“သံဘၣ်ဆၣ်ဒီး ကတိၤဒံးတၢ်”

၁. ဒ်သိးနီၢ်အံၣ်အုဒီးစီၤအၤဒၣ် အဟံၣ်ဖိဃီဖိ သုတလဲၤနုာ်ဆူဧ့ၤဒ့ၣ်တၤသၣ်လီၢ် တဂ့ၤအဂီၢ် တၢ်မနုၤတြီဃာ် အဝဲသ့ၣ်လဲၣ်.

စီၤဟ့းဘ့းလးကွၢ်ဃီၤဝဲအသိလၢတၢ်ပျီပူၤ ဖဲအဝဲသ့ၣ်အီၣ်အဆၣ်အဆၢကတီၢ်န့ၣ်လီၤ. ဒီးဖဲအဝဲဂဲၤဆၢထၢၣ်လၢ အသိအဃၢၤဒီး ကွၢ်ဃီၤတၢ်လၢ အယံၤအခါ ထံၣ်ဘၣ်ဝဲတၢ်ကပီၤကဒုကဒုတခါန့ၣ်လီၤ. ဒီးအဝဲသ့ၣ်ညါဝဲလၢ တၢ်ကပီၤတခါအံၤ မ့ၢ်နးမ့ၣ်အူလၢအတရံးအသးထီဘိလၢ အတြီဃာ်ကျဲလၢ ပှၤကလဲၤနုာ်ဆူဧ့ၤဒ့ၣ်တၤသၣ်အလီၢ်ပူၤန့ၣ်လီၤ. လၢတဘျီအခါ စီၤဟ့းဘ့းလးအမိၢ်အပၢ်အိၣ်ဘၣ်ဝဲလၢဧ့ၤဒ့ၣ်တၤသၣ်အလီၢ်လီၤ. မ့မ့ၢ်ခဲအံၤ အဝဲသ့ၣ်ဒီးအဖိတဖၣ် က့ၤနုာ်လီၤလၢ တၢ်လီၢ်အဝဲန့ၣ်တသ့လၢၤဘၣ်. ထံၣ်ကမှံကွၢ်လၢ ဖဲမုၢ်ဟါလီၤ, ကလံၤဖိဟဲအူထီၣ် ကဖီကဖီအဆၢကတီၢ်န့ၣ်, စီၤဟ့းဘ့းလးမိာ်ထီၣ်အခိၣ်, ကွၢ်ထီၣ်တၢ်ဆူမူခိၣ်ဒီး ဆိကမိၣ်ထီၣ်ဝဲတၢ်ဘၣ်တ့ကစၢ်အဂ့ၢ်န့ၣ်တက့ၢ်. ဘၣ်သ့ၣ်သ့ၣ် စီၤဟ့းဘ့းလးကဆိကမိၣ်ဘၣ်ဝဲလၢ တၢ်လီၤမုၢ်လီၤဖး အိၣ်ထီၣ်လၢပှၤဟီၣ်ခိၣ်ဖိ ဒီးကစၢ်ယွၤအဘၢၣ်စၢၤန့ၣ် မ့ၢ်အဘၣ်လိာ်ဖိးဒ့က့ၤကသ့ဒံးဧါ. ဘၣ်ဃးဒီးတၢ်ဂ့ၢ်အဝဲအံၤန့ၣ် စီၤဟ့းဘ့းလးအဲၣ်ဒိးသ့ၣ်ညါဝဲအဒိၣ်ကတၢၢ်န့ၣ်လီၤ.

၂–၄. မုၢ်မဆါတနံၤအံၤ စီၤဟ့းဘ့းလး ကတိၤတၢ်ဒီးပှၤလၢကျဲဒ်လဲၣ်.

^၂ စီၤဟ့းဘ့းလး ကတိၤတၢ်ဒီးပှၤတုၤလၢ မုၢ်မဆါတနံၤအံၤလီၤ. ဘၣ်သ့ၣ်သ့ၣ် နကစံးလၢတၢ်တခါအံၤဒု ကဲထီၣ်အသးတသ့ဘၣ်. ခီဖျိလၢအဝဲမ့ၢ် စီၤအၤဒၣ်အဖိခွါခံဂၤတဂၤ ဒီးအဝဲသံအိၣ်လံအနံၣ်ဖးယံာ်လံ. ဒီးအဝဲသံအိၣ်ဝဲအနံၣ် ၆,၀၀၀ ဃၣ်ဃၣ်လံအဃိ ခဲအံၤအဝဲကဲထီၣ်ဝဲ ဟီၣ်ခိၣ်ကမူၣ်န့ၣ်လီၤ. လံာ်စီဆှံပာ်ဖျါထီၣ်စ့ၢ်ကီးဝဲလၢ “မ့မ့ၢ်ပှၤသံန့ၣ် တသ့ၣ်ညါဘၣ်တၢ်နီတမံၤဘၣ်.” (စံၣ်. ၉:၅, ၁၀) တကးဒံးဘၣ် လံာ်စီဆှံတကွဲးနီၣ်ဃာ်ဝဲ စီၤဟ့းဘ့းလးအတၢ်ကတိၤနီတဖျၢၣ်ဘၣ်. လၢတၢ်န့ၣ်အဃိ အဝဲကတိၤတၢ်ဒီးပှၤ ကသ့လၢကျဲဒ်လဲၣ်.

^၃ သးစီဆှံ ထိၣ်ဟူးထိၣ်ဂဲၤထီၣ်ဝဲ တၢ်မၢဖိပီလူးအသးလၢ ကကွဲးဝဲစီၤဟ့းဘ့းလးအဂ့ၢ်လီၤ. အဝဲကွဲးဝဲလၢ စီၤဟ့းဘ့းလးန့ၣ် “သံဘၣ်ဆၣ်ဒီး ကတိၤဒံးတၢ်” လီၤ. (ဖး ဧ့ၤဘြံၤ ၁၁:၄ တက့ၢ်.) လံာ်စီဆှံတဆၢအံၤ ပာ်ဖျါထီၣ်န့ၢ်ပှၤလၢ စီၤဟ့းဘ့းလး သံဝဲဘၣ်ဆၣ် အဝဲကတိၤတၢ်ဒီးပှၤ ခီဖျိလၢအတၢ်နာ်န့ၣ်လီၤ. တကးဒံးဘၣ် အဝဲမ့ၢ်ပှၤဟီၣ်ခိၣ်ဖိ အဆိကတၢၢ်တဂၤလၢ အပာ်ဖျါထီၣ်ဝဲတၢ်နာ်န့ၣ်လီၤ. မ့ၢ်လၢအဝဲအိၣ်ဒီး တၢ်နာ်တုၤလီၤတီၤလီၤအဃိ မုၢ်မဆါတနံၤအံၤ ပကွၢ်လိမၤဒိးအီၤသ့ဝဲလီၤ. ပမ့ၢ်မၤလိ စီၤဟ့းဘ့းလးအဂ့ၢ်ဒီး ကွၢ်လိမၤဒိးအတၢ်နာ်န့ၣ် လီၤဂာ်ဒ်သိး အဝဲကတိၤတၢ်ဒီးပှၤလီၤ.

