“ယနာ်လီၤ”

၁. နီၢ်မၢ်သၤအသးကမၤအသးဒ်လဲၣ်, ဒီးဘၣ်မနုၤအဃိလဲၣ်.

တၢ်လၢနီၢ်မၢ်သၤထံၣ်ဘၣ်ဝဲလၢ နံၤအဝဲန့ၣ်န့ၣ် အိၣ်ထီဃာ်လၢအမဲာ်ချံပူၤလီၤ. ထီဘိန့ၣ်အဝဲသ့ၣ်နီၣ်ဘၣ်က့ၤ တၢ်ဆၢကတီၢ်ဖဲ ပှၤကးတံာ်ဃာ်အဒီပုၢ်ဝဲၢ်ခွါလၢ အအဲၣ်ဘၣ်ဝဲဒိၣ်မးအသွၣ်ခိၣ်လၢ လၢၢ်န့ၣ်လီၤ. အဝဲသူၣ်အုးသးအုးဒီး အသးဃၢဝဲဒ်လၢၢ်အသိးလီၤ. အဒီပုၢ်ဝဲၢ်ခွါသံဝဲလံ, ဘၣ်ဆၣ်အဝဲတူၢ်လိာ်ဝဲတသ့ဘၣ်. ဒီးဖဲအပူၤကွံာ်လွံၢ်သီတုၤခဲအံၤ တၢ်ခဲလၢာ်လဲၤအသးဘံဘူဝဲသပှၢ်ကတၢၢ် ခီဖျိလၢအဟံၣ်ပူၤပှဲၤဒီး တၢ်ဟီၣ်တၢ်ယၢၤဒီး ပှၤတမှံၤတပျီၤ ဟဲအိၣ်သကိးအီၤ တဂၤဘၣ်တဂၤအဃိန့ၣ်လီၤ.

၂, ၃. (က) ဖဲနီၢ်မၢ်သၤထံၣ်ဘၣ်ယ့ၣ်ၡူးအခါ အသးကမၤအသးဒ်လဲၣ်. (ခ) နီၢ်မၢ်သၤအတၢ်ကတိၤလၢ အရ့ဒိၣ်တခါန့ၣ် ပာ်ဖျါထီၣ်လၢအဝဲမ့ၢ် ပှၤဒ်လဲၣ်တဂၤလဲၣ်.

^၂ ခဲအံၤန့ၣ် ပှၤလၢအဆၢထၢၣ်လၢ နီၢ်မၢ်သၤအမဲာ်ညါန့ၣ် မ့ၢ်ပှၤလၢအရ့ဒိၣ်ကတၢၢ်လၢ စီၤလါစရူးအဂီၢ်လီၤ. ဒီးလၢဟီၣ်ခိၣ်ဒီဘ့ၣ် ပှၤလၢအမၤဘျါက့ၤဝဲနီၢ်မၢ်သၤအဒီပုၢ်ဝဲၢ်ခွါသ့ဝဲန့ၣ် အိၣ်ထဲယ့ၣ်ၡူးတဂၤဧိၤ, ဘၣ်ဆၣ်အဝဲတဟဲမၤဘျါအီၤဘၣ်. လၢတၢ်န့ၣ်အဃိ ဖဲနီၢ်မၢ်သၤထံၣ်ဘၣ်ဝဲ ယ့ၣ်ၡူးတဘျီအံၤန့ၣ် အသးကဘၣ်ဒိဝဲ သတူၢ်ကလာ်လီၤ. ဒ်လဲၣ်ဂ့ၤဒ်လဲၣ်ဂ့ၤ ဖဲနီၢ်မၢ်သၤတဲသကိးတၢ်ဒီး ယ့ၣ်ၡူးလၢတၢ်ဆၢကတီၢ်ဖုၣ်ကိာ်ဖိ လၢဝ့ၢ်ဘ့ၤသနံအချၢန့ၣ် အဝဲကဒိးန့ၢ်ဘၣ် တၢ်သူၣ်မံသးမုာ်တစဲးဖိလီၤ. မ့ၢ်လၢအဝဲပလၢၢ်ဘၣ်ဝဲ ယ့ၣ်ၡူးအတၢ်သးကညီၤ ဒီးထံၣ်ဘၣ်ဝဲ ယ့ၣ်ၡူအမဲာ်ချံအိၣ်ပှဲၤဒီး တၢ်ဒိသူၣ်ဒိသးလၢအဖီခိၣ်အဃိလီၤ. ယ့ၣ်ၡူးသံကွၢ်အီၤ တၢ်သံကွၢ်တဖၣ်လၢ အကဲထီၣ်တၢ်မၤစၢၤ ဒ်သိးအဝဲကသးစၢၢ်ဆၢဝဲ အတၢ်နာ် ဒီးအတၢ်မုၢ်လၢ်လၢ ပှၤသံကဂဲၤဆၢထၢၣ်သမူထီၣ်က့ၤန့ၣ်လီၤ. ဖဲအဝဲသ့ၣ်ကတိၤသကိးတၢ်အခါ နီၢ်မၢ်သၤတဲဝဲ တၢ်ကတိၤအရ့ဒိၣ်တခါလီၤ. အဝဲစံးဝဲလၢ “ယနာ်လၢနမ့ၢ် ပှၤဟဲလီၤဆူဟီၣ်ခိၣ်ချၢ, ယွၤအဖိခွါ, ခရံာ်န့ၣ်လီၤ.”—ယိၤဟၣ် ၁၁:၂၇.

^၃ နီၢ်မၢ်သၤမ့ၢ်ပိာ်မုၣ်လၢ အအိၣ်ဒီးတၢ်နာ်လၢ အဂၢၢ်အကျၢၤတဂၤလီၤ. လံာ်စီဆှံကွဲးဖျါထီၣ်ဝဲ နီၢ်မၢ်သၤအဂ့ၢ်ထဲတစဲးဖိလီၤ. ဘၣ်ဆၣ် ဒ်သိးပတၢ်နာ်ကဂၢၢ်ကျၢၤထီၣ်အဂီၢ် ပဒိးန့ၢ်ဘၣ်တၢ်မၤလိလၢအအိၣ် သ့ဝဲလီၤ. ဒ်သိးပကသ့ၣ်ညါတၢ်ဂ့ၢ်အံၤအဂီၢ် ပကကွၢ်လံာ်စီဆှံအတၢ်ကွဲးနီၣ် အဆိကတၢၢ်တခါလၢ ဘၣ်ဃးဒီးနီၢ်မၢ်သၤအဂ့ၢ်န့ၣ်လီၤ.

“နဘၣ်ယိၣ်တၢ် ဒီးနသးကိၢ်တၢ်”

၄. ဘၣ်မနုၤအဃိ နီၢ်မၢ်သၤအဟံၣ်ဖိဃီဖိန့ၣ် လီၤဆီဝဲဒီးဟံၣ်ဖိဃီဖိလၢအဂၤတဖၣ်လဲၣ်, ဒီးအဝဲသ့ၣ်အတၢ်ရ့လိာ်သးဒီးယ့ၣ်ၡူးန့ၣ် အိၣ်ဝဲဒ်လဲၣ်.

