လံာ်စီဆှံအၢၣ်လီၤပှၤ တၢ်အိၣ်မူလၢ အလီၤသးခု လၢခါဆူညါအဂီၢ်

ပှၤအါဂၤ အိၣ်ဒီးတၢ်ကီတၢ်ခဲတဖၣ်လၢ အမၤသးအုးအဝဲသ့ၣ်, မၤကိၢ်မၤဂီၤအဝဲသ့ၣ်​ ဒီးအဝဲသ့ၣ်​ တူၢ်ဘၣ်တၢ်လၢအဆါလီၤ. တၢ်ကဲထီၣ်အသးဒီးနၤဒ်န့ၣ်​ တဘျီဘျီဧါ. မ့ၢ်လၢနအိၣ်ဒီး တၢ်ဆူးတၢ်ဆါ မ့တမ့ၢ် ပှၤလၢနအဲၣ်တဂၤဂၤ သံကွံာ်အဃိ ဘၣ်သ့ၣ်သ့ၣ်​ နကတူၢ်ဘၣ်ဒ်န့ၣ်. ဒီးဘၣ်သ့ၣ်သ့ၣ်​ နကဆိကမိၣ်ဘၣ်လၢ ‘တၢ်အိၣ်မူအံၤ မုာ်ထီၣ်က့ၤကန့ၢ်ဒံးဧါ.’ လံာ်စီဆှံဟ့ၣ်ပှၤ တၢ်သံကွၢ်တဖျၢၣ်န့ၣ်​ အတၢ်စံးဆၢလၢ အမၤမုာ်ထီၣ်က့ၤပသးလီၤ.

၁. ဘၣ်ဃးဒီး ခါဆူညါအဂီၢ်န့ၣ်​ လံာ်စီဆှံဟ့ၣ်ပှၤ တၢ်မုၢ်လၢ် မနုၤလဲၣ်.

ဘၣ်မနုၤအဃိ ဟီၣ်ခိၣ်အံၤ အိၣ်ပှဲၤဒီး တၢ်ကီတၢ်ခဲလဲၣ်န့ၣ်​ လံာ်စီဆှံ တဲဖျါထီၣ်န့ၢ်ပှၤ. တကးဒံးဘၣ်​ လံာ်စီဆှံ တဲဖျါထီၣ်​ တၢ်သးခုကစီၣ်လၢ တယံာ်လၢၤဘၣ်န့ၣ်​ ကစၢ်ယွၤ ကမၤလီၤမၢ်ကွံာ် တၢ်ကီတၢ်ခဲတဖၣ်အံၤခဲလၢာ်. လံာ်စီဆှံ အတၢ်အၢၣ်လီၤတဖၣ်န့ၣ်​ ဟ့ၣ်ပှၤ “တၢ်မၤမုာ်အထူအယိာ် ဒီးတၢ်မုၢ်လၢ်လၢအဂ့ၤ” သ့လီၤ. (ဖး ၂ သ့းစၤလနံ ၂:၁၆.) တၢ်အၢၣ်လီၤတဖၣ်အံၤ မၤစၢၤပှၤဒ်သိးဒီး ပလဲၤခီဖျိ ပတၢ်ကီတၢ်ခဲကန့ၢ် ဒီးအိၣ်ဒီးတၢ်ထံၣ်လၢအဂ့ၤ. တကးဒံးဘၣ်​ တၢ်အၢၣ်လီၤတဖၣ်အံၤ ဒုးနာ်န့ၢ်ပှၤ သပှၢ်တၢၢ်လၢ ပကအိၣ်ဒီး တၢ်သးခုလၢ ခဲအံၤဒီးခါဆူညါ လီၤထူလီၤယိာ်လီၤ.

၂. လံာ်စီဆှံ အၢၣ်လီၤဝဲလၢ ခါဆူညါန့ၣ်​ တၢ်အိၣ်သး ကမၤသးဒ်လဲၣ်.