^၄ မ့ၢ်လၢလံာ်စီဆှံ ပာ်ဖျါထီၣ်ဝဲ တၢ်မၤအသးဒီးစီၤဟ့းဘ့းလးထဲတစဲးဖိအဃိ ပမၤလိအါထီၣ် အဂ့ၢ်ဒီးအတၢ်နာ်ကသ့ဒ်လဲၣ်. ခဲအံၤ ပကသမံသမိးကွၢ် စီၤဟ့းဘ့းလး အဂ့ၢ်အကျိၤလီၤ.

စီၤဟ့းဘ့းလးအိၣ်မူဘၣ်လၢ “ဟီၣ်ခိၣ်အခီၣ်ထံးလံၤလံၤ”

၅. ဖဲယ့ၣ်ၡူးတဲဝဲဘၣ်ဃး ဒီးစီၤဟ့းဘ့းလး အိၣ်မူတ့ၢ်ဝဲလၢ “ဟီၣ်ခိၣ်အခီၣ်ထံးလံၤလံၤ” န့ၣ် အဝဲအဲၣ်ဒိးစံးဝဲဒ်လဲၣ်. (ကွၢ်တၢ်ဂ့ၢ်အဘျဲၣ်တက့ၢ်.)

^၅ ဖဲကစၢ်ယွၤတ့လီၤ နီၢ်အံၣ်အုဒီးစီၤအၤဒၣ် တယံာ်တမီၢ်ဝံၤအလီၢ်ခံန့ၣ် စီၤဟ့းဘ့းလးအိၣ်ဖျဲၣ်ထီၣ်ဝဲလီၤ. ဒီးယ့ၣ်ၡူးစံးစ့ၢ်ကီးဝဲလၢ စီၤဟ့းဘ့းလးအိၣ်မူတ့ၢ်ဝဲလၢ “ဟီၣ်ခိၣ်အခီၣ်ထံးလံၤလံၤ” န့ၣ်လီၤ. (ဖး လူၤကၣ် ၁၁:၅၀, ၅၁ တက့ၢ်.) ဖဲယ့ၣ်ၡူးတဲဘၣ်ဃးဒီး “ဟီၣ်ခိၣ်” အံၤအခါန့ၣ် ဖျါလၢအဝဲအဲၣ်ဒိးစံးဝဲ ပှၤဟီၣ်ခိၣ်ဖိလၢအိၣ်ဒီးတၢ်ခွဲးတၢ်ယာ်လၢ ကဘၣ်တၢ်ပှ့ၤက့ၤအီၤလၢ တၢ်ဒဲးဘးအစုပူၤန့ၣ်လီၤ. ကယဲၢ်ပှၤဟီၣ်ခိၣ်ဖိလၢ အအိၣ်မူဘၣ်လၢဟီၣ်ခိၣ်ချၢအံၤအကျါန့ၣ် စီၤဟ့းဘ့းလးမ့ၢ်ပှၤ လွံၢ်ဂၤတဂၤလီၤ. ဘၣ်ဆၣ် ဖျါလၢယွၤထံၣ်အီၤဒ် အဝဲမ့ၢ်ပှၤအဆိကတၢၢ်တဂၤ လၢတၢ်ပှ့ၤက့ၤအီၤလၢ တၢ်ဒဲးဘးအစုပူၤသ့ဝဲန့ၣ်လီၤ.a လၢတၢ်န့ၣ်အဃိ ဖဲစီၤဟ့းဘ့းလးအစိၤန့ၣ် ပှၤလၢအကဲဒိဂ့ၤတဲာ်ဘၣ်လၢအဂီၢ်န့ၣ် တအိၣ်နီတဂၤဘၣ်.

၆. စီၤဟ့းဘ့းလး အမိၢ်အပၢ်န့ၣ် မ့ၢ်ပှၤဒ်လဲၣ်.

^၆ ဖဲပှၤဟီၣ်ခိၣ်ဖိတဖၣ် အိၣ်ထီၣ်တယံာ်တမီၢ်န့ၣ် အဝဲသ့ၣ်ကွၢ်ဆၢၣ်မဲာ်ဘၣ်ဝဲ တၢ်လၢအလီၤသးအုးတဖၣ်လီၤ. တချုးလၢ စီၤဟ့းဘ့းလးအမိၢ်အပၢ် နီၢ်အံၣ်အုဒီးစီၤအၤဒၣ် မၤတၢ်ကမၣ်အခါ အဝဲသ့ၣ်မ့ၢ်ပှၤလၢ အလၢအပှဲၤဒီးအိၣ်မူဘၣ်ဝဲ မုာ်မုာ်ခုၣ်ခုၣ်လီၤ. တကးဒံးဘၣ် အဝဲသ့ၣ်အိၣ်ဒီးတၢ်ခွဲးတၢ်ယာ်လၢ ကအိၣ်မူဘၣ်ဝဲလီၤထူလီၤယိာ်န့ၣ်လီၤ. ဘၣ်ဆၣ် မ့ၢ်လၢအဝဲသ့ၣ်ထီဒါ ယဟိဝၤယွၤအဃိ အဝဲသ့ၣ်ဘၣ်ဟးထီၣ်ကွံာ်လၢ ဧ့ၤဒ့ၣ်တၤသၣ်လီၢ်အပူၤန့ၣ်လီၤ. စီၤအၤဒၣ်ဒီးနီၢ်အံၣ်အု အဲၣ်လီၤထဲအသး ဒီးတဆိကမိၣ်တၢ်လၢ အဖိအလံၤအဂီၢ်အဃိ အဝဲသ့ၣ်မၤကမၣ်ဝဲ ယွၤအတၢ်သိၣ်တၢ်သီန့ၣ်လီၤ. လၢတၢ်န့ၣ်အဃိ အဝဲသ့ၣ်အတၢ်အိၣ်မူ လၢအလၢအပှဲၤအံၤ လီၤမၢ်ကွံာ်ဝဲ ဒီးတအိၣ်မူဘၣ်ဝဲ လီၤထူလီၤယိာ်လၢၤဘၣ်.—၁ မိၤ. ၂:၁၅–၃:၂၄.

၇, ၈. ဖဲစီၤကၤယံၣ် အိၣ်ဖျဲၣ်ထီၣ်အခါ နီၢ်အံၣ်အုစံးဝဲဒ်လဲၣ်. ဒီးဘၣ်သ့ၣ်သ့ၣ် အဝဲကဆိကမိၣ်လီၤအသး ဒ်လဲၣ်.

^၇ ဖဲနီၢ်အံၣ်အုဒီးစီၤအၤဒၣ် ဘၣ်တၢ်ဟီထီၣ်ကွံာ်အဝဲသ့ၣ်လၢ ဧ့ၤဒ့ၣ်တၤသၣ်လီၢ်အခါ အဝဲသ့ၣ်အတၢ်အိၣ်မူပှဲၤဝဲဒီး တၢ်ကီတၢ်ခဲလီၤ. ဒီးဖဲအဖိဝဲၢ်ကိ အိၣ်ဖျဲၣ်ထီၣ်အခါ ယုၢ်န့ၢ်ဝဲအမံၤလၢ စီၤကၤယံၣ် ဒီးစံးဝဲလၢ “ယန့ၢ်ဘၣ်လံ ပှၤကညီတဂၤလၢယွၤလံ.” ဘၣ်သ့ၣ်သ့ၣ် နီၢ်အံၣ်အု ကသ့ၣ်နီၣ်ထီၣ်က့ၤဝဲ ကစၢ်ယွၤအတၢ်စံးပာ်လၢ ဧ့ၤဒ့ၣ်တၤသၣ်လီၢ်အပူၤလီၤ. ဖဲန့ၣ်န့ၣ် ကစၢ်ယွၤစံးဝဲလၢ ပိာ်မုၣ်ကအိၣ်ဒီး “အချံအသၣ်” မ့တမ့ၢ် အစၢၤအသွဲၣ်လၢအကမၤဟးဂီၤကွံာ် ပှၤအၢပှၤသီတဂၤလၢ အလီန့ၢ်ဝဲနီၢ်အံၣ်အုဒီးစီၤအၤဒၣ်န့ၣ်လီၤ. (၁ မိၤ. ၃:၁၅; ၄:၁) ဘၣ်သ့ၣ်သ့ၣ် နီၢ်အံၣ်အု ကဆိကမိၣ်လီၤအသးလၢ အဝဲမ့ၢ်ပိာ်မုၣ်အဝဲန့ၣ် ဒီးအဖိခွါကၤယံၣ်မ့ၢ် “အချံအသၣ်” လၢကစၢ်ယွၤစံးပာ်ဝဲန့ၣ်လီၤ.

