တၢ်သူၣ်ထီၣ်လၢ အဆီၣ်ထွဲ ပတၢ်စံၣ်တဲၤတဲလီၤတၢ်မၤ

ပှၤပၢဆှၢတၢ်ကမံးတံာ် သူဝဲတၢ်မၤဘူၣ် လၢကသူၣ်ထီၣ်ဝဲ တၢ်သူၣ်ထီၣ်တဖၣ် လၢကဆီၣ်ထွဲဝဲ တၢ်စံၣ်တဲၤတဲလီၤတၢ်မၤအဂီၢ်. အဒိ ဖဲ၂၀၂၃ တၢ်မၤအနံၣ် အတီၢ်ပူၤန့ၣ် ယဟိဝၤပှၤအုၣ်အသး အဝဲၤတြၢ် သူဝဲ စ့ဒီၤလၤ အကကွဲၢ် ၅၀၀ ဘျဲၣ် ဒ်သိး ကပှ့ၤ, ကတ့ထီၣ်, ကဘှီဘၣ်မၤဂ့ၤထီၣ် ဒီးကကွၢ်ကတဲာ်ကတီၤ ဘီမုၢ်ဘျီၣ်ဒိၣ် ဒီးကဝီၤဘျီၣ်ဒိၣ် လၢဟီၣ်ခိၣ်ဒီဘ့ၣ်အဂီၢ်.a စ့ဒီၤလၤ အကကွဲၢ် ၅၀၀ ဘျဲၣ်အကျါန့ၣ် အတပၣ်ဃုာ်ဒီး တၢ်လၢာ်ဘူၣ်လၢာ်စ့ၤလၢ တၢ်အိၣ်ဖှိၣ် တဖျၢၣ်ဘၣ်တဖျၢၣ် ကွၢ်ထွဲ အနီၢ်ကစၢ် အဘီမုၢ်ဘျီၣ်ဒိၣ်ဒံးဘၣ်.

တၢ်မၤဘူၣ်တဖၣ်န့ၣ် ပှၤသူအီၤလၢ ပှၤကတ့ထီၣ် ဒီးကွၢ်ထွဲဝဲ ဝဲၤတြၢ်တၢ်သူၣ်ထီၣ်တဖၣ်. ဝဲၤတြၢ် အတၢ်သူၣ်ထီၣ်တဖၣ်န့ၣ် မၤစၢၤပှၤဒ်သိး ပှၤကရဲၣ်လီၤကျဲၤလီၤ ဒီးဆီၣ်ထွဲဝဲ တၢ်စံၣ်တဲၤတဲလီၤတၢ်မၤ လၢဟီၣ်ခိၣ်ဒီဘ့ၣ်အဂီၢ်. ဒ်သိး ပှၤကသူက့ၤတၢ်မၤဘူၣ်တနီၤလၢ ပှၤကတ့ဂ့ၤထီၣ်ဝဲ ဝဲၤတြၢ် အတၢ်သူၣ်ထီၣ်, ဘီမုၢ်ဘျီၣ်ဒိၣ် ဒီးကဝီၤဘျီၣ်ဒိၣ်တဖၣ်အဂီၢ် လၢဝဲၤတြၢ်န့ၣ် ပမၤတၢ်ဆီတလဲတနီၤ. ဒ်သိးပှၤကတ့ဂ့ၤထီၣ် မ့တမ့ၢ် တ့ထီၣ်ဝဲၤတြၢ်တၢ်သူၣ်ထီၣ်လၢ အသီအဂီၢ် ကျိၣ်စ့လၢာ်ဝဲဒီဒူၣ်. ဘၣ်မနုၤအဃိ ပဘၣ်မၤဒ်န့ၣ်လဲၣ်. ဝဲၤတြၢ်အတၢ်သူၣ်ထီၣ်တဖၣ်န့ၣ် အဆီၣ်ထွဲဝဲ တၢ်စံၣ်တဲၤတဲလီၤတၢ်မၤ ဒ်လဲၣ်. ပကကွၢ်သကိး.