လံာ်စီဆှံ တဲဝဲလၢ ခါဆူညါန့ၣ်​ “တၢ်သံတအိၣ်လၢၤဘၣ်. ဒီးတၢ်သူၣ်အုးသးအုးမ့ၢ်ဂ့ၤ, တၢ်ဟီၣ်တၢ်ယၢၤမ့ၢ်ဂ့ၤ, တၢ်လၢအဆါမ့ၢ်ဂ့ၤ တအိၣ်လၢၤဘၣ်.” (ဖး လီၣ်ဖျါ ၂၁:၄.) တၢ်ကီတၢ်ခဲတဖၣ်လၢ ပှၤဟီၣ်ခိၣ်ဖိ တူၢ်ဘၣ်ဝဲလၢ မုၢ်မဆါတနံၤအံၤ ဒ်သိးဒီး တၢ်ဖှီၣ်တၢ်ယာ်, တၢ်တတီတလိၤ, တၢ်ဆူးတၢ်ဆါ ဒီးတၢ်သံန့ၣ်​ တအိၣ်လၢၤဘၣ်. လံာ်စီဆှံ အၢၣ်လီၤဝဲလၢ ပှၤဟီၣ်ခိၣ်ဖိ ကအိၣ်မူဘၣ်​ မုာ်မုာ်ခုၣ်ခုၣ်​ လီၤထူလီၤယိာ်လၢ ဟီၣ်ခိၣ်ပၤရဒံစူး အပူၤလီၤ.

၃. လံာ်စီဆှံ အတၢ်အၢၣ်လီၤတဖၣ်​ ကဟဲလၢထီၣ်ပှဲၤထီၣ်​ နီၢ်ကီၢ်န့ၣ်​ နနာ်န့ၢ်အီၤသ့ဧါ.

ပှၤအါဂၤ မုၢ်လၢ်ဝဲလၢ ဟီၣ်ခိၣ်အတၢ်အိၣ်သးတဖၣ်​ ကဂ့ၤထီၣ်က့ၤ. ဘၣ်ဆၣ်​ အဝဲသ့ၣ်​ အတၢ်မုၢ်လၢ် ကဟဲလၢထီၣ်ပှဲၤထီၣ်​ နီၢ်ကီၢ်ဧါန့ၣ်​ အဝဲသ့ၣ်​ တသ့ၣ်ညါ လီၤတံၢ်ဘၣ်. ဘၣ်ဆၣ်​ တၢ်လၢလံာ်စီဆှံ အၢၣ်လီၤဝဲတဖၣ်န့ၣ်​ ကဟဲလၢထီၣ်ပှဲၤထီၣ်​ နီၢ်ကီၢ်. အဃိ ပမၤဒိၣ်ထီၣ်အါထီၣ်​ ပတၢ်နာ်လၢ လံာ်စီဆှံ အတၢ်အၢၣ်လီၤ သ့ခီဖျိပ “ဃုကွၢ်တၢ်ကွဲးအသးတဖၣ်​ လီၤတံၢ်လီၤဆဲး.” (မၤတၢ် ၁၇:၁၁) နမ့ၢ်မၤလိ လံာ်စီဆှံန့ၣ်​ တၢ်လၢလံာ်စီဆှံတဲဝဲ ဘၣ်ဃးဒီး ခါဆူညါအဂ့ၢ်တဖၣ်​ နနာ်န့ၢ်အီၤသ့ဧါ တသ့ဘၣ်ဧါန့ၣ်​ နသ့ၣ်ညါနီၤဖးအီၤ ကဘၣ်လီၤ.

ဃုသ့ၣ်ညါအါထီၣ်

၄. လံာ်စီဆှံ အၢၣ်လီၤဝဲလၢ ပကအိၣ်မူဘၣ် လီၤထူလီၤယိာ် ဒီးတၢ်ကီတၢ်ခဲ တအိၣ်နီတမံၤလၢၤဘၣ်

ကွၢ်လံာ်စီဆှံ အတၢ်အၢၣ်လီၤ လၢလာ်တဖၣ်အံၤ. အထုးန့ၢ်နသးဒိၣ်​ ဖဲလဲၣ်တခါလဲၣ်. ဘၣ်မနုၤအဃိ အထုးန့ၢ်နသးလဲၣ်.

