ဟီၣ်ခိၣ်တၢ်အိၣ်သး မ့ၢ်နးထီၣ်သနာ်က့ ဒ်သိး နသူကတီၤနစ့ ဒီးကွၢ်ကတီၤ နတၢ်ဖိတၢ်လံၤ ကသ့အဂီၢ် မၤထွဲ တၢ်ဟ့ၣ်ကူၣ်တဖၣ်အံၤ
သူစှၤလီၤစ့
သူစှၤလီၤစ့
နမ့ၢ်တလိၣ်ဘၣ် တၢ်ဖိတၢ်လံၤ မ့တမ့ၢ် တၢ်ကူတၢ်ကၤလၢ အဟဲထီၣ်သီဘၣ်န့ၣ် တဘၣ်ပှ့ၤတဂ့ၤ. သံကွၢ်လီၤနသးလၢ ‘ယဘၣ်ပှ့ၤကါ နီၢ်ကီၢ်ဧါ. ယမ့ၢ်သူၣ်အီၣ် တၢ်ဒိးတၢ်လၣ် လၢကရၢၢ်ပူၤန့ၣ် ကကဲဘျုးဒိၣ်ဧါ.’
တချုးလၢ နကပှ့ၤတၢ် တမံၤမံၤဒံးဘၣ်န့ၣ် သံကွၢ်လီၤနသးလၢ ‘တၢ်တခါအံၤ မ့ၢ်ယလိၣ်ဘၣ် နီၢ်ကီၢ်ဧါ. ယပှ့ၤကန့ၢ်ဧါ.’
ပဒိၣ်အတၢ်မၤစၢၤ မ့တမ့ၢ် တၢ်ကရၢကရိတဖုဖု အတၢ်မၤစၢၤ မ့ၢ်အိၣ်န့ၣ် တီၣ်ထီၣ်ကွၢ်.
ကံၣ် တဲဝဲလၢ “ပတဲသကိးတၢ်ဒီး ပဟံၣ်ဖိဃီဖိ ဒီးပကွၢ်ကဒါက့ၤ ပတၢ်အိၣ်သး ဘၣ်ဃးဒီး ပသူစ့ဒ်လဲၣ် ဒီးပသူစှၤလီၤစ့လၢ တၢ်မၤမုာ်မၤဖှံသးအဂီၢ်. ဒီးဒ်သိး ပစ့တလၢာ် အါအါတဂ့ၤအဂီၢ် ပဖီအီၣ်တၢ်လၢဟံၣ်.”
နကသူစ့ဒ်လဲၣ်န့ၣ် ရဲၣ်ကျဲၤပာ်စၢၤ
နကသူစ့ ဒ်လဲၣ်န့ၣ် ရဲၣ်ကျဲၤပာ်စၢၤ
လံာ်စီဆှံတဲဝဲလၢ– “တၢ်လၢပှၤခုတဖၣ် ရဲၣ်လီၤကျဲၤလီၤဝဲန့ၣ် ကကဲထီၣ်လိၣ်ထီၣ်ဝဲ သပှၢ်တၢၢ်, မ့မ့ၢ် ပှၤလၢအမၤကရီတၢ်န့ၣ် ကဖှီၣ်လီၤယာ်လီၤဝဲ သပှၢ်တၢၢ်.” (ကတိၤဒိ ၂၁:၅) နမ့ၢ်ရဲၣ်ကျဲၤပာ်စၢၤလၢ နကသူစ့ ဒ်လဲၣ်န့ၣ် ကမၤစၢၤနၤလၢ နတသူစ့အါန့ၢ်ဒံး နတၢ်ဟဲနုာ်ဘၣ်.
အဆိကတၢၢ် နတၢ်ဟဲနုာ် တလါဘၣ်တလါ အိၣ်ထဲလဲၣ်န့ၣ် ကွဲးနီၣ်ဃာ်အီၤ.
ဝံၤဘျီ တလါဘၣ်တလါ နသူစ့ လၢာ်ထဲလဲၣ်န့ၣ် ကွဲးလီၤအီၤ.
ဝံၤဒီး နကဟ့ၣ် တၢ်ဘူးတၢ်လဲအဂီၢ် နစ့ယၢလံဧါ. နမ့ၢ်သ့ၣ်ညါလၢ နစ့တယၢဒံးဘၣ်န့ၣ် ပှ့ၤတၢ်လၢ နတလိၣ်ဘၣ်တဖၣ်တဂ့ၤ.
ခါလီး တဲဝဲလၢ “ကိးလါဒဲး ပစ့ဟဲနုာ် ဒီးစ့ဟးထီၣ် အိၣ်ထဲလဲၣ်န့ၣ် ပမၤနီၣ်ဃာ် လီၤတံၢ်လီၤဆဲး. ယၤဒီးယမါန့ၣ် ပဂုာ်ကျဲးစၢး စူးဃာ်စ့လၢ တၢ်ကကဲထီၣ်သး သတူၢ်ကလာ်အဂီၢ် ဒီးတၢ်လၢ ပကဘၣ်ပှ့ၤအီၤလၢ ခါဆူညါအဂီၢ်. ခီဖျိလၢ ပမၤဒ်န့ၣ်အဃိ ပသ့ၣ်ညါလၢ ပကဘၣ်သူစ့ဒ်လဲၣ် ဒီးပတဘၣ်ယိၣ်တၢ် အါအါလၢၤဘၣ်.”
