ပှၤတ့ၢ်လီၤ ဝံဒၤနံးယ့လးလၢ ခ့ယုၢ်ကပိၤပူၤ

ဘၤဘူၤလိၣ်အစီၤပၤလၢ အဂၤတဂၤန့ၣ်​ မ့ၢ်ဝဲပှၤမၤဒဲဖိ စီၤဒၤရယါဝ့ၣ်. စီၤပၤဒၤရယါဝ့ၣ်​ ထံၣ်ဝဲလၢ ဝံဒၤနံးယ့လး လီၤဆီန့ၢ်ဒံးပှၤဂၤ. အဃိ စီၤပၤပာ်ထီၣ်အီၤလၢ အပဒိၣ်ဖးဒိၣ်တဖၣ်​ အဖီခိၣ်. ပဒိၣ်ဖးဒိၣ်​ တဖၣ်အံၤ သးက့ၣ်ဝဲ ဝံဒၤနံးယ့လး ဒီးအဲၣ်ဒိးမၤသံကွံာ်အီၤ. အဝဲသ့ၣ်​ သ့ၣ်ညါဝဲလၢ ဝံဒၤနံးယ့လး ဃ့ထုကဖၣ်တၢ်လၢ ယဟိဝၤယွၤ အအိၣ်တနံၤသၢဘျီ. အဃိ အဝဲသ့ၣ်တဲဘၣ်​ စီၤပၤဒၤရယါဝ့ၣ်လၢ ‘အိ, စီၤပၤဧၢ ပကြၢးထုးထီၣ်​ တၢ်သိၣ်တၢ်သီတခါ လၢပှၤကိးဂၤဒဲးန့ၣ်​ ကဘၣ်ဃ့ထုကဖၣ်တၢ် ထဲလၢနအိၣ်. ဒီးပှၤတဂၤဂၤ မ့ၢ်တဒိကနၣ်ဝဲ တၢ်သိၣ်တၢ်သီ တခါအံၤဘၣ်န့ၣ်​ ပှၤကဘၣ်​ တ့ၢ်လီၤအီၤလၢ ခ့ယုၢ်ကပိၤပူၤ.’ စီၤပၤဒၤရယါဝ့ၣ်​ ဘၣ်သူၣ်ဘၣ်သးဝဲ တၢ်ဟ့ၣ်ကူၣ်တခါအံၤ ဒီးထုးထီၣ်ဝဲ တၢ်သိၣ်တၢ်သီအံၤ.

ဖဲဝံဒၤနံးယ့လး နၢ်ဟူဘၣ်ဝဲ တၢ်သိၣ်တၢ်သီလၢ အသီတခါအံၤအခါ အက့ၤလၢအဟံၣ်. ဝံဒၤနံးယ့လး ချံးလီၤအခီၣ်​ ဒီးဃ့ထုကဖၣ်တၢ်လၢ ယဟိဝၤယွၤအအိၣ်​ လၢပဲတရီဖိ အမဲာ်ညါ. ဖဲန့ၣ်အခါ ပှၤလၢအသးက့ၣ်​ ဝံဒၤနံးယ့လးန့ၣ်​ ဟဲနုာ်လီၤလၢအဟံၣ်​ ဒီးထံၣ်ဝဲဝံဒၤနံးယ့လး ဃ့ထုကဖၣ်တၢ် လၢအဟံၣ်ပူၤ. ဝံၤဒီးအဝဲသ့ၣ်​ လဲၤဃ့ၢ်လၢ စီၤပၤဒၤရယါဝ့ၣ်အအိၣ်​ ဒီးတဲဘၣ်အီၤလၢ ‘ဝံဒၤနံးယ့လး တဒိကနၣ်​ နကလုၢ်ဘၣ်. အဝဲဃ့ထုကဖၣ်တၢ်လၢ အကစၢ်ယွၤအအိၣ်​ တနံၤသၢဘျီ.’ စီၤပၤဒၤရယါဝ့ၣ်​ ဘၣ်သူၣ်ဘၣ်သးဝဲ ဝံဒၤနံးယ့လးအဃိ အတအဲၣ်ဒိးလၢ ဝံဒၤနံးယ့လး ကသံဘၣ်. ဒီတနံၤကျၢၤန့ၣ်​ စီၤပၤဒၤရယါဝ့ၣ်​ ဂုာ်ကျဲးစၢးဃုကျဲ လၢကမၤစၢၤဝံဒၤနံးယ့လး. ဘၣ်ဆၣ်​ မ့ၢ်လၢစီၤပၤဒၤရယါဝ့ၣ်​ ထုးထီၣ်ဝဲ တၢ်သိၣ်တၢ်သီ ဝံၤလံအဃိ အဆီတလဲက့ၤဝဲ တသ့လၢၤဘၣ်. အဃိ အမၢအခ့အပှၤ လဲၤတ့ၢ်လီၤ ဝံဒၤနံးယ့လး လၢခ့ယုၢ်ကပိၤပူၤ.

