တၢ်မၤလိ ၂၅
ဒဲစီဆှံလၢတၢ်ဘူၣ်ထီၣ်ဘါထီၣ်အဂီၢ်
ဖဲစီၤမိၤၡ့အိၣ်လၢ ကစၢၢ်စံၤနါလိၤအခါ ယဟိဝၤယွၤ တဲဘၣ်အီၤလၢ ကဘၣ်တ့ထီၣ်ဝဲ ဒဲလီၤဆီတဖျၢၣ်လၢ ကဘၣ်တၢ်ကိးအီၤလၢ ဒဲစီဆှံ. ဒဲစီဆှံအံၤ ကကဲထီၣ်ဝဲ တၢ်လီၢ်လၢ ပှၤအံၣ်စရ့လးဖိတဖၣ် ကဘူၣ်ထီၣ်ဘါထီၣ်ဝဲ ယဟိဝၤယွၤ. ဖဲပှၤအံၣ်စရ့လးဖိ သုးလီၢ်သုးကျဲအခါန့ၣ် အဝဲသ့ၣ် ကဘၣ်စိာ်ဃုာ်ဝဲဒီး ဒဲစီဆှံအံၤ.
ယဟိဝၤယွၤတဲဘၣ် စီၤမိၤၡ့လၢ ‘မၢပှၤဂီၢ်မုၢ်တဖၣ် ဟဲဟ့ၣ်လီၤတၢ်လၢ အအိၣ်ဒီးအဝဲသ့ၣ် ဒ်သိး တ့ထီၣ်ဝဲ ဒဲစီဆှံ ကန့ၢ်အဂီၢ်.’ ပှၤအံၣ်စရ့လးဖိတဖၣ် ဟဲဟ့ၣ်လီၤဝဲထူ, စ့, တိၢ်ဘီ, လၢၢ်လၢ အလုၢ်ဒိၣ်ပှ့ၤဒိၣ် ဒီးထံဖှံၣ်တဖၣ်. အဝဲသ့ၣ် ဟ့ၣ်လီၤစ့ၢ်ကီးဝဲ သိအဆူၣ်, တၢ်ကံးညာ်, ဆၣ်ဖိကီၢ်ဖိအဘ့ၣ် ဒီးတၢ်အဂုၤအဂၤတဖၣ်. ခီဖျိလၢ ပှၤအံၣ်စရ့လးဖိတဖၣ် သးအိၣ်ဟ့ၣ်တၢ် အဃိ စီၤမိၤၡ့ဘၣ်တဲက့ၤ အဝဲသ့ၣ်လၢ ‘ပတၢ်ဖိတၢ်လံၤ အိၣ်အါလံ. တဘၣ်ဟဲစိာ်အါထီၣ် လၢၤတဂ့ၤ.’
ပိာ်မုၣ်ဒီးပိာ်ခွါတဖၣ်လၢ အိၣ်ဒီးတၢ်သ့တၢ်ဘၣ်န့ၣ် ဟဲသူၣ်ထီၣ်စၢၤဝဲ ဒဲစီဆှံ. ယဟိဝၤယွၤ ဟ့ၣ်အဝဲသ့ၣ် တၢ်ကူၣ်သ့လၢ ကတ့ထီၣ်ဝဲ ဒဲစီဆှံအဂီၢ်. အဝဲသ့ၣ်တနီၤန့ၣ် လ့ၢ်လုၣ် ဒီးတနီၤထါတၢ်ကံးညာ် မ့တမ့ၢ် ဆးဃံဆးလၤထီၣ် တၢ်ကံးညာ်. ပှၤဂၤတနီၤဂူာ်လၢၢ်, မၤတၢ်လၢထူ မ့တမ့ၢ် မၤတၢ်လၢသ့ၣ်.
ပှၤအံၣ်စရ့လးဖိတဖၣ် တ့ထီၣ်ဝဲ ဒဲစီဆှံဒ် ယဟိဝၤယွၤ တဲဘၣ်အဝဲသ့ၣ်အသိး. အဝဲသ့ၣ် ဆးဝဲယၣ်ဘျးသဒၢ လၢအဃံအလၤတဘ့ၣ်. ယၣ်ဘျးသဒၢတဘ့ၣ်အံၤ ဘၣ်တၢ်ဘျးလီၤအီၤလၢ တၢ်လီၢ်စီဆှံ ဒီးတၢ်လီၢ်စီဆှံကတၢၢ် အဘၢၣ်စၢၤ. လၢတၢ်လီၢ်စီဆှံကတၢၢ်န့ၣ် တၢ်အၢၣ်လီၤအီလီၤအတလါ အိၣ်ဝဲ. တလါအံၤဘၣ်တၢ်တ့အီၤလၢ သ့ၣ်ဖှ့ၡံးတၤဒီးထူ. လၢတၢ်လီၢ်စီဆှံ အပူၤန့ၣ် အိၣ်ဒီးမ့ၣ်အူဒၢမိၢ်ပှၢ်ထူ, စီၢ်နီၤခိၣ်တဖျၢၣ် ဒီးတၢ်ဆိၣ်ကဲၤနၢမူ အတၢ်လုၢ်လီၢ်တခါ. လၢဒဲစီဆှံအဂၢၤန့ၣ် ထံဒၢတိၢ်ဘီ ဒီးတၢ်လုၢ်လီၢ်ဖးဒိၣ်တခါ အိၣ်ဝဲ. တၢ်အၢၣ်လီၤအီလီၤတလါန့ၣ် ဒုးသ့ၣ်နီၣ်ထီၣ်က့ၤ ပှၤအံၣ်စရ့လးဖိတဖၣ်လၢ အဝဲသ့ၣ် မၤတၢ်အၢၣ်လီၤလၢ ကဒိကနၣ် ယဟိဝၤယွၤ အကလုၢ်.