^၄ လၢအပူၤကွံာ်တယံာ်ဒံးဘၣ်န့ၣ် စီၤလါစရူးအတၢ်အိၣ်ဆူၣ်အိၣ်ချ့ဂ့ၤဝဲလီၤ. ဒီးအဟံၣ်အိၣ်ဝဲလၢ ဝ့ၢ်ဘ့ၤသနံအပူၤလီၤ. စီၤလါစရူး, နီၢ်မၢ်သၤဒီး နီၢ်မၤရံမ့ၢ်ဒီပုၢ်ဝဲၢ်လီၤ. အဝဲသ့ၣ်ဒိၣ်တုာ်ခိၣ်ပှဲၤဘၣ်ဆၣ် အိၣ်ဝဲလၢဟံၣ်တဖျၢၣ်ဃီအပူၤအဃိ မ့ၢ်ဟံၣ်ဖိဃီဖိလၢ အလီၤဆီတဒူၣ်လီၤ. ပှၤဃုသ့ၣ်ညါတၢ်တနီၤစံးဝဲလၢ နီၢ်မၢ်သၤကမ့ၢ်ဖိဝဲၢ်ကိလၢ အဒီပုၢ်ဝဲၢ်အကျါလီၤ. မ့ၢ်လၢအဝဲတူၢ်လိာ်ဒီး ကွၢ်ထွဲဝဲပှၤတမှံၤတကးဒံးဘၣ် တဘျီတခီၣ်န့ၣ် အမံၤဘၣ်တၢ်ပာ်ဖျါထီၣ်အီၤလၢ အဒီပုၢ်ဝဲၢ်တဖၣ်အမဲာ်ညါအဃိလီၤ. (ယိၤဟၣ် ၁၁:၅) မ့ၢ်အဝဲသ့ၣ်ဆီဟံၣ်ဆီဃီဧါ, တဆီဟံၣ်ဆီဃီဧါန့ၣ် ပတဲတဘၣ်ဘၣ်. ဘၣ်ဆၣ် ပသ့ၣ်ညါလၢအဝဲသ့ၣ်မ့ၢ် ယ့ၣ်ၡူးအတံၤသကိးဘူးဘူးတံၢ်တံၢ်လီၤ. ဖဲယ့ၣ်ၡူးဟးစံၣ်တဲၤတဲလီၤတၢ်လၢ ကီၢ်ယူဒၤအဆၢကတီၢ် အဝဲအိၣ်တမှံၤဝဲလၢ စီၤလါစရူးအဟံၣ်ပူၤအါဘျီလီၤ. ပှၤအါဂၤထီဒုၣ်ထီဒါယ့ၣ်ၡူးဒီး သူၣ်ဟ့သးဟ့အီၤ ဘၣ်ဆၣ်ဖဲအဝဲစံၣ်တဲၤတဲလီၤတၢ်ဝံၤ ဟဲက့ၤတုၤလၢစီၤလါစရူးအဟံၣ်အခါ အဝဲကသးခုဝဲဒိၣ်မးလီၤ. မ့ၢ်လၢအဝဲဒိးန့ၢ်ဘၣ်ဝဲ တၢ်ဟ့ၣ်ဂံၢ်ဟ့ၣ်ဘါဒီး တၢ်သူၣ်မံသးမုာ်အဃိလီၤ. ဒီးအခဲအံၤန့ၣ် ယ့ၣ်ၡူးခရံာ်ကလဲၤအိၣ်သကိးအဝဲသ့ၣ်လီၤ.

၅, ၆. (က) တဘျီညါအံၤ ဘၣ်မနုၤအဃိနီၢ်မၢ်သၤအတၢ်မၤအါဝဲလဲၣ်. (ခ) ဖဲယ့ၣ်ၡူးလဲၤဟးအိၣ်သကိးအဝဲသ့ၣ်အဆၢကတီၢ် နီၢ်မၤရံမၤဝဲဒ်လဲၣ်.

^၅ နီၢ်မၢ်သၤဖံးတၢ်မၤတၢ်လၢ ဟံၣ်ပူၤဃီပူၤ ဒီးတူၢ်လိာ်ပှၤတမှံၤအဃိ ထီဘိန့ၣ်အတၢ်မၤကအါဝဲဒီး အဝဲမ့ၢ်ပှၤလၢအမၤတၢ်မၤဆူၣ်ဆူၣ်တဂၤလီၤ. ဒီးတဘျီညါအံၤ ဖဲယ့ၣ်ၡူးကဟဲဟးအိၣ်သကိးအီၤအဆၢကတီၢ်န့ၣ် အဝဲအဲၣ်ဒိးကတဲာ်ကတီၤတၢ်အါမံၤလီၤ. နီၢ်မၢ်သၤကရဲၣ်လီၤကျဲၤလီၤဝဲ တၢ်အီၣ်တၢ်အီလီၤဆီ လၢယ့ၣ်ၡူးအဂီၢ်အါမးလီၤ. ဖဲန့ၣ်အဆၢကတီၢ် တၢ်တူၢ်လိာ်ပှၤတမှံၤန့ၣ် မ့ၢ်တၢ်လၢအရ့ဒိၣ်ဒိၣ်မးလီၤ. အဒိ ဖဲပှၤတမှံၤတဂၤ ဟဲတုၤဝဲအဆၢကတီၢ်န့ၣ် ပှၤနၢမူအီၤ, ဘ့ၣ်လီၤန့ၢ်အီၤအခီၣ်ဖံး, သ့န့ၢ်အီၤအခီၣ် ဒီးဖှူအခိၣ်လၢသိနၢမူလီၤ. (ဖး လူၤကၣ် ၇:၄၄-၄၇ တက့ၢ်.) ပှၤယူဒၤဖိတဖၣ်န့ၣ် အလုၢ်အလၢ်အိၣ်လၢ ကဘၣ်ကွၢ်ထွဲဝဲပှၤတမှံၤဂ့ၤဂ့ၤဘၣ်ဘၣ်, ကတဲာ်ကတီၤဝဲတၢ်လီၢ်တၢ်ကျဲဒ်သိး ပှၤတမှံၤကအိၣ်ဘှံးအိၣ်သါဘၣ်ဝဲဂ့ၤဂ့ၤအဂီၢ် တကးဒံးဘၣ်ကတဲာ်ကတီၤန့ၢ်ဝဲ တၢ်အီၣ်တၢ်အီလၢအဝံၣ်အဘဲတဖၣ်လီၤ.

^၆ ပှၤအါဂၤထံၣ်ဝဲလၢ နီၢ်မၤရံမ့ၢ်ပှၤလၢအသးဆူၣ်လၢ ကမၤလိတၢ်လီၤ. ဘၣ်ဆၣ်တချုးလၢ ယ့ၣ်ၡူးဟဲတုၤလၢအဝဲသ့ၣ်အဟံၣ်အခါန့ၣ် နီၢ်မၤရံကမၤစၢၤအဒီပုၢ်ဝဲၢ်မုၣ်လီၤသၢၣ်. အဃိ နီၢ်မၢ်သၤဒီးနီၢ်မၤရံခံဂၤလၢာ် အတၢ်မၤကအါဝဲလၢ ပှၤတမှံၤလီၤဆီတဂၤအံၤအဂီၢ်လီၤ. ဘၣ်ဆၣ်သနာ်က့ ဖဲယ့ၣ်ၡူးဟဲတုၤဝဲအခါ နီၢ်မၤရံပာ်ကတီၢ်ကွံာ်ဝဲ ဟံၣ်ဃီအတၢ်ဖံးတၢ်မၤလီၤ. ယ့ၣ်ၡူးအဲၣ်ဒိးဟံးန့ၢ်တၢ်ဆၢကတီၢ် လၢကသိၣ်လိဝဲ ပှၤအိၣ်ဖဲန့ၣ်တဖၣ်လီၤတံၢ်လီၤဆဲးလီၤ. အဝဲတလီၤဂာ်ဒ်သိး တၢ်ဘူၣ်တၢ်ဘါခိၣ်နၢ်လၢစိၤဖဲန့ၣ်ဘၣ်. အဝဲပာ်ကဲဝဲပှၤပိာ်မုၣ်ဒီး သိၣ်လိအဝဲသ့ၣ်လၢ ယွၤအဘီအမုၢ်တၢ်သးခုကစီၣ်လၢ တၢ်သူၣ်အိၣ်သးအိၣ်အပူၤလီၤ. နီၢ်မၤရံတအဲၣ်ဒိးတူၢ်ၡူကွံာ်ဝဲ တၢ်ခွဲးတၢ်ယာ်အံၤအဃိ ဆ့ၣ်နီၤဝဲလၢယ့ၣ်ၡူးအခီၣ်ထံးဒီး ဒိကနၣ်ဝဲယ့ၣ်ၡူးအတၢ်ကတိၤကိးဖျၢၣ်ဒဲးလီၤ.