ဖဲတၢ်တနၤန့ၣ်​ စီၤပၤဒၤရယါဝ့ၣ်​ ဘၣ်ယိၣ်တၢ်လၢ ဝံဒၤနံးယ့လးအဂီၢ်အဃိ အမံတန့ၢ်ဘၣ်. ဖဲမုၢ်ဝါထီၣ်အခါ စီၤပၤလဲၤဃ့ၢ်ဝဲလၢ ခ့ယုၢ်ကပိၤအခိၣ်ထိး ဒီးသံကွၢ် ဝံဒၤနံးယ့လးလၢ ‘မ့ၢ်နကစၢ်ယွၤ မၤပူၤဖျဲးနၤစ့ၢ်ကီးဧါ.’

စီၤပၤဒၤရယါဝ့ၣ်​ နၢ်ဟူဝဲတၢ်ကလုၢ်သီၣ်​ ဒီးသ့ၣ်ညါဝဲလၢ အမ့ၢ်ဝဲ ဝံဒၤနံးယ့လးအကလုၢ်. ဝံဒၤနံးယ့လး တဲဘၣ်စီၤပၤလၢ ‘ယဟိဝၤယွၤ မၢမူခိၣ်ကလူး ဟဲကျၢၢ်တံၢ်ဝဲ ခ့ယုၢ်တဖၣ်အကိာ်ပူၤ. အဃိ ခ့ယုၢ်တဖၣ်အံၤ တအ့ၣ်ယၤ နီတစဲးဘၣ်.’ ဖဲစီၤပၤဒၤရယါဝ့ၣ်​ နၢ်ဟူဘၣ်ဝဲအခါ အသးခုဒိၣ်မး. ဒီးစီၤပၤမၢ ပှၤထုးထီၣ်ကွံာ် ဝံဒၤနံးယ့လးလၢ ခ့ယုၢ်ကပိၤပူၤ. ဖဲဝံဒၤနံးယ့လး ဟဲက့ၤထီၣ်အခါ အတဘၣ်ဒိဘၣ်ထံး နီတစဲးဘၣ်. ဝံၤဒီးစီၤပၤတဲဝဲလၢ ‘ပှၤလၢအသးက့ၣ်​ ဝံဒၤနံးယ့လးန့ၣ်​ တ့ၢ်လီၤကွံာ် အဝဲသ့ၣ်​ ခဲလၢာ် လၢခ့ယုၢ်ကပိၤပူၤ.’ ဖဲပှၤတ့ၢ်လီၤကွံာ် အဝဲသ့ၣ်အခါ ခ့ယုၢ်အီၣ်ကွံာ် အဝဲသ့ၣ်ခဲလၢာ်.

တၢ်မၤအသးအံၤ ဝံၤအလီၢ်ခံ စီၤပၤဒၤရယါဝ့ၣ်​ ထုးထီၣ်​ တၢ်ကလုၢ်လၢ ‘မ့ၢ်လၢ ဝံဒၤနံးယ့လး အကစၢ်ယွၤ မၤပူၤဖျဲးအီၤ လၢခ့ယုၢ်ကပိၤပူၤအဃိ ထံဖိကီၢ်ဖိ ခဲလၢာ်ကဘၣ်ပျံၤ ဝံဒၤနံးယ့လး အကစၢ်ယွၤ.’

ဒ်ဝံဒၤနံးယ့လးအသိး မ့ၢ်နဃ့ထုကဖၣ်လၢ ယဟိဝၤယွၤအအိၣ်​ ကိးနံၤဒဲးဧါ.