တၢ်မၤလိ ၉၅
တၢ်မၤပတုာ်အဝဲသ့ၣ် တန့ၢ်နီတမံၤဘၣ်
လၢတၢ်လုၢ်ဟံၣ်အပဲတြီ အခီၣ်ထံးန့ၣ် ပိာ်ခွါလၢအဟးတသ့ဘၣ်တဂၤ ဆ့ၣ်နီၤဒီးဃ့အီၣ်တၢ်ဖဲန့ၣ် ကိးနံၤဒဲး. ဘၣ်တနံၤ ဖဲမုၢ်ဃ့ၢ်လီၤအခါ အဝဲထံၣ်ဝဲ စီၤပ့းတရူး ဒီးစီၤယိၤဟၣ် ကလဲၤနုာ်လီၤလၢ တၢ်လုၢ်ဟံၣ်ပူၤ. ဖဲန့ၣ်အဆၢကတီၢ် ပိာ်ခွါအံၤတဲဘၣ် အဝဲသ့ၣ်လၢ ‘ဝံသးစူၤဟ့ၣ်ယၤ တၢ်တမံၤမံၤမီၤ.’ စီၤပ့းတရူး တဲဆၢက့ၤအီၤလၢ ‘ယကဟ့ၣ်နၤတၢ်ဟ့ၣ်လၢ အဂ့ၤဒိၣ်န့ၢ်ဒံးစ့. လၢယ့ၣ်ၡူးအမံၤ ဂဲၤဆၢထၢၣ်ဒီးဟးတက့ၢ်.’ ဝံၤဒီး စီၤပ့းတရူး ဝံၣ်ဆၢထၢၣ်အီၤ ဒီးပိာ်ခွါန့ၣ်ဟးဝဲ. ပှၤဂီၢ်မုၢ်တဖၣ် သးခုဒိၣ်မး ဒီးပှၤအါဂၤကဲထီၣ်ဝဲ ယ့ၣ်ၡူးအပျဲၢ်အဘီၣ်.
ဘၣ်ဆၣ် ပှၤလုၢ်တၢ်ဒိၣ် ဒီးပှၤစးဒူၤကဲတဖၣ် သးပှံၢ်ထီၣ်တၢ်ဒိၣ်မး. အဝဲသ့ၣ်ဖီၣ်ဝဲ တၢ်မၢဖိတဖၣ် ဒီးလဲၤကိးဝဲဆူရူ. ဒီးအဝဲသ့ၣ် သံကွၢ်ဝဲလၢ ‘ဒ်သိးသုကမၤဘျါ ပိာ်ခွါတဂၤအံၤအဂီၢ် မတဂၤဟ့ၣ်သု တၢ်စိတၢ်ကမီၤလဲၣ်.’ စီၤပ့းတရူး တဲဝဲလၢ ‘ပဒိးန့ၢ်ဘၣ် တၢ်စိတၢ်ကမီၤလၢ ယ့ၣ်ၡူးခရံာ် လၢသုမၤသံအီၤတဂၤန့ၣ် အအိၣ်.’ တၢ်ဘူၣ်တၢ်ဘါခိၣ်နၢ်တဖၣ် ကိးပသူထီၣ်လၢ ‘တဘၣ်တဲ ယ့ၣ်ၡူးအဂ့ၢ်လၢၤတဂ့ၤ.’ ဘၣ်ဆၣ် တၢ်မၢဖိတဖၣ် တဲဝဲလၢ ‘ပကဘၣ်တဲ ယ့ၣ်ၡူးအဂ့ၢ်. ပတတဲဘၣ်န့ၣ် တသ့ဘၣ်.’
ဖဲပှၤပျၢ်ကွံာ် စီၤပ့းတရူးဒီးစီၤယိၤဟၣ် ဝံၤအလီၢ်ခံ အဝဲသ့ၣ်လဲၤဝဲဆူ ယ့ၣ်ၡူးအပျဲၢ်အဘီၣ် အဂၤတဖၣ်အအိၣ် ဒီးတဲဘၣ်အဝဲသ့ၣ်လၢ တၢ်ကဲထီၣ်သးအဂ့ၢ်. အဝဲသ့ၣ် ဃ့ဘါထုကဖၣ်တၢ်တပူၤဃီ ဒီးဃ့ယဟိဝၤယွၤလၢ ‘ဒ်သိး ပကအိၣ်ဒီး တၢ်သးဒူလၢ ပကဆဲးမၤနတၢ်မၤအဂီၢ်န့ၣ် ဝံသးစူၤ မၤစၢၤပှၤတက့ၢ်.’ ယဟိဝၤယွၤ ဟ့ၣ်လီၤအဝဲသ့ၣ် သးစီဆှံ ဒီးအဝဲသ့ၣ် ဆဲးစံၣ်တဲၤတဲလီၤတၢ် ဒီးမၤဘျါက့ၤ ပှၤဂၤအတၢ်ဆါ. အဃိ ပှၤအါဂၤကဲထီၣ်ဝဲ ယ့ၣ်ၡူးအပျဲၢ်အဘီၣ်. ပှၤစးဒူၤကဲတဖၣ် သးက့ၣ်တၢ်မၢဖိတဖၣ် ဒီးဖီၣ်အဝဲသ့ၣ် ဒီးဖၢနုာ်အဝဲသ့ၣ် လၢဃိာ်ပူၤ. ဘၣ်ဆၣ် ဖဲမုၢ်နၤခီန့ၣ် ယဟိဝၤယွၤ ဆှၢလီၤဝဲ မူခိၣ်ကလူးတဂၤလၢ ကဟဲအိးထီၣ်ဝဲ ဃိာ်အတြဲၤ ဒီးတဲဘၣ် တၢ်မၢဖိတဖၣ်လၢ ‘က့ၤဆူတၢ်လုၢ်ဟံၣ် ဒီးသိၣ်လိတၢ်ဖဲန့ၣ်.’
