ဘီမုၢ်လၢကအိၣ်ဝဲ လီၤထူလီၤယိာ်

ဘၣ်တနၤန့ၣ်​ စီၤပၤနဘူၤကးန့စၢ် မံမီၢ်ဝဲ တၢ်မံမီၢ်လၢ အလီၤဆီတခါ. တၢ်မံမီၢ်အံၤ မၤတံာ်တာ် စီၤပၤနဘူၤကးန့စၢ် အသးဒိၣ်မးအဃိ အဝဲမံဝဲ တန့ၢ်လၢၤဘၣ်. အဃိ အကိးန့ၢ်ဝဲ အပှၤအူတၢ်သမူတၢ်တဖၣ်​ ဒီးတဲဘၣ်​ အဝဲသ့ၣ်လၢ ‘တဲဘၣ်ယၤ ယတၢ်မံမီၢ်အခီပညီ.’ အဝဲသ့ၣ်​ တဲဆၢဝဲလၢ ‘စီၤပၤဧၢ နမံမီၢ်မနုၤလဲၣ်, တဲဘၣ်ပှၤသၢၤ.’ ဘၣ်ဆၣ်​ စီၤပၤနဘူၤကးန့စၢ် တဲဘၣ်​ အဝဲသ့ၣ်လၢ ‘ယတတဲဘၣ်သုဘၣ်. သုမ့ၢ်တတဲဘၣ်ယၤ ယတၢ်မံမီၢ်န့ၣ်​ ယကမၤသံသု.’ အဝဲသ့ၣ်​ တဲဘၣ်ကဒီး စီၤပၤလၢ ‘နမံမီၢ်မနုၤလဲၣ်, တဲဘၣ်ပှၤ ဒီးပကတဲဘၣ်နၤ အခီပညီ.’ ဒီးစီၤပၤတဲဘၣ်​ အဝဲသ့ၣ်လၢ ‘သုအဲၣ်ဒိး ထုးယံာ်တၢ်ဆၢကတီၢ်န့ၣ်​ ယသ့ၣ်ညါ. ယမံမီၢ်မနုၤလဲၣ်​ တဲယၤတထံၣ်.’ အဝဲသ့ၣ်တဲဘၣ်​ စီၤပၤလၢ ‘တၢ်တခါန့ၣ်ဒု ပှၤတဲနၤတဘၣ်​ နီတဂၤဘၣ်.’

စီၤပၤနဘူၤကးန့စၢ် သးပှံၢ်ထီၣ်တၢ် ဒိၣ်မးအဃိ အမၢအပျဲၢ် မၤသံကွံာ် ပှၤကူၣ်ဘၣ်ကူၣ်သ့ လၢအထံကီၢ်ပူၤကိးဂၤဒဲး. လၢအကျါန့ၣ်​ ပၣ်ဃုာ်ဒီး စီၤဒၤနံးယ့လး, စီၤဃနၤနယၤ, စီၤမံၡအ့လး ဒီးစီၤဧစၤရယၤ. စီၤဒၤနံးယ့လး ဃ့ဝဲလၢ စီၤပၤကဟ့ၣ်အီၤ တၢ်ဆၢကတီၢ် တစိၢ်ဖိ. ဝံၤဒီး စီၤဒၤနံးယ့လး ဒီးအသကိးတဖၣ်​ ဃ့ထုကဖၣ်လၢ ယဟိဝၤယွၤအအိၣ်​ ဒ်သိးကစၢ်ယွၤ ကမၤစၢၤအဝဲသ့ၣ်အဂီၢ်. ယဟိဝၤယွၤ ကမၤဝဲဒ်လဲၣ်.