၇, ၈. ဘၣ်မနုၤအဃိ နီၢ်မၢ်သၤအသးအ့န့ထီၣ်ဝဲလဲၣ်, ဒီးလၢခံကတၢၢ်န့ၣ် အတၢ်သးအ့န့ဟဲဖျိးထီၣ်ဒ်လဲၣ်.

^၇ နီၢ်မၢ်သၤအမဲာ်ကကိၢ်နါကကိၢ်ဝဲထဲလဲၣ်န့ၣ် ဆိကမိၣ်ကွၢ်တက့ၢ်. အဝဲကဘၣ်ဖီအီၣ်တ့ၤအီၣ်တၢ်လၢ အဝဲသ့ၣ်အဂီၢ်အါမး, ဒီးမၤလၢပှဲၤမူဒါလၢ ပှၤတမှံၤသ့ၣ်တဖၣ်အံၤအဂီၢ်အဃိ အသူၣ်ကိၢ်သးဂီၤဒီး အသးဘၣ်တံာ်တာ်ဒံးယံာ်ဒံးအါထီၣ်ဝဲလီၤ. ဖဲအတၢ်မၤဘံဘူဒီး ဘၣ်မၤတၢ်လၢအံၤတထံၣ်ထံၣ် လၢန့ၣ်တထံၣ်ထံၣ်အဆၢကတီၢ် အဝဲကထံၣ်ဘၣ်အဒီပုၢ်ဝဲၢ်မုၣ်နီၢ်မၤရံ ဆ့ၣ်နီၤအိၣ်ဃိကဒိအဃိ မ့ၢ်နီၢ်မၢ်သၤအမဲာ်ကထီၣ်ဂီၤဝဲဧါ, မ့ၢ်အဝဲကသါသဖှိထီၣ်ဝဲဧါ, မ့ၢ်အမဲာ်သၣ်ကအုၣ်ပိးဧါ. နီၢ်မၢ်သၤမ့ၢ်မၤဝဲဒ်န့ၣ်န့ၣ် တမ့ၢ်တၢ်လၢအလီၤကမၢကမၣ်ဘၣ်. တၢ်မၤတဖၣ်အံၤ အဝဲမ့ၢ်ဘၣ်မၤဝဲထဲတဂၤန့ၣ် ကဝံၤဝဲဒ်လဲၣ်.

^၈ လၢခံကတၢၢ်န့ၣ် နီၢ်မၢ်သၤကီၤအသးတန့ၢ်လၢၤဘၣ်, ဒီးအတၢ်သးအ့န့ဟဲဖျိးထီၣ်ဝဲသတူၢ်ကလာ်လီၤ. ဖဲယ့ၣ်ၡူးကတိၤသကိးတၢ်အဆၢကတီၢ် အဝဲဝၣ်လီၤတဲဝဲလၢ “ကစၢ်ဧၢ, ယမၤတၢ်တဂၤဃီဒီး ယဒီပုၢ်ဝဲၢ်မုၣ်အိၣ်ဒၣ်အတၢ်န့ၣ်, နတပာ်ဘၣ်လၢ တၢ်နီတမံၤဘၣ်ဧါ. မၤသးဒ်န့ၣ်ဒီး ဒ်သိးအကမၤစၢၤယၤဒီး, စံးဘၣ်အီၤတက့ၢ်.” (လူၤကၣ် ၁၀:၄၀) ပထံၣ်ဘၣ်လၢ အဝဲမၢယ့ၣ်ၡူးသိၣ်နီၢ်မၤရံ ဒ်သိးအကက့ၤမၤစၢၤအီၤအဂီၢ်လီၤ. နီၢ်မၢ်သၤအတၢ်ကတိၤအံၤဒု ဆူၣ်တစဲးလံဧါသၢၣ်.

၉, ၁၀. (က) ယ့ၣ်ၡူးစံးဆၢက့ၤ နီၢ်မၢ်သၤဒ်လဲၣ်. (ခ) ယ့ၣ်ၡူးတကွၢ်ကပာ်ကွံာ်ဝဲ နီၢ်မၢ်သၤအတၢ်ဂုာ်ကျဲးစၢးန့ၣ် ပသ့ၣ်ညါဘၣ်ဒ်လဲၣ်.

^၉ နီၢ်မၢ်သၤကကမၢကမၣ်ဝဲလၢ ယ့ၣ်ၡူးအတၢ်ကတိၤအဃိလီၤ. ယ့ၣ်ၡူးစံးဆၢအီၤ ကပုာ်လုးဖိလၢ “နီၢ်မၢ်သၤဧၢ, နီၢ်မၢ်သၤဧၢ, နဲဒၣ်အံၤ, နဘၣ်ယိၣ်တၢ်ဒီး နသးကိၢ်တၢ်လၢ တၢ်အါမံၤအဃိလီၤ. ဘၣ်ဆၣ်ဒီး တၢ်လၢပှၤကြၢးန့ၢ်ဘၣ်ဝဲန့ၣ်, အိၣ်တမံၤလီၤ. ဒီးနီၢ်မၤရံဃုထၢလံ တၢ်အဂ့ၤတမံၤန့ၣ်, လၢပှၤတဟံးထီၣ်ကွံာ်ဘၣ်လၢအီၤ နီတဂၤဘၣ်.” (လူၤကၣ် ၁၀:၄၁, ၄၂) မ့ၢ်ယ့ၣ်ၡူးအဲၣ်ဒိးတဲဝဲ တၢ်မနုၤလဲၣ်. မ့ၢ်အဝဲအဲၣ်ဒိးတဲဝဲလၢ နီၢ်မၢ်သၤန့ၣ်ပာ်ဒိၣ်တၢ်လၢ နီၢ်ခိတခီအါန့ၢ်ဒံးကစၢ်ယွၤဧါ. မ့ၢ်အဝဲကွၢ်ကပာ်ကွံာ်ဝဲ နီၢ်မၢ်သၤအတၢ်ဂုာ်ကျဲးစၢး လၢကကတဲာ်ကတီၤန့ၢ်အီၤ တၢ်အီၣ်လၢအဝံၣ်အဘဲန့ၣ်ဧါ.

^၁၀ တမ့ၢ်ဘၣ်. ယ့ၣ်ၡူးသ့ၣ်ညါဝဲလၢ နီၢ်မၢ်သၤမ့ၢ်ပှၤလၢအသူၣ်ဂ့ၤသးဝါဒီး အိၣ်ဒီးတၢ်အဲၣ်တၢ်ကွံလီၤ. တၢ်တူၢ်လိာ်တမှံၤလၢ တၢ်အီၣ်တၢ်အီအါအါဂီၢ်ဂီၢ်န့ၣ် ယ့ၣ်ၡူးတထံၣ်ဝဲလၢ အမ့ၢ်တၢ်လၢအကမၣ်ဘၣ်. လၢအပူၤကွံာ်တယံာ်ဒံးဘၣ် ဖဲစီၤမးသဲမၤဝဲ “တၢ်အီၣ်အမူးဖးဒိၣ်” အခါယ့ၣ်ၡူးလဲၤဝဲစ့ၢ်ကီးလီၤ. (လူၤကၣ် ၅:၂၉, ခ့ခါစှီၤကျိာ်) လၢတၢ်န့ၣ်အဃိ ပသ့ၣ်ညါဘၣ်လၢယ့ၣ်ၡူး အတၢ်ကတိၤန့ၣ် တအဲၣ်ဒိးတဲဝဲတၢ်အီၣ်အဂ့ၢ်ဘၣ်. အဲၣ်ဒိးတဲဝဲ ဘၣ်ဃးဒီးတၢ်လၢနီၢ်မၢ်သၤ ပာ်ဆိဝဲန့ၣ်လီၤ. နီၢ်မၢ်သၤအသးစၢၢ်ဆၢဝဲလၢ ကဖီအီၣ်တ့ၤအီၣ်တၢ်ဝံၣ်ဝံၣ်ဘဲဘဲ ဒီးသးပ့ၤနီၣ်ဝဲ တၢ်လၢအရ့ဒိၣ်န့ၣ်လီၤ. တၢ်လၢအဝဲသးပ့ၤနီၣ်ဝဲန့ၣ် မ့ၢ်တၢ်မနုၤလဲၣ်.