“ပှၤသူအီၤ ကန့ၢ်ယံာ်ထီၣ်”

ဝဲၤတြၢ်အတၢ်သူၣ်ထီၣ်တနီၤန့ၣ် အိၣ်လံ အနံၣ် ၃၀, ၄၀ ဘျဲၣ်လံ. နံၣ်ခိလဲး လၢအမၤတၢ်လၢ ဟီၣ်ခိၣ်ဒီဘ့ၣ် တၢ်သူၣ်ထီၣ်ဘှီထီၣ်တၢ်မၤ အဝဲၤကျိၤန့ၣ် တဲဝဲလၢ “တၢ်သူၣ်ထီၣ်တဖၣ်န့ၣ် ပှၤမ့ၢ်ကွၢ်ထွဲအီၤ ဂ့ၤဂ့ၤသနာ်က့ ယံာ်ထီၣ်ယံာ်ထီၣ်န့ၣ် အသးပှၢ်ထီၣ် ဒီးအဟးဂီၤအါထီၣ်. အဃိ ပှၤမ့ၢ်ဘှီဘၣ် မၤဂ့ၤထီၣ်က့ၤ တၢ်သူၣ်ထီၣ်တဖၣ်န့ၣ် ပှၤသူအီၤကန့ၢ်ယံာ်ထီၣ်.”

တဘျီတခီၣ်န့ၣ် ဒ်တၢ်ကရၢကရိ တၢ်ဆီတလဲအိၣ်ထီၣ်အသိး ဘ့ၤသ့လး အတၢ်သူၣ်ထီၣ်န့ၣ် ပှၤဘၣ်ဆီတလဲအီၤ တစဲးတမှဲး. လၢဟီၣ်ခိၣ်ဒီဘ့ၣ်န့ၣ် ပှၤစံၣ်တဲၤတဲလီၤတၢ်ဖိ အနီၣ်ဂံၢ် အါထီၣ်မးအါထီၣ်ဝဲအဃိ ပှၤဘၣ်တ့အါထီၣ် ဝဲၢ်တြၢ်တဖၣ်အါမး. အဃိ ဒ်သိးဒီး ပှၤမၤစၢၤ ပှၤစံၣ်တဲၤတဲလီၤတၢ်ဖိတဖၣ်အံၤ ကန့ၢ်အဂီၢ် ပလိၣ်ဘၣ်အါထီၣ် ပှၤလၢကဟဲမၤစၢၤတၢ်လၢ ဝဲၢ်တြၢ်. အဃိ ပှၤဘၣ်တ့ဒိၣ်ထီၣ်ဝဲ ဝဲၤတြၢ်အတၢ်သူၣ်ထီၣ်တဖၣ်.

ပအိၣ်မူဘၣ်လၢ မုၢ်နံၤခံကတၢၢ်အဃိ ပထံၣ်ဘၣ်ဒီး န့ဆၢၣ်တၢ်ဘၣ်ဒိဘၣ်ထံးတဖၣ် အါထီၣ်မးအါထီၣ်. (လူၤကၣ် ၂၁:၁၁) အဃိ ပမ့ၢ်မၤထွဲဝဲ တၢ်သူၣ်ထီၣ်ဘှီထီၣ် အကျိၤအကျဲလၢအသီန့ၣ် ကမၤစၢၤဝဲဒီပုၢ်ဝဲၢ်လၢ အသူၣ်ထီၣ်ဘှီထီၣ်တၢ်တဖၣ် ဒ်သိးအသု တဘၣ်ဒိဘၣ်ထံးတဂ့ၤအဂီၢ်. ဒီးတၢ်သူၣ်ထီၣ်တဖၣ်အံၤ အကမၤစၢၤဝဲ ဒီပုၢ်ဝဲၢ်တဖၣ် ဒ်သိးဒီး အရဲၣ်ကျဲၤတၢ်လၢ န့ဆၢၣ်တၢ်ဘၣ်ဒိဘၣ်ထံးကသ့အဂီၢ် တကးဒံးဘၣ် န့ဆၢၣ်တၢ်ဘၣ်ဒိဘၣ်ထံး ကဲထီၣ်ဝံၤအလီၢ်ခံ အဝဲသ့ၣ် ဆဲးဆီၣ်ထွဲဝဲ တၢ်စံၣ်တဲၤတဲလီၤတၢ်မၤ ကသ့အဂီၢ် စ့ၢ်ကီး.