ယဟိဝၤယွၤဒုးထံၣ်​ စီၤဒၤနံးယ့လး လၢတၢ်ထံၣ်လၢညါခီ ဘၣ်ဃးဒီး စီၤပၤနဘူၤကးန့စၢ် အတၢ်မံမီၢ် ဒီးပာ်ဖျါထီၣ်န့ၢ်အီၤအခီပညီ. လၢခံတနံၤန့ၣ်​ စီၤဒၤနံးယ့လး လဲၤလၢ စီၤပၤအပျဲၢ်အအိၣ်​ ဒီးတဲဝဲလၢ ‘တဘၣ်မၤသံ ပှၤကူၣ်ဘၣ်ကူၣ်သ့ နီတဂၤတဂ့ၤ. ယတဲဖျါထီၣ်​ စီၤပၤအတၢ်မံမီၢ်သ့.’ ဒီးစီၤပၤအပျဲၢ် လဲၤကိးဝဲ စီၤဒၤနံးယ့လးဆူ စီၤပၤနဘူၤကးန့စၢ်အအိၣ်. စီၤဒၤနံးယ့လးတဲဘၣ်​ စီၤပၤလၢ ‘ကစၢ်ယွၤ ဒုးသ့ၣ်ညါနၤ ဘၣ်ဃးဒီး တၢ်ကမၤအသးလၢ ခါဆူညါအဂ့ၢ်. နတၢ်မံမီၢ်န့ၣ်​ မ့ၢ်ဒ်အံၤ. နထံၣ်တၢ်ဂီၤဖးဒိၣ်​ လၢအခိၣ်မ့ၢ်ထူ, အသးနါပှၢ် ဒီးအစုမ့ၢ်စ့, အဟၢဖၢ ဒီးအကံၣ်ဒုၣ်မ့ၢ်တိၢ်ဘီ, အခီၣ်န့ၣ်မ့ၢ်ထး ဒီးအခီၣ်လၣ်န့ၣ်​ ထးဒီးကပံာ် ဃါဃုာ်လိာ်သး. ဝံၤဒီးနထံၣ်ဘၣ်စ့ၢ်ကီး လၢၢ်တဖျၢၣ်လၢ ဘၣ်တၢ်ကူးတဲာ်အီၤလၢ ကစၢၢ်လိၤ, ဟဲလီၤဘၣ်ထံးဝဲ တၢ်ဂီၤဖးဒိၣ်​ အခီၣ်လၣ်. ဒီးတၢ်ဂီၤဖးဒိၣ်အံၤ လီၤကလဲ, ကဲထီၣ်တၢ်ကမူၣ်​ ဒီးဒံကွံာ်ဝဲလၢ ကလံၤကျါ. လၢၢ်တဖျၢၣ်အံၤဒိၣ်ထီၣ်ဝဲ ဒ်ကစၢၢ်တဖျၢၣ်​ ဒီးပှဲၤဝဲလၢဟီၣ်ခိၣ်ဒီဘ့ၣ်ညါ.’

ဝံၤဒီး စီၤဒၤနံးယ့လး တဲဝဲလၢ ‘နတၢ်မံမီၢ် အခီပညီ မ့ၢ်ဒ်အံၤ. တၢ်ဂီၤအခိၣ်သၣ်ဃံ လၢအမ့ၢ်ထူန့ၣ်​ အခီပညီမ့ၢ် နဘီနမုၢ်. မ့မ့ၢ်အသးနါပှၢ် ဒီးအစုလၢအမ့ၢ်စ့န့ၣ်​ မ့ၢ်ဘီမုၢ်လၢ အကဟဲအိၣ်ထီၣ်လၢ နလီၢ်ခံ. ဝံၤဒီးတိၢ်ဘီန့ၣ်​ မ့ၢ်ဘီမုၢ်လၢခံတဘ့ၣ်​ လၢကပၢဝဲဟီၣ်ခိၣ်ဒီတဘ့ၣ်. ဘီမုၢ်လၢ အကဟဲ လၢခံတဘ့ၣ်န့ၣ်​ ကကျၢၤဝဲ ဒ်ထးအသိး. မ့မ့ၢ်ဘီမုၢ် လၢခံကတၢၢ်တဘ့ၣ်န့ၣ်​ ကမ့ၢ်ဘီမုၢ်လၢ အလီၤဖး ဒီးကကျၢၤဝဲ ဒ်ထးအသိးတနီၤ ဒီးကကပုာ်ဝဲ ဒ်ကပံာ်အသိးတနီၤ. လၢၢ်လၢ အကဲထီၣ်ကစၢၢ်န့ၣ်​ မ့ၢ်ကစၢ်ယွၤအဘီအမုၢ် ဒီးကမၤဟးဂီၤကွံာ် ဘီမုၢ်လၢအဂၤခဲလၢာ်. ဒီးကစၢ်ယွၤအဘီအမုၢ်န့ၣ်​ ကအိၣ်ဝဲလီၤထူလီၤယိာ်.’

စီၤပၤနဘူၤကးန့စၢ် ထိၣ်လီၤပှီၤအသးလၢ စီၤဒၤနံးယ့လးအမဲာ်ညါ. ဒီးအတဲဘၣ်​ စီၤဒၤနံးယ့လးလၢ ‘နကစၢ်ယွၤ ဒုးသ့ၣ်ညါနၤ ယတၢ်မံမီၢ် ဒီးယွၤဒ်သိးဒီး နကစၢ်ယွၤန့ၣ်​ တအိၣ်ဘၣ်.’ စီၤပၤနဘူၤကးန့စၢ် တမၤသံ စီၤဒၤနံးယ့လးဘၣ်. လၢတၢ်န့ၣ်အလီၢ် အဒုးကဲထီၣ်​ စီၤဒၤနံးယ့လးလၢ ပှၤကူၣ်တၢ်သ့တဖၣ်​ အပဒိၣ်အခိၣ်​ ဒီးဒုးပၢအီၤ ဘၤဘူၤလိၣ်အကီၢ်ရ့ၣ်​ ဒီတဘ့ၣ်. ယဟိဝၤယွၤ စံးဆၢ စီၤဒၤနံးယ့လး အတၢ်ဃ့ထုကဖၣ်​ ဒ်လဲၣ်န့ၣ်​ ခဲအံၤနနၢ်ပၢၢ်လံဧါ.