ယဟိဝၤယွၤ ဟ့ၣ်လီၤအတၢ်သိၣ်တၢ်သီ

ပှၤအံၣ်စရ့လးဖိတဖၣ် ဟးထီၣ်လၢကီၢ်အဲၤကူပတူးဝံၤ ယံာ်ခံလါန့ၣ် တုၤလၢကစၢၢ်စံၤနါ, လၢတၢ်ကိးအီၤလၢ ကစၢၢ်ဃိၤရ့းစ့ၢ်ကီးန့ၣ်လီၤ. တၢ်လီၢ်အံၤ မ့ၢ်ဝဲယဟိဝၤ ကတိၤတ့ၢ်တၢ်ဒီးမိၤၡ့ လၢတပှီာ်လၢမ့ၣ်အူအီၣ်အပူၤန့ၣ်လီၤ. ပှၤတဖၣ်န့ၣ်အိၣ်ပတုာ်ဝဲဖဲန့ၣ်ဝံၤ အိၣ်ဘှံးဝဲတစိၢ်တလီၢ်န့ၣ်လီၤ.

ပှၤတဖၣ် ခိးဝဲဒၣ်လၢကစၢၢ်ဂံၢ်ထံးအခါ မိၤၡ့တခီ လဲၤထီၣ်ဝဲဆူကစၢၢ်ခိၣ်န့ၣ်လီၤ. တုၤလၢကစၢၢ်ဒီခိၣ်အခါ ကစၢ်ယွၤစံးဘၣ်မိၤၡ့လၢ အအဲၣ်ဒိးဝဲ ပှၤအံၣ်စရ့လးဖိတဖၣ် ကဒိကနၣ်အတၢ်ကတိၤဒီး ကကဲထီၣ် အပှၤလီၤဆီန့ၣ်လီၤ. ဖဲမိၤၡ့ဟဲက့ၤလီၤဝဲလၢ ကစၢၢ်ခိၣ်အခါ စံးဘၣ်အဝဲသ့ၣ် တၢ်လၢယဟိဝၤတဲဘၣ်အီၤန့ၣ်လီၤ. ပှၤတဖၣ်န့ၣ် မ့ၢ်လၢအဲၣ်ဒိးကဲ ယွၤအပှၤဂီၢ်မုၢ်လၢအလီၤဆီအဃိ စံးဆၢဝဲဒၣ်လၢ ကဒိကနၣ်ဝဲသ့ၣ် ယဟိဝၤအကလုၢ်န့ၣ်လီၤ.

ဖဲဆၢကတီၢ်န့ၣ် ယဟိဝၤမၤဝဲဒၣ် တၢ်လီၤလးတခါန့ၣ်လီၤ. မၤခုၣ်ထီၣ်ကစၢၢ်ဒီခိၣ်လၢ မ့ၣ်အူလုၢ်န့ၣ်လီၤ. ဝံၤဒီး မၤသီၣ်မၤသဲလီအသီၣ်စ့ၢ်ကီးန့ၣ်လီၤ. စံးဘၣ်ပှၤတဖၣ်န့ၣ်လၢ ‘ယမ့ၢ် ယဟိဝၤသုကစၢ်ယွၤ လၢအအုၣ်က့ၤခီၣ်က့ၤသုလၢ ကီၢ်အဲၤကူပတူးန့ၣ်လီၤ.’ ဒီးမၤလိာ်ဝဲ ‘လၢယၤအမဲာ်ညါန့ၣ် သုတဘၣ်ဘူၣ်ဘါယွၤအဂုၤအဂၤနီတဂၤဘၣ်’ န့ၣ်လီၤ.

ဟ့ၣ်ကဒီးဝဲတၢ်မၤလိာ် မ့တမ့ၢ် တၢ်သိၣ်တၢ်သီ အဂၤခွံဘီန့ၣ်လီၤ. ပှၤတဖၣ်တခီပျံၤတၢ်ဒိၣ်မးန့ၣ်လီၤ. အဝဲသ့ၣ်တဲဘၣ်မိၤၡ့လၢ ‘မ်နကတိၤတၢ်ဒီးပှၤန့ၣ်တက့ၢ်. ယွၤမ့ၢ်ကတိၤတၢ်ဒီးပှၤန့ၣ် ပပျံၤလၢပကသံဘၣ်ဖုးလီၤ’ န့ၣ်လီၤ.