“ယဟိဝၤယွၤ ဆိၣ်ဂ့ၤဝဲ တၢ်ဆၢတဲာ်အံၤ”

ဒ်ပှၤပၢဆှၢတၢ်ကမံးတံာ် ဟံးစုနဲၣ်ကျဲဝဲအသိး ဖဲ ၂၀၂၃ တၢ်မၤအနံၣ် အတီၢ်ပူၤန့ၣ် ပှၤမၤဝဲ တၢ်သူၣ်ထီၣ်ဘှီထီၣ်တၢ်မၤ တမံၤမံၤလၢ ဝဲၤတြၢ် ၄၃ ဖျၢၣ်အပူၤ. အဃိ ပသ့ၣ်ညါဘၣ်လၢ လၢဟီၣ်ခိၣ်ဒီဘ့ၣ်န့ၣ် ဘ့ၤသ့လး အတၢ်သူၣ်ထီၣ်တဖၣ် တဝာ်ဃၣ်ဃၣ်န့ၣ် ဘၣ်တၢ်ဘှီဘၣ်ထီၣ်က့ၤအီၤလံ. ခီဖျိလၢ ပမၤဒ်အံၤအဃိ အကဲဘျုးဝဲ ဒ်လဲၣ်န့ၣ် ပကကွၢ်သကိး တၢ်အဒိတနီၤ.

ကီၢ်အဲကိလၤ. ဒီပုၢ်ဝဲၢ်ခွါ မဲး လၢအကဲဝဲ အဲကိလၤ အဝဲၤတြၢ် ကမံးတံာ်န့ၣ် တဲဝဲလၢ “ပထံၣ်ဘၣ်လၢ ဃးကဲ ၂:၇ ဟဲလၢထီၣ်ပှဲၤထီၣ်ဝဲအဃိ မ့ၢ်ဝဲ တၢ်ခွဲးတၢ်ယာ် လီၤဆီဖးဒိၣ်. လၢအနံၣ် ၁၀ အတီၢ်ပူၤန့ၣ် ပှၤစံၣ်တဲၤတဲလီၤတၢ်ဖိ ဟဲအါထီၣ်ဝဲ အမျးကယၤ ၆၀. အဃိ ဒ်သိးပမၤစၢၤအဝဲသ့ၣ် ကသ့အဂီၢ် ပလိၣ်ဘၣ်အါထီၣ် ပှၤဘ့ၤသ့လးဖိ သၢစးညါ. သနာ်က့ တၢ်သူၣ်ထီၣ်တတြီၢ်ဘၣ်အဃိ ပကွဲမုာ်အါထီၣ် ဒီပုၢ်ဝဲၢ်တဖၣ်လၢ ကဟဲမၤတၢ်ဖဲအံၤ တသ့ဘၣ်. အဃိ ဒီပုၢ်ဝဲၢ်လၢ ဘ့ၤသ့လးတဖၣ်န့ၣ် အဘၣ်မၤတၢ်ဆူၣ်ဆူၣ် ဒီးအဘၣ်မၤတၢ် အနၣ်ရံၣ်အါန့ၢ်ဒံး တၢ်ဆၢကတီၢ်လၢ ပှၤပာ်ပနီၣ်ဝဲ.”

