ဒၤနံးယ့လး လဲၤတုၤဆူခ့ယုၢ်ကပိၤပူၤ

အိ, ကွၢ်တဘီ, ဒၤနံးယ့လးဒု ဘၣ်နးဘၣ်ဖှီၣ်လံ. သနာ်က့, ခ့ယုၢ်တဖၣ်တအ့ၣ်အီၤမးလဲၣ်. ဘၣ်မနုၤအဃိလဲၣ်. သုသ့ၣ်ညါဧါ. မ့ၢ်မတၤသ့ၣ်တဖၣ် တ့ၢ်လီၤကွံာ်အီၤဆူ ခ့ယုၢ်ကပိၤပူၤန့ၣ်လဲၣ်. ပကကွၢ်သကိးဘီၣ်.

ဘၤဘူၤလိၣ်အစီၤပၤခဲအံၤ မ့ၢ်ဝဲ ဒၤရယါဝ့ၣ်န့ၣ်လီၤ. အဝဲအဲၣ်ဒၤနံးယ့လးဒိၣ်မးန့ၣ်လီၤ. မ့ၢ်လၢ ဒၤနံးယ့လးန့ၣ် အသူၣ်ဂ့ၤသးဝါ ဒီးအိၣ်ဒီးတၢ်ကူၣ်ဘၣ်ကူၣ်သ့ အဃိန့ၣ်လီၤ. ဒၤရယါဝ့ၣ်ပာ်ဒၤနံးယ့လးလၢ ပဒိၣ်ခဲလၢာ်အခိၣ်ကျၢၢ် လၢအဘီအမုၢ်န့ၣ်လီၤ. လၢတၢ်အံၤအဃိ ပှၤအိၣ်လီၤတဲာ်တဖၣ်န့ၣ် သူက့ၣ်သးကါဒၤနံးယ့လး ဒီးကူၣ်ထီၣ်တၢ်အၢဒ်အံၤန့ၣ်လီၤ.

အဝဲသ့ၣ်လဲၤဆူ စီၤပၤဒၤရယါဝ့ၣ်အအိၣ်ဒီး စံးဝဲ ‘တၢ်ဒိၣ်စီၤပၤဧၢ, ပတၢၣ်ပီၣ်သကိးပဝဲဝံၤဒီး ပသးအိၣ်ဃုလီၤပလိာ်လၢ နကထုးထီၣ်တၢ်သိၣ်တၢ်သီ ဒ်အံၤလီၤ. အသီ ၃၀ အတီၢ်ပူၤန့ၣ် ပှၤတဂၤလၢ်လၢ် တဘၣ်ဃ့ထုကဖၣ်တၢ်ဆူ ယွၤမ့ၢ်ဂ့ၤ, ပှၤကညီမ့ၢ်ဂ့ၤ နီတဂၤအအိၣ် မ့တမ့ၢ်ဘၣ်ဆူနအိၣ်န့ၣ်ဘၣ်. ပှၤလၢတကနၣ်န့ၣ် မ်တၢ်တ့ၢ်လီၤအီၤဆူ ခ့ယုၢ်ကပိၤအပူၤတက့ၢ်.’ ဘၣ်မနုၤအဃိ ပှၤသ့ၣ်အံၤ အဲၣ်ဒိးတၢ်ထုးထီၣ် တၢ်သိၣ်တၢ်သီအံၤလဲၣ်န့ၣ် ဒၤရယါဝ့ၣ်တခီ တသ့ၣ်ညါဘၣ်. ဘၣ်ဆၣ်သနာ်က့ ဆိကမိၣ်ဝဲလၢ ကမ့ၢ်တၢ်ဂ့ၤအဃိ ကွဲးဝဲတၢ်သိၣ်တၢ်သီဒီး ပာ်ဂၢၢ်ပာ်ကျၢၤဝဲန့ၣ်လီၤ. ခဲအံၤ, ဆီတလဲဝဲတၢ်သိၣ်တၢ်သီ တန့ၢ်လၢၤဘၣ်.

တုၤမ့ၢ်ဒၤနံးယ့လး နၢ်ဟူတၢ်သိၣ်တၢ်သီအဝဲန့ၣ်ဒီး က့ၤဝဲဆူဟံၣ်ဝံၤဒီး ဃ့ဘါထုကဖၣ် ဒ်မၤညီနုၢ်ဝဲအသိးန့ၣ်လီၤ. ပှၤအၢပှၤသီတဖၣ်န့ၣ် သ့ၣ်ညါဝဲသ့ၣ်လၢ ဒၤနံးယ့လးတတဆိကတီၢ် ဃ့ဘါထုကဖၣ်တၢ်ဆူ ယဟိဝၤအအိၣ်ဘၣ်အဃိ သးခုဝဲသ့ၣ်ဒိၣ်မးန့ၣ်လီၤ. ဘၣ်မနုၤအဃိလဲၣ်န့ၣ် အဝဲသ့ၣ်အတၢ်ကူၣ်လၢ ကမၤသံကွံာ်ဒၤနံးယ့လးန့ၣ် ဖျါလၢကကဲထီၣ်လိၣ်ထီၣ်ဝဲ အဃိန့ၣ်လီၤ.