လၢခံန့ၣ် ယွၤစံးမိၤၡ့ဒ်အံၤလီၤ. ‘ထီၣ်ကစၢၢ်ဒီး ဟဲဆူယအိၣ်တက့ၢ်. ယကဟ့ၣ်လီၤနၤ လၢၢ်ဘ့ၣ်ဘၣ်ခံဘ့ၣ်လၢ တၢ်မၤလိာ်တဖၣ်လၢ ယအဲၣ်ဒိးအဝဲသ့ၣ်တိၢ်န့ၢ် ဘၣ်တၢ်ကွဲးဃာ် န့ၣ်လီၤ.’ ဒ်န့ၣ်အဃိ မိၤၡ့ဘၣ်ထီၣ်ကဒီးကစၢၢ် လၢခံတဘျီန့ၣ်လီၤ. အိၣ်ဝဲဒၣ်ဖဲန့ၣ် နံၤ ၄၀ ဒီးနၤ ၄၀ န့ၣ်လီၤ.

ကစၢ်ယွၤန့ၣ် ထုးထီၣ်ဟ့ၣ်အပှၤတဖၣ် တၢ်သိၣ်တၢ်သီအါမးန့ၣ်လီၤ. မိၤၡ့ကွဲးနီၣ်ဃာ် တၢ်သိၣ်တၢ်သီတဖၣ်န့ၣ်လီၤ. ယွၤဟ့ၣ်မိၤၡ့ လၢၢ်ဘ့ၣ်ဘၣ်ခံဘ့ၣ်စ့ၢ်ကီးန့ၣ်လီၤ. လၢလၢၢ်ဘ့ၣ်ဘၣ်တဖၣ်အံၤအလိၤန့ၣ် ယွၤကွဲးတၢ်သိၣ်တၢ်သီအဘီ ၁၀ လၢအကစၢ်ဒၣ်ဝဲ, လၢအတဲတ့ၢ်ဝဲ ပှၤခဲလၢာ်န့ၣ်လီၤ. တၢ်န့ၣ် ဘၣ်တၢ်ကိးအီၤလၢ တၢ်မၤလိာ်အဘီ ၁၀ န့ၣ်လီၤ.

တၢ်မၤလိာ်အဘီတဆံ မ့ၢ်တၢ်သိၣ်တၢ်သီလၢအကါဒိၣ်န့ၣ်လီၤ. တၢ်သိၣ်တၢ်သီအဂၤလၢ ယွၤဟ့ၣ်တ့ၢ်ပှၤအံၣ်စရ့လးဖိတဖၣ်စ့ၢ်ကီး အကါဒိၣ်ဝဲဒၣ်န့ၣ်လီၤ. တၢ်သိၣ်တၢ်သီတခါစံးဝဲ, ‘အဲၣ်ယွၤနကစၢ်လၢ နသူၣ်ကံၢ်သးလဲ, ဒီးနသးဒီဖျၢၣ်ညါ, ဒီးနဂံၢ်နဘါခဲလၢာ်တက့ၢ်’ န့ၣ်လီၤ. လၢခံတခါစံးဝဲ, ‘အဲၣ်ပှၤလၢနဃၢၤ ဒ်နအဲၣ်လီၤနသးအသိးတက့ၢ်’ န့ၣ်လီၤ. ယွၤအဖိခွါယ့ၣ်ၡူး စံးဝဲဒၣ်, လၢတၢ်သိၣ်တၢ်သီလၢ ယဟိဝၤဟ့ၣ်တ့ၢ် ပှၤအံၣ်စရ့လးဖိတဖၣ်အကျါန့ၣ် တၢ်သိၣ်တၢ်သီခံခါအံၤ မ့ၢ်အဒိၣ်ကတၢၢ်န့ၣ်လီၤ. လၢခံန့ၣ် ပကသ့ၣ်ညါဘၣ် တၢ်ဂ့ၢ်တၢ်ကျိၤတဖၣ်လၢ ဘၣ်ဃး ကစၢ်ယွၤအဖိခွါ ဒီးအတၢ်စံၣ်တဲၤတဲလီၤတဖၣ်အဂ့ၢ် အါဒိၣ်မးဒံးန့ၣ်လီၤ.