ဟးထီၣ်ဘၣ်ဝဲသ့ၣ်လၢဃိာ်ပူၤ အဂ့ၢ်

ကွၢ်, မူခိၣ်ကလူးလၢ အဖီၣ်ဃာ် ဃိာ်အပဲတြီလၢ အအိးထီၣ်အသးန့ၣ်တက့ၢ်. ပှၤတဖၣ်လၢအမၤထူၣ်ဖျဲးဝဲန့ၣ် မ့ၢ်ယ့ၣ်ၡူးအတၢ်မၢဖိတဖၣ်န့ၣ်လီၤ. ဘၣ်မနုၤအဃိ အဝဲသ့ၣ် ဘၣ်တၢ်တ့ၢ်လီၤအီၤလၢ ဃိာ်ပူၤလဲၣ်န့ၣ် ပကကွၢ်သကိးတက့ၢ်.

ယ့ၣ်ၡူးအပျဲၢ်အဘီၣ်တဖၣ် ဘၣ်တၢ်လူလီၤအီၤလၢသးစီဆှံန့ၣ် တယံာ်ဒံးဘၣ်. တၢ်မၤအသးတခီ မ့ၢ်ဒ်အံၤလီၤ. ဘၣ်မုၢ်တနံၤ, ဖဲမုၢ်ထူၣ်အခါန့ၣ် ပ့းတရူးဒီးယိၤဟၣ်လဲၤသကိးဝဲဆူ ယရူၤၡလ့ၣ်အတၢ်လုၢ်ဟံၣ်န့ၣ်လီၤ. ဖဲတၢ်လုၢ်ဟံၣ်အပဲတြီအကပၤန့ၣ် ပှၤလၢအခီၣ်တဆှိၣ် လၢအအိၣ်ဖျဲၣ်ထီၣ်လံၤလံၤ အိၣ်တဂၤလီၤ. ဒ်သိးကဃ့တိၢ်လၢ ပှၤလၢအဟဲဆူတၢ်လုၢ်ဟံၣ်သ့ၣ်တဖၣ် အအိၣ်အဂီၢ် ပှၤဟဲယိးအီၤဒီး ပာ်အီၤဖဲတၢ်လီၢ်အဝဲန့ၣ် ကိးနံၤဒဲးလီၤ. ဖဲအဝဲဒၣ်ထံၣ် ပ့းတရူး ဒီးယိၤဟၣ်အခါ ဃ့ဝဲလၢအကဟ့ၣ်အီၤ တၢ်တခါခါန့ၣ်လီၤ. တၢ်မၢဖိတဖၣ် ကမၤဝဲမနုၤလဲၣ်.

အဝဲသ့ၣ်အိၣ်ကတီၤဝဲဒီး ကွၢ်ဃီၤဝဲပှၤဖှီၣ်ပှၤယာ်တဂၤအံၤန့ၣ်လီၤ. ဒီးပ့းတရူးစံးဝဲ ‘ယစ့တအိၣ်ဘၣ်. ဘၣ်ဆၣ်, ယကဟ့ၣ်နၤ တၢ်လၢအအိၣ်န့ၣ်လီၤ.’ ဒီးစံးဝဲ ‘ဂဲၤဆၢထၢၣ်ဒီးဟး လၢယ့ၣ်ၡူးအမံၤပူၤတက့ၢ်.’ ဝံၤဒီးဖီၣ်ထီၣ်ပှၤန့ၣ် အစုထွဲန့ၣ်လီၤ. ဒီးပှၤန့ၣ် ဂဲၤဆၢထၢၣ်စံၣ်ဝဲတဘျီဃီဝံၤ ဟးထီၣ်ကျဲန့ၣ်လီၤ. ဖဲပှၤတဖၣ်ထံၣ်တၢ်အံၤအခါ ကမၢကမၣ်ဝဲသ့ၣ် ဒိၣ်ဒိၣ်ကလဲာ်ဝံၤ လၢတၢ်စိကမီၤလီၤလးဒ်အံၤအဃိ သူၣ်ပိၢ်သးဝာ်လၢ တၢ်သးခုဖးဒိၣ်အပူၤန့ၣ်လီၤ.

