စီၤယိၤၡံယၤ အိၣ်ဒီးအတံၤသကိးလၢအဂ့ၤ

နဆိကမိၣ်လၢ ပကမၤတၢ်လၢအဂ့ၤန့ၣ် ကကီဧါ.— ပှၤအါတက့ၢ် ဆိကမိၣ်ဝဲလၢ ကီလီၤ. လံာ်စီဆှံတဲဘၣ်ပှၤ ပိာ်ခွါဖိလၢအမံၤမ့ၢ် စီၤယိၤၡံယၤတဂၤ ကီခဲဒိၣ်မးလၢ အကမၤတၢ်လၢအဂ့ၤအဂီၢ်လီၤ. ဘၣ်ဆၣ် အဝဲအိၣ်ဒီးအတံၤသကိးအဂ့ၤ လၢကမၤစၢၤအီၤလီၤ. ပကကွၢ်သကိး ဘၣ်ဃးစီၤယိၤၡံယၤ ဒီးအတံၤသကိးတဖၣ်အဂ့ၢ်မီၣ်.

စီၤယိၤၡံယၤ အပါပၢ်မ့ၢ်ဝဲ ယူဒၤအစီၤပၤ စီၤအၤမိၣ်လီၤ. စီၤအၤမိၣ်န့ၣ် အၢသီဒိၣ်မးဒီး ဘူၣ်ထီၣ်ဘါထီၣ် တၢ်ဂီၤတၢ်ဖီၣ်လီၤ. ဖဲစီၤယိၤၡံယၤ အပါပၢ်သံဝံၤအလီၢ်ခံန့ၣ် အဝဲကဲထီၣ် ယူဒၤအစီၤပၤလီၤ. ဘၣ်ဆၣ်အဝဲအသးအိၣ်ဒံးဒၣ် ဃိးနံၣ်လီၤ. နဆိကမိၣ်လၢ အဝဲကမၤတၢ်အၢဒ်သိး အပါပၢ်ဧါ.— အဝဲတမၤဝဲဘၣ်.

ဖဲအဝဲအနီၢ်ဆံးဆံးဖိအခါဒၣ်လဲာ် အသးအိၣ် ဒိကနၣ် ယဟိဝၤယွၤ အကလုၢ်လီၤ. လၢတၢ်န့ၣ်အဃိ အဝဲဃုထၢ အတံၤသကိးလၢ ပှၤလၢအအဲၣ်ယဟိဝၤယွၤတဖၣ်လီၤ. အဝဲသ့ၣ် မၤစၢၤစီၤယိၤၡံယၤလၢ ကမၤတၢ်လၢအဂ့ၤအဂီၢ်လီၤ. အတံၤသကိးတနီၤန့ၣ် မ့ၢ်မတၤတဖၣ်လဲၣ်.

အတံၤသကိးတဂၤန့ၣ် မ့ၢ်ဝဲ စီၤစဖါနယၤလီၤ. စီၤစဖါနယၤ မ့ၢ်ဝံတဂၤလၢ အဟ့ၣ်ပလီၢ် ပှၤယူဒၤဖိလၢ အဝဲသ့ၣ်မ့ၢ် ဘူၣ်ထီၣ်ဘါထီၣ် တၢ်ဂီၤတၢ်ဖီၣ်န့ၣ် တၢ်အၢကဘၣ်အီၤလီၤ. စီၤယိၤၡံယၤ ဒိကနၣ် ဝံစဖါနယၤအကလုၢ်ဒီး ဘူၣ်ထီၣ်ဘါထီၣ်ဝဲ ယဟိဝၤယွၤလီၤ. တဘူၣ်ထီၣ်ဘါထီၣ်ဝဲ တၢ်ဂီၤတၢ်ဖီၣ်ဘၣ်.

အတံၤသကိးလၢ အဂၤတဂၤန့ၣ်မ့ၢ် စီၤယံးရမံယၤလီၤ. အဝဲအသး အနံၣ်အလါ ဘူးကထဲသိးဒီး စီၤယိၤၡံယၤလီၤ. ဖဲအဝဲသ့ၣ် ဒိၣ်ထီၣ်အခါ အဟံၣ်အိၣ်ဘူးလိာ်အသးလီၤ. အဝဲသ့ၣ်မ့ၢ် ပှၤဒီတံၤဒီသကိးလၢ အဂ့ၤအဃိ ဖဲစီၤယိၤၡံယၤသံအခါ စီၤယံးရမံၤယၤ အသးသယုၢ်ဝဲ စီၤယိၤၡံယၤထဲလဲၣ်န့ၣ် ကွဲးဖျါဝဲလၢ တၢ်သးဝံၣ်လီၤဆီတယုၢ်အပူၤလီၤ. စီၤယံးရမံယၤ ဒီးစီၤယိၤၡံယၤ မၤစၢၤလိာ်အသး တဂၤဒီးတဂၤ ဒ်သိးကမၤတၢ်လၢအဂ့ၤ ဒီးကဒိကနၣ် ယဟိဝၤယွၤအကလုၢ်အဂီၢ်လီၤ.

နမၤလိဘၣ် တၢ်မနုၤလၢ စီၤယိၤၡံယၤ အအိၣ်လဲၣ်.— ဖဲစီၤယိၤၡံယၤ မ့ၢ်ဒံးဖိသၣ်တဂၤအခါ အသးအိၣ်မၤ တၢ်လၢအဂ့ၤလီၤ. အဝဲသ့ၣ်ညါလၢ အကြၢးဒီတံၤဒီသကိးဒီး ပှၤလၢအအဲၣ် ယဟိဝၤယွၤတဖၣ်လီၤ. နၤစ့ၢ်ကီးနကဘၣ် ဃုထၢတံၤသကိးလၢ အအဲၣ်ယဟိဝၤယွၤဒီး မၤစၢၤနၤသ့လၢ နကမၤတၢ်လၢအဂ့ၤအဂီၢ်လီၤ.