ဖးလံာ်စီဆှံ အဆၢတဖၣ်​ လၢအဘၣ်တၢ်ပာ်ဖျါထီၣ်အီၤ ဖဲတၢ်အၢၣ်လီၤတဖၣ်အံၤ အကပၤ ဒီးဆိကမိၣ်ထံ တၢ်သံကွၢ် လၢလာ်တဖၣ်အံၤ–

• မ့ၢ်နဆိကမိၣ်​ လံာ်စီဆှံအဆၢတဖၣ်အံၤ ကဲဘျုးလၢ နဂီၢ်ဧါ. နဟံၣ်ဖိဃီဖိ မ့တမ့ၢ် နသကိးတဂၤဂၤ မ့ၢ်မၤလိဘၣ်​ လံာ်စီဆှံ အဆၢတဖၣ်အံၤန့ၣ်​ နဆိကမိၣ်​ အကကဲဘျုးလၢ အဝဲသ့ၣ်​ အဂီၢ်စ့ၢ်ကီးဧါ.

ထံၣ်တမှံကွၢ်လၢ နအိၣ်မူဘၣ်လၢဟီၣ်ခိၣ်​ ဖဲတၢ်အိၣ်သးလၢ အတဂ့ၤဘၣ်​ တအိၣ်နီတမံၤလၢၤဘၣ်.

၅. တၢ်အၢၣ်လီၤတဖၣ်လၢ လံာ်စီဆှံအပူၤန့ၣ်​ မၤစၢၤပှၤဒ်သိး ပကအိၣ်ဒီး တၢ်ထံၣ်လၢအဂ့ၤ

တၢ်ဂီၤမူ– ယအဲၣ်ဒိး တြီဆၢတၢ်တတီတလိၤ (၄:၀၇)

• လၢတၢ်ဂီၤမူအပူၤန့ၣ်​ တၢ်တတီတလိၤလၢ အမၤတံာ်တာ် ရၤဖံကၤအသးန့ၣ်​ မ့ၢ်မနုၤလဲၣ်.

• တၢ်တတီတလိၤလၢ အထံၣ်ဘၣ်ဝဲန့ၣ်​ တလီၤမၢ်ကွံာ်ဘၣ်​ သနာ်က့ လံာ်စီဆှံ မၤစၢၤအီၤဒ်လဲၣ်.

ဖဲပနာ်န့ၢ် လံာ်စီဆှံ အတၢ်အၢၣ်လီၤ ဘၣ်ဃးဒီး ခါဆူညါအဂ့ၢ်အခါ ပလဲၤခီဖျိ တၢ်သူၣ်ဟးဂီၤသးဟးဂီၤန့ၢ် ဒီးပမ့ၢ်အိၣ်ဒီး တၢ်ကီတၢ်ခဲသနာ်က့ ပသးခုသ့ဒံး. ဖး ကတိၤဒိ ၁၇:၂၂ ဒီး ရိမ့ၤ ၁၂:၁၂ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• နမ့ၢ်နာ် တၢ်လၢလံာ်စီဆှံတဲဝဲ ဘၣ်ဃးဒီး ခါဆူညါအဂ့ၢ်န့ၣ်​ နဆိကမိၣ်​ နတၢ်အိၣ်မူခဲအံၤ ကမုာ်ထီၣ်ဧါ. ဘၣ်မနုၤအဃိ နဆိကမိၣ်​ ဒ်န့ၣ်လဲၣ်.

