စးထီၣ်လၢ တၢ်ပူၤဖျဲးလၢကီၢ်အဲၤကူပတူးအဆၢကတီၢ် တုၤလၢ ပှၤအံၣ်စရ့လးအစီၤပၤအဆိကတၢၢ်အစိၤ

မိၤၡ့ထုးထီၣ်ပှၤအံၣ်စရ့လးဖိလၢ ကီၢ်အဲၤကူပတူး လၢတၢ်အကုၢ်အပှၤအဖီလာ်ဝံၤ ဟဲက့ၤကိးအီၤဆူကစၢၢ်စံၤနါန့ၣ်လီၤ. ဖဲတၢ်လီၢ်အဝဲန့ၣ် ယွၤဟ့ၣ်လီၤအဝဲသ့ၣ် တၢ်မၤလိာ်န့ၣ်လီၤ. လၢတၢ်န့ၣ်အလီၢ်ခံ မိၤၡ့မၢလီၤပှၤ ၁၂ ဂၤ လဲၤကွၢ်ဟုၣ်ကီၢ်ကနၤဧၣ်န့ၣ်လီၤ. ဘၣ်ဆၣ်, ပှၤအဂၤ ၁၀ ဟဲက့ၤစိာ်တၢ်ကစီၣ်အအၢန့ၣ်လီၤ. လၢအဝဲသ့ၣ်အဃိ ပှၤတဖၣ်အသးအိၣ်ထီၣ်ဝဲလၢ ကက့ၤကဒါက့ၤဆူ ကီၢ်အဲၤကူပတူးန့ၣ်လီၤ. လၢတၢ်စူၢ်တၢ်နာ်တအိၣ်ဒ်အံၤအဃိ ကစၢ်ယွၤစံၣ်ညီၣ် ပှၤအံၣ်စရ့လးဖိတဖၣ်လၢ ကဟးဝ့ၤဝီၤလၢပှၢ်လၢ်ကျါ အနံၣ်လွံၢ်ဆံန့ၣ်လီၤ.

လၢခံန့ၣ် ယွၤဃုထၢယိၤၡူလၢ ကဆှၢနုာ်ပှၤအံၣ်စရ့လးဖိတဖၣ်ဆူ ကီၢ်ကနၤဧၣ်အပူၤန့ၣ်လီၤ. လၢအဝဲသ့ၣ်ကမၤန့ၢ် ကီၢ်ကနၤဧၣ်အဂီၢ် ယဟိဝၤဒုးကဲထီၣ်တ့ၢ်ဝဲ တၢ်လီၤလးအကလုာ်ကလုာ်န့ၣ်လီၤ. မၤအိၣ်ပတုာ် တဒီလီၤသံး ထံကျိယၢ်ဒ့ၣ်န့ၣ်လီၤ. မၤလီၤပှီၢ်တ့ၢ်ဝဲဒၣ် ယရံၤဃိအဝ့ၢ်ခိၣ်ဒူန့ၣ်လီၤ. ဝံၤဒီး မၤအိၣ်ကတီၢ်မုၢ်ဒီနံၤညါန့ၣ်လီၤ. တုၤအယံာ်ဃုနံၣ်ဒီး ဒုမၤန့ၢ်ဝဲကီၢ်လၢ ကနၤဧၣ်ဖိတဖၣ်အစုပူၤန့ၣ်လီၤ.

စးထီၣ်လၢယိၤၡူန့ၣ် ပှၤစံၣ်ညီၣ်ကွီၢ်တဂၤဘၣ်တဂၤ ပၢပှၤအံၣ်စရ့လးဖိတဖၣ် ၃၅၆ နံၣ်န့ၣ်လီၤ. ဘါရး, ကံးဒဧိၣ်, ယံးဖသၤ, ၡံၣ်ၡိၣ် ဃုာ်ဒီး ၡမူၤအ့လး, ပှၤစံၣ်ညီၣ်ကွီၢ်အါဂၤအဂ့ၢ်န့ၣ် ပသ့ၣ်ညါဘၣ်ဝဲလီၤ. ပဖးဘၣ်စ့ၢ်ကီး ရၤဃး, ဒဘိရၤ, ယအ့လး, ရူၤသး, နၤဧမံဒီး, ဒလံလၤ ပိာ်မုၢ်တဖၣ်အဂ့ၢ်န့ၣ်လီၤ. လၢ တၢ်နီၤဖး ၃ အပူၤန့ၣ် ပာ်ဃုာ်တၢ်ဂ့ၢ်တၢ်ကျိၤလၢ ၃၉၆ နံၣ်အတီၢ်ပူၤန့ၣ်လီၤ.