^၈ နီၢ်အံၣ်အု မ့ၢ်ဆိကမိၣ်ဝဲဒ်န့ၣ်န့ၣ် အတၢ်ဆိကမိၣ်တပျာ်လံ. ဒီးအဝဲမ့ၢ်သိၣ်လိဝဲ အဖိခွါကၤယံၣ် ဒ်န့ၣ်န့ၣ် မ့ၢ်အဆီၣ်ထွဲဝဲအဖိခွါဒ်သိး ကအိၣ်ဒီးတၢ်ပာ်ထီၣ်ထီသးအဂီၢ်လီၤ. တၢ်ဆၢကတီၢ် လဲၤပူၤကွံာ်ဝဲဒီး နီၢ်အံၣ်အု အိၣ်ဖျဲၣ်ထီၣ်ဝဲ ဖိခွါလၢအသီတဂၤလီၤ. ဘၣ်ဆၣ်ပထံၣ်ဘၣ်လၢ အဝဲတပတြၢၤဝဲအဖိခွါတဂၤအံၤ နီတစဲးဘၣ်. ဒီးအဝဲသ့ၣ်ယုၢ်ဝဲအမံၤလၢ စီၤဟ့းဘ့းလးလီၤ. မံၤအံၤအခီပညီမ့ၢ်ဝဲ “ကသါလီၤ” မ့တမ့ၢ် “တၢ်ကလီကလီ” န့ၣ်လီၤ. (၁ မိၤ. ၄:၂) မ့ၢ်လၢအဝဲသ့ၣ် ယုၢ်န့ၢ်အဖိခွါတဂၤအံၤ အမံၤဒ်အံၤအဃိ ဖျါလၢအဝဲသ့ၣ်မုၢ်လၢ်တၢ်လၢ စီၤကၤယံၣ်အအိၣ် အါန့ၢ်ဒံးစီၤဟ့းဘ့းလးအအိၣ်န့ၣ်လီၤ.

၉. မိၢ်ပၢ်လၢမုၢ်မဆါတနံၤအံၤ မၤလိန့ၢ်တၢ်လၢ မိၢ်ပၢ်အဆိကတၢၢ်ခံဂၤအအိၣ် သ့ဝဲဒ်လဲၣ်.

^၉ မိၢ်ပၢ်လၢမုၢ်မဆါတနံၤအံၤ မၤလိန့ၢ်တၢ်လၢ မိၢ်ပၢ်အဆိကတၢၢ်ခံဂၤအအိၣ်သ့ဝဲလီၤ. ခီဖျိလၢ သုတၢ်စံးတၢ်ကတိၤ ဒီးသုသကဲာ်ပဝးအဃိ မ့ၢ်သုသိၣ်လိသုဖိတဖၣ် ဒ်သိးအဝဲသ့ၣ်ကအိၣ်ဒီး သးလၢအဲၣ်ဒိးဒိၣ်စိလၢ ပှၤဂၤအဖီခိၣ်, တၢ်ပာ်ထီၣ်ထီသး, ဒီးတၢ်အဲၣ်လီၤထဲသးဧါ. မ့တမ့ၢ် မ့ၢ်သုသိၣ်လိသုဖိဒ်သိး အကအဲၣ်ယဟိဝၤယွၤ ဒီးသုးဘူးအသးလၢအအိၣ်ဧါ. လီၤသးအုးဒိၣ်မးလၢ နီၢ်အံၣ်အုဒီးစီအၤဒၣ် တသိၣ်လိဝဲအဖိ ဒ်သိးအကအဲၣ်ယွၤဘၣ်. ဘၣ်ဆၣ်အဖိအလံၤတဖၣ် အိၣ်ဒီးတၢ်မုၢ်လၢ်လၢ ကကဲထီၣ်ဝဲယွၤအတံၤသကိးန့ၣ်လီၤ.

စီၤဟ့းဘ့းလး မၤဒိၣ်ထီၣ်ထီထီၣ် အတၢ်နာ်ဒ်လဲၣ်

၁၀, ၁၁. စီၤဟ့းဘ့းလးဒီးစီၤကၤယံၣ်န့ၣ် ဖံးအီၣ်မၤအီၣ်တၢ်မနုၤလဲၣ်. ဒီးတၢ်ဂ့ၤတၢ်ဝါလၢ စီၤဟ့းဘ့းလး မၤဒိၣ်ထီၣ်ထီထီၣ်ဝဲန့ၣ် မ့ၢ်မနုၤလဲၣ်.

^၁၀ ဖဲဖိခွါခံဂၤအံၤ ဒိၣ်ထီၣ်ဝဲအခါ စီၤအၤဒၣ်သိၣ်လိအဝဲသ့ၣ် ဒ်သိးအဝဲသ့ၣ်ဖံးတၢ်မၤတၢ်ဒီး လုၢ်အီၣ်လုၢ်အီအဟံၣ်ဖိဃီဖိကသ့အဂီၢ်လီၤ. လၢတၢ်န့ၣ်အဃိ စီၤကၤယံၣ်ကဲထီၣ် ပှၤထူစံာ်ဖိဒီးစီၤဟ့းဘ့းလး ကဲထီၣ်ဝဲပှၤကွၢ်သိန့ၣ်လီၤ.

^၁၁ ဘၣ်ဆၣ် စီၤဟ့းဘ့းလးန့ၣ် တမ့ၢ်ထဲလၢ အဝဲကွၢ်ဝဲသိဖိတဖၣ်ဘၣ်, အဝဲမၤစ့ၢ်ကီးဝဲ တၢ်လၢအရ့ဒိၣ်အဂၤတမံၤလီၤ. နံၣ်တဖၣ်လဲၤပူၤကွံာ်ဒီး စီၤဟ့းဘ့းလးမၤဒိၣ်ထီၣ်ဝဲ အတၢ်နာ် တစဲးဘၣ်တစဲးလီၤ. လၢခံန့ၣ် စီၤပီလူးကွဲးဖျါထီၣ်က့ၤဝဲ စီၤဟ့းဘ့းလး အတၢ်နာ်အဂ့ၢ်န့ၣ်လီၤ. ဆိကမိၣ်ကွၢ် ပှၤဟီၣ်ခိၣ်ဖိလၢ အဒိဂ့ၤတဲာ်ဘၣ် တအိၣ်လၢအဂီၢ်နီတဂၤအဃိ စီၤဟ့းဘ့းလးမၤဒိၣ်ထီၣ် အတၢ်နာ်ယဟိဝၤယွၤကသ့ လၢကျဲဒ်လဲၣ်. စီၤဟ့းဘ့းလးမၤဒိၣ်ထီၣ်ထီထီၣ်ဝဲ အတၢ်နာ်ဒ်လဲၣ်အဂ့ၢ်န့ၣ် ပကသမံသမိးကွၢ် တၢ်ဂ့ၢ်သၢမံၤလီၤ.

