လၢဝဲၤတြၢ်တဖၣ်န့ၣ် ပှၤမၤတၢ်မနုၤလဲၣ်

ဘ့ၤသ့လး အဟံၣ်ဖိဃီဖိတဖၣ်န့ၣ် မၤတၢ်လၢဝဲၤကျိၤအကလုာ်ကလုာ် လၢကဆီၣ်ထွဲမၤစၢၤ တၢ်စံၣ်တဲၤတဲလီၤတၢ်မၤလၢ ထံကီၢ်တကီၢ် မ့တမ့ၢ် အါန့ၢ်တကီၢ်အပူၤန့ၣ်လီၤ. အဝဲသ့ၣ်မၤတၢ်လၢ တၢ်ကွဲးကျိာ်ထံတၢ်အကရူၢ်, တၢ်စဲကျံးမဲးကစံ, တၢ်ဆးလံာ်, တၢ်ပာ်ဖှိၣ်လံာ်အလီၢ်, တၢ်ထုးထီၣ်တၢ်ကလုၢ်ဒီးတၢ်ဂီၤမူ, မ့တမ့ၢ် ကွၢ်ထွဲတၢ်မၤအဂၤတဖၣ်လီၤ.

ဝဲၤတြၢ်ကမံးတံာ်န့ၣ် ပၢဆှၢအံးထွဲကွၢ်ထွဲဝဲ တၢ်ဖံးတၢ်မၤတဖၣ်လီၤ. တၢ်ဖံးတၢ်မၤလၢ ဘၣ်တၢ်မၤအီၤလၢ ဝဲၤတြၢ်အပူၤန့ၣ် ပှၤပၢဆှၢတၢ်ကမံးတံာ် အးလီၤဝဲလၢ ဝဲၤတြၢ်ကမံးတံာ်အစုပူၤလီၤ. ဝဲၤတြၢ်ကမံးတံာ်န့ၣ် ဘၣ်တၢ်ပာ်ဖှိၣ်ထီၣ်အီၤလၢ တၢ်အိၣ်ဖှိၣ်သးပှၢ်လၢ အတုၤထီၣ်ထီၣ်ဘးသၢဂၤ မ့တမ့ၢ်အါန့ၢ်ဒံးသၢဂၤန့ၣ်လီၤ. ကမံးတံာ်အံၤ ဘၣ်ဒုးသ့ၣ်ညါဝဲ ပှၤပၢဆှၢတၢ်ကမံးတံာ် လၢဘၣ်ဃးဒီးတၢ်ဂုၤထီၣ်ပသီထီၣ် ဒီးတၢ်သဘံၣ်ဘုၣ်လၢ အဟဲပၢၢ်ထီၣ်လၢ တၢ်လီၢ်လၢ အဝဲသ့ၣ်အတၢ်ကွၢ်ထွဲအဖီလာ်န့ၣ်လီၤ. ခီဖျိအဝဲသ့ၣ်မၤဒ်အံၤအဃိ ကဲထီၣ်တၢ်မၤစၢၤလၢ ပှၤပၢဆှၢတၢ်ကမံးတံာ် ကဃုထၢဝဲတၢ်ဂ့ၢ်လၢ ကကွဲးနုာ်ဝဲလၢပလံာ်လဲၢ်တဖၣ်အပူၤလီၤ. ဒီးကဲထီၣ်တၢ်မၤစၢၤစ့ၢ်ကီးလၢ ကဃုထၢတၢ်ဂ့ၢ်လၢ တၢ်အိၣ်ဖှိၣ်ရိဖှိၣ် ဒီးတၢ်အိၣ်ဖှိၣ်ဖးဒိၣ်တဖၣ်အဂီၢ်န့ၣ်လီၤ. ပှၤလၢအခၢၣ်စး ပှၤပၢဆှၢတၢ်ကမံးတံာ်န့ၣ် ဘၣ်တၢ်ဆှၢအီၤလၢ ကလဲၤအိၣ်သကိး ဝဲၤတြၢ်တဖၣ်ဘၣ်ဆၢဘၣ်ကတီၢ် ဒီးကဟ့ၣ်ဝဲတၢ်နဲၣ်လိဒ်သိး ဝဲၤတြၢ်ကမံးတံာ် သုးကျဲၤတၢ်ဖံးတၢ်မၤကန့ၢ် ဂ့ၤဂ့ၤအဂီၢ်လီၤ. (ကတိၤဒိ ၁၁:၁၄) ဖဲန့ၣ်အဆၢကတီၢ် ပှၤကကတဲာ်ကတီၤ တၢ်ရဲၣ်တၢ်ကျဲၤလီၤဆီလၢ ကပၣ်ဃုာ်ဒီးပှၤလၢအခၢၣ်စး ဝဲၤလီၢ်ခိၣ်သ့ၣ်တဂၤအံၤ အတၢ်စံၣ်တဲၤတဲလီၤလၢကဟ့ၣ်ဂံၢ်ဟ့ၣ်ဘါ ပှၤအိၣ်လၢဝဲၤတြၢ်အတၢ်အံးထွဲကွၢ်ထွဲ အဖီလာ်တဖၣ်အဂီၢ်န့ၣ်လီၤ.

