တၢ်မၤလိ ၃
တၢ်သးခုကစီၣ်အံၤဟဲလၢ ယွၤအအိၣ်နီၢ်နီၢ်ဧါ
၁. မတၤဒုးအိၣ်ထီၣ် လံာ်စီဆှံလဲၣ်.
တၢ်သးခုကစီၣ်လၢ ပှၤဟီၣ်ခိၣ်ဖိတဖၣ် ကအိၣ်မူဘၣ် လီၤထူလီၤယိာ်လၢ ဟီၣ်ခိၣ်ချၢန့ၣ် ဘၣ်တၢ်ကွဲးနီၣ်အီၤလၢ လံာ်စီဆှံအပူၤလီၤ. (စံးထီၣ်ပတြၢၤ ၃၇:၂၉) လံာ်စီဆှံန့ၣ် ဘၣ်တၢ်ပာ်ဖှိၣ်ထီၣ်အီၤလၢ လံာ် ၆၆ ကတြူၢ်လီၤ. ယွၤသူဝဲ ပိာ်ခွါလၢအတီ အဂၤ ၄ဝ ဃၣ်ဃၣ်လၢ ကကွဲးလံာ်အံၤအဂီၢ်လီၤ. စီၤမိၤၡ့ကွဲးဝဲ လံာ်အဆိကတၢၢ်ယဲၢ်ကတြူၢ် ဖဲပူၤကွံာ်အနံၣ် ၃,၅၀၀ ဃၣ်ဃၣ်လီၤ. တၢ်မၢဖိစီၤယိၤဟၣ်ကွဲးဝဲ လံာ်စီဆှံအလီၢ်ခံကတၢၢ်တကတြူၢ်လၢ အပူၤကွံာ်အနံၣ် ၁,၉၀ဝ ဘျဲၣ်လီၤ. ပှၤတဖၣ်လၢအကွဲးလံာ်စီဆှံန့ၣ် ကွဲးဝဲမတၤအတၢ်ဆိကမိၣ်လဲၣ်. ကစၢ်ယွၤသူဝဲ သးစီဆှံလၢ ကဆဲးကျိးဝဲဒီး ပှၤလၢအကွဲးဝဲလံာ်စီဆှံလီၤ. (၂ ၡမူၤအ့လး ၂၃:၂) အဝဲသ့ၣ်ကွဲးလီၤဝဲ ယွၤအတၢ်ဆိကမိၣ်တဖၣ်လီၤ. တမ့ၢ်အဝဲသ့ၣ် အတၢ်ဆိကမိၣ်ဘၣ်. လၢတၢ်န့ၣ်အဃိ ယဟိဝၤယွၤမ့ၢ် ပှၤလၢအဒုးအိၣ်ထီၣ်ဝဲ လံာ်စီဆှံလီၤ.—ဖး ၂ တံၤမသ့း ၃:၁၆; ၂ ပ့းတရူး ၁:၂၀, ၂၁ တက့ၢ်.
ကွၢ်တၢ်ဂီၤမူလၢအမ့ၢ် ပှၤလၢအဒုးအိၣ်ထီၣ်လံာ်စီဆှံန့ၣ် မ့ၢ်မတဂၤလဲၣ်
၂. လံာ်စီဆှံ ဟဲလၢယွၤအအိၣ်န့ၣ် ပနာ်ကသ့ဒ်လဲၣ်.
လံာ်စီဆှံ တဲဆိပာ်စၢၤဝဲခါဆူညါတၢ်ကမၤအသး လီၤတံၢ်လီၤဆဲးအဃိ ပသ့ၣ်ညါဘၣ်လၢ တၢ်အံၤဟဲလၢယွၤအအိၣ်လီၤ. ပှၤဟီၣ်ခိၣ်ဖိတဖၣ်မၤဝဲဒ်အံၤတသ့နီတဂၤဘၣ်. (ယိၤၡူ ၂၃:၁၄) ခါဆူညါပှၤဟီၣ်ခိၣ်ဖိအတၢ်အိၣ်မူ ကမၤအသးဒ်လဲၣ်န့ၣ် ထဲယွၤတဂၤဧိၤလၢအမ့ၢ်သ့တၢ်လၢာ်ကစၢ် ထံၣ်စိပာ်စၢၤဝဲသ့လီၤ.—ဖး ယၡါယၤ ၄၂:၉; ၄၆:၁၀ တက့ၢ်.
