တၢ်မၤလိ ၆၁
အဝဲသ့ၣ်တဘါထီၣ် တၢ်ဂီၤဖးဒိၣ်ဘၣ်
စီၤပၤနဘူၤကးန့စၢ် မံမီၢ်ဝဲတၢ်ဂီၤဖးဒိၣ် တယံာ်တမီၢ်ဝံၤအလီၢ်ခံ အဝဲတ့ထီၣ်ဝဲ တၢ်ဂီၤထူဖးဒိၣ်တဒု. တၢ်ဂီၤထူဖးဒိၣ်တဒုအံၤ ဘၣ်တၢ်တ့ထီၣ်အီၤဖဲ ဒူရၤအတၢ်ပျီဖးလဲၢ်အပူၤ. ဝံၤဒီး စီၤပၤနဘူၤကးန့စၢ် ကိးဖှိၣ်ဝဲ ကယဲၢ်ပှၤအရ့ဒိၣ်တဖၣ် လၢအထံကီၢ်ပူၤ. လၢပှၤတဖၣ်အံၤ အကျါန့ၣ် ပၣ်ဃုာ်ဒီး စီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤ. ဒီးစီၤပၤဟ့ၣ်လီၤ တၢ်ကလုၢ်လၢ ‘ဖဲသုနၢ်ဟူ ကွဲၤ, တနၢ်, ဒီးပံ အကလုၢ် သီၣ်ထီၣ်အခါန့ၣ် ပှၤကိးဂၤဒဲး ကဘၣ်ဘါထီၣ် တၢ်ဂီၤထူတဒုအံၤ.’ ပှၤတဂၤဂၤ မ့ၢ်တဘါထီၣ် တၢ်ဂီၤထူတဒုအံၤဘၣ်န့ၣ် ကဘၣ်တၢ်တ့ၢ်လီၤကွံာ်အီၤ လၢမ့ၣ်အူပူၤ. မ့ၢ်ပှၤဧ့ၤဘြံၤဖိသၢဂၤအံၤ ကဘါထီၣ်ဝဲ တၢ်ဂီၤထူဧါ မ့တမ့ၢ် မ့ၢ်အဝဲသ့ၣ်ကဆဲးဘါထီၣ်ဝဲ ယဟိဝၤယွၤထဲတဂၤဧိၤဧါ.
ဝံၤဒီး စီၤပၤမၤလိာ်ဝဲလၢ ပှၤကဒ့ဝဲ တၢ်ဒ့တၢ်အူ. ဖဲတၢ်ဒ့တၢ်အူ သီၣ်ထီၣ်ဝဲအခါ ပှၤကိးဂၤဒဲး တီၤလီၤအခိၣ် ဒီးဘူၣ်ထီၣ်ဘါထီၣ်ဝဲ တၢ်ဂီၤထူတဒုအံၤ. ဘၣ်ဆၣ် ထဲဒၣ်စီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤန့ၣ် တဘူၣ်ထီၣ်ဘါထီၣ် တၢ်ဂီၤထူတဒုအံၤဘၣ်. အဃိ ပှၤပိာ်ခွါတနီၤ လဲၤတဲဘၣ် စီၤပၤလၢ ‘ပှၤဧ့ၤဘြံၤဖိသၢဂၤန့ၣ် တဘါထီၣ်ဝဲ နတၢ်ဂီၤထူဘၣ်.’ ဒီးစီၤပၤနဘူၤကးန့စၢ် မၢလီၤအပှၤ ဆူအဝဲသ့ၣ်အအိၣ် ဒီးတဲဝဲလၢ ‘ယကဟ့ၣ်သု တၢ်ခွဲးတၢ်ယာ် အသီတဘျီလၢ သုကဘါထီၣ် တၢ်ဂီၤထူ. သုမ့ၢ်တဘါထီၣ်ဘၣ်န့ၣ် ယကတ့ၢ်လီၤသုလၢ မ့ၣ်အူပူၤ. ဒီးယွၤလၢ အမၤပူၤဖျဲးသုလၢ ယစုပူၤသ့န့ၣ် တအိၣ်နီတဂၤဘၣ်.’ ပှၤဧ့ၤဘြံၤဖိသၢဂၤအံၤ တဲဆၢက့ၤစီၤပၤလၢ ‘ပတလိၣ်ဘၣ် တၢ်ခွဲးတၢ်ယာ်လၢ အသီတဘျီဘၣ်. ပနာ်လၢ ပကစၢ်ယွၤ မၤပူၤဖျဲးပှၤလၢ နစုပူၤသ့. ပကစၢ်ယွၤ မ့ၢ်တမၤပူၤဖျဲးပှၤသနာ်က့ စီၤပၤဧၢ, လ့ၤတက့ၤ ပတဘါထီၣ် နတၢ်ဂီၤထူဘၣ်.’