ဒ်သိးပှၤကမၤဒိၣ်ထီၣ် ဝဲၤတြၢ်အဂီၢ် ပှၤကဘၣ်မၤဒ်လဲၣ်န့ၣ် ဒီပုၢ်ဝဲၢ်တဖၣ် ဟဲဃုသ့ၣ်ညါဝဲ. လၢအခီၣ်ထံးန့ၣ် အဝဲသ့ၣ် ဆိကမိၣ်ဝဲလၢ အဝဲသ့ၣ် မ့ၢ်ဘှီဘၣ်မၤဂ့ၤထီၣ်က့ၤ ဘ့ၤသ့လးန့ၣ် အကချ့ ဒီးကကဲဘျုးဝဲ. သနာ်က့ လၢခံအဝဲသ့ၣ် က့ၤဆိကမိၣ်ထံက့ၤဝဲ ဒီးသ့ၣ်ညါထီၣ်ဝဲလၢ အမ့ၢ်ဘှီဘၣ်မၤဂ့ၤထီၣ်က့ၤ ဘ့ၤသ့လးန့ၣ် တၢ်မၤဘူၣ်ကလၢာ်အါမး အဃိ အဝဲသ့ၣ် တအဲၣ်ဒိးမၤဝဲ ဒ်န့ၣ်ဘၣ်. အဃိ အဝဲသ့ၣ် ဟ့ၣ်ကူၣ်ဝဲလၢ ကပှ့ၤဝဲတၢ်သူၣ်ထီၣ်လၢ အအိၣ်ဘူးတဖျၢၣ် ဒီးကဘှီဘၣ်မၤဂ့ၤထီၣ်က့ၤဝဲ. ဒီပုၢ်ဝဲၢ် မဲးတဲဝဲလၢ “ဖဲဒီပုၢ်ဝဲၢ်တဖၣ် ပာ်ဖျါထီၣ်န့ၢ်ဝဲ ဝဲၤတြၢ်ကမံးတံာ်လၢ အကပှ့ၤဝဲ တၢ်သူၣ်ထီၣ်တဖျၢၣ် ဒီးဘှီဘၣ်မၤဂ့ၤထီၣ်ဝဲအခါ လၢအခီၣ်ထံးန့ၣ် ပဘၣ်ယိၣ်လၢ တၢ်သူၣ်ထီၣ်အံၤ အတဂ့ၤ ထဲသိးတၢ်သူၣ်ထီၣ်လၢ ပသူၣ်ထီၣ်လၢ ပနီၢ်ကစၢ်ဘၣ်. သနာ်က့ ခဲအံၤ ပသ့ၣ်ညါလၢ တၢ်သူၣ်ထီၣ်အံၤ အကဲဘျုးဝဲ ဒီးယဟိဝၤယွၤ ဆိၣ်ဂ့ၤဝဲ ပတၢ်ဆၢတဲာ်.”

ဖျါလၢ ခါဆူညါန့ၣ် ပှၤကဘၣ်မၤဒိၣ်ထီၣ်ဝဲ အဲကိလၤ အဝဲၤတြၢ်ဒံး. တၢ်စံၣ်တဲၤတဲလီၤတၢ်မၤ လဲၤထီၣ်လဲၤထီဝဲ ဒိၣ်မးအဃိ ဒ်သိးဝဲၤတြၢ် ဆဲးဆီၣ်ထွဲဝဲ တၢ်စံၣ်တဲၤတဲလီၤတၢ်မၤ ကသ့အဂီၢ် ပှၤသူဝဲ တၢ်သူၣ်ထီၣ်လၢအသီ ဒီးဘ့ၤသ့လး အတၢ်သူၣ်ထီၣ်လၢ ပှၤဆီတလဲဘၣ်အီၤညီ. တကးဒံးဘၣ် ပှၤငါဝဲ တၢ်သူၣ်ထီၣ်တဖၣ်စ့ၢ်ကီး.

ကီၢ်ယပၣ်. ဝဲၤတြၢ် အတၢ်သူၣ်ထီၣ်တနီၤန့ၣ် ပှၤသူဘၣ်အီၤ န့ၢ်အနံၣ် ၄၀ ဃၣ်ဃၣ်လံ ဒီးတနီၤန့ၣ် ပှၤတဘှီဘၣ်မၤဂ့ၤထီၣ်က့ၤအီၤ ဒိၣ်ဒိၣ်မုၢ်မုၢ် နီတဘျီဒံးဘၣ်. ဒီပုၢ်ဝဲၢ်တဖၣ် ကွၢ်ထွဲဝဲ တၢ်သူၣ်ထီၣ်တဖၣ် ဂ့ၤဂ့ၤအဃိ တၢ်သူၣ်ထီၣ်တဖၣ် ဖျါဂ့ၤဒံး. သနာ်က့ နီၢ်ကီၢ်န့ၣ် ပသူဝဲ တၢ်သူၣ်ထီၣ်တဖၣ် အနံၣ်အါန့ၢ်ဒံး ပကြၢးသူအီၤဒံး. အဃိ ပဘၣ်ဘှီဘၣ်မၤဂ့ၤထီၣ်က့ၤ တၢ်သူၣ်ထီၣ်တဖၣ်အံၤ ဒိၣ်ဒိၣ်မုၢ်မုၢ်.

