သ့ၣ်ဖးဒိၣ်တထူၣ်လၢ ဘၣ်တၢ်ဒိလီၤအီၤလၢ ဘီမုၢ်အတၢ်ပၢတၢ်ပြး

ဘၣ်တနၤန့ၣ်​ စီၤပၤနဘူၤကးန့စၢ် မံမီၢ် တၢ်မံမီၢ်လၢ အလီၤပျံၤလီၤဖုးတခါ. အဝဲကိးန့ၢ်ဝဲ အပှၤကူၣ်ဘၣ်ကူၣ်သ့တဖၣ်​ ဒ်သိးကတဲဘၣ်အီၤ အတၢ်မံမီၢ် အခီပညီ. ဘၣ်ဆၣ်​ အပှၤကူၣ်ဘၣ်ကူၣ်သ့တဖၣ်​ တဲဘၣ်အတၢ်မံမီၢ် အခီပညီ တသ့နီတဂၤဘၣ်. လၢခံန့ၣ်​ စီၤပၤတဲဘၣ်ဝဲ ဝံဒၤနံးယ့လး ဘၣ်ဃးဒီး အတၢ်မံမီၢ်.

စီၤပၤနဘူၤကးန့စၢ် တဲဘၣ်ဝံဒၤနံးယ့လးလၢ ‘ယမံမီၢ်လၢ ယထံၣ်သ့ၣ်တထူၣ်​ ဒီးသ့ၣ်တထူၣ်အံၤ ဒိၣ်ထီၣ်ထီထီၣ်ဝဲ တုၤလၢမူခိၣ်. ဒီးပှၤအိၣ်လၢ ဟီၣ်ခိၣ်ဒီဘ့ၣ်န့ၣ်​ ထံၣ်ဘၣ်ဝဲ သ့ၣ်တထူၣ်အံၤ. သ့ၣ်အံၤအိၣ်ဒီးအလၣ်လၢ အဃံလၤဒီး အသၣ်အိၣ်ဝဲအါမး. တကးဒံးဘၣ်​ ဆၣ်ဖိကီၢ်ဖိတဖၣ်​ ဟဲအိၣ်ကဒု လၢအဖီလာ် ဒီးထိၣ်ဖိလံၣ်ဖိတဖၣ်​ တ့ထီၣ်အသွံလၢ သ့ၣ်ဒ့တဖၣ်အလိၤ. ဝံၤဒီး မူခိၣ်ကလူးတဂၤ ဟဲလီၤလၢမူခိၣ်​ ဒီးတဲဝဲလၢ “ကူာ်လီၤကွံာ် သ့ၣ်တထူၣ်န့ၣ်​ ဒီးကျီတဲာ်ကွံာ် အဒ့တဖၣ်. မ့မ့ၢ် သ့ၣ်ခိၣ်ဆၢၣ်လၢ အဂံၢ် အိၣ်လၢဟီၣ်ခိၣ်လာ်အံၤန့ၣ်​ ကျီၤဃာ်အီၤလၢ ထးကွီၤ ဒီးတိၢ်ဘီကွီၤ ဒီးပာ်အီၤလၢနီၣ်ကျါ လၢတၢ်ပျီပူၤတက့ၢ်. ပှၤကညီအသး လၢအအိၣ်ဒီးအီၤန့ၣ်​ မ်အဆီတလဲလၢ ဆၣ်ဖိကီၢ်ဖိအသး ဒီးမ်နွံနံၣ်​ လဲၤပူၤကွံာ်တက့ၢ်. ပှၤကိးဂၤဒဲး ကသ့ၣ်ညါဝဲလၢ ကစၢ်ယွၤမ့ၢ်ပှၤလၢ အပၢတၢ်လီၤ. ဒီးအဝဲမ့ၢ်အဲၣ်ဒိးလၢ ပှၤတဂၤဂၤ ကပၢတၢ်န့ၣ်​ အဟ့ၣ်လီၤဘီမုၢ်လၢ ပှၤတဂၤန့ၣ်​ အစုပူၤသ့.”’