ဖဲစီၤပၤနဘူၤကးန့စၢ် နၢ်ဟူဘၣ် အဝဲသ့ၣ် အတၢ်ကတိၤအခါ အသးပှံၢ်ထီၣ်တၢ် ဒိၣ်မး. အဝဲတဲဘၣ် အခ့အပှၤလၢ ‘မၤကိၢ်ထီၣ်မ့ၣ်အူနွံစး.’ ဝံၤဒီးစီၤပၤတဲဘၣ် အသုးဖိတဖၣ်လၢ ‘စၢထီၣ်ပှၤဧ့ၤဘြံၤဖိသၢဂၤအံၤ ဒီးတ့ၢ်လီၤအဝဲသ့ၣ်လၢ မ့ၣ်အူပူၤခဲအံၤ.’ မ့ၢ်လၢမ့ၣ်အူ ကိၢ်ဝဲဒိၣ်မးအဃိ ဖဲပှၤသုးဖိတဖၣ် သုးဘူးအသးဆူ မ့ၣ်အူကပၤ ဒ်သိးကတ့ၢ်လီၤဝဲ ပှၤဧ့ၤဘြံၤဖိသၢဂၤအံၤ လၢမ့ၣ်အူပူၤအခါ မ့ၣ်အူအီၣ်ကွံာ်ဝဲ ပှၤသုးဖိတဖၣ်အံၤ ဒီးအဝဲသ့ၣ် သံဝဲတဘျီဃီ. ဘၣ်ဆၣ် ဖဲစီၤပၤနဘူၤကးန့စၢ် ကွၢ်လီၤဝဲလၢ မ့ၣ်အူပူၤအခါ အဝဲထံၣ်ဝဲ ပှၤလွံၢ်ဂၤ ဟးဝဲလၢမ့ၣ်အူကျါ. ဖဲစီၤပၤထံၣ် တၢ်မၤအသးဒ်အံၤအခါ အဝဲပျံၤတၢ်ဒိၣ်မး ဒီးသံကွၢ်ဝဲ အပဒိၣ်တဖၣ်လၢ ‘ပကွံာ်လီၤ ပှၤလၢမ့ၣ်အူကျါန့ၣ် ထဲသၢဂၤလီၤတမ့ၢ်ဧီၤ. ခဲအံၤ ယထံၣ် ပှၤလွံၢ်ဂၤညါ ဒီးလၢအကျါတဂၤန့ၣ် လီၤဂာ်လၢမူခိၣ်ကလူးဟီ.’
စီၤပၤနဘူၤကးန့စၢ် လဲၤသုးဘူးအသးလၢ မ့ၣ်အူကပၤ ဒီးကိးထီၣ်ဝဲလၢ ‘ကစၢ်ယွၤလၢ အထီကတၢၢ်တဂၤ အခ့အပှၤသ့ၣ်ဧၢ ဟဲက့ၤထီၣ်က့ၤ.’ ဖဲစီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤ ဟဲက့ၤထီၣ်ဝဲလၢ မ့ၣ်အူပူၤအခါ မ့ၣ်အူတအီၣ်အဝဲသ့ၣ် အမိၢ်ပှၢ်, အခိၣ်ဆူၣ်, အဆ့ကၤဘၣ်. ဒီးအဝဲသ့ၣ် တနၢဃိစ့ၢ်ကီးဘၣ်. အဃိ ဖဲပှၤဂီၢ်မုၢ်ထံၣ်ဝဲအခါ အဝဲသ့ၣ် ကမၢကမၣ်ဒိၣ်မး.
စီၤပၤနဘူၤကးန့စၢ် တဲဝဲလၢ ‘စီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤ အယွၤန့ၣ် မ့ၢ်ကစၢ်ယွၤလၢ အစိကမီၤ ဒိၣ်ကတၢၢ်တဂၤ. အဝဲဆှၢလီၤ မူခိၣ်ကလူး ဒ်သိးကမၤပူၤဖျဲး အခ့အပှၤအဂီၢ်. အဃိ ကစၢ်ယွၤလၢ အဒ်သိးဒီး အဝဲသ့ၣ်အယွၤန့ၣ် တအိၣ်နီတဂၤဘၣ်.’
ဖဲနထံၣ်ဘၣ် တၢ်ကီတၢ်ခဲအခါ မ့ၢ်နပာ်လီၤနသး ဂၢၢ်ဂၢၢ်ကျၢၤကျၢၤလၢ နကတီဒီးယဟိဝၤယွၤ ဒ်ပှၤဧ့ၤဘြံၤဖိသၢဂၤအံၤ စ့ၢ်ကီးဧါ.
“နကဘၣ် ဘူၣ်ထီၣ်ဘါထီၣ် နကစၢ်ယဟိဝၤယွၤ ဒီးနကဘၣ်မၤထဲ အတၢ်လီၤ.”—မးသဲ ၄:၁၀