၁၂, ၁၃. ယွၤအတၢ်ဘၣ်တ့ မၤဂၢၢ်ကျၢၤထီၣ် စီၤဟ့းဘ့းလး အတၢ်နာ်လၢကျဲဒ်လဲၣ်.

^၁၂ ယဟိဝၤယွၤ အတၢ်ဘၣ်တ့. ယဟိဝၤယွၤ ဆိၣ်အၢဝဲဟီၣ်ခိၣ်ဒီးဒုးမဲထီၣ်ဝဲ တၤဆှုၣ်တၤမဲဒ်သိး ပှၤဟီၣ်ခိၣ်ဖိတဖၣ် သူၣ်အီၣ်ဖျးအီၣ်တၢ် သုတညီတဂ့ၤအဂီၢ်လီၤ. ဘၣ်ဆၣ်သနာ်က့ ဒ်သိးစီၤဟ့းဘ့းလးအဟံၣ်ဖိဃီဖိ ဆဲးအိၣ်မူဝဲဆူညါကသ့အဂီၢ် ဟီၣ်ခိၣ်ဒုးမဲထီၣ်ဝဲ တၢ်မုၢ်တၢ်ဘိဒီးတၤသူတၤသၣ်တဖၣ်လီၤ. မ့မ့ၢ်တၢ်ဖိတၢ်လံၤတဖၣ်ဒ်သိးဒီး ထိၣ်ဖိလံၣ်ဖိ, ဒ့ၣ်ဖိညၣ်ဖိ, ကစၢၢ်ကလိ, ထံကျိထံကွာ်, ပီၣ်လဲၣ်ပီၣ်တြီၤ, မူကပိာ်လိၤ, တၢ်အၢၣ်, မုၢ်ဧိၤလါဧိၤဒီးဆၣ်ဧိၤဖီဧိၤတဖၣ်န့ၣ် ယဟိဝၤယွၤတဆိၣ်အၢဝဲဘၣ်. စီၤဟ့းဘ့းလးထံၣ်ဘၣ်ဝဲ ယွၤအတၢ်အဲၣ်, အတၢ်ကူၣ်သ့ဒီး အတၢ်ဂ့ၤတၢ်ဝါ ခီဖျိလၢယဟိဝၤယွၤ အတၢ်ဘၣ်တ့န့ၣ်လီၤ. (ဖး ရိမ့ၤ ၁:၂၀ တက့ၢ်.) ဖဲစီၤဟ့းဘ့းလး ဆိကမိၣ်ထံဝဲ ယွၤအတၢ်ဂ့ၤတၢ်ဝါဒီး တၢ်ဘၣ်တ့သ့ၣ်တဖၣ်အခါ အတၢ်နာ်ဒိၣ်ထီၣ်ဝဲလီၤ.

^၁၃ ပနာ်သ့သပှၢ်ကတၢၢ်လၢ စီၤဟ့းဘ့းလး ပာ်လီၤဝဲတၢ်ဆၢကတီၢ်လၢ ကဆိကမိၣ်ထံဝဲ ယဟိဝၤယွၤအဂ့ၢ်န့ၣ်လီၤ. ထံၣ်ကမှံကွၢ်လၢ စီၤဟ့းဘ့းလး ကွၢ်ထွဲဝဲအသိတဖၣ်န့ၣ်တက့ၢ်. ပှၤကွၢ်သိတဂၤန့ၣ် ကဘၣ်ဟးဝဲတၢ်လီၢ်ဖးယံၤ, ဘၣ်ခီဂာ်ဝဲကစၢၢ်ကလိ, တၢ်လူၢ်တၢ်တြီၤဒီးထံဖိကျိတဖၣ် ဒ်သိးကဃုထံၣ်န့ၢ် နီၣ်လါဟ့, ထံဒီးတၢ်လီၢ်လၢ သိဖိကအိၣ်ဘှံးအိၣ်သါဝဲအဂီၢ်လီၤ. လၢယွၤအတၢ်ဘၣ်တ့ခဲလၢာ်အကျါ, သိန့ၣ်မ့ၢ်ဆၣ်ဖိကီၢ်ဖိလၢ အအံးထွဲကွၢ်ထွဲလီၤအသး တသ့အါအါဘၣ်အဃိ ပှၤဟီၣ်ခိၣ်ဖိကဘၣ်ကဟုကယာ်အီၤလီၤ. ဒ်န့ၣ်အသိး ဘၣ်သ့ၣ်သ့ၣ်စီၤဟ့းဘ့းလး ကတူၢ်ဘၣ်ဝဲ လၢအလိၣ်ဘၣ်ပှၤတဂၤဂၤလၢ အအိၣ်ဒီးတၢ်စိတၢ်ကမီၤလၢ ကကဟုကယာ်အီၤ, ကဒီသဒၢအီၤ ဒီးကကွၢ်ထွဲအီၤစ့ၢ်ကီးလီၤ. လၢတၢ်န့ၣ်အဃိ ဖဲအဝဲဃ့ဘါထုကဖၣ်တၢ်အခါ ကတဲဖျါထီၣ်ဝဲ အတၢ်တူၢ်ဘၣ်တဖၣ်အံၤထီဘိလီၤ. ဒီးမ့ၢ်လၢအဝဲမၤဝဲ ဒ်အံၤအဃိ အတၢ်နာ်ဂၢၢ်ကျၢၤထီၣ်ဝဲလီၤ.

၁၄, ၁၅. ယဟိဝၤယွၤ တဲဆိပာ်စၢၤဝဲတၢ်မနုၤလဲၣ်. ဒီးတၢ်ဂ့ၢ်သ့ၣ်တဖၣ်အံၤ မၤစၢၤစီၤဟ့းဘ့းလးဒ်လဲၣ်.

^၁၄ ယဟိဝၤယွၤအတၢ်စံးပာ်. နီၢ်အံၣ်အုဒီးစီၤအၤဒၣ် ကတဲနၢ်ပၢၢ်အဖိတဖၣ်လၢ ဘၣ်မနုၤအဃိ ကစၢ်ယွၤဟီထီၣ်ကွံာ် အဝဲသ့ၣ်လၢ ဧ့ၤဒ့ၣ်တၤသၣ်အလီၢ်လဲၣ်. ဒီးစီၤဟ့းဘ့းလး ကဆိကမိၣ်ထံဝဲ တၢ်ဂ့ၢ်လၢ အဟဲကဲထီၣ်အသးဒီးအမိၢ်အပၢ်န့ၣ်လီၤ.