ပ့းတရူးစံးဝဲဒၣ် ‘ပမၤတၢ်လီၤလးအံၤလၢ ယွၤလၢအမၤမူထီၣ်က့ၤယ့ၣ်ၡူးလၢတၢ်သံ အစိကမီၤန့ၣ်လီၤ.’ ဖဲပ့းတရူးဒီးယိၤဟၣ် ကတိၤတၢ်အခါ တၢ်ဘူၣ်တၢ်ဘါအခိၣ်အနၢ်တနီၤ ဟဲတုၤဝဲလီၤ. အဝဲသ့ၣ်သးထီၣ်ဒိၣ်မးလၢ ပ့းတရူးဒီးယိၤဟၣ်စံၣ်တဲၤတဲလီၤ ယ့ၣ်ၡူးမူထီၣ်က့ၤဝဲအဂ့ၢ်အဃိလီၤ. လၢတၢ်န့ၣ်အဃိ ဖီၣ်ဝဲသ့ၣ် ဒီးတ့ၢ်လီၤဝဲသ့ၣ် ပ့းတရုးဒီးယိၤဟၣ် ဆူဃိာ်ပူၤန့ၣ်လီၤ.

လၢခံတနံၤန့ၣ် တၢ်ဘူၣ်တၢ်ဘါအခိၣ်တဖၣ် မၤတၢ်အိၣ်ဖှိၣ်ဖးဒိၣ်န့ၣ်လီၤ. ဟဲကိးဃုာ်ဝဲစ့ၢ်ကီး ပ့းတရူး, ယိၤဟၣ်, ဒီးပှၤလၢအဝဲသ့ၣ်မၤဘျါအီၤန့ၣ်လီၤ. တၢ်ဘူၣ်တၢ်ဘါအခိၣ်အနၢ်တဖၣ် သံကွၢ်အဝဲသ့ၣ် ‘သုမၤဘျါက့ၤပှၤအံၤလၢ မတၤအစိကမီၤန့ၣ်လဲၣ်, တဲတဘီ.’

ပ့းတရူးစံးဆၢက့ၤအဝဲသ့ၣ် ‘ပမၤဘျါပှၤအံၤလၢ ယွၤလၢအမၤမူထီၣ်က့ၤယ့ၣ်ၡူး အစိကမီၤန့ၣ်လီၤ.’ ပှၤလုၢ်တၢ်အခိၣ်သ့ၣ်တဖၣ် တသ့ၣ်ညါလၢ ကဘၣ်မၤဝဲသ့ၣ်ဒ်လဲၣ်န့ၣ်ဘၣ်. မ့ၢ်လၢ တၢ်လီၤလးအဝဲအံၤ ကဲထီၣ်တ့ၢ်နီၢ်နီၢ်အဃိ အဝဲသ့ၣ်သမၢဝဲတသ့ဘၣ်. လၢတၢ်အံၤအဃိ တဲပလီၢ်တၢ်မၢဖိတဖၣ်လၢ အသုတစံၣ်တဲၤတဲလီၤ ယ့ၣ်ၡူးအဂ့ၢ်ဆူညါလၢၤတဂ့ၤ ဒီးပျၢ်ကွံာ်အဝဲသ့ၣ်လီၤ.

