ဟီၣ်ခိၣ်တၢ်အိၣ်သး ဒံးနးထီၣ်အဃိ
၄ | ဆဲးအိၣ်ဒီး တၢ်မုၢ်လၢ်ထီဘိ
ဘၣ်မနုၤအဃိ အရ့ဒိၣ်လဲၣ်
ဟီၣ်ခိၣ်တၢ်အိၣ်သး နးထီၣ်ဒိၣ်မးအဃိ အမၤဘၣ်ဒိ ပှၤအါဂၤ တၢ်အိၣ်ဆူၣ်အိၣ်ချ့ ဒီးပှၤအါဂၤ အသးဂံၢ်ဘါလီၤစၢ်. အဃိ ပှၤအါဂၤ ဆိကမိၣ်ဝဲလၢ တၢ်အိၣ်သးတဖၣ်အံၤ ဂ့ၤထီၣ်က့ၤ တသ့လၢၤဘၣ်. အဃိ အဝဲသ့ၣ် မၤဝဲဒ်လဲၣ်.
ဘၣ်ဃးဒီး ခါဆူညါအဂ့ၢ်န့ၣ် ပှၤတနီၤ တဘၣ်သး ဆိကမိၣ်ဃုာ်ဝဲလၢၤဘၣ်.
ပှၤအဂၤတနီၤန့ၣ် ဒ်သိးအတၢ်သူၣ်ကိၢ်သးဂီၤ ကလီၤမၢ်ကွံာ်အဂီၢ် အဝဲသ့ၣ်အီသံး ဒီးအီတၢ်မူၤတၢ်ဘှီး.
မ့မ့ၢ် ပှၤအဂၤတနီၤန့ၣ် ဆိကမိၣ်ဝဲလၢ အမ့ၢ်သံန့ၣ် ဂ့ၤဒိၣ်န့ၢ်ဒံး အအိၣ်မူဒံး. အဃိ အဝဲသ့ၣ် ဆိကမိၣ်ဝဲလၢ အကမၤသံလီၤသး.
တၢ်လၢ နကဘၣ်သ့ၣ်ညါ
တၢ်ကီတၢ်ခဲလၢ နထံၣ်ဘၣ်ခဲအံၤန့ၣ် ဘၣ်သ့ၣ်သ့ၣ် အကဲတၢ်တစိၢ်တလီၢ်ဖိလီၤ အဃိ တၢ်အိၣ်သး ဂ့ၤထီၣ်က့ၤသ့.
နတၢ်ကီတၢ်ခဲတနီၤ မ့ၢ်တဂ့ၤထီၣ်က့ၤဘၣ် သနာ်က့ ဒ်သိးနလဲၤခီဖျိအီၤ ကန့ၢ်အဂီၢ် တၢ်လၢနမၤသ့န့ၣ် အိၣ်ဝဲ.
လံာ်စီဆှံ အၢၣ်လီၤဝဲလၢ ခါဆူညါန့ၣ် ပှၤဟီၣ်ခိၣ်ဖိ အတၢ်ကီတၢ်ခဲ ကလီၤမၢ်ကွံာ်ဝဲ လီၤထူလီၤယိာ်.
တၢ်လၢနမၤသ့
လံာ်စီဆှံ တဲဝဲလၢ– “ခဲမုၢ်ဆ့ၣ်န့ၣ် တၢ်ကိၢ်တၢ်ဂီၤ ကအိၣ်ဒံးအဃိ တဘၣ်သူၣ်ကိၢ်သးဂီၤတၢ်လၢ ခဲမုၢ်ဆ့ၣ်အဂီၢ်တဂ့ၤ. တၢ်ကီတၢ်ခဲလၢ တနံၤအံၤ အဂီၢ်န့ၣ် အါဝဲလံ.”—မးသဲ ၆:၃၄.
တဘၣ်ဘၣ်ယိၣ်တၢ် အါတလၢ လၢခါဆူညါအဂီၢ်တဂ့ၤ ဒီးဆိကမိၣ်ထဲလၢ နကမၤတၢ်လၢ တနံၤအံၤအဂီၢ်.
နမ့ၢ်ဘၣ်ယိၣ်တၢ် ဘၣ်ဃးဒီးတၢ်လၢ တကဲထီၣ်သးဒံးဘၣ်န့ၣ် နတၢ်ကိၢ်တၢ်ဂီၤ ကအါထီၣ် ဒီးနတဆဲးမုၢ်လၢ်တၢ်လၢ ခါဆူညါအဂီၢ် အါအါလၢၤဘၣ်.
လံာ်စီဆှံ အၢၣ်လီၤဝဲလၢ ခါဆူညါန့ၣ် ပကအိၣ်ဒီး တၢ်အိၣ်မူလၢအဂ့ၤ
ပှၤကွဲးထါစံးထီၣ်ပတြၢၤတဂၤ ဃ့ထုကဖၣ်လၢ ကစၢ်ယွၤအအိၣ် ဒီးတဲဝဲလၢ “နကလုၢ်ကထါန့ၣ် မ့ၢ်ဝဲမ့ၣ်အူဒၢတဖျၢၣ်လၢ အဟံးစုနဲၣ်ကျဲယခီၣ် ဒီးတၢ်ကပီၤတခါလၢ အမၤကပီၤထီၣ် ယကျဲ.” (စံးထီၣ်ပတြၢၤ ၁၁၉:၁၀၅) အဃိ ကစၢ်ယွၤ ကလုၢ်ကထါ မၤစၢၤပှၤသ့.
အဒိ ဖဲမုၢ်နၤခီ အဆၢကတီၢ်န့ၣ် ဒ်သိးပဟးကဘၣ်အဂီၢ် မ့ၣ်အူအတၢ်ကပီၤ မၤကပီၤထီၣ်န့ၢ်ပကျဲ. ဒ်န့ၣ်အသိး ဖဲတၢ်ကီတၢ်ခဲ အိၣ်ထီၣ်အခါ ပဆၢတဲာ်တၢ်ကသ့ ဂ့ၤဂ့ၤအဂီၢ် လံာ်စီဆှံ မၤစၢၤပှၤသ့.
တကးဒံးဘၣ် မ့ၣ်အူအတၢ်ကပီၤ မၤစၢၤပှၤလၢ ပကထံၣ်စိတၢ်လၢ ပမဲာ်ညါ. ဒ်န့ၣ်အသိး လံာ်စီဆှံ အတၢ်အၢၣ်လီၤတဖၣ် ဒုးသ့ၣ်ညါပှၤလၢ ခါဆူညါန့ၣ် ပကအိၣ်ဒီး တၢ်အိၣ်မူအဂ့ၤ.