၁၁, ၁၂. ယ့ၣ်ၡူးသိၣ်ဝဲနီၢ်မၢ်သၤလၢ တၢ်အဲၣ်တၢ်ကွံအပူၤဒ်လဲၣ်.

^၁၁ ယ့ၣ်ၡူးလၢအမ့ၢ် ယဟိဝၤယွၤအဖိခွါန့ၣ် ဟဲဆူနီၢ်မၢ်သၤအဟံၣ် ဒ်သိးကသိၣ်လိ တၢ်မ့ၢ်တၢ်တီအဂီၢ်လီၤ. နီၢ်မၢ်သၤအတၢ်ကတဲာ်ကတီၤတဖၣ်မ့ၢ်ဂ့ၤ, တၢ်အီၣ်တၢ်အီလၢအဝံၣ်အဘဲမ့ၢ်ဂ့ၤ, တၢ်အဂုၤအဂၤတဖၣ်မ့ၢ်ဂ့ၤ အရ့တဒိၣ်ထဲသိးဒီး တၢ်လၢယ့ၣ်ၡူးအဲၣ်ဒိးသိၣ်လိဝဲတဖၣ်ဘၣ်. မ့ၢ်လၢနီၢ်မၢ်သၤတူၢ်ၡူကွံာ်တၢ်ခွဲးတၢ်ယာ်လၢ ကမၤဂၢၢ်ကျၢၤထီၣ်အတၢ်စူၢ်တၢ်နာ်အဃိ ယ့ၣ်ၡူးကသးအုးဝဲလီၤ. ဘၣ်ဆၣ်အဝဲပျဲဝဲလၢ နီၢ်မၢ်သၤကဃုထၢတၢ်လၢ အနီၢ်ကစၢ်ဒၣ်ဝဲလီၤ.a ဘၣ်ဆၣ်နီၢ်မၢ်သၤ ကမၢဆူၣ်စ့ၢ်ကီးဝဲနီၢ်မၤရံ ဒ်သိးအဝဲကတူၢ်ၡူကွံာ်ဝဲအတၢ်ခွဲးတၢ်ယာ်လၢ ကမၤလိတၢ်လၢယ့ၣ်ၡူးအအိၣ်န့ၣ် တကြၢးဝဲဘၣ်ဝဲဘၣ်.

^၁၂ ယ့ၣ်ၡူးသိၣ်ဝဲနီၢ်မၢ်သၤ လၢတၢ်အဲၣ်တၢ်ကွံအပူၤ ဒီးကိးထီၣ်အမံၤလၢ အကလုၢ်ကဖီလီဖိ ဒ်သိးနီၢ်မၢ်သၤအသးကခုၣ်လီၤအဂီၢ်လီၤ. ဒီးအဝဲစံးဘၣ်နီၢ်မၢ်သၤလၢ တလိၣ်လၢ “နဘၣ်ယိၣ်တၢ်ဒီး နသးကိၢ်တၢ်လၢ တၢ်အါမံၤအဃိ” ဘၣ်. လီၤဆီဒၣ်တၢ် ဖဲယ့ၣ်ၡူးသိၣ်လိလံာ်စီဆှံတၢ်မ့ၢ်တၢ်တီအဆၢကတီၢ် အဝဲမ့ၢ်ကတဲာ်ကတီၤဝဲ တၢ်အီၣ်တၢ်အီထဲတမံၤခံမံၤန့ၣ် လၢပှဲၤလံ. နီၢ်မၤရံဆၢတဲာ်အသးလၢ ကမၤလိတၢ်လၢယ့ၣ်ၡူးအအိၣ်လီၤ. ဒီးလ့ၤတက့ၤ ယ့ၣ်ၡူးတထုးထီၣ်ကွံာ် “တၢ်အဂ့ၤတမံၤ” အံၤလၢနီၢ်မၤရံအအိၣ်ဘၣ်.

၁၃. ဖဲယ့ၣ်ၡူးစံးဆၢက့ၤနီၢ်မၢ်သၤအခါန့ၣ် ပဒိးန့ၢ်ဘၣ်တၢ်မၤလိဒ်လဲၣ်.

^၁၃ ခရံာ်ဖိလၢ မုၢ်မဆါတနံၤအံၤန့ၣ် ဟံးန့ၢ်တၢ်မၤလိလၢ နီၢ်မၢ်သၤအအိၣ်သ့ဝဲလီၤ. လၢတၢ်န့ၣ်အဃိ ပတဘၣ်ပာ်ဒိၣ် တၢ်အဂုၤအဂၤတမံၤမံၤ အါန့ၢ်ဒံး “နီၢ်သးအတၢ်လိၣ်ဘၣ်” တဂ့ၤ. (မး. ၅:၃, nwt) ပအဲၣ်ဒိးကွၢ်လိမၤဒိး နီၢ်မၢ်သၤအတၢ်သးအိၣ်ဟ့ၣ်တၢ် ဒီးအတၢ်ဂုာ်ကျဲးစၢးမၤတၢ်န့ၣ်လီၤ. ဘၣ်ဆၣ် ပတအဲၣ်ဒိး ‘ဘၣ်ယိၣ်တၢ်ဒီး သးကိၢ်တၢ်’ အါတလၢ ဘၣ်ဃးဒီးတၢ်တူၢ်လိာ်တမှံၤတပျီတုၤဒၣ်လဲာ် ပသးပ့ၤနီၣ်တၢ်လၢအရ့ဒိၣ်ကတၢၢ်တဖၣ်ဘၣ်. (ဖး ရိမ့ၤ ၁:၁၁, ၁၂ တက့ၢ်.) ဖဲပရ့လိာ်ပသးဒီးဒီပုၢ်ဝဲၢ်တဖၣ်အခါ ပအီၣ်ဘၣ်အီဘၣ်ဝံၣ်ဝံၣ်ဘဲဘဲမ့ၢ်ဂ့ၤ, ပဒုးအီၣ်ဒုးအီအဝဲသ့ၣ်လၢ တၢ်အီၣ်အဝံၣ်အဘဲမ့ၢ်ဂ့ၤ တမ့ၢ်တၢ်လၢအရ့ဒိၣ်ကတၢၢ်ဘၣ်. တၢ်လၢအရ့ဒိၣ်ကတၢၢ်န့ၣ် မ့ၢ်ဝဲဒၣ်လၢ ပကဟ့ၣ်ဂံၢ်ဟ့ၣ်ဘါလိာ်ပသးတဂၤဒီးတဂၤ လၢနီၢ်သးတခီလီၤ.

အဒီပုၢ်ဝဲၢ်လၢ အဲၣ်ဘၣ်ဝဲတဂၤ ဂဲၤဆၢထၢၣ်သမူထီၣ်က့ၤ

၁၄. နီၢ်မၢ်သၤပာ်လီၤဒိဂ့ၤတဲာ်ဘၣ်ဒီး တူၢ်လိာ်ယ့ၣ်ၡူးအတၢ်သိၣ်က့ၤသီက့ၤန့ၣ် ပသ့ၣ်ညါဘၣ်ဒ်လဲၣ်.