မၤထီၣ်ကမၢ်တဂ့ၤ / စူးဃာ်စ့
မၤထီၣ်ကမၢ်တဂ့ၤ / စူးဃာ်စ့
ဒ်သိး နကမၢ်တထီၣ်တဂ့ၤအဂီၢ် ရဲၣ်ကျဲၤပာ်စၢၤလၢ နကသူစ့ဂ့ၤဂ့ၤ. မ့ၢ်သ့န့ၣ် တဘၣ်ဟံးလိၢ်စ့တဂ့ၤ ဒီးဂုာ်ကျဲးစၢး စူးဃာ်စ့လၢ နကပှ့ၤတၢ်လၢ နလိၣ်ဘၣ်အဂီၢ်.
စူးဃာ်စ့ ကိးလါဒဲး တစဲးဘၣ်တစဲး ဒ်သိးနကသူအီၤလၢ တၢ်ကကဲထီၣ်သးလၢ ခါဆူညါအဂီၢ်.
မၤတၢ်ဆူၣ်ဆူၣ် / မၤတၢ်မၤ တခါထီဘိ
လံာ်စီဆှံ တဲဝဲလၢ– “တၢ်မၤလၢ ပှၤမၤအီၤဆူၣ်ဆူၣ် ကိးမံၤဒဲးန့ၣ် အိၣ်ဒီးအဘျုး.”—ကတိၤဒိ ၁၄:၂၃.
မၤတၢ်ဆူၣ်ဆူၣ် / မၤတၢ်မၤ တခါထီဘိ
တၢ်မၤတခါလၢ နမၤအီၤန့ၣ် နမၤအီၤမ့ၢ်တမုာ်ဘၣ် သနာ်က့ ခီဖျိလၢ နန့ၢ်ဘၣ်စ့အဃိ နကဘၣ်အိၣ်ဒီး တၢ်ထံၣ်လၢအဂ့ၤ ဒီးမၤတၢ်ဆူၣ်ဆူၣ်.
ဂုာ်ကျဲးစၢး မၤတၢ်ဆူၣ်ဆူၣ် ဒီးကဲထီၣ်ပှၤလၢ ပှၤနာ်န့ၢ်အီၤသ့. နမ့ၢ်မၤဒ်န့ၣ်န့ၣ် ကမၤစၢၤနၤလၢ နတၢ်မၤ ကအိၣ်ထီဘိ ဒီးလၢခံ နတၢ်မၤ မ့ၢ်တအိၣ်လၢၤဘၣ် သနာ်က့ နဃုတၢ်မၤကညီ.
ဒမံၤထြံၤ တဲဝဲလၢ “ယမ့ၢ်ဘၣ်မၤ တၢ်မၤလၢ ယမၤအီၤတမုာ်ဘၣ် ဒီးယန့ၢ်ဘၣ်စ့ မ့ၢ်စှၤသနာ်က့ ယမၤဒံး. တၢ်မၤအံၤ ယပာ်အီၤဒ် ယနီၢ်ကစၢ်တၢ်မၤ, ယမၤလၢပှဲၤ ယမူဒါဂ့ၤဂ့ၤ ဒီးယဂုာ်ကျဲးစၢး မၤအီၤလၢ အဂ့ၤကတၢၢ်.”
နမ့ၢ်ဟးဃု တၢ်မၤန့ၣ် . . .
နကန့ၢ်ဘၣ် တၢ်မၤအဂီၢ် နကဘၣ် စးထီၣ်ဟးဃုဆိ. ဖဲနဃုတၢ်မၤအခါ တၢ်မၤလီၢ်တဖျၢၣ်ဖျၢၣ် မ့ၢ်တပာ်ဖျါထီၣ်လၢ အလိၣ်ပှၤမၤတၢ်ဖိဘၣ် သနာ်က့ ဆဲးကျိးဒီး တၢ်မၤလီၢ်တဖျၢၣ်န့ၣ် ဒီးသံကွၢ်အီၤလၢ မ့ၢ်တၢ်မၤလၢ နမၤသ့ အိၣ်တခါခါဧါ. ဒီးတဲဘၣ်နသကိး ဒီးနဟံၣ်ဖိဃီဖိလၢ နဃုတၢ်မၤ.
ဖဲနဃုတၢ်မၤအခါ ဘၣ်သ့ၣ်သ့ၣ် နတန့ၢ်ဘၣ် တၢ်မၤလၢနလီကီဘၣ်. သနာ်က့ သးအိၣ်တူၢ်လိာ် တၢ်မၤတခါခါလၢ အမၤလၢပှဲၤ နဟံၣ်ဖိဃီဖိ အတၢ်လိၣ်ဘၣ်.