ဒ်တၢ်ဆၢကတီၢ် လဲၤပူၤကွံာ်ဝဲအသိး တၢ်ရဲၣ်တၢ်ကျဲၤလၢ ပှၤဘ့ၤသ့လးဖိတဖၣ်အဂီၢ်န့ၣ် ဆီတလဲဝဲ. အဒိ တချုးဖဲ ၂၀၁၅ န့ၣ် ပှၤဖီန့ၢ် ပှၤဘ့ၤသ့လးဖိတဖၣ် အတၢ်အီၣ်ခဲလၢာ် အဃိ ကီၢ်ယပၣ် အဘ့ၤသ့လး အဒၢးတဖၣ်န့ၣ် “အဖၣ်ကပူၤ” အိၣ်ဝဲ ဆံးဆံးဖိ. သနာ်က့ ခဲအံၤန့ၣ် ပှၤဘ့ၤသ့လးဖိတဖၣ် အါတက့ၢ်န့ၣ် အဝဲသ့ၣ် ဘၣ်ဖီအီၣ်တၢ်လၢ အနီၢ်ကစၢ်. အဃိ ပှၤတ့ဒိၣ်ထီၣ်ဝဲ ဖၣ်ကပူၤလၢ ဘ့ၤသ့လး အဒၢးတဖၣ်အပူၤ. အဃိ ပှၤဘ့ၤသ့လးဖိတဖၣ် ဖီအီၣ်ဘၣ်တၢ်ညီထီၣ်. ဒီပုၢ်ဝဲၢ်မုၣ် ခိမံကိၤ လၢအမၤတၢ်လၢ ယပၣ် အဘ့ၤသ့လးန့ၣ် အတဲဝဲလၢ “ပှၤတ့ဒိၣ်ထီၣ် ဖၣ်ကပူၤဒ်အံၤအဃိ ယတူၢ်ဘၣ်ဒ်သိး ယအိၣ်ဘၣ်လၢယဟံၣ် ဒီးအမၤစၢၤယၤ လၢယကဆီၣ်ထွဲ ဘ့ၤသ့လး အတၢ်ရဲၣ်တၢ်ကျဲၤအသီ လၢလၢပှဲၤပှဲၤ.”

ကီၢ်ယပၣ်အဝဲၤတြၢ်န့ၣ် အမၤဝဲ တၢ်မၤလၢ အရ့ဒိၣ်ဒိၣ်မးလၢ ဟီၣ်ခိၣ်ဒီဘ့ၣ် တၢ်မၤအဂီၢ်. (မးသဲ ၂၈:၁၉, ၂၀) ဝဲၤတြၢ်လၢ အစဲကျံးထုးထီၣ်ဝဲ လံာ်စီဆှံ ဒီတဘ့ၣ်န့ၣ် အိၣ်ဝဲထဲခံဖျၢၣ်လီၤ. လၢအကျါတဖျၢၣ်န့ၣ် မ့ၢ်ဝဲ ကီၢ်ယပၣ်အဝဲၤတြၢ် ဒီခဲအံၤ လၢကီၢ်ယပၣ် အဝဲၤတြၢ်န့ၣ် ပှၤထီထီၣ်ဝဲ စဲးလၢ ပှၤကဒီၣ်တဲာ်ဃူတၢ် ဒီးစဲးတဝံးထီၣ်တၢ်ကမူၣ် ဒ်သိးကကဲထီၣ် တၢ်ဒီသဒၢလၢ ပှၤစဲကျံးထုးထီၣ်တၢ်တဖၣ်အဂီၢ်. ဒ်သိး ပှၤကပှ့ၤ ဒီးထီထီၣ်ဝဲ စဲးအံၤအဂီၢ် အလၢာ်ဝဲ စ့ဒီၤလၤ တကကွဲၢ်ဃၣ်ဃၣ်ညါ. ဝဲၤတြၢ်မၤဝဲဒ်အံၤ ဒ်သိးပှၤဆဲး စဲကျံးထုးထီၣ် နီၢ်သးတၢ်အီၣ်တၢ်အီ ဒီးဆှၢလီၤဝဲကန့ၢ်အဂီၢ်.