ဟ့ၣ်တၢ်မၤစၢၤလၢ လီၢ်ကဝီၤတၢ်အိၣ်ဖှိၣ်တဖၣ်အဂီၢ်လီၤ. တချုးပှၤစးထီၣ်တၢ်အိၣ်ဖှိၣ်အသီတဖၣ်အခါ ဒီပုၢ်ဝဲၢ်ခွါလၢအဘၣ်မူဘၣ်ဒါလၢ ဝဲၤတြၢ်တဖၣ်န့ၣ် ကဘၣ်တူၢ်လိာ်ပာ်ဂၢၢ်ပာ်ကျၢၤတၢ်လီၤ. ဒီပုၢ်ဝဲၢ်ခွါလၢအဘၣ်မူဘၣ်ဒါတဖၣ် နဲၣ်လိစ့ၢ်ကီး ပှၤလဲၤလၢညါ, မံးၡ့ၣ်နရ့ၣ်, ဒီးကဝီၤအပှၤကွၢ်တၢ်လၢ အမၤတၢ်လၢ ဝဲၤတြၢ်အတၢ်အံးထွဲကွၢ်ထွဲအဖီလာ်လီၤ. အဝဲသ့ၣ်သုးကျဲၤဝဲ ကဝီၤတၢ်အိၣ်ဖှိၣ်ဒီး တၢ်အိၣ်ဖှိၣ်ဖးဒိၣ်တဖၣ်, နဲၣ်လိဝဲတၢ်သူၣ်ထီၣ် ဘီမုၢ်ဘျီၣ်ဒိၣ်အသီတဖၣ်, ဒီးဆှၢလံာ်လဲၢ်လၢ တၢ်အိၣ်ဖှိၣ်တဖၣ်လိၣ်ဘၣ်ဝဲန့ၣ်လီၤ. တၢ်မၤခဲလၢာ်လၢဘၣ်တၢ်မၤအီၤလၢ ဝဲၤတြၢ်တဖၣ်န့ၣ် မၤစၢၤဝဲဒ်သိး တၢ်စံၣ်တဲၤတဲလီၤတၢ်မၤ ကလဲၤအသးဘျ့ဘျ့ဆှီဆှီအဂီၢ်လီၤ. —၁ ကရံၣ်သူး ၁၄:၃၃, ၄၀.

• ဝဲၤတြၢ်ကမံးတံာ်န့ၣ် မၤစၢၤဝဲ ပှၤပၢဆှၢတၢ်ကမံးတံာ်ဒ်လဲၣ်.

• ဝဲၤတြၢ်န့ၣ် အံးထွဲကွၢ်ထွဲတၢ်မၤမနုၤတဖၣ်လဲၣ်.