စီၤဘံးလၣ်အကသ့ၣ်ယီၤတဲတၢ်

ပှၤအံၣ်စရ့လးဖိတဖၣ်​ အိၣ်ဝဲလၢ ပှၢ်မုၢ်ကနၢ အနံၣ်​ ၄၀ ဃၣ်ဃၣ်လံ. ဒီးအဝဲသ့ၣ်​ ဒုးနၢၤဝဲ ဝ့ၢ်လၢ အဂံၢ်ဆူၣ်ဘါဆူၣ်တဖၣ်​ အါဖျၢၣ်. ခဲအံၤ အဝဲသ့ၣ်အိၣ်လၢကီၢ်မိၤအးလၢ ထံကျိယၢ်ဒ့ၣ်​ အဝၢ်ဘးခီလၢ မုၢ်ထီၣ်တကပၤ. ဒီးဆၢကတီၢ်ဘၣ်လၢ ပှၤအံၣ်စရ့လးဖိတဖၣ်​ ကလဲၤနုာ်လီၤလၢ ကီၢ်တၢ်စံးပာ်အပူၤ. စီၤဘၤလးလၢအမ့ၢ်ပှၤမိၤအးဖိ အစီၤပၤန့ၣ်​ ပျံၤဝဲလၢ ပှၤအံၣ်စရ့လးဖိတဖၣ်​ ကဟဲဒုးနၢၤ အထံကီၢ်. လၢတၢ်န့ၣ်အဃိ အဝဲကွဲမုာ်ဝဲ စီၤဘံးလၣ်​ ဒ်သိးကဟဲလၢ ကီၢ်မိၤအးဒီး ကဆိၣ်အၢဝဲ ပှၤအံၣ်စရ့လးဖိတဖၣ်.

ဘၣ်ဆၣ်​ ယဟိဝၤယွၤတဲဘၣ်​ စီၤဘံးလၣ်လၢ ‘နတဘၣ်လဲၤဆိၣ်အၢ ပှၤအံၣ်စရ့လးဖိတဖၣ်ဘၣ်.’ အဃိ စီၤဘံးလၣ်​ တလဲၤဝဲဘၣ်. စီၤပၤဘၤလး ကွဲမုာ်ကဒီး စီၤဘံးလၣ်​ လၢခံတဘျီ ဒီးအၢၣ်လီၤဝဲလၢ ကယဲၢ်တၢ်လၢ စီၤဘံးလၣ်ဃ့ဝဲန့ၣ်​ ကဟ့ၣ်လီၤဝဲ. ဘၣ်ဆၣ်​ စီၤဘံးလၣ်​ တလဲၤဝဲဘၣ်. လၢခံကတၢၢ် ကစၢ်ယွၤတဲဘၣ်​ စီၤဘံးလၣ်လၢ ‘နလဲၤလၢ ကီၢ်မိၤအးအပူၤသ့ ဘၣ်ဆၣ်​ နကဘၣ်တဲတၢ်ထဲ တၢ်လၢယမၢနတဲ.’

စီၤဘံးလၣ်​ ဒိးထီၣ်ကသ့ၣ်ယီၤ ဒီးလဲၤဝဲလၢ ကလံၤထံးတခီ ဆူကီၢ်မိၤအး. ယဟိဝၤယွၤတဲအီၤလၢ တဘၣ်လဲၤဆိၣ်အၢ ပှၤအံၣ်စရ့လးဖိတဖၣ်ဘၣ်. ဘၣ်ဆၣ်​ စီၤဘံးလၣ်​ ပာ်လီၤအသးလၢ ကလဲၤဆိၣ်အၢဝဲ ပှၤအံၣ်စရ့လးဖိတဖၣ်. အဃိ ယဟိဝၤယွၤ အမူခိၣ်ကလူး တြီဃာ်ဝဲ စီၤဘံးလၣ်လၢ ကျဲမုၢ်ပူၤသၢဘျီ. စီၤဘံးလၣ်တထံၣ်ဝဲ မူခိၣ်ကလူးဘၣ်. ဘၣ်ဆၣ်​ အကသ့ၣ်ယီၤထံၣ်ဝဲ မူခိၣ်ကလူး. ဖဲကသ့ၣ်ယီၤ ထံၣ်ဝဲမူခိၣ်ကလူးအခါ အဆိကတၢၢ်န့ၣ်​ ကသ့ၣ်ယီၤ ဟးထီၣ်ကွံာ်လၢ ကျဲမုၢ်ဖီခိၣ်​ ဒီးလဲၤဝဲဆူတၢ်ပျီပူၤ. ခံဘျီတဘျီန့ၣ်​ ကသ့ၣ်ယီၤ သနံးအသးဒီး တၢ်ဒူၣ်ကပၤအဃိ စီၤဘံးလၣ်​ အခီၣ်ဘၣ်တံၢ်ဒီး တၢ်ဒူၣ်. သၢဘျီတဘျီန့ၣ်​ ကသ့ၣ်ယီၤမံလီၤဝဲလၢ ကျဲမုၢ်ခိၣ်. ဖဲတၢ်မၤအသး တဘျီစုာ်စုာ်န့ၣ်​ စီၤဘံးလၣ်​ တီၢ်ဝဲအကသ့ၣ်ယီၤ လၢနီၣ်လဲာ်.

