ပကြၢးမၤ မူးပွဲတဖၣ်ဧါ

မုၢ်မဆါတနံၤအံၤ တၢ်ဘူၣ်တၢ်ဘါဒီး ဟီၣ်ခိၣ်မူးပွဲတဖၣ်လၢ ပှၤအါဂၤဘၣ်အသး လၢဘၣ်တၢ်မၤအီၤလၢ ဟီၣ်ခိၣ်တၢ်လီၢ်အါမးန့ၣ် အခီၣ်ထံးခီၣ်ဘိ တမ့ၢ်လၢလံာ်စီဆှံပူၤဘၣ်. မ့မ့ၢ်ဒ်န့ၣ်ဒီး မူးပွဲတဖၣ်အံၤ ဟဲလီၤစၢၤဖဲလဲၣ်. နလဲၤဃုသ့ၣ်ညါနၢ်ပၢၢ်တၢ်လၢ လံာ်ဖှိၣ်ဒၢးတဒၢး မ့ၢ်သ့န့ၣ် နသမံသမိးကွၢ် လံာ်ဒိးသန့ၤတဖၣ်လၢ အပာ်ဖျါ နအိၣ်ဆိးအလီၢ် မူးပွဲလၢ ပှၤအါဂၤဘၣ်အသးတဖၣ် အဂ့ၢ်သ့န့ၣ်လီၤ. ဆိကမိၣ်ကွၢ်သကိး တၢ်အဒိစှၤကိာ်တက့ၢ်.

အံးစထၢၣ် (ခရံာ်ဂဲၤဆၢထၢၣ် အနံၤ). ဘြံးတၢၣ်နံကၣ် လံာ်ထံးလံာ်ယ့ၤ န့ၣ်ပာ်ဖျါဝဲလၢ “တၢ်မၤ အံးစထၢၣ်အဂ့ၢ်န့ၣ် လံာ်စီဆှံ အသီတကတြူၢ်အပူၤ တနဲၣ်ဖျါဝဲ နီတပူၤဘၣ်.” အံးစထၢၣ်အမူး စးထီၣ်အသးဒ်လဲၣ်. ဟဲလီၤစၢၤလၢ တၢ်နာ်ကမၣ် အတၢ်ဘူၣ်တၢ်ဘါလီၤ. အဝဲသ့ၣ်စံးဝဲလၢ မူးပွဲအံၤန့ၣ် မ့ၢ်ယ့ၣ်ၡူးအတၢ်သမူထီၣ်က့ၤ အတၢ်ပနီၣ်အမူး သနာ်က့, လုၢ်လၢ်လၢ ဘၣ်ဃးဒီး အံးစထၢၣ်မူးပွဲကတီၢ်န့ၣ် တမ့ၢ်ခရံာ်ဖိ အလုၢ်အလၢ်တဖၣ်ဘၣ်. အဒိ, ဘၣ်ဃးဒီး “အံးစထၢၣ် ပဒဲ” လၢပှၤအါဂၤဘၣ်အသးန့ၣ် ကဲးသလံး လံာ်ထံးလံာ်ယ့ၤ စံးဝဲဒ်အံၤလီၤ– “ပဒဲန့ၣ် မ့ၢ်တၢ်အဒိတမံၤလၢ ပှၤလၢအတဘါယွၤဒီး မ့ၢ်တၢ်ပနီၣ်လၢ တၢ်ဖှံလီၤထီဘိန့ၣ်လီၤ.”

နံၣ်ထီၣ်သီအမူးတဖၣ်. နံၤသီဒီး လုၢ်လၢ်တဖၣ်လၢ ဘၣ်ထွဲဒီး နံၣ်ထီၣ်သီအမူးတဖၣ်န့ၣ် တကီၢ်ဒီးတကီၢ် တလီၤဂာ်လိာ်အသးဘၣ်. ဘၣ်ဃးဒီးမူးပွဲအံၤ အခီၣ်ထံးခီၣ်ဘိန့ၣ် ဟီၣ်ခိၣ်အလံာ်ထံးလံာ်ယ့ၤ ပာ်ဖျါဝဲဒ်အံၤလီၤ– “ခ.န. ၄၆, လါယနူၤအါရံၤ ၁ သီန့ၣ် ရိမ့ၤအစီၤပၤ ကၠူလံးယဲးစံဇၣ် ပာ်ဂၢၢ်ကျၢၤဝဲလၢ နံၣ်ထီၣ်သီအနံၤလီၤ. ပှၤရိမ့ၤဖိတဖၣ် ဟ့ၣ်လီၤဝဲနံၤအံၤဆူ ဝ့ၢ်ပဲတြီ, ဟံၣ်ပဲတြီ ဒီးတၢ်အခီၣ်ထံးအယွၤ, ကၠံနဲးစ်အအိၣ်န့ၣ်လီၤ. သန့ၤထီၣ်ဝဲ ကၠံနဲးစ် အမံၤဒီးကိးဝဲ လါယနူၤအါရံၤလီၤ, အဝဲအိၣ်ဒီး အမဲာ်သၣ်ခံဘ့ၣ်—ကွၢ်တၢ်လၢ မဲာ်ညါတဘ့ၣ် ဒီးလီၢ်ခံတဘ့ၣ်လီၤ.” လၢတၢ်န့ၣ်အဃိ, နံၣ်ထီၣ်သီအမူးတဖၣ်န့ၣ် ဟဲလီၤစၢၤလၢ ပှၤလၢအတဘါယွၤတဖၣ် အလုၢ်အလၢ်န့ၣ်လီၤ.