လံာ်လၢအဟဲလၢ ယွၤအအိၣ်အံၤ လီၤဆီန့ၢ်ဒံးလံာ်အဂၤတဖၣ်လီၤ. လံာ်စီဆှံအံၤဘၣ်တၢ်ထုးထီၣ်ရၤလီၤအီၤ အဘ့ၣ်လၢ အကကွဲၢ်အကထိဒီး ဘၣ်တၢ်ထုးထီၣ်အီၤလၢကျိာ်လၢအကယၤတဖၣ်လီၤ. လံာ်စီဆှံအံၤ မ့ၢ်လံာ်လၢပျၢၤ သနာ်က့လီၤပလိာ်လိာ်အသးဒီး စဲအ့ၣ်အတၢ်ကူၣ်ဘၣ်ကူၣ်သ့လီၤ. ပှၤကွဲးလံာ်အံၤအိၣ်အဂၤလွံၢ်ဆံသနာ်က့ အတၢ်ကွဲးတဖၣ် လီၤပလိာ်လိာ်အသးလီၤ.a အါန့ၢ်အန့ၣ် လံာ်စီဆှံပာ်ဖျါထီၣ်ဝဲ ကစၢ်ယွၤ အတၢ်အဲၣ်တၢ်ကွံလီၤ. ဒီးတၢ်အံၤအိၣ်ဒီးတၢ်စိတၢ်ကမီၤလၢ ကဆီတလဲကွံာ် ပတၢ်အိၣ်မူလီၤ. တၢ်ဂ့ၢ်လၢအတီတဖၣ်အံၤ ဒုးနာ်န့ၢ်ပှၤအကကွဲၢ်တဖၣ်လၢ လံာ်စီဆှံမ့ၢ်ယွၤအကလုၢ်ကထါလီၤ.—ဖး ၁ သ့းစၤလနံ ၂:၁၃ တက့ၢ်.
ကွၢ်တၢ်ဂီၤမူလၢအမ့ၢ် ပနာ်ကသ့ဒ်လဲၣ် လံာ်စီဆှံန့ၣ် အမ့ၢ်အတီဧါ
၃. လံာ်စီဆှံပူၤ ပၣ်ဃုာ်ဒီးတၢ်ဂ့ၢ်မနုၤလဲၣ်.
လံာ်စီဆှံအတၢ်ဂ့ၢ်မိၢ်ပှၢ်န့ၣ် ပၣ်ဃုာ်ဒီးတၢ်သးခုကစီၣ်လၢအမ့ၢ် ယွၤအတၢ်တိာ်ပာ်လၢ အပှဲၤဒီးတၢ်အဲၣ်တၢ်ကွံလၢ ပှၤဟီၣ်ခိၣ်ဖိအဂီၢ်လီၤ. လံာ်စီဆှံတဲနၢ်ပၢၢ်ပှၤလၢ ပှၤဟီၣ်ခိၣ်ဖိတဖၣ်မၤလီၤမၢ်ကွံာ်ဝဲ တၢ်ခွဲးတၢ်ယာ်လီၤဆီတခါ လၢကအိၣ်မူဘၣ်ဝဲလၢ ဟီၣ်ခိၣ်ပၤရဒံစူးအပူၤဒ်လဲၣ်အဂ့ၢ် ဒီးလၢခံန့ၣ်ပကဒိးန့ၢ်ဘၣ်က့ၤ ပၤရဒံစူးလၢကျဲဒ်လဲၣ်အဂ့ၢ်န့ၣ်လီၤ.—ဖး လီၣ်ဖျါ ၂၁:၄, ၅ တက့ၢ်.