လၢခံတဂီၤ လၢပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် အပူၤန့ၣ် ပှၤတဲဘၣ် တၢ်ဘူၣ်တၢ်ဘါခိၣ်နၢ်တဖၣ်လၢ ‘ပှၤကးပံးဃာ် ဃိာ်အတြဲၤကျၢၤကျၢၤ. ဘၣ်ဆၣ် ပိာ်ခွါလၢသုဖီၣ်န့ၣ် တအိၣ်လၢၤဘၣ်. အဝဲသ့ၣ်အိၣ်လၢ တၢ်လုၢ်ဟံၣ်အပူၤ ဒီးသိၣ်လိပှၤဂၤတဖၣ်.’ တၢ်မၢဖိတဖၣ်န့ၣ် ပှၤဖီၣ်ကဒီးအဝဲသ့ၣ် ဒီးပှၤဆှၢအဝဲသ့ၣ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်တဖျၢၣ်. ပှၤလုၢ်တၢ်ခိၣ် အဒိၣ်ကတၢၢ် တဲဝဲလၢ ‘သုတဘၣ်တဲ ယ့ၣ်ၡူးအဂ့ၢ်တဂ့ၤန့ၣ် ပတဲသုဝံၤလံဒၢး.’ ဘၣ်ဆၣ် စီၤပ့းတရူး တဲဆၢက့ၤဝဲလၢ “လၢပကဒိကနၣ် ပှၤကညီအလီၢ် ပကဘၣ်ဒိကနၣ် ကစၢ်ယွၤ အကလုၢ်.”
တၢ်ဘူၣ်တၢ်ဘါခိၣ်နၢ်တဖၣ် သးပှံၢ်ထီၣ်တၢ်ဒိၣ်မး အဃိအဝဲသ့ၣ် အဲၣ်ဒိးမၤသံ တၢ်မၢဖိတဖၣ်. ဘၣ်ဆၣ် ပှၤဖၤရံၤၡဲတဂၤ လၢအမံၤမ့ၢ်ဝဲ စီၤကမၤလ့လးန့ၣ် ဂဲၤဆၢထၢၣ် ဒီးတဲဝဲလၢ ‘ပလီၢ်သုသးသၢၤ. ဘၣ်သ့ၣ်သ့ၣ် ကစၢ်ယွၤအိၣ်ဒီး ပိာ်ခွါတဖၣ်အံၤ. အဃိ သုထီဒါ ကစၢ်ယွၤဘူၣ်ဧါ.’ တၢ်ဘူၣ်တၢ်ဘါခိၣ်နၢ်တဖၣ်န့ၣ် ဒိကနၣ်ဝဲအကလုၢ်. ဖဲပှၤတီၢ်တၢ်မၢဖိတဖၣ်လၢ နီၣ်တီၢ်ဝံၤအလီၢ်ခံ တၢ်ဘူၣ်တၢ်ဘါခိၣ်နၢ် မၤလိာ်ကဒီးအဝဲသ့ၣ်လၢ သုတဘၣ် ဟးစံၣ်တဲၤတဲလီၤတၢ်လၢၤတဂ့ၤ ဝံၤဒီး ပျဲက့ၤအဝဲသ့ၣ်. ဘၣ်ဆၣ် တၢ်မၢဖိတဖၣ် တပတုာ် စံၣ်တဲၤတဲလီၤတၢ်ဘၣ်. အဝဲသ့ၣ် ဆဲးပာ်ဖျါထီၣ် တၢ်သးဒူ ဒီးစံၣ်တဲၤတဲလီၤဝဲ တၢ်သးခုကစီၣ် လၢတၢ်လုၢ်ဟံၣ် ဒီးတဟံၣ်ဘၣ်တဟံၣ်.
“လၢပကဒိကနၣ် ပှၤကညီအလီၢ် ပကဘၣ်ဒိကနၣ် ကစၢ်ယွၤ အကလုၢ်.”—မၤတၢ် ၅:၂၉