တၢ်ဘူၣ်တၢ်ဘါအဒဲစီဆှံ အဂ့ၢ်

တၢ်သူၣ်ထီၣ်အဝဲအံၤ မ့ၢ်မနုၤလဲၣ် သုသ့ၣ်ညါဧါ. မ့ၢ်ဒဲအလီၤဆီတခါလၢ ပှၤကဘူၣ်ထီၣ်ဘါထီၣ် ယဟိဝၤအဂီၢ်န့ၣ်လီၤ. ဘၣ်တၢ်ကိးအီၤလၢ တၢ်ဘူၣ်တၢ်ဘါအဒဲစီဆှံလီၤ. ပှၤတဖၣ် ဟးထီၣ်လၢအဲၤကူပတူးအလီၢ်ခံ တနံၣ်အတီၢ်ပူၤန့ၣ် သူၣ်ထီၣ်ဝဲသ့ၣ်ဝံၤန့ၣ်လီၤ. မတၤမၢအဘှီဝဲသ့ၣ်လဲၣ်န့ၣ် နသ့ၣ်ညါဧါ.

မ့ၢ်ယဟိဝၤမၢ အဘှီထီၣ်ဝဲန့ၣ်လီၤ. ဖဲမိၤၡ့အိၣ်လၢကစၢၢ်စံၤနါအဒီခိၣ်အခါ ကဘၣ်သူၣ်ထီၣ်ဝဲဒ်လဲၣ်န့ၣ် ယဟိဝၤနဲၣ်အီၤန့ၣ်လီၤ. မၢအဘှီဝဲ ဒ်သိးတၢ်ဘ့ၣ်လီၤကွံာ်အီၤ တခါဘၣ်တခါကညီအဂီၢ်န့ၣ်လီၤ. မ့ၢ်မၤဒ်န့ၣ်မးဒီး ဒဲအကူာ်တဖၣ် ဘၣ်တၢ်သုးအီၤဆူ တၢ်လီၢ်အဂၤတလီၢ်ဒီး တၢ်သူၣ်ထီၣ်က့ၤဒဲကညီဝဲလီၤ. လၢတၢ်န့ၣ်အဃိ ပှၤအံၣ်စရ့လးဖိ လဲၤတၢ်လၢပှၢ်လၢ်ကျါအခါ လဲၤစိာ်ဝဲဒဲစီဆှံဒီးအဝဲသ့ၣ်န့ၣ်လီၤ.

ပမ့ၢ်ကွၢ်ဒၢးအအံၣ်လၢ အိၣ်လၢဒဲအသနၢၣ်တကပၤအပူၤသၢပျၢၤ ပထံၣ်ဘၣ်တလါတဖျၢၣ်သ့လီၤ. အဝဲန့ၣ်ဘၣ်တၢ်ကိးအီၤလၢ တၢ်အၢၣ်လီၤအီလီၤအတလါလီၤ. တလါဖီခိၣ်န့ၣ် မူခိၣ်ကလူး မ့တမ့ၢ် ခ့ရူာ်ခံဂၤအဂီၤ လၢဘၣ်တၢ်မၤအီၤလၢထူ အိၣ်လၢ တလါတခီတကပၤအကတၢၢ်စုာ်စုာ်န့ၣ်လီၤ. မ့ၢ်လၢမိၤၡ့စုးသ့ၣ်ဖး လၢၢ်ဘ့ၣ်ဘၣ်ခံဘ့ၣ်အဃိ ကစၢ်ယွၤဘၣ်ကွဲးကဒီးဝဲ တၢ်မၤလိာ်အဘီတဆံ လၢလၢၢ်ဘ့ၣ်ဘၣ်အဂၤခံဘ့ၣ်အလိၤန့ၣ်လီၤ. လၢၢ်ဘ့ၣ်ဘၣ်ခံဘ့ၣ်အံၤ ဘၣ်တၢ်ပာ်အီၤလၢ တၢ်အၢၣ်လီၤအီလီၤတလါပူၤလီၤ. ဝံၤဒီး တရံၢ်တဖျၢၣ်လၢအအိၣ်ဒီး ကိၣ်မၤနၤလၢအပူၤစ့ၢ်ကီး ဘၣ်တၢ်ဒၢနုာ်ဃာ်အီၤလၢ တလါပူၤန့ၣ်လီၤ. ကိၣ်မၤနၤစံးတၢ်န့ၣ်မ့ၢ်မနုၤလဲၣ်. သုသ့ၣ်နီၣ်ထီၣ်ဧါ.