^၁၅ ယဟိဝၤယွၤစံးဝဲလၢ ဟီၣ်ခိၣ်အံၤ ကဘၣ်တၢ်ဆိၣ်အၢအီၤန့ၣ်လီၤ. လၢတၢ်န့ၣ်အဃိ စီၤဟ့းဘ့းလးထံၣ်ဘၣ်ဝဲ တၤဆှုၣ်တၤမဲတဖၣ် အိၣ်ဝဲလၢတၢ်လီၢ်သကုၤဆးဒးလီၤ. ဒီးယဟိဝၤယွၤစံးပာ်ဝဲလၢ တချုးလၢ နီၢ်အံၣ်အုအိၣ်ဖျဲၣ်ထီၣ်အဖိန့ၣ် အဟၢဖၢကဆါဝဲလီၤ. ဖဲစီၤဟ့းဘ့းလး အပုၢ်တဖၣ်အိၣ်ဖျဲၣ်ထီၣ်ဝဲအခါ အဝဲထံၣ်ဘၣ်ဝဲလၢ ယွၤအတၢ်ကတိၤတဖၣ်အံၤ ဟဲလၢထီၣ်ပှဲၤထီၣ်ဝဲလီၤ. တကးဒံးဘၣ် ယဟိဝၤယွၤစံးဝဲလၢ နီၢ်အံၣ်အု ကလီကီဝဲအဝၤအတၢ်အဲၣ် ဒီးအတၢ်ကဟုကယာ်န့ၣ်လီၤ. ဒီးကစၢ်ယွၤစံးစ့ၢ်ကီးဝဲလၢ စီၤအၤဒၣ်န့ၣ် ကဒိၣ်စိဝဲလၢ နီၢ်အံၣ်အုအဖီခိၣ်လီၤ. စီၤဟ့းဘ့းလး ထံၣ်ဘၣ်ဝဲလၢ အမိၢ်အပၢ်အတၢ်ရ့လိာ်သးန့ၣ် မၤအသးဒ်ယွၤစံးပာ်ဝဲအသိးန့ၣ်လီၤ. ဒီးအဝဲထံၣ်ဘၣ်ဝဲလၢ ယဟိဝၤယွၤအတၢ်ကတိၤ ကိးထံၣ်ဒဲးန့ၣ် ဟဲလၢထီၣ်ပှဲၤထီၣ်ဝဲလီၤ. လၢတၢ်န့ၣ်အဃိ စီၤဟ့းဘ့းလးနာ်ဝဲသပှၢ်ကတၢၢ်လၢ ကစၢ်ယွၤအတၢ်စံးပာ်လၢ အဘၣ်ဃးဒီးပိာ်မုၣ် “အချံအသၣ်” မ့တမ့ၢ် အစၢၤအသွဲၣ်န့ၣ် ကမၤဘၣ်ဘျီးဘၣ်ဒါက့ၤတၢ်ဂ့ၢ်ကီလၢ အဟဲကဲထီၣ်အသးလၢ ဧ့ၤဒ့ၣ်တၤသၣ်လီၢ်န့ၣ်လီၤ. —၁ မိၤ. ၃:၁၅-၁၉.

၁၆, ၁၇. စီၤဟ့းဘ့းလး မၤလိန့ၢ်တၢ်လၢ ယဟိဝၤယွၤအခ့ရူာ်တဖၣ် အအိၣ်ဒ်လဲၣ်.

^၁၆ ယဟိဝၤယွၤအခ့အပှၤတဖၣ်. စီၤဟ့းဘ့းလး တထံၣ်ဘၣ်ဝဲပှၤဟီၣ်ခိၣ်ဖိ လၢအအိၣ်ဒီးဒိဂ့ၤတဲာ်ဘၣ် လၢအဂီၢ်နီတဂၤဘၣ်. ဘၣ်ဆၣ် ဖဲန့ၣ်အဆၢကတီၢ် ပှၤလၢအအိၣ်မူလၢ ဟီၣ်ခိၣ်ချၢအံၤတမ့ၢ်ထဲပှၤဟီၣ်ခိၣ်ဖိဘၣ်. မူခိၣ်ကလူးတနီၤ အိၣ်ဝဲလၢဟီၣ်ခိၣ်ချၢစ့ၢ်ကီးလီၤ. ဖဲနီၢ်အံၣ်အုဒီး စီၤအၤဒၣ် ဘၣ်တၢ်ဟီထီၣ်ကွံာ်အီၤဝံၤအလီၢ်ခံန့ၣ် ကစၢ်ယွၤပာ်လီၤဝဲ ခ့ရူာ်တဖၣ်လၢအမ့ၢ် မူခိၣ်ကလူးလၢ အပတီၢ်ထီဒီးနးမ့ၣ်အူလၢအတရံးအသးထီဘိ လၢဧ့ၤဒ့ၣ်တၤသၣ်လီၢ် မုၢ်ထီၣ်တခီန့ၣ်လီၤ. လၢတၢ်န့ၣ်အဃိ နီၢ်အံၣ်အု, စီၤအၤဒၣ် ဒီးအဝဲသ့ၣ်အဖိအလံၤသ့ၣ်တဖၣ် က့ၤနုာ်လီၤဆူ ဧ့ၤဒ့ၣ်တၤသၣ်အလီၢ်တန့ၢ်လၢၤဘၣ်.—ဖး ၁ မိၤၡ့ ၃:၂၄ တက့ၢ်.

^၁၇ စီၤဟ့းဘ့းလးထံၣ်ဘၣ်ဝဲခ့ရူာ်တဖၣ် စးထီၣ်လၢအဝဲမ့ၢ် ဖိသၣ်အဆၢကတီၢ် ဒီးတုၤလီၤလၢအနီၢ်ဒိၣ်ထီၣ်တစုအဃိ အဝဲကတူၢ်ဘၣ်ဝဲဒ်လဲၣ်န့ၣ် ဆိကမိၣ်ကွၢ်တက့ၢ်. အဒိ ခ့ရူာ်တဖၣ်မၤကဲထီၣ် အက့ၢ်အဂီၤ ဒ်ပှၤဟီၣ်ခိၣ်ဖိအသိးအဃိ စီၤဟ့းဘ့းလးထံၣ်ဘၣ်ဝဲလၢ အဝဲသ့ၣ်မ့ၢ် ပှၤလၢအဂံၢ်ဆူၣ်ဘါဆူၣ်ဒိၣ်မးန့ၣ်လီၤ. တကးဒံးဘၣ် နးမ့ၣ်အူလၢ အတရံးအသးထီဘိန့ၣ် မ့ၢ်တၢ်လၢအလီၤကမၢကမၣ်လၢ အဂီၢ်လီၤ. စးထီၣ်လၢမုၢ်ဂီၤတုၤလီၤလၢ မုၢ်နၤ, တသီဝံၤတသီ, တၢ်ဆၢကတီၢ်လဲၤပူၤကွံာ်အနံၣ်လၢအဆံ ဘၣ်ဆၣ် စီၤဟ့းဘ့းလး ထံၣ်ဘၣ်ဝဲလၢ ခ့ရူာ်တဖၣ်န့ၣ် တၢ်တကၢၣ်အသးဘၣ်, တပာ်တ့ၢ်ကွံာ်အမူဒါဘၣ် ဒီးဆၢထၢၣ်ဝဲလၢအလီၢ်ထီဘိန့ၣ်လီၤ. လၢတၢ်န့ၣ်အဃိ စီၤဟ့းဘ့းလးသ့ၣ်ညါဘၣ်ဝဲလၢ ယဟိဝၤယွၤ အိၣ်ဒီးအခ့အပှၤ လၢအတီတဖၣ်န့ၣ်လီၤ. စီၤဟ့းဘ့းလး အဟံၣ်ဖိဃီဖိတဖၣ် တတီတလိၤ ဒီးတဒိကနၣ်ယဟိဝၤယွၤ အကလုၢ်ဘၣ်. ဘၣ်ဆၣ် အဝဲထံၣ်ဘၣ်ဝဲခ့ရူာ်တဖၣ် အိၣ်ဒီးတၢ်သးတီ ဒီးဒိကနၣ်ဝဲယဟိဝၤယွၤအကလုၢ်လီၤ. ဒီးခ့ရူာ်တဖၣ်အဒိအတဲာ်န့ၣ် မၤစၢၤစီၤဟ့းဘ့းလး ဒ်သိးအတၢ်နာ် ကဂၢၢ်ကျၢၤထီၣ်ဝဲအဂီၢ်လီၤ.