^၁၄ မ့ၢ်နီၢ်မၢ်သၤတူၢ်လိာ်ဝဲ ယ့ၣ်ၡူးအတၢ်သိၣ်က့ၤသီက့ၤဧါ. ဖဲယ့ၣ်ၡူးသိၣ်ဝဲနီၢ်မၢ်သၤ ပူၤကွံာ်အလါတဖၣ်အလါဝံၤအလီၢ်ခံ တၢ်မၢဖိယိၤဟၣ်တဲဝဲလၢ “ယ့ၣ်ၡူးအဲၣ်နီၢ်မၢ်သၤ ဒီးအဒီပုၢ်ဝဲၢ်မုၣ်, ဒီးစီၤလါစရူးလီၤ.” (ယိၤဟၣ် ၁၁:၅) လၢတၢ်န့ၣ်အဃိ ပသ့ၣ်ညါဘၣ်လၢနီၢ်မၢ်သၤ တပာ်တၢ်ကမၣ်လၢယ့ၣ်ၡူးအလိၤ ဒီးတဟးကဒူးကဒ့ၣ်အဂ့ၢ်လၢ ပှၤဂၤအမဲာ်ညါဘၣ်. ယ့ၣ်ၡူးသိၣ်ဝဲနီၢ်မၢ်သၤလၢ တၢ်အဲၣ်တၢ်ကွံအပူၤ ဒီးနီၢ်မၢ်သၤတူၢ်လိာ်ဝဲလၢ အသးဒီဖျၢၣ်လီၤ. နီၢ်မၢ်သၤပာ်လီၤတ့ၢ်ဒိဂ့ၤတဲာ်ဘၣ်လၢပဂီၢ်လီၤ. မ့ၢ်လၢပဝဲခဲလၢာ် ပလိၣ်ဘၣ်တၢ်သိၣ်က့ၤသီက့ၤအဃိလီၤ.

၁၅, ၁၆. (က) ဖဲစီၤလါစရူးဆိးက့အခါ နီၢ်မၢ်သၤကမၤဝဲဒ်လဲၣ်. (ခ) ဘၣ်မနုၤအဃိ နီၢ်မၢ်သၤဒီးနီၢ်မၤရံ အတၢ်မုၢ်လၢ်ဟးဂီၤဝဲလဲၣ်.

^၁၅ ဖဲစီၤလါစရူးဆိးက့အခါ နီၢ်မၢ်သၤကဂုာ်ကျဲးစၢး အံးထွဲကွၢ်ထွဲအီၤလၢ အဂ့ၤကတၢၢ်လီၤ. ဒီးအဝဲကမၤဝဲတၢ်ကိးမံၤဒဲး ဒ်သိးအဒီပုၢ်ဝဲၢ်ကအိၣ်ဆူၣ်ထီၣ်က့ၤအဂီၢ်လီၤ. ဘၣ်ဆၣ်သနာ်က့ စီၤလါစရူးအတၢ်ဆါန့ၣ် နးထီၣ်ဝဲရုၢ်ရုၢ်လီၤ. ဖဲစီၤလါစရူးဆိးက့အဆၢကတီၢ် နီၢ်မၢ်သၤဒီးနီၢ်မၤရံ ကအိၣ်လၢအကပၤကိးနၣ်ရံၣ်, ကိးဆၢကတီၢ်ဒဲးလီၤ. နီၢ်မၢ်သၤကကွၢ်ဝဲ အဒီပုၢ်ဝဲၢ်ခွါအမဲာ်လၢအလီၤကအိဒီး ကသ့ၣ်နီၣ်ဘၣ်က့ၤဝဲ တၢ်ဆၢကတီၢ်ဖဲ အဝဲသ့ၣ် သူၣ်ခုသးခုဒ်သိးသိးဒီး သူၣ်အုးသးအုးဝဲဒ်သိးသိးအခါန့ၣ်လီၤ.

^၁၆ နီၢ်မၢ်သၤဒီးနီၢ်မၤရံထံၣ်ဘၣ်ဝဲလၢ အဒီပုၢ်ဝဲၢ်အတၢ်ဆါနးထီၣ်တုၤဒၣ်လဲာ် အဝဲသ့ၣ်မၤစၢၤဝဲတသ့လၢၤဘၣ်. လၢတၢ်န့ၣ်အဃိအဝဲသ့ၣ် ဆှၢလီၤတၢ်ကစီၣ်ဆူယ့ၣ်ၡူးအအိၣ်လၢ “ကစၢ်ဧၢ, နတံၤသကိးလၢနအဲၣ်အီၤတဂၤ ဆိးက့ဝဲန့ၣ်လီၤ.” (ယိၤဟၣ် ၁၁:၁, ၃, ခ့ခါစှီၤကျိာ်) ဖဲန့ၣ်အဆၢကတီၢ် ယ့ၣ်ၡူးစံၣ်တဲၤတဲလီၤတၢ်လၢ တၢ်လီၢ်လၢအယံၤဒီးအဝဲသ့ၣ် ခံသီကျဲန့ၣ်လီၤ. အဝဲသ့ၣ်သ့ၣ်ညါဝဲလၢ ယ့ၣ်ၡူးအဲၣ်စီၤလါစရူးဒီး နာ်ဝဲလၢယ့ၣ်ၡူးကမၤစၢၤဝဲ အတံၤသကိးတဂၤအံၤလီၤ. ဘၣ်သ့ၣ်သ့ၣ်အဝဲသ့ၣ်ကကွၢ်လၢ်ဝဲ ယ့ၣ်ၡူးအကျဲလၢတၢ်သူၣ်ကိၢ်သးဂီၤအပူၤလီၤ. ဘၣ်ဆၣ် အခဲအံၤစီၤလါစရူးသံဝဲလံအဃိ အဝဲသ့ၣ်အတၢ်မုၢ်လၢ် ဟးဂီၤလၢာ်လံ.

၁၇. ဘၣ်မနုၤအဃိ နီၢ်မၢ်သၤဆိကမိၣ်တၢ် တဘၣ်လၢၤဘၣ်လဲၣ်, ဒီးဖဲနီၢ်မၢ်သၤနၢ်ဟူဘၣ်ဝဲလၢ ယ့ၣ်ၡူးဟဲဘူးကတုၤလၢဝ့ၤဘ့ၤသနံအခါ အဝဲမၤဝဲတၢ်မနုၤလဲၣ်.

^၁၇ မ့ၢ်လၢစီၤလါစရူးသံဝဲအဃိ နီၢ်မၢ်သၤဒီးနီၢ်မၤရံကသးအုးဝဲဒိၣ်မးလီၤ. ဒီးအဝဲသ့ၣ်ကဘၣ်ရဲၣ်ကျဲၤတၢ်လၢ ပှၤကခူၣ်လီၤအီၤအဂီၢ် တကးဒံးဘၣ်အဝဲသ့ၣ်ကဘၣ်တူၢ်လိာ်ပှၤတမှံၤ လၢဝ့ၢ်ဘ့ၤသနံဒီး သဝီလၢအခိၣ်အဃၢၤန့ၣ်လီၤ. ဘၣ်ဆၣ်တုၤခဲအံၤ အဝဲသ့ၣ်တနၢ်ဟူယ့ၣ်ၡူးအကစီၣ်နီတမံၤဘၣ်. လၢတၢ်န့ၣ်အဃိ နီၢ်မၢ်သၤဆိကမိၣ်ဝဲတဘၣ်လၢၤဘၣ်. လၢခံကတၢၢ်န့ၣ် ဖဲစီၤလါစရူးသံဝံၤလွံၢ်သီဒီး နီၢ်မၢ်သၤနၢ်ဟူဘၣ်ဝဲတၢ်ကစီၣ်လၢ ယ့ၣ်ၡူးဟဲလၢဝ့ၢ်ဘ့ၤသနံဘူးကတုၤလံ. နီၢ်မၢ်သၤမ့ၢ်ပိာ်မုၣ်လၢ အဖျဲၣ်ဖျဲၣ်ဆှါဆှါတဂၤအဃိ ဖဲအဝဲသူၣ်အုးသးအုးအဆၢကတီၢ်ဒၣ်လဲာ် လဲၤဝဲဆူယ့ၣ်ၡူးအအိၣ် ချ့သဒံးဒီးတဲဘၣ်ဝဲနီၢ်မၤရံတချုးဘၣ်.—ဖး ယိၤဟၣ် ၁၁:၁၈-၂၀ တက့ၢ်.