မိၤၡ့အဝဲၢ် အၤဟရိၣ်န့ၣ် မ့ၢ်ပှၤလၢ ယဟိဝၤဃုထၢအီၤလၢအကမၤ ပှၤလုၢ်တၢ်အခိၣ်အဒိၣ်ကတၢၢ်န့ၣ်လီၤ. အဝဲဒၣ်ဘၣ်ဆှၢတၢ် ဖဲပှၤဘူၣ်ထီၣ်ဘါထီၣ်ယဟိဝၤအခါ န့ၣ်လီၤ. အဖိခွါတဖၣ်စ့ၢ်ကီး မၤပှၤလုၢ်တၢ်အခိၣ်တဖၣ်န့ၣ်လီၤ.

ကွၢ်ဒဲစီဆှံအဒၢးဖးဒိၣ်တက့ၢ်. အိၣ်ဒၢးအအံၣ်ခံစးန့ၣ်လီၤ. သုထံၣ်တလါဖိ လၢမ့ၣ်အူလုၢ်ဟးထီၣ်န့ၣ်ဧါ. ဖဲအံၤလီၤ, ပှၤကိးလၢတၢ်နၢမူတဖၣ် အတၢ်နၢမူန့ၣ် ဘၣ်တၢ်ဆှိကဲၤဝဲန့ၣ်လီၤ. ဝံၤဒီး, အိၣ်ဒီးမ့ၣ်အူဒၢအထူၣ် လၢအအိၣ်ဒီးမ့ၣ်အူဒၢနွံခါစ့ၢ်ကီးန့ၣ်လီၤ. တၢ်သၢမံၤတမံၤလၢ အအိၣ်လၢဒၢးပူၤန့ၣ် မ့ၢ်ဝဲစီၤနီၤခိၣ်လီၤ. အဖီခိၣ်န့ၣ် ဘၣ်တၢ်ပာ်ထီၣ်ဃာ် ကိၣ် ၁၂ ဖျၢၣ်လီၤ.

လၢဒဲစီဆှံအဂၢၤပူၤန့ၣ် သရာ်ဖးဒိၣ်လၢအပှဲၤဒီးထံ အိၣ်တဖျၢၣ်လီၤ. ပှၤလုၢ်တၢ်အခိၣ်တဖၣ် ဘၣ်သူဝဲဒၣ်တၢ်အံၤလၢ ကသ့စီတၢ်အဂီၢ်လီၤ. အိၣ်ဒံးဒီးတၢ်လုၢ်လီၢ်ဖးဒိၣ်တဖျၢၣ်န့ၣ်လီၤ. လၢတၢ်အံၤအဖီခိၣ်န့ၣ် ဆၣ်ဖိကီၣ်ဖိလၢ တၢ်မၤသံအီၤတဖၣ်န့ၣ် ဘၣ်တၢ်လုၢ်ထီၣ်အီၤ လၢယဟိဝၤအဂီၢ်လီၤ. ဒဲစီဆှံန့ၣ် ဘၣ်တၢ်ဆီလီၤအီၤလၢ ဒဲကဝီၤအခၢၣ်သးလိၤလိၤဒီး ပှၤအံၣ်စရ့လးဖိတဖၣ် အိၣ်ဝးတရံးဝဲသ့ၣ် ဒဲစီဆှံန့ၣ်လီၤ.