၁၈. မုၢ်မဆါတနံၤအံၤ ပမၤဂၢၢ်ကျၢၤထီၣ် ပတၢ်နာ်သ့လၢကျဲဒ်လဲၣ်.

^၁၈ စီၤဟ့းဘ့းလး ဆိကမိၣ်ထံဝဲ ယဟိဝၤယွၤအတၢ်ဘၣ်တ့ ဒီးအတၢ်စံးပာ်အဃိ အတၢ်နာ်ဂၢၢ်ကျၢၤထီၣ်ဝဲလီၤ. ဒီးခ့ရူာ်တဖၣ် အဒိအတဲာ်လၢအဂ့ၤန့ၣ် ကဲထီၣ်တၢ်မၤစၢၤလၢ အဂီၢ်စ့ၢ်ကီးလီၤ. ပဝဲသ့ၣ်စ့ၢ်ကီး ပမၤလိန့ၢ်တၢ်လၢ စီၤဟ့းဘ့းလး အအိၣ်အါမးလီၤ. မုၢ်မဆါတနံၤအံၤ ပှၤသးစၢ်တဖၣ်အဟံၣ်ဖိဃီဖိ မ့ၢ်တပာ်လီၤဒိတဲာ်လၢအဂ့ၤ ဘၣ်ဆၣ် အဝဲသ့ၣ်မၤဒိၣ်ထီၣ် အတၢ်နာ်လၢယဟိဝၤယွၤ အဖီခိၣ်သ့ဝဲလီၤ. ခဲအံၤ ပမၤဂၢၢ်ကျၢၤထီၣ်ပတၢ်နာ် သ့ခီဖျိလၢပဆိကမိၣ်ထံ ယွၤအတၢ်ဘၣ်တ့ လၢအအိၣ်ဝးတရံးပှၤ အကလုာ်ကလုာ်န့ၣ်လီၤ. အဂၤတမံၤန့ၣ် ပအိၣ်ဒီးလံာ်စီဆှံ ဒီးပှၤဟီၣ်ခိၣ်ဖိတဖၣ်လၢ အဒိဂ့ၤတဲာ်ဘၣ်န့ၣ်လီၤ.

ဘၣ်မနုၤအဃိ ကစၢ်ယွၤတူၢ်လိာ် စီၤဟ့းဘ့းလးအတၢ်ဟ့ၣ်လုၢ်ထီၣ်လဲၣ်

၁၉. စီၤဟ့းဘ့းလး နၢ်ပၢၢ်ထီၣ်ဝဲ တၢ်ဂ့ၢ်မနုၤလဲၣ်.

^၁၉ စီၤဟ့းဘ့းလး အတၢ်နာ်ဒံးယံာ်ဒံးအါထီၣ်ဝဲလီၤ. လၢတၢ်န့ၣ်အဃိ အဝဲဃုကျဲလၢ အကပာ်ဖျါထီၣ် အတၢ်နာ်ခီဖျိလၢ တၢ်မၤန့ၣ်လီၤ. ဘၣ်ဆၣ် စီၤဟ့းဘ့းလး မ့ၢ်ပှၤဟီၣ်ခိၣ်ဖိအဃိ အဝဲဟ့ၣ်ထီၣ်ဝဲ တၢ်ဟ့ၣ်လၢအကဲဘျုးလၢ ကစၢ်ယွၤအဂီၢ် ကအိၣ်ဝဲတမံၤမံၤဧါ. ယဟိဝၤယွၤ မ့ၢ်တၢ်ဘၣ်တ့ကစၢ်အဃိ အဝဲတလိၣ်ဘၣ် ပှၤဟီၣ်ခိၣ်ဖိအတၢ်ဟ့ၣ် ဒီးအတၢ်မၤစၢၤဘၣ်. ဘၣ်ဆၣ် လၢခံန့ၣ်စီၤဟ့းဘ့းလး နၢ်ပၢၢ်ထီၣ်ဝဲလၢ အဝဲမ့ၢ်ဟ့ၣ်တၢ်လၢအဂ့ၤကတၢၢ် လၢတၢ်သးအိၣ်အပူၤန့ၣ် ယဟိဝၤယွၤလၢ အပှဲၤဒီးတၢ်အဲၣ်တၢ်ကွံတဂၤအံၤ ကသးခုဝဲလီၤ.

၂၀, ၂၁. စီၤကၤယံၣ်ဒီးစီၤဟ့းဘ့းလး လုၢ်ထီၣ်တၢ်မနုၤလၢ ယဟိဝၤယွၤအအိၣ်လဲၣ်. ဒီးကစၢ်ယွၤ စံးဆၢက့ၤအဝဲသ့ၣ်ဒ်လဲၣ်.

^၂၀ စီၤဟ့းဘ့းလး ဃုထၢထီၣ်ဝဲသိအဝဲၢ်ကိ လၢအဂ့ၤကတၢၢ်တဖၣ် ဒ်သိးကလုၢ်ထီၣ်ဝဲဆူ ကစၢ်ယွၤအအိၣ်န့ၣ်လီၤ. တကတီၢ်ဃီန့ၣ် စီၤကၤယံၣ်စ့ၢ်ကီး ပာ်ဖှိၣ်ထီၣ်ဝဲတၤသူတၤသၣ်လၢ အသူၣ်ဝဲတဖၣ် ဒီးလုၢ်ထီၣ်ဝဲဆူ ယွၤအအိၣ်ဒ်သိး အကဒိးန့ၢ်ဘၣ်ဝဲတၢ်ဆိၣ်ဂ့ၤအဂီၢ်လီၤ. ဘၣ်ဆၣ်သနာ်က့ အတၢ်ပာ်သူၣ်ပာ်သးန့ၣ် တလီၤဂာ်ဒီး စီၤဟ့းဘ့းလးဘၣ်. ဖဲအဝဲသ့ၣ်ခံဂၤ ဟ့ၣ်လုၢ်ထီၣ်တၢ်အဆၢကတီၢ်န့ၣ် တၢ်မၤအသးဒ်လဲၣ်.