ဖဲဒၤရယါဝ့ၣ်သ့ၣ်ညါ ဘၣ်မနုၤအဃိ ပှၤတဖၣ်အံၤအဲၣ်ဒိးထုးထီၣ် တၢ်သိၣ်တၢ်သီအံၤလဲၣ်န့ၣ်အခါ အသးအုးဒိၣ်မးန့ၣ်လီၤ. ဘၣ်ဆၣ်သနာ်က့ ဆီတလဲဝဲတၢ်သိၣ်တၢ်သီတသ့လၢၤဘၣ်. လၢတၢ်န့ၣ်အဃိ ဘၣ်ခါလီၤအကလုၢ်လၢ တၢ်ကတ့ၢ်လီၤဒၤနံးယ့လးဆူ ခ့ယုၢ်ကပိၤပူၤန့ၣ်လီၤ. ဘၣ်ဆၣ် စီၤပၤဒိၣ်စံးဘၣ်ဒၤနံးယ့လးလၢ ‘မ်ယွၤလၢနဘါအီၤန့ၣ် ကအုၣ်က့ၤခီၣ်က့ၤနၤတက့ၢ်’ န့ၣ်လီၤ.

ဒၤရယါဝ့ၣ်န့ၣ် အသးအုးဒိၣ်မးအဃိ မံဝဲတန့ၣ်ဘၣ်. တုၤလၢခံတဂီၤန့ၣ် လဲၤဃ့ၢ်ဝဲဆူ ခ့ယုၢ်ကပိၤန့ၣ်လီၤ. ပထံၣ်အီၤသ့ဖဲန့ၣ်လီၤ. လၢတၢ်ဟီၣ်တၢ်ယၢၤအကလုၢ်ဖးဒိၣ်အပူၤ ကိးသံကွာ်ဝဲ ‘ယွၤလၢအမူဝဲတဂၤအခ့အပှၤ ဒၤနံးယ့လးဧၢ, ယွၤလၢနဘါအီၤတဂၤန့ၣ် အုၣ်က့ၤခီၣ်က့ၤနၤလၢ ခ့ယုၢ်တဖၣ်န့ၣ်သ့စ့ၢ်ကီးဧါ.’ န့ၣ်လီၤ.

ဒၤနံးယ့လးစံးဆၢက့ၤဝဲဒၣ် ‘ကစၢ်ယွၤမၢလီၤ အမူခိၣ်ကလူးလၢ ကကးတံာ်ဃာ်ခ့ယုၢ်အကိာ်ပူၤန့ၣ်လီၤ. လၢတၢ်န့ၣ်အဃိ တအ့ၣ်ယၤဘၣ်.’

စီၤပၤဒိၣ်သးခုဒိၣ်မးန့ၣ်လီၤ. ခါလီၤအကလုၢ်လၢ ပှၤကထုးထီၣ် ဒၤနံးယ့လးလၢ ခ့ယုၢ်ကပိၤပူၤန့ၣ်လီၤ. ဝံၤဒီး မၢပှၤတ့ၢ်လီၤကွံာ် ပှၤအၢပှၤသီလၢအကူၣ်အၢ ဒၤနံးယ့လးတဖၣ်န့ၣ်ဆူ ခ့ယုၢ်ကပိၤပူၤန့ၣ်လီၤ. ပှၤတဖၣ်အံၤ တချုးတုၤလၢကပိၤအခီၣ်ထံးဒံးဘၣ် ခ့ယုၢ်စံၣ်ဖီၣ်အ့ၣ်အီၤန့ၣ် ဒီးအီၣ်အညၣ် အ့ၣ်ဘျဲးအဃံခဲလၢာ်န့ၣ်လီၤ.

လၢခံန့ၣ် ဒၤရယါဝ့ၣ်ကွဲးလံာ်ဆူ အဘီဖိမုၢ်ဖိတဖၣ်အအိၣ်န့ၣ်ဒ်အံၤလီၤ. ‘ယမၤလိာ်သုလၢ ပှၤကိးဂၤဒဲး ကဘၣ်ယူးယီၣ်ပာ်ကဲ ဒၤနံးယ့လးအကစၢ်ယွၤန့ၣ်လီၤ. အယွၤန့ၣ် ပာ်ဖျါထီၣ် တၢ်လီၤလးအကလုာ်ကလုာ်န့ၣ်လီၤ. အုၣ်က့ၤခီၣ်က့ၤ ဒၤနံးယ့လးလၢ အသုတကဲထီၣ် ခ့ယုၢ်အဆၣ်န့ၣ်လီၤ.’