ဖဲပှၤတ့ထီၣ်ဘှီထီၣ်တၢ် အဆၢကတီၢ် ဒီပုၢ်ဝဲၢ်တဖၣ် ဂုာ်ကျဲးစၢးဝဲ ဒ်သိး ပှၤစဲကျံးထုးထီၣ် လံာ်စီဆှံကန့ၢ်အဂီၢ်ဒံး. ဒီပုၢ်ဝဲခွါ ထြ့ လၢအမ့ၢ်ဝဲ ကီၢ်ယပၣ် အဝဲၤတြၢ်ကမံးတံာ်န့ၣ် တဲဝဲလၢ “ဖဲပှၤတ့ထီၣ်ဘှီထီၣ်တၢ် အဆၢကတီၢ် ပတၢ်ကရၢကရိ ထုးထီၣ်ဝဲ တၢ်ကွဲးကျိာ်ထံ လံာ်စီဆှံ အါထီၣ်. ဒီးလၢဟီၣ်ခိၣ်ဒီဘ့ၣ်န့ၣ် ပှၤလိၣ်ဘၣ် လံာ်စီဆှံ အါထီၣ်မးအါထီၣ်. ဖဲပှၤထီထီၣ် စဲးအသီအဆၢကတီၢ် ဒ်သိး ဒီပုၢ်ဝဲၢ်တဖၣ် ဆဲးစဲကျံးထုးထီၣ်လံာ်လဲာ် ကန့ၢ်အဂီၢ် ဝဲၤကျိၤအကလုာ်ကလုာ် ဒီးပှၤအါဂၤန့ၣ် ဘၣ်မၤသကိးတၢ် ဒ်သိးသိး.” တၢ်ကီတၢ်ခဲ အိၣ်ဝဲဒ်အံၤ သနာ်က့ ဖဲပှၤတ့ထီၣ်ဘှီထီၣ်တၢ် ဒိၣ်ဒိၣ်မုၢ်မုၢ်လၢ ပှၤစဲကျံးထုးထီၣ်တၢ်လီၢ် ဖဲ၂၀၂၃ လါမၢ်ၡး တုၤလၢ လါအီကူး အတီၢ်ပူၤ တလါဘၣ်တလါန့ၣ် ပှၤစဲကျံးထုးထီၣ်ဝဲ လံာ်အဘ့ၣ် ၂၂၀,၀၀၀ ညါ. သနာ်က့ စ့တလၢာ်အါထီၣ်ဘၣ်.

ပှၤဘှီဘၣ်မၤဂ့ၤထီၣ်တၢ် ဒ်သိးဝဲၤတြၢ်ကသူဘၣ်ဝဲ မ့ၣ်အူအဂံၢ်ကစှၤလီၤ ဒီးတၢ်လၢာ်ဘူၣ်လၢာ်စ့ၤ ကစှၤလီၤအဂီၢ်. ပှၤကသူက့ၤဝဲ စိၤလၤအဃိ တနံၣ်ဘၣ်တနံၣ်န့ၣ် ပှၤသူဘၣ်ဝဲ မ့ၣ်အူအဂံၢ်ကစှၤလီၤ အဃိတၢ်လၢာ်ဘူၣ်လၢာ်စ့ၤ ကလီၤစှၤဝဲ စ့ဒီၤလၤ ၁၂၀,၀၀၀ ဃၣ်ဃၣ်ညါ. ပှၤကထီထီၣ်ဝဲ ပဲတြီဖိလၢ အအိၣ်ဒီး မဲာ်ထံကလၤ သၢကထြၢ အဃိ တနံၣ်ဘၣ်တနံၣ်န့ၣ် စ့ကလၢာ်စှၤလီၤဝဲ ဒီၤလၤ ၁၀,၀၀၀ လၢမ့ၣ်အူဂံၢ်အဂီၢ်. ပှၤမၤဝဲဒ်အံၤအဃိ ဖဲပှၤဘှီဘၣ်မၤဂ့ၤထီၣ်တၢ် အဆၢကတီၢ် ကျိၣ်စ့ကလၢာ်အါဝဲ သနာ်က့ နမ့ၢ်ဒွးက့ၤလၢ ပှၤသူဝဲတၢ်သ့ၣ်တဖၣ်အံၤ ကန့ၢ်အနံၣ် ယံာ်ထဲလဲၣ်န့ၣ် စ့ဒီၤလၤ ကလၢာ်စှၤလီၤဝဲ ၃.၅ ကကွဲၢ်ဘျဲၣ်ညါ. တကးဒံးဘၣ် ခီဖျိလၢ ပသူတၢ်သ့ၣ်တဖၣ်အံၤအဃိ တမၤဘၣ်ဒိဝဲ ခိၣ်ဃၢၤန့ဆၢၣ် အါအါလၢၤဘၣ်.