^၂၁ ဘၣ်သ့ၣ်သ့ၣ် စီၤအၤဒၣ်အဖိခွါခံဂၤအံၤ သူဝဲတၢ်လုၢ်လီၢ်ဒီးမ့ၣ်အူ လၢကလုၢ်ထီၣ်တၢ်အဂီၢ်န့ၣ်လီၤ. စီၤဟ့းဘ့းလးဒီးစီၤကၤယံၣ်န့ၣ် ကလဲၤလုၢ်ထီၣ်တၢ်ဖဲ ခ့ရူာ်တဖၣ်ထံၣ်ဝဲသ့အလီၢ်န့ၣ်လီၤ. ဖဲန့ၣ်အဆၢကတီၢ် လၢဟီၣ်ခိၣ်ချၢအံၤ ပှၤလၢအမၤတၢ်လၢ ယဟိဝၤယွၤအခၢၣ်စးန့ၣ် အိၣ်ဒၣ်ထဲခ့ရူာ်တဖၣ်အံၤလီၤ. ဒီးယဟိဝၤယွၤ စံးဆၢက့ၤ စီၤဟ့းဘ့းလးဒီးစီၤကၤယံၣ်ဒ်လဲၣ်. လံာ်စီဆှံစံးဝဲလၢ– “ဘၣ်ယွၤအသးလၢ စီၤဟ့းဘ့းလးဒီးအတၢ်မၤဘူၣ်လီၤ.” (၁ မိၤ. ၄:၄) ကစၢ်ယွၤ ဘၣ်သူၣ်ဘၣ်သးဝဲ စီၤဟ့းဘ့းလးအတၢ်လုၢ်ထီၣ် ဘၣ်ဆၣ် အဝဲပာ်ဖျါထီၣ်ဝဲလၢကျဲဒ်လဲၣ်န့ၣ် လံာ်စီဆှံတတဲဝဲဘၣ်.

၂၂, ၂၃. ဘၣ်မနုၤအဃိ ယဟိဝၤယွၤဘၣ်အသးလၢ စီၤဟ့းဘ့းလး အတၢ်ဟ့ၣ်လုၢ်ထီၣ်လဲၣ်.

^၂၂ ဘၣ်မနုၤအဃိ ကစၢ်ယွၤဘၣ်အသး လၢစီၤဟ့းဘ့းလး အတၢ်လုၢ်ထီၣ်လဲၣ်. ခီဖျိလၢ အတၢ်ဟ့ၣ်လုၢ်ထီၣ်ဂ့ၤဝဲအဃိဧါ. ဆၣ်ဖိကီၢ်ဖိန့ၣ် မ့ၢ်ကစၢ်ယွၤအတၢ်ဘၣ်တ့လၢအိၣ်ဒီး သးသမူန့ၣ်လီၤ. ဒီးတချုးလၢစီၤဟ့းဘ့းလး ဟ့ၣ်လုၢ်ထီၣ်ဆၣ်ဖိကီၢ်ဖိန့ၣ် အဝဲလူလီၤကွံာ်ဝဲအသွံၣ်လီၤ. အဝဲဟ့ၣ်လုၢ်ထီၣ်ဝဲဒ်အံၤအဃိ သွံၣ်အလုၢ်အပှ့ၤအိၣ်ဝဲထဲလဲၣ်န့ၣ် မ့ၢ်အဝဲနၢ်ပၢၢ်ဝဲစ့ၢ်ကီးဧါ. နံၣ်လၢအကယၤတဖၣ် လဲၤပူၤကွံာ်ဝံၤအလီၢ်ခံ ယဟိဝၤယွၤ မၤလိာ်ဝဲလၢ ပှၤကလုၢ်ထီၣ်ဝဲ သိဖိလၢအလၢအပှဲၤတဒုန့ၣ်လီၤ. ဒီးတၢ်လုၢ်ထီၣ်တခါအံၤန့ၣ် ဒိလီၤဝဲလၢ “ယွၤအသိဖိ” လၢအမ့ၢ် အဖိခွါလၢအလၢအပှဲၤ အတၢ်လုၢ်ထီၣ်သးန့ၣ်လီၤ. (ယိၤဟၣ် ၁:၂၉; ၂ မိၤ. ၁၂:၅-၇) ဘၣ်ဆၣ် ဘၣ်သ့ၣ်သ့ၣ် စီၤဟ့းဘ့းလး တနၢ်ပၢၢ်တၢ်ဂ့ၢ်သ့ၣ်တဖၣ်အံၤအါအါဘၣ်.

^၂၃ ပသ့ၣ်ညါလၢ စီၤဟ့းဘ့းလးန့ၣ် လုၢ်ထီၣ်ဝဲ တၢ်လၢအဂ့ၤကတၢၢ်န့ၣ်လီၤ. တမ့ၢ်ထဲ ယဟိဝၤယွၤ ဘၣ်အသးလၢ စီၤဟ့းဘ့းလး အတၢ်လုၢ်ထီၣ်တခါဘၣ်, ကစၢ်ယွၤကွၢ်ဝဲ အတၢ်ပာ်သူၣ်ပာ်သးစ့ၢ်ကီးလီၤ. ယဟိဝၤယွၤ ဘၣ်သူၣ်ဘၣ်သးဝဲ စီၤဟ့းဘ့းလး အတၢ်ဟ့ၣ်လုၢ်ထီၣ် မ့ၢ်လၢအဝဲအဲၣ်ယဟိဝၤယွၤဒီးနာ်အီၤအဃိလီၤ.

၂၄. (က) ဘၣ်ဃးဒီးစီၤကၤယံၣ် အတၢ်လုၢ်ထီၣ်န့ၣ် ပတဲလၢအတကြၢးဝဲဘၣ်ဝဲန့ၣ် ကသ့စ့ၢ်ကီးဧါ. (ခ) စီၤကၤယံၣ် လီၤဂာ်ဒီးပှၤအါဂၤ လၢမုၢ်မဆါတနံၤအံၤဒ်လဲၣ်.

^၂၄ မ့မ့ၢ်စီၤကၤယံၣ် အတၢ်ပာ်သူၣ်ပာ်သးန့ၣ် လီၤဆီဒီးစီၤဟ့းဘ့းလးဒိၣ်မးလီၤ. လၢတၢ်န့ၣ်အဃိ လံာ်စီဆှံစံးဝဲလၢ “စီၤကၤယံၣ်ဒီး အတၢ်မၤဘူၣ်န့ၣ်” တဘၣ်ယဟိဝၤယွၤအသးဘၣ်. (၁ မိၤ. ၄:၅) ဘၣ်ဃးဒီးစီၤကၤယံၣ် အတၢ်လုၢ်ထီၣ်န့ၣ် ပတဲလၢအတကြၢးဝဲဘၣ်ဝဲန့ၣ် ကသ့စ့ၢ်ကီးဧါ. တသ့ဘၣ်. လၢခံန့ၣ် ယွၤအတၢ်သိၣ်တၢ်သီ ပာ်ဖျါထီၣ်ဝဲလၢ ကစၢ်ယွၤဟ့ၣ်အခွဲးလၢ ပှၤအံၣ်စရ့လးဖိတဖၣ် ကလုၢ်ထီၣ်တၢ်လၢ တၤသူတၤသၣ်စ့ၢ်ကီးလီၤ. (၃ မိၤ. ၆:၁၄, ၁၅) ကစၢ်ယွၤတတူၢ်လိာ်ဝဲ စီၤကၤယံၣ်အတၢ်ဟ့ၣ်လုၢ်ထီၣ်မ့ၢ်လၢ “အတၢ်မၤဒၣ်ဝဲမ့ၢ်အအၢအသီ” အဃိန့ၣ်လီၤ. (ဖး ၁ ယိၤဟၣ် ၃:၁၂ တက့ၢ်.) ပှၤအါဂၤလၢ မုၢ်မဆါတနံၤအံၤ ဆိကမိၣ်ဝဲလၢ အဝဲသ့ၣ် မ့ၢ်လဲၤထီၣ်ဘါယွၤန့ၣ်လၢပှဲၤလံ. ဒီးစီၤကၤယံၣ်စ့ၢ်ကီး အတၢ်ဆိကမိၣ် လီၤဂာ်ဒ်န့ၣ်လီၤ. ဘၣ်ဆၣ် စီၤကၤယံၣ်တအဲၣ် ယဟိဝၤယွၤဒီးတနာ်အီၤန့ၣ် တယံာ်တမီၢ် အိၣ်ဖျါထီၣ်ဝဲလၢ အတၢ်ဖံးတၢ်မၤအပူၤလီၤ.

