ယ့ၣ်ၡူးဟဲဒ်စီၤပၤ အဂ့ၢ်

ယ့ၣ်ၡူးမၤဘျါ ပှၤမဲာ်တထံၣ်တၢ်ခံဂၤဝံၤ တယံာ်တမီၢ်န့ၣ် လဲၤတုၤဝဲဆူသဝီဖိတဖျၢၣ်လၢ အအိၣ်ဘူးလၢ ဝ့ၢ်ယရူၤၡလ့ၣ်န့ၣ်လီၤ. ကိးန့ၢ်အပျဲၢ်အဘီၣ်ခံဂၤဒီးစံးဝဲ, ‘လဲၤဆူသဝီပူၤဒီး သုကထံၣ်န့ၢ်ကသ့ၣ်ယီၤတဒုလီၤ. ဘ့ၣ်လီၤအပျံၤ ဒီးဟဲမိၤဆူယအိၣ်တက့ၢ်’ န့ၣ်လီၤ.

ဖဲကသ့ၣ်ယီၤဖိ ဟဲတုၤဆူယ့ၣ်ၡူးအအိၣ်အခါ ယ့ၣ်ၡူးထီၣ်ဆ့ၣ်နီၤဝဲဒၣ်လၢ ကသ့ၣ်ယီၤဖိအဖီခိၣ်န့ၣ်လီၤ. ဝံၤဒီး လဲၤဒိးဝဲဆူဝ့ၢ်ယရူၤၡလ့ၣ် လၢအစီၤစုၤဝဲတစဲး အပူၤန့ၣ်လီၤ. တုၤအဘုးထီၣ်လၢဝ့ၢ်အကပၤန့ၣ် ပှၤဂီၢ်မုၢ်တဖု ဟဲသဂၢၢ်ထီၣ်အီၤလီၤ. ပှၤအါဒံအါဂၤ ဘ့ၣ်လီၤအဆ့ကၤဒီး ဒါလီၤန့ၢ်ဝဲသ့ၣ်လၢကျဲဖီခိၣ်န့ၣ်လီၤ. ပှၤအဂၤတဖၣ်တခီ ကျီတဲာ်ဟဲစိာ်စူၣ်ပလိၣ်အဒ့တဖၣ်ဒီး ဒါလီၤဝဲလၢကျဲဖီခိၣ်စ့ၢ်ကီးန့ၣ်လီၤ. ဒီးကိးပသူထီၣ်ဝဲသ့ၣ်လၢ ‘စီၤပၤလၢအဟဲလၢ ယဟိဝၤအမံၤန့ၣ် မ်အဘၣ်ယွၤအတၢ်ဆိၣ်ဂ့ၤတက့ၢ်’ န့ၣ်လီၤ.

လၢပျၢၤ အံၣ်စရ့လးအကီၢ်န့ၣ် အလုၢ်အလၢ်အိၣ်လၢ စီၤပၤလၢအထီၣ်သီနီန့ၣ် ဘၣ်ဒိးထီၣ်ကသ့ၣ်ယီၤဖိလၢ ဝ့ၢ်ယရူၤၡလ့ၣ်အပူၤဒီး ဘၣ်ဟးဝ့ၤဝီၤပာ်ဖျါထီၣ်အသးလၢ ကမျၢၢ်အမဲာ်ညါန့ၣ်လီၤ. ယ့ၣ်ၡူးစ့ၢ်ကီး မၤဝဲဒ်န့ၣ်လီၤသၢၣ်. ပှၤတဖၣ်အံၤ ပာ်ဖျါထီၣ် အဝဲသ့ၣ်တူၢ်လိၤကစၢ်ယ့ၣ်ၡူး ဒ်စီၤပၤတဂၤအသိးန့ၣ်လီၤ. ဘၣ်ဆၣ်သနာ်က့ တမ့ၢ်ပှၤကိးဂၤဒဲးတူၢ်လိာ်ယ့ၣ်ၡူးဘၣ်. ပသ့ၣ်ညါဘၣ်တၢ်အံၤသ့လၢ ပမ့ၢ်ကွၢ် တၢ်မၤအသးဖဲ ယ့ၣ်ၡူးလဲၤတုၤလၢတၢ်လုၢ်ဟံၣ်အခါန့ၣ်လီၤ.

လၢတၢ်လုၢ်ဟံၣ်န့ၣ် ယ့ၣ်ၡူးမၤဘျါဝဲ ပှၤမဲာ်တထံၣ်တၢ် ဒီးပှၤလၢအစုတဂ့ၤခီၣ်တဂ့ၤတဖၣ် န့ၣ်လီၤ. ဖဲဖိသၣ်တဖၣ်ထံၣ်တၢ်အံၤအခါ ကိးပသူထီၣ်ဒီး စံးပတြၢၤယ့ၣ်ၡူးန့ၣ်လီၤ. ပှၤလုၢ်တၢ်အခိၣ်တဖၣ် နၢ်ဟူဝဲဒီးအသးထီၣ်ဝဲသ့ၣ်, ဒီးစံးဝဲယ့ၣ်ၡူးလၢ ‘ဖိသၣ်တဖၣ်ကတိၤတၢ်မနုၤလဲၣ်န့ၣ် နနၢ်ဟူဧါ’ န့ၣ်လီၤ.

ယ့ၣ်ၡူးစံးဆၢက့ၤ ‘အၢၣ်, ယနၢ်ဟူကစီဒီလီၤ. လံာ်စီဆှံစံးဝဲဒၣ် “နကတဲာ်ကတီၤတၢ် စံးထီၣ်ပတြၢၤလၢဖိဆံး, ဒီးဖိသၣ်အီၣ်နုၢ်ထံတဖၣ်အထးခိၣ်” န့ၣ် သုတဖးဘၣ်နီတခီၣ်ဧါ. လၢတၢ်န့ၣ်အဃိ ဖိသၣ်တဖၣ် စံးထီၣ်ပတြၢၤဝဲသ့ၣ်ယွၤအစီၤပၤန့ၣ်လီၤ.’

ပဝဲသ့ၣ်တဖၣ်စ့ၢ်ကီး ပအဲၣ်ဒိးဒ်သိးလၢဖိသၣ်တဖၣ်န့ၣ်လီၤ, တမ့ၢ်ဘၣ်ဧါ. ပှၤတနီၤကတြီပှၤ ဒ်သိးပသုတစံးကတိၤကစၢ်ယွၤအဘီမုၢ်အဂ့ၢ်တဂ့ၤလီၤ. ဘၣ်ဆၣ် မ်ပကစံးကတိၤတၢ်ဂ့ၤတဖၣ်လၢ ယ့ၣ်ၡူးကမၤန့ၢ်ပှၤ ကွ့ၢ်ကွ့ၢ်န့ၣ်တက့ၢ်.

ဖဲယ့ၣ်ၡူးအိၣ်မူဒံးလၢဟီၣ်ခိၣ်အခါန့ၣ် အဆၢကတီၢ်တဘၣ်လၢ ကစးထီၣ်ပၢတၢ်ဒ်စီၤပၤတဂၤအသိး ဒံးဘၣ်. ဆံးယံာ်မးကစးထီၣ်ပၢတၢ်လဲၣ်. ယ့ၣ်ၡူးအပျဲၢ်တဖၣ် အဲၣ်ဒိးသ့ညါဝဲတၢ်အံၤလီၤ. ပကဖးဘၣ်တၢ်န့ၣ်လၢ လၢခံတဆၢန့ၣ်လီၤ.