ပူ ၆
ဖိခွါလၢအနၢ်လိၤ ဒီးဖိခွါလၢအအၢအသီ အဂ့ၢ်
ကွၢ်ကၤယံၣ်ဒီး ဟ့းဘ့းလးတက့ၢ်. ခံဂၤလၢာ်န့ၣ် ဒိၣ်ထီၣ်ဝဲသ့ၣ်လံ. မ့မ့ၢ်ကၤယံၣ်တခီ ကဲထီၣ်ပှၤထူစံာ်ဖိလီၤ. သူၣ်ဝဲဒၣ်ဘုတဖၣ် ဒီးတၢ်ဒိးတၢ်လၣ်, တၤသူတၤသၣ်တဖၣ်န့ၣ်လီၤ.
မ့မ့ၢ်ဟ့းဘ့းလးတခီ ကဲထီၣ်ပှၤကွၢ်သိလီၤ. အဝဲသးအိၣ်အံးထွဲကွၢ်ထွဲ သိဖိတဖၣ်န့ၣ်လီၤ. သိဖိတဖၣ်ဒိၣ်ထီၣ်ဝံၤ တယံာ်ဘၣ်ဒီး ဟ့းဘ့းလးန့ၣ် အိၣ်ထီၣ်ဝဲဒီး သိဖးဒိၣ်တဖုဝံၤ ဘၣ်ကွၢ်ဝဲဒၣ်သိန့ၣ်လီၤသၢၣ်.
ဘၣ်မုၢ်တနံၤန့ၣ် ကၤယံၣ်ဒီး ဟ့းဘ့းလး ဟဲစိာ်ဝဲသ့ၣ်တၢ်လုၢ် ဆူယွၤအအိၣ်လီၤ. ကၤယံၣ်န့ၣ်ဟဲစိာ် အတၤသူတၤသၣ်တနီၤလၢ အသူၣ်ဃာ်ဝဲန့ၣ်လီၤ. မ့မ့ၢ်ဟ့းဘ့းလးတခီ ဟဲစိာ်ဝဲဒၣ် သိဖိအဂ့ၤကတၢၢ် လၢအအိၣ်ဒီးအီၤန့ၣ်လီၤ. ယဟိဝၤဘၣ်အသးလၢ ဟ့းဘ့းလးဒီး ဟ့းဘ့းလးအတၢ်လုၢ်လီၤ. တဘၣ်အသးလၢ ကၤယံၣ်ဒီး ကၤယံၣ်အတၢ်လုၢ်န့ၣ်ဘၣ်. ဘၣ်မနုၤအဃိလဲၣ်, နသ့ၣ်ညါဧါ.
တမ့ၢ်ထဲ ဟ့းဘ့းလးအတၢ်လုၢ်န့ၣ် ဂ့ၤန့ၢ် ကၤယံၣ်အတၢ်လုၢ်အဃိဘၣ်. ဟ့းဘ့းလးန့ၣ် မ့ၢ်စ့ၢ်ကီး ပှၤဂ့ၤတဂၤအဃိလီၤ. အဝဲဒၣ် အဲၣ်ယဟိဝၤ ဒီးအဲၣ်စ့ၢ်ကီးအဝဲၢ်န့ၣ်လီၤ. မ့မ့ၢ်ကၤယံၣ်တခီ အၢမးလီၤ. အဝဲတအဲၣ်အပုၢ်ဘၣ်.
