ဘၣ်မနုၤအဃိ အရ့ဒိၣ်လၢ ပကသ့ၣ်ညါ တၢ်စံးဆၢလဲၣ်
တၢ်ဘၣ်တ့ကစၢ် အိၣ်ဧါန့ၣ် ဘၣ်မနုၤအဃိ အရ့ဒိၣ်လၢ ပကဘၣ်သ့ၣ်ညါလဲၣ်. နမ့ၢ်နာ် တၢ်အုၣ်သးတဖၣ်လၢ အပာ်ဖျါထီၣ်လၢ သ့တၢ်လၢာ်ကစၢ် အိၣ်ဝဲန့ၣ် ဘၣ်သ့ၣ်သ့ၣ် နကအဲၣ်ဒိး ဃုသ့ၣ်ညါ တၢ်အုၣ်သးလၢ ပှၤလၢအဒုးအိၣ်ထီၣ် လံာ်စီဆှံန့ၣ် မ့ၢ်ကစၢ်ယွၤဧါ. ဒီးနမ့ၢ်နာ် တၢ်လၢ လံာ်စီဆှံ တဲဝဲန့ၣ် နကဒိးန့ၢ်ဘၣ် အဘျုးအါမး ဒ်သိးဒီး တၢ်ဂ့ၢ်လၢလာ်တဖၣ်အံၤ ပာ်ဖျါထီၣ်ဝဲ.
နတၢ်အိၣ်မူ ကမုာ်ဒိၣ်ထီၣ်
လံာ်စီဆှံတဲဝဲလၢ– “အဝဲ [ကစၢ်ယွၤ] မၤဂ့ၤတၢ်အဃိလီၤ. အဝဲဒုးစူၤလီၤတၢ်လၢ မူခိၣ်လၢသုဂီၢ် ဒီးဒုးသၣ်ထီၣ် တၤသူတၤသၣ် ဘၣ်ဆၢဘၣ်ကတီၢ်, အဝဲဟ့ၣ်သု တၢ်အီၣ်တၢ်အီ အါအါဂီၢ်ဂီၢ် ဒီးမၤပှဲၤသုသးလၢ တၢ်သူၣ်ဖှံသးညီလီၤ.”—မၤတၢ် ၁၄:၁၇.
အဲၣ်ဒိးတဲဝဲလၢ– ကယဲၢ်တၢ်လၢ ပဒိးန့ၢ်ဘၣ်လၢ န့ဆၢၣ် တၢ်ဘၣ်တ့န့ၣ် မ့ၢ်တၢ်ဟ့ၣ်လၢ အဟဲလၢ တၢ်ဘၣ်တ့ကစၢ်အအိၣ်. ဒီးဖဲနသ့ၣ်ညါထီၣ်လၢ တၢ်ဘၣ်တ့ကစၢ် လၢအသးအိၣ်ဟ့ၣ်တၢ် တဂၤ အဲၣ်နၤထဲလဲၣ်အခါ နကပာ်လုၢ်ပာ်ပှ့ၤ တၢ်ဟ့ၣ်တဖၣ်အံၤဒိၣ်မး.
နကန့ၢ်ဘၣ် တၢ်ဟ့ၣ်ကူၣ်အဂ့ၤလၢ နတၢ်အိၣ်မူ ကိးနံၤဒဲး
လံာ်စီဆှံတဲဝဲလၢ– “နကနၢ်ပၢၢ် တၢ်လၢအတီအလိၤ, တၢ်စံၣ်ညီၣ်တီ ဒီးတၢ်လၢအကြၢးဝဲဘၣ်ဝဲ လၢအမ့ၢ် ကျဲလၢအဂ့ၤ.”—ကတိၤဒိ ၂:၉.
အဲၣ်ဒိးတဲဝဲလၢ– တၢ်လၢ အမၤသးခုနၤ မ့ၢ်မနုၤလဲၣ်န့ၣ် နတၢ်ဘၣ်တ့ကစၢ် သ့ၣ်ညါဝဲ အဂ့ၤကတၢၢ်. အဃိ နမ့ၢ်မၤလိလံာ်စီဆှံန့ၣ် နကသ့ၣ်ညါဘၣ် တၢ်ဂ့ၢ်ဒီဒူၣ် လၢအကမၤစၢၤနၤလၢ နတၢ်အိၣ်မူ ကိးနံၤဒဲး.
နကသ့ၣ်ညါထီၣ် တၢ်သံကွၢ်တဖၣ် အတၢ်စံးဆၢ
လံာ်စီဆှံတဲဝဲလၢ– “နကထံၣ်န့ၢ် တၢ်သ့ၣ်ညါ ဘၣ်ဃးဒီး ကစၢ်ယွၤ.”—ကတိၤဒိ ၂:၅.
အဲၣ်ဒိးတဲဝဲလၢ– ခီဖျိလၢ နသ့ၣ်ညါလၢ တၢ်ဘၣ်တ့ကစၢ် အိၣ်ဝဲအဃိ ကမၤစၢၤနၤလၢ နကသ့ၣ်ညါစ့ၢ်ကီး တၢ်သံကွၢ်အရ့ဒိၣ်တဖၣ် အတၢ်စံးဆၢ ဒ်သိးဒီး တၢ်အိၣ်မူ အတၢ်တိာ်ပာ်န့ၣ် မ့ၢ်မနုၤလဲၣ်. ဘၣ်မနုၤအဃိ တၢ်နးတၢ်ဖှီၣ် အိၣ်အါထဲအံၤညါလဲၣ်. ပမ့ၢ်သံန့ၣ် တၢ်ကကဲထီၣ်သးဒီးပှၤဒ်လဲၣ်. ဒီးနကထံၣ်န့ၢ် တၢ်စံးဆၢလၢ အလီၤသူၣ်မံသးမုာ်လၢ လံာ်စီဆှံပူၤ.
နကအိၣ်ဒီး တၢ်မုၢ်လၢ် လၢခါဆူညါ
လံာ်စီဆှံတဲဝဲလၢ– “ယဟိဝၤယွၤ တဲဝဲလၢ ‘တၢ်လၢ ယကမၤန့ၢ်သုန့ၣ် ယသ့ၣ်ညါအီၤ လီၤတံၢ်လီၤဆဲးလီၤ. ယကဟ့ၣ်သု တၢ်မုာ်တၢ်ခုၣ် ဒီးတမ့ၢ် တၢ်ကီတၢ်ခဲဘၣ်. ဒီးယကဟ့ၣ်သု တၢ်မုၢ်လၢ် ဒီးတၢ်အိၣ်မူလၢ အဂ့ၤလၢ ခါဆူညါ.’”—ယံးရမံယၤ ၂၉:၁၁.
အဲၣ်ဒိးတဲဝဲလၢ– ကစၢ်ယွၤ အၢၣ်လီၤပာ်စၢၤပှၤလၢ ခါဆူညါန့ၣ် အကမၤလီၤမၢ်ကွံာ် တၢ်အၢတၢ်သီ, တၢ်နးတၢ်ဖှီၣ် ဒီးတၢ်သံ ခဲလၢာ်ခဲဆ့. အဃိ နမ့ၢ်နာ်န့ၢ် ကစၢ်ယွၤ အတၢ်အၢၣ်လီၤ လၢကဟဲလၢပှဲၤထီၣ် လၢခါဆူညါန့ၣ် ကမၤစၢၤနၤလၢ နလဲၤခီဖျိ တၢ်ကီတၢ်ခဲလၢ နထံၣ်ဘၣ်ခဲအံၤ လၢတၢ်သးဒူအပူၤ ကဘူၣ်.