ယဟိဝၤယွၤ ဃုထၢထီၣ် စီၤအၤဟရိၣ် ဒီးစီၤအၤဟရိၣ် အဖိခွါတဖၣ်လၢ ကမၤတၢ်လၢ ဒဲစီဆှံအပူၤ ဒ်ပှၤလုၢ်တၢ်ဒိၣ်တဖၣ်. အဝဲသ့ၣ် မၤတၢ်ဖဲန့ၣ် ဒီးကဘၣ်ဟ့ၣ်လုၢ်ထီၣ်တၢ်လၢ ယဟိဝၤယွၤအအိၣ်. ပှၤလၢ အလဲၤနုာ်လီၤလၢ တၢ်လီၢ်စီဆှံကတၢၢ်အပူၤ သ့ဝဲန့ၣ် မ့ၢ်ထဲပှၤလုၢ်တၢ်ခိၣ် အဒိၣ်ကတၢၢ် စီၤအၤဟရိၣ်တဂၤဧိၤ. စီၤအၤဟရိၣ် လဲၤနုာ်လီၤဝဲလၢ တၢ်လီၢ်စီဆှံကတၢၢ်အပူၤ တနံၣ်တဘျီ ဒ်သိး ကလုၢ်ထီၣ်တၢ်လၢ အတၢ်ဒဲးဘး, အဟံၣ်ဖိဃီဖိ အတၢ်ဒဲးဘး ဒီးလၢပှၤအံၣ်စရ့လးဖိ အတၢ်ဒဲးဘးအဂီၢ်.
ပှၤအံၣ်စရ့လးဖိတဖၣ် ဟးထီၣ်လၢ ကီၢ်အဲၤကူပတူးအပူၤ တနံၣ်ဝံၤ အလီၢ်ခံန့ၣ် အဝဲသ့ၣ် တ့ထီၣ်ဝဲ ဒဲစီဆှံဝံၤဝဲ. ခဲအံၤ အဝဲသ့ၣ် အိၣ်ဒီးတၢ်လီၢ်လၢ ကဘူၣ်ထီၣ်ဘါထီၣ် ယဟိဝၤယွၤအဂီၢ်.
ဒဲစီဆှံန့ၣ် ပှဲၤဝဲဒီး ယဟိဝၤယွၤ အစိကမီၤ ဒီးယဟိဝၤယွၤ မၤဖျါထီၣ် တၢ်အၢၣ်လၢ ဒဲစီဆှံအဖီခိၣ်. ဖဲတၢ်အၢၣ်အိၣ်လၢ ဒဲစီဆှံအဖီခိၣ်န့ၣ် ပှၤအံၣ်စရ့လးဖိတဖၣ် ကဘၣ်အိၣ်ဝဲဖဲန့ၣ်. ဘၣ်ဆၣ် ဖဲတၢ်အၢၣ် မ့ၢ်သုးအသးန့ၣ် ပှၤအံၣ်စရ့လးဖိတဖၣ် သ့ၣ်ညါဝဲလၢအဝဲသ့ၣ် ကဘၣ်သုးအလီၢ်. အဝဲသ့ၣ်စိာ်ဃုာ်ဒီး ဒဲစီဆှံဒီးပိာ်ထီၣ်ဝဲ တၢ်အၢၣ်အခံ.
“ဒီးယနၢ်ဟူ တၢ်ကလုၢ်သီၣ်ဖးဒိၣ်လၢ လီၢ်ပစိာ်အအိၣ် တဲဝဲလၢ ‘ကွၢ်မီၤ, ကစၢ်ယွၤအဒဲ အိၣ်ဒီးပှၤဟီၣ်ခိၣ်ဖိလီၤ. ဒီးကစၢ်ယွၤ ကအိၣ်ဝဲဆိးဝဲဒီးအဝဲသ့ၣ် ဒီးအဝဲသ့ၣ် ကမ့ၢ်အပှၤဂီၢ်မုၢ်လီၤ. ဒီးကစၢ်ယွၤ အနီၢ်ကစၢ်န့ၣ် ကအိၣ်ဒီးအဝဲသ့ၣ်လီၤ.’”—လီၣ်ဖျါ ၂၁:၃