၁၈, ၁၉. နီၢ်မၤသၤအိၣ်ဒီး တၢ်မုၢ်လၢ်ဒ်လဲၣ်, ဒီးအတၢ်နာ်န့ၣ် လီၤဆီဝဲဒီးပှၤစးဒူၤကဲတဖၣ်လၢကျဲဒ်လဲၣ်.

^၁၈ ဖဲနီၢ်မၢ်သၤထံၣ်လိာ်အသးဒီးယ့ၣ်ၡူးအခါ တဲဖျါထီၣ်ဝဲအနီၢ်ကစၢ် ဒီးနီၢ်မၤရံအတၢ်တူၢ်ဘၣ်လၢ အမၤတံာ်တာ်အသးတဘျုးသီလံန့ၣ်လီၤ. အဝဲစံးဝဲလၢ “ကစၢ်ဧၢ, နမ့ၢ်အိၣ်တ့ၢ်ဖဲအံၤဒီး, ယဒီပုၢ်ဝဲၢ်ခွါတသံဘၣ်ဝဲဘၣ်.” ဘၣ်ဆၣ်နီၢ်မၢ်သၤအတၢ်မုၢ်လၢ်ဒီး အတၢ်နာ်န့ၣ် တလီၤမၢ်ကွံာ်ဝဲဒံးဘၣ်. အဝဲတဲကဒီးဝဲလၢ “ယသ့ၣ်ညါလၢ ဖဲဒၣ်နဃ့တၢ်လၢယွၤ . . . န့ၣ်, ယွၤကဟ့ၣ်နၤလီၤ.” တဘျီဃီန့ၣ် ယ့ၣ်ၡူးစံးဆၢက့ၤအီၤလၢ “နဒီပုၢ်ဝဲၢ်ခွါ ကဂဲၤဆၢထၢၣ်က့ၤလီၤ.”—ယိၤဟၣ် ၁၁:၂၁-၂၃.

^၁၉ နီၢ်မၢ်သၤဆိကမိၣ်ဝဲလၢ ယ့ၣ်ၡူးတဲအီၤဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤလၢ ခါဆူညါအဂ့ၢ်န့ၣ်လီၤ. လၢတၢ်န့ၣ်အဃိအဝဲစံးဝဲလၢ စီၤလါစရူး “ကဂဲၤဆၢထၢၣ်က့ၤဝဲလၢ မုၢ်နံၤကတၢၢ် အတၢ်ဂဲၤဆၢထၢၣ်က့ၤန့ၣ်, ယသ့ၣ်ညါလီၤ.” (ယိၤဟၣ် ၁၁:၂၄) ပသ့ၣ်ညါလၢနီၢ်မၢ်သၤနာ်ဝဲ တၢ်ဂဲၤဆၢထၢၣ်သမူထီၣ်က့ၤ သပှၢ်ကတၢၢ်လီၤ. လံာ်စီဆှံပာ်ဖျါထီၣ်ဝဲ တၢ်ဂဲၤဆၢထၢၣ်သမူထီၣ်က့ၤအဂ့ၢ်ဘၣ်ဆၣ် ပှၤစးဒူၤကဲလၢအမ့ၢ် ပှၤယူဒၤဖိအတၢ်ဘူၣ်တၢ်ဘါခိၣ်နၢ်တဖၣ်န့ၣ် တတူၢ်လိာ်ဝဲဘၣ်. (ဒၤ. ၁၂:၁၃; မၢ်ကူး ၁၂:၁၈) မ့မ့ၢ်နီၢ်မၢ်သၤန့ၣ် သ့ၣ်ညါဝဲလၢ ယ့ၣ်ၡူးသိၣ်လိဝဲတၢ်ဂဲၤဆၢထၢၣ်သမူထီၣ်က့ၤအဂ့ၢ်တကးဘၣ် အနီၢ်ကစၢ်ဒၣ်ဝဲ မၤဂဲၤဆၢထၢၣ်သမူထီၣ်က့ၤပှၤဂၤအိၣ်ဝဲလီၤ. ဘၣ်ဆၣ်ယ့ၣ်ၡူးမၤဂဲၤဆၢထၢၣ်သမူထီၣ်က့ၤ ပှၤလၢအသံယံာ်ဝဲထဲသိးဒီး စီၤလါစရူးန့ၣ် တအိၣ်နီတဂၤဘၣ်. တၢ်ကမၤအသးဒ်လဲၣ်န့ၣ် နီၢ်မၢ်သၤတသ့ၣ်ညါဝဲဘၣ်.

၂၀. ယ့ၣ်ၡူးအတၢ်ကတိၤလၢအရ့ဒိၣ်တထံၣ်ဒီး နီၢ်မၢ်သၤအတၢ်စံးဆၢဖဲ ယိၤဟၣ် ၁၁:၂၅-၂၇ န့ၣ်အခီပညီဒ်လဲၣ်.

^၂၀ ဖဲန့ၣ်အဆၢကတီၢ်ယ့ၣ်ၡူးတဲဝဲ တၢ်ကတိၤလၢအရ့ဒိၣ်တထံၣ်လီၤ. အဝဲစံးဝဲလၢ “ယဲဒၣ်အံၤ ယမ့ၢ်တၢ်ဂဲၤဆၢထၢၣ်က့ၤ ဒီးတၢ်မူလီၤ.” မ့ၢ်လီၤ, ယဟိဝၤယွၤဟ့ၣ်ဝဲအဖိခွါလၢ တၢ်စိတၢ်ကမီၤဒီး ခါဆူညါ အဝဲကဒုးဂဲၤဆၢထၢၣ်သမူထီၣ်က့ၤပှၤသံလၢ ဟီၣ်ခိၣ်ဒီဘ့ၣ်န့ၣ်လီၤ. ယ့ၣ်ၡူးသံကွၢ်နီၢ်မၢ်သၤလၢ “တၢ်န့ၣ်နနာ်စ့ၢ်ကီးဧါ.” ဒ်တၢ်မၤလိအံၤအခိၣ်တီ ပာ်ဖျါထီၣ်ဝဲအသိး အဝဲစံးဆၢက့ၤဝဲလၢ “ယနာ်လီၤ.” အဝဲနာ်ဝဲလၢယ့ၣ်ၡူးမ့ၢ် မ့းၡံအၤ, ယဟိဝၤယွၤအဖိခွါ ဒီးပှၤတဂၤလၢ ဝံတဖၣ်စံးပာ်ဝဲလၢ အကဟဲလီၤလၢဟီၣ်ခိၣ်ချၢန့ၣ်လီၤ.—ယိၤဟၣ် ၅:၂၈, ၂၉; ဖး ယိၤဟၣ် ၁၁:၂၅-၂၇ တက့ၢ်.