ဒ်မုၢ်နံၤတဖၣ်လဲၤပူၤကွံာ်ဝဲအသိး တၢ်မၢဖိတဖၣ် စံၣ်တဲၤတဲလီၤယ့ၣ်ၡူးအဂ့ၢ်ဆူညါဒီး မၤဘျါဝဲသ့ၣ် ပှၤဆူးပှၤဆါတဖၣ်စ့ၢ်ကီးန့ၣ်လီၤ. တၢ်လီၤလးတဖၣ်အံၤအကစီၣ်န့ၣ် ဟူထီၣ်သါလီၤသကုၤဆးဒးလီၤ. လၢတၢ်န့ၣ်အဃိ ပှၤလၢ ဝ့ၢ်ယရူၤၡလ့ၣ်အဃိၢ်အဃၢၤဝးတရံး ဒီးခူဝ့ၢ်ဒူသဝီတဖၣ်ဒၣ်လဲာ် ဟဲကိးဝဲ ပှၤဘၣ်ဆူးဘၣ်ဆါတဖၣ်ဆူ တၢ်မၢဖိတဖၣ်အအိၣ် လၢကမၤဘျါန့ၢ်အီၤလီၤ. တၢ်ဘူၣ်တၢ်ဘါအခိၣ်အနၢ်တဖၣ် အသးကါလၢတၢ်အံၤအဃိဒီး ဖီၣ်တၢ်မၢဖိတဖၣ်ဝံၤ တ့ၢ်လီၤအဝဲသ့ၣ်ဆူ ဃိာ်ပူၤန့ၣ်လီၤ. သနာ်က့ တၢ်မၢဖိတဖၣ် တအိၣ်ဘၣ်လၢဃိာ်ပူၤ ယံာ်ယံာ်ဘၣ်.

တုၤမုၢ်နၤခီန့ၣ် ဒ်အဖျါလၢတၢ်ဂီၤပူၤအံၤအသိး ကစၢ်ယွၤအမူခိၣ်ကလူး ဟဲအိးထီၣ်ဝဲဃိာ်အပဲတြီလီၤ. မူခိၣ်ကလူးစံးဝဲ ‘လဲၤဆူတၢ်လုၢ်ဟံၣ်ဒီး စံၣ်တဲၤတဲလီၤတၢ်ကဒီး ဆူကမျၢၢ်တက့ၢ်.’ လၢခံတဂီၤတၢ်ဘူၣ်တၢ်ဘါအခိၣ်တဖၣ် ပျၢ်လီၤပှၤလၢ အကထုးထီၣ်တၢ်မၢဖိတဖၣ်အခါန့ၣ် တၢ်မၢဖိတဖၣ်တအိၣ်လၢၤဘၣ်. လၢခံ အဝဲသ့ၣ်ထံၣ်ဝဲလၢ တၢ်မၢဖိတဖၣ် စံၣ်တဲၤတဲလီၤ ပှၤတဖၣ်လၢတၢ်လုၢ်ဟံၣ်ပူၤန့ၣ်ဒီး လဲၤကိးအဝဲသ့ၣ်ဆူ ကွီၢ်ဘျီၣ်ခိၣ်တဖၣ်အအိၣ်န့ၣ်လီၤ.

တၢ်ဘူၣ်တၢ်ဘါအခိၣ်တဖၣ် စံးဝဲသ့ၣ်လၢ ‘ပတြီဃာ်သုဃံးဃံးလၢ သုတသိၣ်က့ၤသီက့ၤ ယ့ၣ်ၡူးအဂ့ၢ် လ့ၤတက့ၤဘၣ်ဆၣ် သုမၤပှဲၤဝ့ၢ်ယရူၤၡလ့ၣ်လၢ သုတၢ်စူၢ်တၢ်နာ်န့ၣ်လံမးလဲၣ်’ န့ၣ်လီၤ. တၢ်မၢဖိတဖၣ်စံးဆၢက့ၤ ‘ပကဘၣ်ဒိကနၣ်ယွၤကလုၢ် အါန့ၣ်ပှၤကညီအတၢ်ကတိၤန့ၣ်လီၤ’ ဒီးအဝဲသ့ၣ် သိၣ်လိသီလိ ‘တၢ်သးခုကစီၣ်’ အဂ့ၢ်ဆူညါဒ်န့ၣ်လီၤ. တၢ်န့ၣ် တမ့ၢ်တၢ်ဒိဂ့ၤတဲာ်ဘၣ်လၢ ပဂီၢ်ဘၣ်ဧါ.