အဝဲသ့ၣ် တတီၤလီၤဘါထီၣ်တၢ် အဂ့ၢ်

သုသ့ၣ်နီၣ် သူၣ်ဘီၣ်သးစၢ်သၢဂၤအံၤအဂ့ၢ် လၢသုနၢ်ဟူတ့ၢ်န့ၣ်ဧါ. မ့ၢ်လီၤ. အဝဲသ့ၣ်န့ၣ် ဒၤနံးယ့လးအသကိးသၢဂၤလၢ အဂ့ၢ်လိာ်တၢ်အီၣ်လၢ တကြၢးအီၣ်ဝဲသ့ၣ်န့ၣ်လီၤသၢၣ်. ပှၤဘၤဘူၤလိၣ်ဖိတဖၣ် ကိးအဝဲသ့ၣ်လၢ ၡၤဒရး, မ့ၤၡးဒီး ဧဘ့ၤဒနကိၤလီၤ. ခဲအံၤ ကွၢ်အဝဲသ့ၣ်တဖၣ်တက့ၢ်. ဘၣ်မနုၤအဃိ တတီၤလီၤကဒွံကျိာ်တၢ်ဂီၤဖးဒိၣ်အံၤ ဒ်သိးပှၤအဂၤတဖၣ်န့ၣ်လဲၣ်. မ်ပကွၢ်သကိးတက့ၢ်.

တၢ်သိၣ်တၢ်သီလၢ ယဟိဝၤအကစၢ်ဒၣ်ဝဲကွဲးအီၤ, လၢဘၣ်တၢ်ကိးအီၤလၢ တၢ်မၤလိာ်အဘီတဆံန့ၣ် သုသ့ၣ်နီၣ်ဒ်ဧါ. တၢ်မၤလိာ်အဆိကတၢၢ်တဘီစံးဝဲ ‘လၢယၤအမဲာ်ညါန့ၣ် ဘါကစၢ်အဂုၤအဂၤနီတဂၤတဂ့ၤ’ န့ၣ်လီၤ. တမ့ၢ်တၢ်လၢအညီဘၣ်ဆၣ် ပှၤသးစၢ်သၢဂၤအံၤ တိၢ်န့ၢ်တၢ်သိၣ်တၢ်သီဝဲန့ၣ်လီၤ.

ဘၤဘူၤလိၣ်အစီၤပၤ နဘူၤကးန့စၢ်န့ၣ် ကိးဖှိၣ်ဃာ်ဝဲဒၣ် ပှၤလီၢ်ဒိၣ်လၤထီလၢအကါဒိၣ်အါဂၤ ဒ်သိးကဟ့ၣ်ဝဲသ့ၣ် တၢ်ယူးယိၣ်ပာ်ကဲတၢ်ဂီၤဖးဒိၣ်လၢ အမၤဝဲဒၣ်အံၤအဂီၢ်န့ၣ်လီၤ. စီၤပၤခါလီၤအကလုၢ်ဒ်အံၤ ဝံၤယူၢ်ဒံးလီၤ. ‘ဖဲသုနၢ်ဟူ ကွဲၤ, ပံ, တနၢ် ဒီးတၢ်ဒ့တၢ်အူအဂၤတဖၣ် သီၣ်ထီၣ်ဝဲန့ၣ် သုကဘၣ်ဘူၣ်ထီၣ်ဘါထီၣ် တၢ်ဂီၤထူဖးဒိၣ်အံၤန့ၣ်လီၤ. ပှၤတဂၤလၢ်လၢ် လၢအတဘူၣ်ထီၣ်ဘါထီၣ်ဝဲန့ၣ် ကဘၣ်တၢ်တ့ၢ်လီၤကွံာ်အီၤ ဆူမ့ၣ်အူကဲၤကဖးအဖၣ်ကပူၤ တဘျီဃီန့ၣ်လီၤ.’

ဖဲစီၤပၤနဘူၤကးန့စၢ် နၢ်ဟူဝဲဒၣ်လၢ ၡၤဒရး, မ့ၤၡးဒီးဧဘ့ၤဒနကိၤ တဘူၣ်ထီၣ်ဘါထီၣ်အတၢ်ဂီၤအခါ အသးထီၣ်ဝဲဒၣ် ဒိၣ်ဒိၣ်ကလဲာ်န့ၣ်လီၤ. မၢလီၤပှၤဒုးဟဲနုာ်အဝဲသ့ၣ် ဆူအမဲာ်ညါဝံၤ ဟ့ၣ်ကဒီးအခွဲးတဘျီလၢ ကဘူၣ်ဝဲဘါဝဲတၢ်ဂီၤအဂီၢ်န့ၣ်လီၤ. ဘၣ်ဆၣ်သနာ်က့ သးစၢ်ဖိတဖၣ်အံၤ, ပာ်ဂံၢ်ပာ်ဘါဒီးသန့ၤအသးလၢ ယဟိဝၤန့ၣ်လီၤ. အဝဲသ့ၣ်တဲဘၣ်နဘူၤကးန့စၢ်လၢ, ‘ယွၤလၢပဘူၣ်အီၤဘါအီၤန့ၣ် အုၣ်က့ၤခီၣ်က့ၤပှၤသ့န့ၣ်လီၤ. ယွၤပကစၢ်အံၤ မ့တအုၣ်က့ၤခီၣ်က့ၤပှၤဘၣ်ဆၣ် နတၢ်ဂီၤထူန့ၣ် ပတဘူၣ်အီၤဘါအီၤလ့ၤတက့ၤဘၣ်’ န့ၣ်လီၤ.