ယွၤအကလုၢ်ကထါန့ၣ် ပၣ်ဃုာ်ဒီး တၢ်သိၣ်တၢ်သီတဖၣ်, ဒီးတၢ်ဟ့ၣ်ကူၣ်ဟ့ၣ်ဖးတဖၣ်လီၤ. အါန့ၢ်အန့ၣ် လံာ်စီဆှံပာ်ဖျါထီၣ်ဝဲ ကစၢ်ယွၤအတၢ်ရ့လိာ်သးဒီး ပှၤဟီၣ်ခိၣ်ဖိတဖၣ်န့ၣ်လီၤ. တၢ်အံၤမၤစၢၤပှၤ ဒ်သိးပကသ့ၣ်ညါအါထီၣ်ဘၣ် ယွၤအတၢ်ဂ့ၤတၢ်ဝါတဖၣ်အဂီၢ်လီၤ. လၢတၢ်န့ၣ်အဃိ လံာ်စီဆှံကကဲထီၣ်တၢ်မၤစၢၤလၢ နကသ့ၣ်ညါယွၤအဂီၢ်လီၤ. လံာ်အံၤတဲနၢ်ပၢၢ်ပှၤလၢ ပကဲထီၣ်ယွၤအတံၤသကိးကသ့ဒ်လဲၣ်အဂ့ၢ်န့ၣ်လီၤ.—ဖး စံးထီၣ်ပတြၢၤ ၁၉:၇, ၁၁; ယၤကိာ် ၂:၂၃; ၄:၈ တက့ၢ်.
၄. နနၢ်ပၢၢ်လံာ်စီဆှံ ကသ့ဒ်လဲၣ်.
ယ့ၣ်ၡူးယၢၤထီၣ်ဝဲ လံာ်စီဆှံအဆၢတဆၢဝံၤတဆၢ ဒီးတဲနၢ်ပၢၢ်ဝဲ “တၢ်ကွဲးအသး” အခီပညီန့ၣ်လီၤ. ဘရိၣ်ခၠၣ်တဘ့ၣ်အံၤ ကမၤစၢၤနၤလၢ နကနၢ်ပၢၢ်လံာ်စီဆှံလီၤ. မ့ၢ်လၢအပာ်ဖျါထီၣ်ဝဲ လံာ်စီဆှံတဆၢဝံၤတဆၢဒီး တဲနၢ်ပၢၢ်အခီပညီ ဒ်ယ့ၣ်ၡူးမၤဝဲအသိးန့ၣ်လီၤ.—ဖး လူၤကၣ် ၂၄:၂၇, ၄၅ တက့ၢ်.
တၢ်သးခုကစီၣ်လၢယွၤအအိၣ်န့ၣ် ထုးန့ၢ်ပှၤသးအါန့ၢ်ဒံးတၢ်အဂၤလီၤ. ဘၣ်ဆၣ်, ပှၤတနီၤနီၤ တသးအိၣ်ဝဲတၢ်ကစီၣ်အံၤဘၣ်. ဒီးပှၤအဂၤတနီၤန့ၣ် အသးဘၣ်တံာ်တာ်လၢ တၢ်ကစီၣ်အံၤအဃိလီၤ. တဘၣ်သးဟးဂီၤတဂ့ၤ. ဒ်သိးနကအိၣ်ဒီးတၢ်မုၢ်လၢ်လၢ နကဒိးန့ၢ်ဘၣ်တၢ်မူအထူအယိာ်အဂီၢ်န့ၣ် နကဘၣ်ဃုသ့ၣ်ညါအါထီၣ်ယွၤအဂ့ၢ်လီၤ.—ဖး ယိၤဟၣ် ၁၇:၃ တက့ၢ်.
a ကွၢ်ဘရိၣ်ခၠၣ်လၢအမ့ၢ် လံာ်စီဆှံအံၤအတၢ်ကစီၣ် မ့ၢ်မနုၤလဲၣ် တက့ၢ်.