ဘၣ်ဆၣ်​ ဖဲသၢဘျီတဘျီဝံၤ အလီၢ်ခံန့ၣ်​ ယဟိဝၤယွၤ မၤဝဲတၢ်လီၤလးအဃိ ကသ့ၣ်ယီၤတဲထီၣ်တၢ်. ကသ့ၣ်ယီၤ သံကွၢ်စီၤဘံးလၣ်လၢ ‘ဘၣ်မနုၤအဃိ နတီၢ်ယၤလဲၣ်.’ စီၤဘံးလၣ်​ တဲဆၢက့ၤဝဲလၢ ‘နမၤမဲာ်ဆှးယၤ. ခဲအံၤ နးမ့ၢ်အိၣ်လၢယစုပူၤန့ၣ်​ ယကမၤသံနၤ.’ ကသ့ၣ်ယီၤ စံးဆၢက့ၤအီၤလၢ ‘နဒိးယၤ အိၣ်လံအနံၣ်ဖးယံာ်လံ. မ့ၢ်ယမၤနၤဒ်အံၤ တဘျီဘျီဧါ.’

ဝံၤဒီး ယဟိဝၤယွၤဒုးထံၣ်​ စီၤဘံးလၣ်လၢ မူခိၣ်ကလူး. မူခိၣ်ကလူးတဲဘၣ်အီၤလၢ ‘ယဟိဝၤယွၤ ဟ့ၣ်ပလီၢ်နၤလၢ နတဘၣ်လဲၤဆိၣ်အၢ ပှၤအံၣ်စရ့လးဖိတဖၣ်ဘၣ်.’ စီၤဘံးလၣ်တဲဝဲလၢ ‘ယမၤကမၣ်တၢ်လံ. ယကက့ၤကဒါက့ၤလၢ ယဟံၣ်.’ ဘၣ်ဆၣ်​ မူခိၣ်ကလူး တဲအီၤလၢ ‘နလဲၤလၢကီၢ်မိၤအးအပူၤသ့ ဘၣ်ဆၣ်​ နကဘၣ်တဲတၢ်ထဲ တၢ်လၢယဟိဝၤယွၤ မၢနတဲ.’

မ့ၢ်စီၤဘံးလၣ်ဒိကနၣ်ဝဲ ယဟိဝၤယွၤအကလုၢ်ဧါ. တဒိကနၣ်ဝဲဘၣ်. စီၤဘံးလၣ်​ ဂုာ်ကျဲးစၢးဆိၣ်အၢ ပှၤအံၣ်စရ့လးဖိ သၢဘျီညါ. ဘၣ်ဆၣ်​ လၢတၢ်ဆိၣ်အၢအလီၢ်န့ၣ်​ ယဟိဝၤယွၤမၢ အဆိၣ်ဂ့ၤက့ၤဝဲ ပှၤအံၣ်စရ့လးဖိတဖၣ်​ ကိးဘျီဒဲး. လၢခံကတၢၢ်န့ၣ်​ ပှၤအံၣ်စရ့လးဖိတဖၣ်​ လဲၤဒုးဝဲ ပှၤမိၤအးဖိ ဒီးစီၤဘံးလၣ်သံဝဲ. စီၤဘံးလၣ်​ မ့ၢ်ဒိကနၣ်​ ယဟိဝၤယွၤအကလုၢ်န့ၣ်​ တၢ်ကဟဲကဲထီၣ်အသးဒီးအီၤ ဒ်အံၤဧါ.