၂၁, ၂၂. (က) ဖဲယ့ၣ်ၡူးထံၣ်ဘၣ်ဝဲ ပှၤလၢအဟီၣ်ဝဲတဖၣ်အဆၢကတီၢ် အဝဲပာ်ဖျါထီၣ်အသးအတၢ်တူၢ်ဘၣ်ဒ်လဲၣ်. (ခ) ဖဲယ့ၣ်ၡူးမၤသမူထီၣ်က့ၤ စီၤလါစရူးအခါ တၢ်မၤအသးဒ်လဲၣ်.

^၂၁ မ့ၢ်ယဟိဝၤယွၤဒီးအဖိခွါယ့ၣ်ၡူးခရံာ် ပာ်လုၢ်ပာ်ပှ့ၤဝဲနီၢ်မၢ်သၤအတၢ်နာ်ဧါ. တၢ်လၢအဟဲကဲထီၣ်အသးလၢ နီၢ်မၢ်သၤအမဲာ်ညါန့ၣ် ပာ်ဖျါထီၣ်ဝဲတၢ်စံးဆၢ လီၤတံၢ်လီၤဆဲးလီၤ. အဆိကတၢၢ်န့ၣ် နီၢ်မၢ်သၤကရီလဲၤကိးဝဲ အဒီပုၢ်ဝဲၢ်မုၣ်နီၢ်မၤရံလီၤ. ဝံၤဒီး ဖဲကစၢ်ကတိၤတၢ်ဒီးနီၢ်မၤရံဒီး ပှၤလၢအဟဲဟီၣ်သကိးဒီးအီၤအခါ နီၢ်မၢ်သၤထံၣ်ဘၣ်လၢ ယ့ၣ်ၡူးအသးဘၣ်ဒိဝဲဒိၣ်မးန့ၣ်လီၤ. တကးဒံးဘၣ်အဝဲထံၣ်ဘၣ်လၢ ယ့ၣ်ၡူးတပာ်ခူသူၣ်အတၢ်တူၢ်ဘၣ်တဖၣ်ဘၣ်, အသးဘၣ်ဒိတုၤလၢ အမဲာ်ထံလီၤဝဲလီၤ. ဒီးအဝဲနၢ်ဟူဘၣ်ယ့ၣ်ၡူးမၤလိာ်ပှၤလၢ ကသုးကွံာ်ဝဲလၢၢ်လၢအကးတံာ်ဃာ် အဒီပုၢ်ဝဲၢ်ခွါအသွၣ်ခိၣ်န့ၣ်လီၤ.—ယိၤဟၣ် ၁၁:၂၈-၃၉.

^၂၂ ဘၣ်ဆၣ်နီၢ်မၢ်သၤ တဘၣ်အသးဘၣ်. အဝဲတဲဝဲလၢ အဒီပုၢ်ဝဲၢ်ခွါသံအိၣ်လွံၢ်သီလံအဃိ ကနၢအုၣ်ဝဲလီၤ. ယ့ၣ်ၡူးတဲသ့ၣ်နီၣ်ထီၣ်က့ၤအီၤလၢ “ယစံးဘၣ်တဲဘၣ်နၤလၢ နမ့ၢ်နာ်တၢ်ဒီး, နကထံၣ်ဘၣ်ယွၤအလၤအကပီၤ, တမ့ၢ်ဘၣ်ဧါ.” ဒ်ယ့ၣ်ၡူးတဲအီၤအသိး အဝဲနာ်ဝဲ, ဒီးထံၣ်ဘၣ်ဝဲယဟိဝၤယွၤအလၤကပီၤ သပှၢ်ကတၢၢ်လီၤ. မ့ၢ်လၢယဟိဝၤယွၤ ဟ့ၣ်စိဟ့ၣ်ကမီၤအဖိခွါယ့ၣ်ၡူး ဒ်သိးကမၤသမူထီၣ်က့ၤစီၤလါစရူးအဃိန့ၣ်လီၤ. တၢ်မၤအသးလၢနံၤအဝဲန့ၣ်န့ၣ် မ့ၢ်တၢ်လၢနီၢ်မၢ်သၤ ကသ့ၣ်နီၣ်ထီၣ်ဝဲတဘိယူၢ်ဃီ တုၤလၢအသံတစုလီၤ. အဒိ, အဝဲနၢ်ဟူဘၣ်ယ့ၣ်ၡူးကိးထီၣ်ဝဲ စီၤလါစရူးလၢတၢ်သူၣ်ဆူၣ်သးဆူၣ်အပူၤလၢ “စီၤလါစရူးဧၢ, ဟဲက့ၤထီၣ်တက့ၢ်.” ဝံၤဒီးအဝဲနၢ်ဟူဘၣ်ဝဲ တၢ်သီၣ်ထီၣ်ကသွံဒံဖိ လၢလ့ကအိအပူၤလီၤ. ဒီးအဝဲထံၣ်ဘၣ်ဝဲ အဒီပုၢ်ဝဲၢ်ခွါစီၤလါစရူးလၢ ဘၣ်တၢ်ဘိၣ်ဘံဃာ်အီၤလၢတၢ်ကံးညာ်တဂၤအံၤ ဟဲက့ၤထီၣ်ဝဲကဘှၢကဘှၢတုၤလၢ လ့ကအိအခိၣ်ထိးလီၤ. ဒီးအဝဲနၢ်ဟူယ့ၣ်ၡူး မၤလိာ်ပှၤလၢ “ဃ့ၣ်လီၤကွံာ်အီၤ, ဒီးပျၢ်ကွံာ်အီၤတက့ၢ်.” တဘျီဃီန့ၣ် နီၢ်မၢ်သၤဒီးနီၢ်မၤရံ ကဃ့ၢ်ဖိးဟုဝဲအဒီပုၢ်ဝဲၢ်ခွါလၢ တၢ်သူၣ်ဖှံသးညီအပူၤန့ၣ်လီၤ. (ဖး ယိၤဟၣ် ၁၁:၄၀-၄၄ တက့ၢ်.) နီၢ်မၢ်သၤအတၢ်သူၣ်အုးသးအုး ဒံကွံာ်ဖျိးကွံာ်ဝဲလၢာ်လံ.

၂၃. ယဟိဝၤယွၤဒီးယ့ၣ်ၡူး အဲၣ်ဒိးမၤတၢ်မနုၤလၢနဂီၢ်လဲၣ်. ဒီးနကဘၣ်မၤတၢ်မနုၤလဲၣ်.

^၂၃ စီၤလါစရူးအဂ့ၢ်န့ၣ် ပာ်ဖျါထီၣ်န့ၢ်ပှၤလၢ တၢ်ဂဲၤဆၢထၢၣ်သမူထီၣ်က့ၤန့ၣ် တမ့ၢ်တၢ်မုၢ်လၢ်ကလီကလီဘၣ်, မ့ၢ်တၢ်လၢအကဲထီၣ်တ့ၢ်အသးလၢညါ သပှၢ်ကတၢၢ်ဒီး မ့ၢ်စ့ၢ်ကီးလံာ်စီဆှံအတၢ်သိၣ်လိတခါလၢ အဒုးသူၣ်မံသးမုာ်ပှၤန့ၣ်လီၤ. (ယိၤဘး ၁၄:၁၄, ၁၅) ယဟိဝၤယွၤဒီးအဖိခွါ သးအိၣ်ဆိၣ်ဂ့ၤ ပှၤလၢအအိၣ်ဒီးတၢ်နာ်လၢအဂၢၢ်ကျၢၤလီၤ. ဒီးဒ်နီၢ်မၢ်သၤ, နီၢ်မၤရံဒီးစီၤလါစရူးဒိးန့ၢ်ဘၣ်တၢ်ဆိၣ်ဂ့ၤအသိး ပဝဲစ့ၢ်ကီးပမ့ၢ်မၤဂၢၢ်ကျၢၤထီၣ်ပတၢ်နာ်န့ၣ် ယဟိဝၤယွၤဒီးယ့ၣ်ၡူး ကဆိၣ်ဂ့ၤပှၤလီၤ.