လၢတၢ်အံၤအဃိ ယွၤစံးဘၣ်ကၤယံၣ်လၢ ကဆီတလဲအသးအဂီၢ်န့ၣ်လီၤ. ဘၣ်ဆၣ် ကၤယံၣ်န့ၣ် တဒိကနၣ်ဝဲဘၣ်. ယွၤဘၣ်အသးလၢ ဟ့းဘ့းလးအါန့ၢ်အီၤအဃိ အဝဲသးထီၣ်ဝဲကစၢ်ယွၤဒိၣ်မးန့ၣ်လီၤ. ဒ်န့ၣ်ဒီး ကၤယံၣ်စံးဝဲဟ့းဘ့းလးလၢ ‘ပကလဲၤသကိးဆူစံာ်ပျီပူၤ’ ဒီးတုၤလၢစံာ်ပျီပူၤ ဖဲအဝဲသ့ၣ်အိၣ်ဒၣ်ခံဂၤဧိၤအခါ ကၤယံၣ်န့ၣ် တီၢ်ဝဲဒၣ်အပုၢ်န့ၣ်လီၤ. တီၢ်ဝဲဆါနးမး တုၤလၢအသံတစုလီၤ. ကၤယံၣ်မၤတၢ်ဒ်အံၤန့ၣ် တမ့ၢ်တၢ်မၤအအၢနီၢ်နီၢ်ဘၣ်ဧါ.
ဟ့းဘ့းလးသံဘၣ်ဆၣ် ယွၤသ့ၣ်နီၣ်ထီၣ်အီၤဒံးလီၤ. ဟ့းဘ့းလးန့ၣ် မ့ၢ်ပှၤအဂ့ၤလီၤ. ယဟိဝၤတသးပ့ၤနီၣ် ပှၤဒ်အံၤန့ၣ် နီတဘျီဘၣ်. လၢတၢ်အံၤအဃိ ဘၣ်မုၢ်တနံၤန့ၣ် ယွၤကမၤမူထီၣ်က့ၤဟ့းဘ့းလးန့ၣ်လီၤ. ဖဲအခါန့ၣ် ဟ့းဘ့းလးတမ့ၢ်ကသံကဒါက့ၤ နီတဘျီလၢၤဘၣ်. မူဝဲထီဘိလၢဟီၣ်ခိၣ်အံၤ ကသ့ဝဲန့ၣ်လီၤ. ပမ့ၢ်သ့ၣ်ညါလိာ်ပသးဒီး ပှၤဒ်ဟ့းဘ့းလးန့ၣ်သၢပျၢၤ တဂ့ၤဝဲဘၣ်ဧါ.
ပှၤဒ်သိးကၤယံၣ်န့ၣ် တဘၣ်ယွၤအသးဘၣ်. လၢတၢ်န့ၣ်အဃိ ကၤယံၣ်မၤသံအပုၢ်ဝံၤအလီၢ်ခံ ယွၤစံၣ်ညီၣ်တဲာ်အီၤလၢ ကအိၣ်ယံၤဒိၣ်မးဘၣ်ဝဲဒီး အဟံၣ်ဖိဃီဖိတဖၣ်န့ၣ်လီၤ. ကၤယံၣ်န့ၣ် လဲၤဝဲဆူဟီၣ်ခိၣ်တၢ်လီၢ်အဂၤတပူၤအခါ လဲၤကိးဃုာ်အပုၢ်ပိာ်မုၣ်တဂၤစ့ၢ်ကီးန့ၣ်လီၤ. ဒီးအပုၢ်ပိာ်မုၣ်ဝဲန့ၣ် ဟဲကဲထီၣ်အမါန့ၣ်လီၤ.
လၢခံန့ၣ် ကၤယံၣ်ဒီးအမါ မၤန့ၢ်အဖိတဖၣ်လီၤ. အၤဒၣ်ဒီးအံၣ်အုအဖိခွါ ဖိမုၣ်သ့ၣ်တဖၣ်စ့ၢ်ကီး ဆီဟံၣ်ဆီဃီဝံၤ အိၣ်ဖျဲၣ်ထီၣ်ဖိလံၤတဖၣ်လီၤ. တယံာ်တမီၢ်ဘၣ်န့ၣ် ပှၤအါထီၣ်ဂီၢ်ထီၣ် လၢဟီၣ်ခိၣ်ချၢန့ၣ်လီၤ. ပကဖးကွၢ်ပှၤတနီၤလၢ အဝဲသ့ၣ်အကျါအဂ့ၢ်န့ၣ်တက့ၢ်.