ကသ့ၣ်ယီၤတဒုကတိၤတၢ် အဂ့ၢ်

နနၢ်ဟူဘၣ်ကသ့ၣ်ယီၤ ကတိၤတၢ်ဧါ. သုကစံးလၢ ‘တနၢ်ဟူဘၣ်ဘၣ်. ဆၣ်ဖိကီၢ်ဖိကတိၤတၢ်တသ့ဘၣ်’ န့ၣ်လီၤ. ဘၣ်ဆၣ် လံာ်စီဆှံတခီကွဲးဃာ်ဝဲလၢ ကသ့ၣ်ယီၤတဒု ကတိၤတၢ်အဂ့ၢ်လီၤ. မၤကတိၤတၢ်ဒ်လဲၣ်အဂ့ၢ်န့ၣ် မ်ပကွၢ်သကိးတက့ၢ်.

ဖဲပှၤအံၣ်စရ့လးဖိတဖၣ် ဘူးထီၣ်အကနုာ်လီၤဆူ ကီၢ်ကနၤဧၣ်အကတီၢ်န့ၣ်လီၤ. မိၤအးအစီၤပၤဘၤလးန့ၣ် ပျံၤဝဲပှၤအံၣ်စရ့လးဖိအဃိ ပျၢ်လီၤဝဲအကလူးတဖၣ်ဆူ ပှၤကူၣ်တၢ်ဆးတၢ်သ့လၢ တၢ်ကိးအီၤဘံးလၣ်အအိၣ် ဒ်သိးကဆိၣ်အၢန့ၢ်ပှၤအံၣ်စရ့လးဖိအဂီၢ်န့ၣ်လီၤ. ဘၤလးန့ၣ် အၢၣ်လီၤဝဲဘံးလၣ်လၢ ကဟ့ၣ်အီၤစ့အါအါကလဲာ်န့ၣ်လီၤ. လၢတၢ်န့ၣ်အဃိ ဘံးလၣ်န့ၣ်ဒိးထီၣ်အကသ့ၣ်ယီၤဒီး လဲၤဆူဘၤလးအအိၣ်လီၤ.

ယဟိဝၤတဘၣ်အသးလၢ ဘံးလၣ်ကဆိၣ်အၢအပှၤဂီၢ်မုၢ်ဘၣ်. လၢတၢ်န့ၣ်အဃိ မၢလီၤဝဲကလူးတဂၤ လၢအစိာ်နးဖးထီတဘ့ၣ် ဆၢထၢၣ်လၢကျဲလၢဘံးလၣ်လဲၤဝဲ ဒီးမၤတံာ်ဃာ်ကျဲန့ၣ်လီၤ. ဘံးလၣ် တထံၣ်ဝဲမူခိၣ်ကလူးဘၣ်ဆၣ် အကသ့ၣ်ယီၤတခီ ထံၣ်ဝဲဒၣ်လီၤ. လၢတၢ်န့ၣ်အဃိ ကသ့ၣ်ယီၤန့ၣ် ဃၣ်ကပၤအသးလၢမူခိၣ်ကလူး ယၢ်ခီယၢ်ဘးဒီကတီၢ်န့ၣ်လီၤသၢၣ်. လၢခံကတၢၢ်န့ၣ် ထိၣ်လီၤဃံၤအသးလၢ ကျဲဖီခိၣ်န့ၣ်လီၤ. ဘံးလၣ်သးထီၣ်ဝဲဒိၣ်မးန့ၣ်လီၤ. တီၢ်ဝဲဒၣ်ကသ့ၣ်ယီၤလၢနီၢ်လဲာ်န့ၣ်လီၤ.

ထဲန့ၢ်ဒီး ယဟိဝၤမၤတၢ်လၢ ကသ့ၣ်ယီၤကတိၤတၢ် ဒ်သိးဘံးလၣ်ကနၢ်ဟူအဂီၢ်န့ၣ်လီၤ. ကသ့ၣ်ယီၤစံး, ‘လၢနကတီၢ်ယၤအဂီၢ် ယမၤနၤမနုၤလဲၣ်’ န့ၣ်လီၤ.

ဘံးလၣ်စံးဝဲဒၣ်လၢ ‘နမၤယၤဒ် ပှၤကဆိကမိၢ်ယၤ တၢ်ပျုၢ်လီၤ. ဃဲာ်မ့ၢ်အိၣ်လၢယစုပူၤတဘ့ၣ်သၢပျၢၤ ယကမၤသံဘၣ်နၤလီၤ.’

ကသ့ၣ်ယီၤစံးဘၣ်အီၤ, ‘လၢညါန့ၣ် မ့ၢ်ယမၤနၤဒ်အံၤတဘျီဘျီဧါ.’ ဘံးလၣ်စံးဆၢက့ၤအီၤလၢ ‘နတမၤဘၣ်’ န့ၣ်လီၤ.

တုၤအံၤဒီး ယဟိဝၤဒုးထံၣ်ဝဲဘံးလၣ်လၢ မူခိၣ်ကလူးလၢအစိာ်နးတဘ့ၣ် ဆၢထၢၣ်လၢကျဲလိၤန့ၣ်လီၤ. မူခိၣ်ကလူးစံးဝဲဒၣ် ‘ဘၣ်မနုၤအဃိ နဘၣ်တီၢ်နကသ့ၣ်ယီၤလဲၣ်. နတကြၢးလဲၤဆိၣ်အၢ ပှၤအံၣ်စရ့လးဖိတဖၣ်ဘၣ်အဃိ ယဟဲလၢယကမၤတံာ် ကျဲလၢနလဲၤန့ၣ်လီၤ. နကသ့ၣ်ယီၤမ့ၢ်တဃၣ်ကပၤအသးဒီးယၤန့ၣ် ယကမၤသံဘၣ်နၤလီၤ. ဘၣ်ဆၣ် ယတမၤဘၣ်ဒိအီၤဘၣ်’ န့ၣ်လီၤ.

ဘံးလၣ်စံးဝဲဒၣ်, ‘ယကမၣ်ဘၣ်ယဲလံ. ကစၢ်ဆၢထၢၣ်လၢကျဲပူၤန့ၣ် ယတထံၣ်အဃိန့ၣ်လီၤ.’ မူခိၣ်ကလူးန့ၣ် ပျဲလဲၤဝဲဘံးလၣ်ဒီး ဘံးလၣ်န့ၣ် လဲၤထံၣ်ဝဲဘၤလးန့ၣ်လီၤ. ဂုာ်ကျဲးစၢးဝဲဒံးလၢကဆိၣ်အၢ ပှၤအံၣ်စရ့လးဖိန့ၣ်လီၤ. ဘၣ်ဆၣ်သနာ်က့ လၢကဆိၣ်အၢအလီၢ်န့ၣ် ယဟိဝၤမၤအီၤလၢ ကဆိၣ်ဂ့ၤဝဲဒၣ် သၢဘျီန့ၣ်လီၤ.