“နီၢ်မၢ်သၤ မၤတၢ်လုၢ်အီၣ်လုၢ်အီ”

၂၄. ဖဲလံာ်စီဆှံပာ်ဖျါထီၣ်ဝဲ နီၢ်မၢ်သၤအဂ့ၢ်အလီၢ်ခံကတၢၢ်တဘျီန့ၣ် အဝဲမၤဝဲတၢ်မနုၤလဲၣ်.

^၂၄ လၢခံန့ၣ်လံာ်စီဆှံပာ်ဖျါထီၣ်ဝဲ နီၢ်မၢ်သၤအဂ့ၢ်အိၣ်ဒံးထဲတဘျီဧိၤလီၤ. ဘၣ်ဖဲယ့ၣ်ၡူးဘူးထီၣ်ကသံ အလီၢ်ခံကတၢၢ်တနွံ ဒီးယ့ၣ်ၡူးသ့ၣ်ညါပာ်စၢၤ တၢ်ကီတၢ်ခဲလၢအဝဲ ကကွၢ်ဆၢၣ်မဲာ်ဘၣ်ဝဲတဖၣ်အဃိ လဲၤအိၣ်ဝဲလၢအတံၤသကိး နီၢ်မၢ်သၤအဟံၣ်လၢ ဝ့ၢ်ဘ့ၤသနံအပူၤန့ၣ်လီၤ. ဒ်သိးယ့ၣ်ၡူးကလဲၤဝဲဆူ ဝ့ၢ်ယရူၤၡလ့ၣ်အဂီၢ် အဝဲကဘၣ်ဟးဝဲလၢအခီၣ်ယံၤဝဲ ခံမံးလာ်န့ၣ်လီၤ. ဘၣ်ဆၣ်တချုးလၢ ယ့ၣ်ၡူးလဲၤဆူဝ့ၢ်ယရူၤၡလ့ၣ်အခါန့ၣ် လံာ်စီဆှံပာ်ဖျါထီၣ်နီၢ်မၢ်သၤအဂ့ၢ် အလီၢ်ခံကတၢၢ်တဘျီလီၤ. ဖဲယ့ၣ်ၡူးဒီးစီၤလါစရူး အီၣ်သကိးတၢ်လၢ ပှၤဘၣ်တၢ်ဆါအၢစီၤၡံမိၣ်အဟံၣ် အဆၢကတီၢ်န့ၣ် လံာ်စီဆှံစံးဝဲလၢ “နီၢ်မၢ်သၤ မၤတၢ်လုၢ်အီၣ်လုၢ်အီ” န့ၣ်လီၤ.—ယိၤဟၣ် ၁၂:၂.

၂၅. မုၢ်မဆါတနံၤအံၤ လၢပတၢ်အိၣ်ဖှိၣ်အပူၤ ပအိၣ်ဒီးပိာ်မုၣ်တဖၣ်လၢအလီၤဂာ်ဒီး နီၢ်မၢ်သၤအဃိ ကဲထီၣ်တၢ်ဆိၣ်ဂ့ၤလၢပဂီၢ်ဒ်လဲၣ်.

^၂၅ နီၢ်မၢ်သၤ ဂုာ်ကျဲးစၢးမၤတၢ်ဒ်အံၤန့ၣ် တမ့ၢ်တၢ်လၢအလီၤဆီဘၣ်. အဝဲမၤတၢ်မၤဆူၣ်ဆူၣ်ဒီး ဂုာ်ကျဲးစၢးအံးထွဲကွၢ်ထွဲ ပှၤလၢအကပိာ်ကပၤထီဘိလီၤ. မုၢ်မဆါတနံၤအံၤ လၢပတၢ်အိၣ်ဖှိၣ်အပူၤ ပိာ်မုၣ်တဖၣ်လၢအလီၤဂာ်ဒီးနီၢ်မၢ်သၤ မ့ၢ်အိၣ်န့ၣ် မ့ၢ်တၢ်ဆိၣ်ဂ့ၤဖးဒိၣ်တခါလီၤ. ဒီပုၢ်ဝဲၢ်မုၣ်သ့ၣ်တဖၣ်အံၤ မ့ၢ်ပှၤလၢအသးလဲၢ်, ဟ့ၣ်တၢ်ညီဒီးပာ်ဖျါထီၣ်အတၢ်နာ် ခီဖျိလၢအဝဲသ့ၣ်မၤတၢ်မၤဆူၣ်ဆူၣ်ဒီး တူၢ်ဆါအသးလၢ ယဟိဝၤယွၤဒီးပှၤဂၤအဂီၢ်လီၤ. ဒီးပနာ်သ့လၢ နီၢ်မၢ်သၤကပာ်ဖျါထီၣ်ဝဲ တၢ်ဂ့ၤတၢ်ဝါတဖၣ်အံၤ တုၤလၢအကတၢၢ်လီၤ. ဘၣ်ဆၣ်တယံာ်တမီၢ်န့ၣ် အဝဲကကွၢ်ဆၢၣ်မဲာ်ဘၣ်ဝဲ တၢ်မၤကွၢ်အကလုာ်ကလုာ်လီၤ.

၂၆. နီၢ်မၢ်သၤအတၢ်နာ်န့ၣ် ကဲထီၣ်တၢ်မၤစၢၤလၢ အဂီၢ်ဒ်လဲၣ်.

^၂၆ အဒိ လၢစှၤသီအတီၢ်ပူၤ ဖဲပှၤမၤသံကစၢ်ယ့ၣ်ၡူးခရံာ် အဆၢကတီၢ်န့ၣ် တၢ်သူၣ်ကိၢ်သးဂီၤဒီး တၢ်သူၣ်အုးသးအုးကဟဲလီၤဘၣ်အီၤ သပှၢ်ကတၢၢ်လီၤ. တကးဒံးဘၣ် ပှၤအၢပှၤသီလၢအမၤသံယ့ၣ်ၡူးန့ၣ် ပာ်လီၤအသးဂၢၢ်ဂၢၢ်ကျၢၤကျၢၤလၢ ကမၤသံစီၤလါစရူးစ့ၢ်ကီးလီၤ. မ့ၢ်လၢပှၤအါဂၤထံၣ်ဘၣ်ဝဲ စီၤလါစရူးလၢအဂဲၤဆၢထၢၣ်သမူထီၣ်က့ၤ ဒီးနာ်က့ၤဝဲယ့ၣ်ၡူးအဃိလီၤ. (ဖး ယိၤဟၣ် ၁၂:၉-၁၁ တက့ၢ်.) ဒီးလၢခံန့ၣ် တၢ်သံထုးဖးဝဲ နီၢ်မၢ်သၤဒီးအဒီပုၢ်ဝဲၢ်တဖၣ်လီၤ. တၢ်သံထုးဖးအဝဲသ့ၣ်လၢ ကျဲဒ်လဲၣ် ဒီးဖဲလဲၣ်အဆၢကတီၢ်လဲၣ်န့ၣ် ပတသ့ၣ်ညါလီၢ်တံၢ်လီၤဆဲးဘၣ်. ဘၣ်ဆၣ် ပတဲသ့လၢနီၢ်မၢ်သၤအတၢ်နာ် ကမၤစၢၤအီၤဒ်သိး ကအိၣ်ဒီးတၢ်တူၢ်န့ၢ်ခီၣ်ကဲ တုၤလၢအသံဝဲတစုလီၤ. လၢတၢ်န့ၣ်အဃိ ခရံာ်ဖိလၢမုၢ်မဆါတနံၤအံၤန့ၣ် ကြၢးကွၢ်လိမၤဒိးဝဲ နီၢ်မၢ်သၤအတၢ်နာ်လီၤ.