“တၢ်လၢပကဘၣ်မၤအီၤ အိၣ်ဒံးဝဲအါမး”

ဝဲၤတြၢ်ခံဖျၢၣ်အံၤ ပာ်ဖျါထီၣ်ဝဲလၢ ဘ့ၤသ့လး တၢ်သူၣ်ထီၣ်တဖၣ်န့ၣ် အဆီၣ်ထွဲဝဲ တၢ်စံၣ်တဲၤတဲလီၤတၢ်မၤဒိၣ်မး. သနာ်က့ တၢ်လၢ ပကဘၣ်မၤအီၤန့ၣ် အိၣ်ဝဲဒံး. ဒီပုၢ်ဝဲၢ် အဲရဲၤ လၢအမၤတၢ်လၢ ဟီၣ်ခိၣ်ဒီဘ့ၣ် တၢ်သူၣ်ထီၣ်ဘှီထီၣ်တၢ်မၤန့ၣ် တဲဝဲလၢ “ပမၤတၢ်ဝံၤဒီဒူၣ်လံ သနာ်က့ တၢ်လၢပကဘၣ်မၤအီၤန့ၣ် အိၣ်ဒံးဝဲ အါမးဒံး. ပစံးဘျုးဘၣ် ဒီပုၢ်ဝဲၢ်လၢ အဆီၣ်ထွဲဝဲ တၢ်မၤအံၤ ခီဖျိလၢ အဝဲသ့ၣ်ဟ့ၣ်တၢ်မၤဘူၣ်. တကးဒံးဘၣ် ပစံးဘျုးဘၣ် ဒီပုၢ်ဝဲၢ်လၢ အဟဲမၤစၢၤတ့ၢ်တၢ်လၢ အနီၢ်ကစၢ် ဒီးပှၤလၢ အအိၣ်ဒီး ဖီတၢၣ်လၢ ကဟဲမၤစၢၤတၢ်လၢ ခါဆူညါတဖၣ်စ့ၢ်ကီး. ပဒီပုၢ်ဝဲၢ်တဖၣ် ဟဲမၤစၢၤတၢ်လၢ အနီၢ်ကစၢ် ဒီးအဆီၣ်ထွဲဝဲ တၢ်မၤအံၤလၢ တၢ်မၤဘူၣ်န့ၣ် ပာ်ဖျါထီၣ်ဝဲလၢ ယဟိဝၤယွၤ ဆိၣ်ဂ့ၤဝဲ ပတၢ်မၤအံၤဒိၣ်မး.”—စံးထီၣ်ပတြၢၤ ၁၁၀:၃.

တၢ်သူၣ်ဘှီထီၣ်တၢ်မၤ ဒီးတၢ်ဘှီဘၣ်မၤဂ့ၤတၢ်န့ၣ် ပမၤအီၤသ့ ခီဖျိလၢ ပှၤဟ့ၣ်တၢ်မၤဘူၣ်လၢ တၢ်သူၣ်အိၣ်သးအိၣ်အပူၤအဃိ. ပှၤအါဂၤန့ၣ် ဟ့ၣ်ဝဲ တၢ်မၤဘူၣ်လၢ donate.jw.org. သုဆဲးဟ့ၣ်တၢ်မၤဘူၣ်လၢ တၢ်သူၣ်အိၣ်သးအိၣ်အပူၤအဃိ ပစံးဘျုးဘၣ်သုဒိၣ်မး.