တၢ်ဂ့ၢ်လၢအရ့ဒိၣ်

လၢလံာ်စီဆှံအပူၤန့ၣ်​ အိၣ်ဒီးတၢ်အၢၣ်လီၤတဖၣ်လၢ အမၤသးခုပှၤဒိၣ်မး, အဟ့ၣ်ပှၤတၢ်မုၢ်လၢ် ဒီးအမၤမုာ်ထီၣ်က့ၤ ပတၢ်အိၣ်မူ လၢခဲအံၤ.

တၢ်ကွၢ်ကဒါက့ၤ

• ဘၣ်မနုၤအဃိ ပှၤကဘၣ်သ့ၣ်ညါ ဘၣ်ဃးဒီး ကစၢ်ယွၤ အတၢ်အၢၣ်လီၤတဖၣ်လဲၣ်.

• ဘၣ်ဃးဒီး ခါဆူညါအဂ့ၢ်န့ၣ်​ လံာ်စီဆှံ တဲဝဲဒ်လဲၣ်.

• တၢ်မုၢ်လၢ်လၢ ဘၣ်ဃးဒီး ခါဆူညါအဂ့ၢ်န့ၣ်​ ကမၤစၢၤပှၤလၢ ဆၢကတီၢ်ခဲအံၤ ဒ်လဲၣ်.

ဃုသ့ၣ်ညါ

ဖဲနထံၣ်ဘၣ်​ တၢ်ကီတၢ်ခဲတဖၣ်အခါ တၢ်မုၢ်လၢ် မၤစၢၤနၤသ့ဒ်လဲၣ်န့ၣ်​ ဃုသ့ၣ်ညါကွၢ်.

“တၢ်မုၢ်လၢ်န့ၣ်​ ပဃုထံၣ်န့ၢ်အီၤ ကသ့ဖဲလဲၣ်.” (ပၢၢ်ထီၣ်! လါအ့ဖြ့ၣ်​ ၂၂, ၂၀၀၄)

တၢ်မုၢ်လၢ်လၢ ခါဆူညါအဂီၢ် မၤစၢၤဝဲ ပှၤလၢအအိၣ်ဒီး တၢ်ဆူးတၢ်ဆါလၢအယံာ်အထၢ သ့ဒ်လဲၣ်န့ၣ်​ ဃုသ့ၣ်ညါကွၢ်.

“နမ့ၢ်အိၣ်ဒီးတၢ်ဆါ ယံာ်ယံာ်ထၢထၢန့ၣ်​ လံာ်စီဆှံ မၤစၢၤနၤသ့ဧါ.” (တၢ်မၤလိလၢ အအိၣ်လၢ online အဖီခိၣ်)

ဖဲနကွၢ် တၢ်သးဝံၣ်တဖျၢၣ်အံၤ အတၢ်ဂီၤမူအခါ ထံၣ်တမှံကွၢ်လၢ နၤဒီးနဟံၣ်ဖိဃီဖိ အိၣ်ဘၣ်​ မုာ်မုာ်ခုၣ်ခုၣ်လၢ ပၤရဒံစူးအပူၤ လၢလံာ်စီဆှံ အၢၣ်လီၤပာ်စၢၤဝဲ လၢခါဆူညါအဂီၢ်.

ပထံၣ်တမှံကွၢ် တၢ်အိၣ်မူဆူညါ (၃:၃၇)

ဖးကွၢ်တၢ်ဂ့ၢ်ဘၣ်ဃးဒီး ပှၤတဂၤလၢ အမၤစၢၤပှၤလၢအခိၣ်အဃၢၤန့ၣ်​ ဖဲသ့ၣ်ညါဘၣ်​ တၢ်မုၢ်လၢ်လၢ အအိၣ်လၢ လံာ်စီဆှံအပူၤ တဘျီဃီန့ၣ်​ အတၢ်အိၣ်မူဆီတလဲဝဲဒ်လဲၣ်.

“ယတတူၢ်ဘၣ်လၢ ယဘၣ်ဆီတလဲ ဟီၣ်ခိၣ်အတၢ်အိၣ်သးလၢၤဘၣ်.” (တၢးထီခိးတၢ်, လါယူၤလံ ၁, ၂၀၁၃)