ယဟိဝၤယွၤ ဒုးသ့ၣ်ညါ စီၤဒၤနံးယ့လးလၢ စီၤပၤအတၢ်မံမီၢ် အခီပညီ. ဖဲစီၤဒၤနံးယ့လး နၢ်ပၢၢ်ဝဲ စီၤပၤအတၢ်မံမီၢ် အခီပညီအခါ အဝဲပျံၤတၢ်ဒိၣ်မး. အဝဲတဲဝဲလၢ ‘အိစီၤပၤဧၢ, ယဆၢလၢ နတၢ်မံမီၢ်အံၤ ကဘၣ်ဃးဒီးနဒုၣ်နဒါ. ဘၣ်ဆၣ်​ တၢ်မံမီၢ်အံၤ ဘၣ်ဃးဒီးနၤ. သ့ၣ်ထူၣ်ဖးဒိၣ်​ တထူၣ်လၢ တၢ်ကူာ်လီၤကွံာ်န့ၣ်​ မ့ၢ်နၤ. တၢ်ကနီဟးထီၣ်ကွံာ်နၤလၢ နဘီနမုၢ်အပူၤ ဒီးနကအီၣ်​ နီၣ်ဧိၤမံၤဧိၤလၢ တၢ်ပျီပူၤ ဒ်ဆၣ်ဖိကီၢ်ဖိအသိး. ဘၣ်ဆၣ်​ ခီဖျိလၢ မူခိၣ်ကလူး တဲဝဲလၢ ပှၤကဘၣ်​ ပာ်တ့ၢ် သ့ၣ်ခိၣ်ဆၢၣ်လၢ အအိၣ်ဒီးအဂံၢ်အဃိ လၢခံ နကကဲထီၣ်ဘၣ်က့ၤ စီၤပၤလၢအသီတဘျီ.’

တၢ်ဆၢကတီၢ် ပူၤကွံာ်တနံၣ်​ ဝံၤအလီၢ်ခံ ဘၣ်တနံၤန့ၣ်​ စီၤပၤနဘူၤကးန့စၢ် ဟးဝဲလၢအဟံၣ်ခိၣ်​ ဒီးကွၢ်စိလီၤဝဲ ဝ့ၢ်ဘၤဘူၤလိၣ်. ဒီးအဝဲတဲဝဲလၢ ‘ကွၢ်ဝ့ၢ်တဖျၢၣ်လၢ အလီၤဘီလီၤမုၢ်အံၤ, ယတ့ထီၣ်အီၤလီၤ. ယဖါဖၠဲးညါ.’ ဖဲစီၤပၤ တဲတၢ်အခါ တၢ်ကလုၢ် သီၣ်ထီၣ်လၢမူခိၣ်​ ဒီးတဲဝဲလၢ ‘စီၤပၤနဘူၤကးန့စၢ်ဧၢ ခဲအံၤ တၢ်ကထုးထီၣ်ကွံာ်နၤလၢ နဘီနမုၢ်အပူၤ.’

ဖဲန့ၣ်အဆၢကတီၢ် စီၤပၤနဘူၤကးန့စၢ် ပျုၢ်ထီၣ်ဝဲ ဒီးကဲထီၣ်ဒ် ဆၣ်ဖိကီၢ်ဖိအသိး. ဝံၤဒီး ဘၣ်တၢ်နီဟးထီၣ်ကွံာ်အီၤ လၢအနီပူၤ ဒီးဘၣ်လဲၤအိၣ်ဝဲလၢ ဆၣ်ဖိကီၢ်ဖိအကျါ လၢပျီပူၤ. စီၤပၤနဘူၤကးန့စၢ် အခိၣ်ဆူၣ်​ ထီထီၣ်ဝဲ လီၤဂာ်ဒ်သိးဒီး လံာ်ကြီကြာ်အဆူၣ်. ဒီးအစုမ့ၣ်​ ခီၣ်မ့ၣ်စ့ၢ်ကီး ထီထီၣ်ဝဲ ဒ်ထိၣ်အစုမ့ၣ်​ ခီၣ်မ့ၣ်အသိး.

ဖဲတၢ်ဆၢကတီၢ် လဲၤပူၤကွံာ် နွံနံၣ်ဝံၤအလီၢ်ခံန့ၣ်​ စီၤပၤနဘူၤကးန့စၢ် သ့ၣ်ညါလီၤက့ၤအသး ဒီးယဟိဝၤယွၤ ဒုးကဲထီၣ်က့ၤအီၤလၢ ဘၤဘူၤလိၣ်အစီၤပၤ ဒ်လၢညါအသိး. ဖဲတၢ်မၤအသးဒီးအီၤ ဒ်န့ၣ်ဝံၤအလီၢ်ခံ အဝဲတဲဝဲလၢ ‘ယစံးထီၣ်ပတြၢၤ ယဟိဝၤယွၤ လၢအမ့ၢ်မူခိၣ်အစီၤပၤ. ခဲအံၤယသ့ၣ်ညါလၢ ယဟိဝၤယွၤ မ့ၢ်တၢ်ပၢအကစၢ်. အဝဲဆီၣ်လီၤ ပှၤလၢအပာ်ထီၣ်ထီသး ဒီးပှၤတဂၤဂၤလၢ အဝဲအဲၣ်ဒိး ဟ့ၣ်လီၤဝဲဘီမုၢ်န့ၣ်​ ဟ့ၣ်လီၤဝဲသ့.’