သူနစ့သ့သ့ဘၣ်ဘၣ်

ဘၣ်မနုၤအဃိ ပဘၣ်သူစ့ သ့သ့ဘၣ်ဘၣ်လဲၣ်

နမ့ၢ်တသူကတီၤနစ့ဘၣ်န့ၣ် ဘၣ်သ့ၣ်သ့ၣ် နကထံၣ်ဘၣ် ကျိၣ်စ့တၢ်ဂ့ၢ်ကီအါထီၣ် ဒီးနကသူၣ်ကိၢ်သးဂီၤတၢ်. နစ့မ့ၢ်တအိၣ်အါအါဘၣ် သနာ်က့ ဒ်သိးနသူကတီၤနစ့ ကသ့အဂီၢ် တၢ်လၢနမၤသ့န့ၣ် အိၣ်ဝဲတနီၤ.

နမၤမနုၤသ့လဲၣ်

တဘၣ်သူစ့ အါန့ၢ်ဒံး စ့လၢအအိၣ်ဒီးနၤတဂ့ၤ. နမ့ၢ်တသူစ့ အါန့ၢ်ဒံး စ့လၢအအိၣ်ဒီးနၤဘၣ်န့ၣ် ဖဲတၢ်ကဲထီၣ်သး သတူၢ်ကလာ်အခါ နတဘၣ်ယိၣ်တၢ် အါအါဘၣ် ဒီးနဟ့ၣ် တၢ်အဘူးအလဲကန့ၢ်.

ဒ်သိးနတသူစ့ အါန့ၢ်ဒံး စ့လၢအအိၣ်ဒီးနၤ တဂ့ၤအဂီၢ် ကွဲးလီၤစရီ ဘၣ်ဃးဒီး ကျိၣ်စ့လၢ နလိၣ်ဘၣ်လၢ တၢ်ဟဲနုာ် ဒီးတၢ်ဟးထီၣ်အဂီၢ်. နကွဲးလီၤစရီ ဝံၤအလီၢ်ခံ သူစ့ထဲလၢ တၢ်လၢနလိၣ်ဘၣ်အီၤ နီၢ်ကီၢ်အဂီၢ်. မၤထွဲဒ်သိး နကွဲးလီၤစရီ ဒီးဖဲတၢ်ပှ့ၤဒိၣ်ထီၣ် မ့တမ့ၢ် နတၢ်ဟဲနုာ် ဆီတလဲအခါ မ့ၢ်လိၣ်န့ၣ် ဆီတလဲက့ၤနစရီ. ဒီးနမ့ၢ်ကဲပှၤလၢ အဆီဟံၣ်ဆီဃီန့ၣ် တဲသကိး နတၢ်ဆၢတဲာ်ဒီး နသးသမူတံၤသကိး.

မၤကွၢ်ဒ်အံၤ– ဖဲနပှ့ၤတၢ်အခါ မ့ၢ်သ့န့ၣ် ပှ့ၤတၢ်လၢ စ့စးခိ ဒီးတဘၣ်ပှ့ၤလၢ ခြဲးဒ့းခး (credit card) တဂ့ၤ. ပှၤတနီၤ မၤဝဲဒ်အံၤအဃိ အဝဲသ့ၣ် သူစ့သ့သ့ဘၣ်ဘၣ် ဒီးအကမၢ် တထီၣ်ဘၣ်. ပာ်လီၤတၢ်ဆၢကတီၢ်လၢ နကဖးလံာ်လၢ စ့တၢးအရူ ဆှၢန့ၢ်နၤ ဘၣ်ဃးဒီး နတၢ်ဟဲနုာ် ဒီးတၢ်ဟးထီၣ်အဂ့ၢ်. နမ့ၢ်သ့ၣ်ညါလၢ နစ့အိၣ်ဒံးထဲလဲၣ်န့ၣ် နတဘၣ်ယိၣ်တၢ် အါအါဘၣ်.

ပကသူစ့ ဖဲအကြၢးန့ၣ် အတညီဘၣ်. ဘၣ်ဆၣ် ပမ့ၢ်ရဲၣ်ကျဲၤပာ်စၢၤလၢ ပကသူစ့ ဒ်လဲၣ်န့ၣ် အကကဲဘျုးလၢပဂီၢ် ဒီးပတလိၣ် သးကိၢ်တၢ်အါအါဘၣ်.

ဒ်သိး နတၢ်မၤ ကဆဲးအိၣ် ထီဘိအဂီၢ် မၤတၢ်ဆူၣ်ဆူၣ်. နကဘၣ်မၤဒ်လဲၣ်. အဒိ လဲၤလၢတၢ်မၤ ဘၣ်ဆၢဘၣ်ကတီၢ်, အိၣ်ဒီးတၢ်ထံၣ်အဂ့ၤ လၢနတၢ်မၤအဖီခိၣ်, သးအိၣ်မၤစၢၤပှၤဂၤ ဒီးမၤတၢ်ဆူၣ်ဆူၣ်. ပာ်ကဲပှၤဂၤ, မၤထွဲတၢ်ဘျၢ ဒီးဂုာ်ကျဲးစၢး မၤဂ့ၤဒိၣ်ထီၣ် နတၢ်သ့တၢ်ဘၣ်.

တဘၣ်သူနါစိၤ စ့တဂ့ၤ. သံကွၢ်လီၤနသးလၢ ‘မ့ၢ်ယသူစ့ အါတလၢလၢ တၢ်လၢယတလိၣ်ဘၣ် မ့တမ့ၢ် တၢ်လၢတမၤဂ့ၤယၤဘၣ် အဂီၢ်ဧါ.’ အဒိ ပှၤအါဂၤန့ၣ် အသူလၢာ်ဂီၤစ့လၢ တၢ်လၢတမၤဂ့ၤအီၤဘၣ် ဒ်သိးဒီး တၢ်မူၤတၢ်ဘှီး, တၢ်တၤကျိၣ်တၤစ့, ပှ့ၤအီမိာ်ထူ မ့တမ့ၢ် ပှ့ၤအီသံးအါတလၢ. တၢ်သ့ၣ်တဖၣ်အံၤ ကမၤဘၣ်ဒိ အတၢ်အိၣ်ဆူၣ်အိၣ်ချ့ ဒီးဘၣ်သ့ၣ်သ့ၣ် အတၢ်မၤ တအိၣ်လၢၤဘၣ်.

စူးဃာ်စ့လၢ တၢ်ကဲထီၣ်သး သတူၢ်ကလာ်အဂီၢ်. မ့ၢ်သ့န့ၣ် စူးဃာ်စ့တနီၤလၢ တၢ်ကဲထီၣ်သး သတူၢ်ကလာ်အဂီၢ်. နမ့ၢ်မၤဒ်န့ၣ်န့ၣ် ဖဲနၤ မ့တမ့ၢ် နဟံၣ်ဖိဃီဖိ တဂၤဂၤ အိၣ်တဆူၣ်ဘၣ်, တၢ်မၤတအိၣ်လၢၤဘၣ် မ့တမ့ၢ် ထံၣ်ဘၣ် တၢ်ကဲထီၣ်သး သတူၢ်ကလာ်အခါ နတဘၣ်ယိၣ်တၢ် အါအါဘၣ်.