၂၅, ၂၆. ယဟိဝၤယွၤ ဟ့ၣ်ပလီၢ် စီၤကၤယံၣ်ဒ်လဲၣ်. ဒီးစီၤကၤယံၣ် မၤဆၢက့ၤဝဲဒ်လဲၣ်.

^၂၅ ဖဲစီၤကၤယံၣ် သ့ၣ်ညါဝဲလၢ ယဟိဝၤယွၤတဘၣ်သူၣ်ဘၣ်သး အတၢ်ဟ့ၣ်လုၢ်ထီၣ်အခါ မ့ၢ်အဝဲကွၢ်လိမၤဒိးဝဲ စီၤဟ့းဘ့းလး အဒိအတဲာ်စ့ၢ်ကီးဧါ. တကွၢ်လိဝဲဘၣ်. လၢန့ၣ်အမဲာ်ညါ အဝဲသူၣ်ဒိၣ်သးဖျိးထီၣ်အပုၢ် ဒီးသးဟ့အီၤဖးဆါညါ. ဖဲယဟိဝၤယွၤ ထံၣ်ဘၣ်ဝဲစီၤကၤယံၣ်အိၣ်ဒီး တၢ်ပာ်သူၣ်ပာ်သး လၢအတကြၢးတဘၣ်အခါ ကစၢ်ယွၤဂုာ်ကျဲးစၢးမၤစၢၤအီၤ ဒ်သိးအကဆီတလဲကွံာ် အတၢ်ပာ်သူၣ်ပာ်သး လၢအတဂ့ၤအံၤန့ၣ်လီၤ. ဒီးကစၢ်ယွၤ ဟ့ၣ်ပလီၢ်အီၤဒ်သိး အတၢ်သးက့ၣ်န့ၣ် သုတဆှၢအီၤလၢ တၢ်ဒဲးဘးအကျဲတဂ့ၤအဂီၢ်လီၤ. တကးဒံးဘၣ် ကစၢ်ယွၤစံးဘၣ်အီၤလၢ နမ့ၢ်ဆီတလဲ နတၢ်ပာ်သူၣ်ပာ်သးန့ၣ် တၢ်က “ပာ်ထီၣ်ထီနၤ” လီၤ.—၁ မိၤ. ၄:၆, ၇.

^၂၆ စီၤကၤယံၣ်တတူၢ်လိာ် ကစၢ်ယွၤ အတၢ်သိၣ်က့ၤသီက့ၤအီၤဘၣ်. ဒီးအဝဲကွဲမုာ်အပုၢ်လၢ ကလဲၤဒီးအီၤ လၢပျီပူၤလီၤ. မ့ၢ်လၢစီၤဟ့းဘ့းလး နာ်န့ၢ်အကၠီအဃိ အဝဲလဲၤဃုာ်ဒီးအီၤလီၤ. ဖဲန့ၣ်အခါ စီၤကၤယံၣ်တီၢ်ဝဲအပုၢ် တုၤအသံလီၤ. (၁ မိၤ. ၄:၈) လၢတၢ်န့ၣ်အဃိ စီၤဟ့းဘ့းလး မ့ၢ်ပှၤအဆိကတၢၢ်တဂၤ လၢအတူၢ်ဘၣ် တၢ်မၤအၢမၤသီ ခီဖျိလၢ အတၢ်နာ်အဃိန့ၣ်လီၤ. အဝဲသံဘၣ်ဆၣ် ကစၢ်ယွၤတသးပ့ၤနီၣ်အီၤဘၣ်.

၂၇. (က) ဘၣ်မနုၤအဃိ ပနာ်သ့လၢစီၤဟ့းဘ့းလး ကဂဲၤဆၢထၢၣ်သမူထီၣ်က့ၤလဲၣ် (ခ) ဒ်သိးပကထံၣ်ဘၣ် စီၤဟ့းဘ့းလးအဂီၢ် ပကဘၣ်မၤဒ်လဲၣ်.

^၂၇ လံာ်စီဆှံပာ်ဖျါထီၣ်ဝဲလၢ စီၤဟ့းဘ့းလးအသွံၣ်ကိးထီၣ် ယဟိဝၤယွၤ လၢကဟ့ၣ်ကၣ်က့ၤတၢ် လၢတၢ်စံၣ်ညီၣ်တီအဂီၢ်လီၤ. ဒီးကစၢ်ယွၤဟ့ၣ်ကၣ်က့ၤတၢ်လၢ စီၤဟ့းဘ့းလးအဂီၢ် ဒီးစံၣ်ညီၣ်ဝဲ စီၤကၤယံၣ်လီၤ. (၁ မိၤ. ၄:၉-၁၂) စီၤဟ့းဘ့းလးအတၢ်နာ်န့ၣ် ကတိၤတၢ်ဒီးပှၤတုၤလီၤလၢ မုၢ်မဆါတနံၤအံၤလီၤ. ဖဲစီၤဟ့းဘ့းလး ဘၣ်တၢ်မၤသံအီၤအခါ အသးနံၣ်အိၣ်ဝဲထဲ အနံၣ်တကယၤဃၣ်ဃၣ်န့ၣ်လီၤ. ပမ့ၢ်ထိၣ်သတြီၤအသးနံၣ်ဒီး ပှၤလၢအအိၣ်မူဖဲအစိၤန့ၣ် အဝဲအိၣ်မူဘၣ်ဝဲ တယံာ်ဘၣ်. ဘၣ်ဆၣ် တချုးလၢစီၤဟ့းဘ့းလးသံဝဲအခါန့ၣ် အဝဲသ့ၣ်ညါဝဲလၢ အပၢ်ယဟိဝၤယွၤလၢမူခိၣ် အဲၣ်အီၤဒီးဘၣ်အသးလၢအီၤလီၤ. (ဧ့ၤ. ၁၁:၄) လၢတၢ်န့ၣ်အဃိ ပနာ်သ့လၢ ယွၤကသ့ၣ်နီၣ်ထီၣ်က့ၤ စီၤဟ့းဘ့းလး ဒီးဖဲဟီၣ်ခိၣ်ကဲထီၣ် ပၤရဒံစူးအဆၢကတီၢ်န့ၣ် အဝဲကဂဲၤဆၢထၢၣ်သမူထီၣ်က့ၤဝဲလီၤ. (ယိၤဟၣ် ၅:၂၈, ၂၉) မ့ၢ်နအဲၣ်ဒိး ထံၣ်လိာ်သး ဒီးအီၤလၢတၢ်လီၢ်ဖဲန့ၣ်ဧါ. နမ့ၢ်ပာ်လီၤနသးဂၢၢ်ဂၢၢ်ကျၢၤကျၢၤလၢ နကကွၢ်လိမၤဒိး စီၤဟ့းဘ့းလးအတၢ်နာ်န့ၣ် နကထံၣ်လိာ်သးဒီးအီၤ လၢဟီၣ်ခိၣ်ပၤရဒံစူးအပူၤ သပှၢ်ကတၢၢ်လီၤ.