ဟလိၣ်ဝံ. အမဲရကၤနါ လံာ်ထံးလံာ်ယ့ၤ စံးဝဲဒ်အံၤလီၤ– “လုၢ်လၢ်လီၤဆီတဖၣ်လၢ ဘၣ်ဃးဒီး ဟလိၣ်ဝံန့ၣ် ပထံၣ်ဘၣ်လၢ ဟဲလီၤစၢၤလၢ တချုးတုၤ ခရံာ်ဖိအစိၤ ဒရူအံး [လၢပျၢၤ စဲလ်တ့းပှၤလုၢ်တၢ်အဒိၣ်] အလုၢ်အလၢ်န့ၣ်လီၤ. ပှၤစဲလ်တ့းဖိတဖၣ် မၤဝဲမူးပွဲလၢ ယွၤအကါဒိၣ်ခံဂၤ—မုၢ်အယွၤဒီး ပှၤသံတဖၣ် အယွၤ . . . လၢမူးပွဲအံၤ ဘၣ်တၢ်မၤအီၤဖဲ လါနိၣ်ဝ့ဘၢၣ် ၁ သီ, ပှၤစဲလ်တ့းဖိတဖၣ် အနံၣ်ထီၣ်သီ အစးန့ၣ်လီၤ. မူးပွဲလၢပှၤသံတဖၣ်အဂီၢ်န့ၣ် ဒုးကဲထီၣ်ဝဲလၢ ခရံာ်ဖိအလုၢ်အလၢ် တစဲးဘၣ်တစဲးန့ၣ်လီၤ.”

မူးပွဲအဂၤတဖၣ်. မူးပွဲခဲလၢာ်လၢ ဘၣ်တၢ်မၤအီၤလၢ ဟီၣ်ခိၣ်ဒီဘ့ၣ်အဂ့ၢ်န့ၣ် ပကတိၤသကိးခဲလၢာ် တသ့ဘၣ်. ဘၣ်ဆၣ် မူးပွဲလၢအမၤလၤကပီၤ ပှၤကညီ မ့တမ့ၢ် ပှၤကညီအတၢ်ကရၢ ကရိတဖၣ်န့ၣ် ယဟိဝၤ တတူၢ်လိာ်ဝဲဘၣ်. (ယံးရမံယၤ ၁၇:၅-၇; မၤတၢ် ၁၀:၂၅, ၂၆) တိၢ်နီၣ်လၢနသးပူၤလၢ, တၢ်ဘူၣ်တၢ်ဘါ မူးပွဲတဖၣ်န့ၣ် ကစၢ်ယွၤတူၢ်လိာ် တတူၢ်လိာ်န့ၣ် ပကဘၣ် သမံသမိးကွၢ် တၢ်သ့ၣ်တဖၣ်အံၤ အခီၣ်ထံးခီၣ်ဘိန့ၣ်လီၤ. (ယၡါ. ၅၂:၁၁; လီၣ်. ၁၈:၄) လံာ်အံၤအတၢ်နီၤဖး ၁၆ အပူၤပာ်ဖျါဝဲ လံာ်စီဆှံ တၢ်သိၣ်တၢ်သီတဖၣ်န့ၣ် ကမၤစၢၤနၤလၢ နကနီၤဖး တၢ်ပာ်ဃုာ်လၢ ဟီၣ်ခိၣ်မူးပွဲလုၢ်လၢ်တဖၣ်အံၤန့ၣ် ကစၢ်ယွၤထံၣ်ဝဲ ဒ်လဲၣ်အဂ့ၢ်န့ၣ်လီၤ.