၢ်ခိက့ၢ်ဂီၤ ကအိၣ်ထီၣ်အဂီၢ် စဲခဲလၢာ်န့ၣ် ကဘၣ်မၤသကိးတၢ် ဒီးကဘၣ်ဆှၢလီၤဝဲ စဲတနီၤလၢ ထူၣ်ပျၢ်အကျါ, လၢညၣ်ထူၣ်အကျါ, လၢဃံအကျါ, လၢသွံၣ်အကျါ ဒီးလၢထံးၡူအကျါ. စဲတဖၣ်အံၤ ဒုးကဲထီၣ်ဖိသၣ်လၢ အအိၣ်လၢ အမိဒၢလီၢ်ပူၤ သီသီ သ့လၢကျဲဒ်လဲၣ်န့ၣ် ပှၤတသ့ၣ်ညါနၢ်ပၢၢ် လီၤတံၢ်လီၤဆဲးဒံးဘၣ်. အဃိ ယဆိကမိၣ်လၢ ပှၤလၢအရဲၣ်ကျဲၤ ဒီးဒုးအိၣ်ထီၣ် တၢ်သးသမူန့ၣ် ကဘၣ်မ့ၢ်ပှၤလၢ အအိၣ်ဒီး တၢ်ကူၣ်သ့အါကတၢၢ်.

“ပူၤကွံာ်အနံၣ်တဖၣ် တၢ်လၢ ပှၤစဲအ့ၣ်ဖိတဖၣ် သ့ၣ်ညါဘၣ်ဝဲ ဘၣ်ဃးဒီး ဖိသၣ်လၢ ဟဲအိၣ်ထီၣ်လၢ အမိဒၢလီၢ်ပူၤ သီသီအဂ့ၢ်န့ၣ် ဖျါလီၤဂာ်လၢ အဘၣ်လိာ်သးဒီး တၢ်လၢ စံးထီၣ်ပတြၢၤ ၁၃၉:၁၅, ၁၆ တဲဖျါထီၣ်ဝဲ ဘၣ်ဃးဒီး ဖိသၣ်လၢ ဟဲအိၣ်ထီၣ်လၢ အမိဒၢလီၢ်ပူၤ သီသီအဂ့ၢ်. တၢ်ဂ့ၢ်အံၤ ပှၤကွဲးလံာ်စီဆှံဖိ ကွဲးပာ်စၢၤဝဲ လီၤတံၢ်လီၤဆဲး ဖးယံာ်လံ. တၢ်ဘၣ်တ့ကစၢ် မ့ၢ်တဒုးသ့ၣ်ညါ အဝဲသ့ၣ်လၢ ကဘၣ်ကွဲးဝဲ တၢ်ဂ့ၢ်အံၤဘၣ်န့ၣ် အဝဲသ့ၣ်ကွဲးဝဲ လီၤတံၢ်လီၤဆဲး ကသ့ဒ်လဲၣ်.”

လၢ jw.org အပူၤန့ၣ် ကွၢ်တၢ်ဂီၤမူ လၢအမ့ၢ် Rocío Picado Herrero: A Chemistry Teacher Explains Her Faith. ဃုကွၢ် အါထီၣ်လၢ JW.ORG