ဖဲနဘူၤကးန့စၢ်နၤဟူ တၢ်ကတိၤအံၤအခါ, အတၢ်သးထီၣ်ကဲၤဒ်မ့ၣ်အူ ပိၢ်ဖးထီၣ်ဝဲဒၣ်န့ၣ်လီၤသၢၣ်. မ့ၣ်အူကဲၤကဖးဖးဒိၣ်တခါ အိၣ်ဖဲတၢ်ကပၤန့ၣ်လီၤ. ဒီးအဝဲဒၣ်ခါလီၤ အကလုၢ်လၢ ‘မၤကဲၤကိၢ်ထီၣ် မ့ၣ်အူ ဒိၣ်န့ၢ်လၢညါနွံစးတက့ၢ်’ န့ၣ်လီၤ. ဝံၤဒီး မၢပှၤလၢအဂံၢ်ဆူၣ်ဘါဆူၣ်ကတၢၢ် လၢအသုးမုၢ်ပူၤစၢ ၡၤဒရး, မ့ၤၡးဒီး ဧဘ့ၤဒနကိၤလၢပျံၤ ဒီးတ့ၢ်လီၤအဝဲသ့ၣ်ဆူမ့ၣ်အူကဲၤကဖးဖၣ်ကပူၤအပူၤန့ၣ်လီၤ. မ့ၢ်လၢမ့ၢ်အူကဲၤကဖးဒိၣ်အံၤ ကိၢ်ကဖးတလၢကွံာ်အခၢးအဃိ ပှၤအဆူၣ်ကတၢၢ်တဖၣ်ဒၣ်လဲာ် မ့ၣ်အူပျ့ၤအီၣ်သံကွံာ်အီၤန့ၣ်လီၤ. သးစၢ်သၢဂၤလၢ အဝဲသ့ၣ်တ့ၢ်လီၤကွံာ်အီၤတဖၣ်တခီ တၢ်မၤအသးဒီးအီၤဒ်လဲၣ်.

စီၤပၤဒိၣ်န့ၣ် ဖဲအကွၢ်လီၤဝဲဆူ မ့ၣ်အူကဲၤကဖးအပူၤန့ၣ်အခါ ဖုးသံပျီၢ်ဂီၤဘၣ်ဝဲဒိၣ်မးန့ၣ်လီၤ. သံကွၢ်ဝဲဒၣ် ‘ပစၢပှၤသၢဂၤလၢပျံၤဝံၤ တ့ၢ်လီၤအီၤဆူ မ့ၣ်အူးကဲၤကဖးအပူၤ တမ့ၢ်ဘၣ်ဧါ.’

အကုၢ်တဖၣ် စံးဆၢအီၤ, ‘မ့ၢ်မးလီၤ, ကစၢ်စီၤပၤဧၢ.’

စီၤပၤစံးဝဲဒၣ် ‘ဘၣ်ဆၣ်သနာ်က့ ယထံၣ်ပှၤလွံၢ်ဂၤ ဟးဝ့ၤဝီၤလၢ မ့ၣ်အူကျါလီၤ. အဝဲသ့ၣ်တဘၣ်တၢ်စၢဃာ်အီၤဘၣ်. မ့ၣ်အူတအီၣ်အဝဲသ့ၣ်စ့ၢ်ကီးဘၣ်. ပှၤလွံၢ်ဂၤတဂၤတခီ လီၤဂာ်လၢယွၤတဂၤမးလဲၣ်.’ စီၤပၤဒိၣ်န့ၣ် လဲၤဘူးထီၣ်ဆူ မ့ၣ်အူကဲၤကဖးအဖၣ်ကပူၤအပဲတြီကပၤဒီး ကိးပသူထီၣ်ဝဲ ‘ၡၤဒရး, မ့ၤၡးဒီး ဧဘ့ၤဒနကိၤသ့ၣ်ဧၢ, ဟဲက့ၤထွးထီၣ်တက့ၢ်. တၢ်ထီကတၢၢ်ကစၢ်ယွၤ အကုၢ်အပှၤသ့ၣ်ဧၢ, ဟဲက့ၤထီၣ်တက့ၢ်’ န့ၣ်လီၤ.

ဖဲအဝဲသ့ၣ်ဟဲက့ၤထီၣ်ဝဲအခါ ပှၤခဲလၢာ်ထံၣ်ဘၣ်အီၤလၢ မ့ၣ်အူတအီၣ်ဘၣ်အဝဲသ့ၣ်ဘၣ်. ထဲန့ၣ်ဒီး စီၤပၤဒိၣ်စံးဝဲဒၣ်လၢ ‘စံးထီၣ်ပတြၢၤ, ၡၤဒရး, မ့ၤၡးဒီး ဧဘ့ၤဒနကိၤသ့ၣ်အယွၤန့ၣ်တက့ၢ်. အဝဲသ့ၣ်န့ၣ် အယွၤအမဲာ်ညါ, တဘါဝဲယွၤအဂၤတဖၣ်အဃိ, အဝဲသ့ၣ်အယွၤ မၢလီၤမူခိၣ်ကလူးဒ်သိးကဟဲအုၣ်က့ၤခီၣ်က့ၤ အဝဲသ့ၣ်န့ၣ်လီၤ.’

အဝဲအံၤမ့ၢ်တၢ်သးတီဒီးယဟိဝၤ, လၢကြၢးပဟံးန့ၢ်တၢ်ဒိးဂ့ၤတဲာ်ဘၣ်တခါလီၤ တမ့ၢ်ဘၣ်ဧါ.