စးထီၣ်လၢ တၢ်ဘၣ်စၢဃာ်ဒ် ဘၤဘူၤလိၣ်အကုၢ်အကတီၢ် တုၤလၢ ဝ့ၢ်ယရူၤၡလ့ၣ်အဝ့ၢ်ခိၣ်ဒူ ဘၣ်တၢ်သူၣ်ထီၣ်က့ၤအီၤအကတီၢ်

ဖဲပှၤအံၣ်စရ့လးဖိတဖၣ် ဘၣ်တၢ်စၢဃာ်လၢ ကီၢ်ဘၤဘူၤလိၣ်အခါန့ၣ် ဘၣ်တၢ်မၤကွၢ်အီၤလၢတၢ်စူၢ်တၢ်နာ် အကလုာ်ကလုာ်န့ၣ်လီၤ. ၡၤဒရး, မ့ၤၡးဒီး ဧဘ့ၤဒနကိၤတဖၣ် ဘၣ်တၢ်တ့ၢ်လီၤအီးဆူ မ့ၣ်အူကဲၤကဖးအဖၣ်ကပူၤအပူၤန့ၣ်လီၤ. ဘၣ်ဆၣ်သနာ်က့ ကစၢ်ယွၤ အုၣ်က့ၤခီၣ်က့ၤ ထုးထီၣ်မူဒံးက့ၤအဝဲသ့ၣ်န့ၣ်လီၤ. လၢခံန့ၣ် ဘၤဘူၤလိၣ်လီၤဆူ မၤဒဲဒီး ပၤရၣ်အစုပူၤအလီၢ်ခံ ဒၤနံးယ့လးစ့ၢ်ကီး ဘၣ်တၢ်တ့ၢ်လီၤအီၤဆူ ခ့ယုၢ်ကပိၤပူၤန့ၣ်လီၤ. ဘၣ်ဆၣ်သနာ်က့ ယွၤကးတံာ်ခ့ယုၢ်အကိာ်ပူၤဒီး အုၣ်က့ၤခီၣ်က့ၤအီၤန့ၣ်လီၤ.

လၢခံကတၢၢ်န့ၣ် ပၤရၣ်အစီၤပၤကိရ့ၣ် ပျၢ်ကွံာ်ဝဲပှၤအံၣ်စရ့လးဖိတဖၣ်န့ၣ်လီၤ. စးထီၣ်လၢဘၣ်တၢ်က့ၤဖီၣ်အီၤ ဆူဘၤဘူၤလိၣ်န့ၣ် အိၣ်အနံၣ် ၇၀ ပှဲၤထီၣ်ဒီး ပှၤအံၣ်စရ့လးဖိတဖၣ်န့ၣ် က့ၤကဒါဘၣ်ဆူ အထံအကီၢ်ဒၣ်ဝဲန့ၣ်လီၤ. ဖဲအဟဲက့ၤတုၤဆူ ဝ့ၢ်ယရူၤၡလ့ၣ်အခါ တၢ်မၤလၢ အဝဲသ့ၣ်မၤဝဲအဆိကတၢၢ်န့ၣ် တၢ်သူၣ်ထီၣ်က့ၤယဟိဝၤ အတၢ်လုၢ်ဟံၣ်န့ၣ်လီၤ. ဘၣ်ဆၣ်သနာ်က့ တယံာ်တမီၢ်န့ၣ် ဒုၣ်ဒါတဖၣ်မၤတံာ်တာ်အတၢ်မၤန့ၣ်လီၤ. လၢတၢ်န့ၣ်အဃိ ဟဲက့ၤတုၤဝ့ၢ်ယရူၤၡလ့ၣ်ဝံၤ ယံာ် ၂၂ နံၣ်မးဒီး သူၣ်ထီၣ်တၢ်လုၢ်ဟံၣ်ဝံၤလီၤ.

ပသ့ၣ်ညါဘၣ်တၢ်လၢခံတခါန့ၣ် ဧ့စြၤလဲၤဆူဝ့ၢ်ယရူၤၡလ့ၣ်ဒီး ကယၢကယဲထီၣ်ဝဲဒၣ် တၢ်လုၢ်ဟံၣ် အဂ့ၢ်န့ၣ်လီၤ. တၢ်န့ၣ် ကဲထီၣ်လၢ တၢ်သူၣ်ထီၣ်တၢ်လုၢ်ဟံၣ်ဝံၤ ၄၇ နံၣ်ဃၣ်ဃၣ် အကတီၢ်န့ၣ်လီၤ. ဧ့စြၤလဲၤတၢ်ဝံၤအလီၢ်ခံ ယံာ် ၁၃ နံၣ်မးဒီး နဃ့မယၤ ဘှီစၢၤက့ၤဝ့ၢ်ယရူၤၡလ့ၣ် အတၢ်ဒူၣ်လၢ အလီၤပှီၢ်တ့ၢ်ဝဲန့ၣ်လီၤ. တၢ်နီၤဖး ၅ ပာ်ဖျါထီၣ် တၢ်မၤအသးတဖၣ် တုၤလီၤလၢဆၢကတီၢ် အဝဲန့ၣ်, လၢအယံာ် ၁၅၂ နံၣ်န့ၣ်လီၤ.