စီၤယိၤၡံယၤ အဲၣ်ဝဲယဟိဝၤယွၤ အတၢ်သိၣ်တၢ်သီ

ဖဲစီၤယိၤၡံယၤ အသးအိၣ်ဝဲ ဃိးနံၣ်အခါ အဝဲကဲထီၣ်ဝဲ ယူဒၤအစီၤပၤ. ဖဲန့ၣ်အဆၢကတီၢ် ပှၤဂီၢ်မုၢ်တဖၣ်မၤဝဲ တၢ်ဝံတၢ်နါ အတၢ်ဖံးတၢ်မၤ ဒီးဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်တဖၣ်. ဖဲစီၤယိၤၡံယၤအိၣ်​ ၁၆ နံၣ်အခါ အဝဲဃုသ့ၣ်ညါ ယဟိဝၤယွၤအဂ့ၢ် ဒ်သိး ကဘူၣ်ထီၣ်ဘါထီၣ်အီၤ ဒီးမၤသးခုအီၤအဂီၢ်. ဖဲစီၤယိၤၡံယၤ ပှဲၤထီၣ်အနံၣ်​ ၂၀ အခါ အဝဲစးထီၣ်​ မၤဟးဂီၤကွံာ်ဝဲ တၢ်ဂီၤတၢ်ဖှီၣ်ဒီး တၢ်လုၢ်လီၢ်လၢ ကီၢ်ယူဒၤအပူၤ. ဖဲစီၤယိၤၡံယၤအိၣ်ဝဲ ၂၆ နံၣ်အခါ အဝဲရဲၣ်ကျဲၤဝဲလၢ ပှၤကဘှီဂ့ၤထီၣ်က့ၤ ယဟိဝၤယွၤ အတၢ်လုၢ်ဟံၣ်.

ပှၤလုၢ်တၢ်အခိၣ်​ စီၤဃံးလကံယၤ ထံၣ်န့ၢ်ဝဲ ယဟိဝၤယွၤ အတၢ်သိၣ်တၢ်သီ အလံာ်ထူလၢ တၢ်လုၢ်ဟံၣ်ပူၤ. ဘၣ်သ့ၣ်သ့ၣ်​ လံာ်ထူအံၤန့ၣ်​ စီၤမိၤၡ့ကွဲးဝဲ. စီၤပၤအနဲၣ်ရွဲၣ်​ စီၤမၡူလၣ်​ ဟဲက့ၤစိာ်ဝဲ လံာ်ထူအံၤလၢ စီၤယိၤၡံယၤအအိၣ်​ ဒီးဖးဝဲလံာ်တၢ်သိၣ်တၢ်သီအံၤလၢ အကလုၢ်ဖးဒိၣ်. ဖဲစီၤယိၤၡံယၤ ဒိကနၣ်ဝဲအခါန့ၣ်​ အဝဲသ့ၣ်ညါဘၣ်ဝဲလၢ ပှၤဂီၢ်မုၢ်တဖၣ်အံၤ တဒိကနၣ်​ ယဟိဝၤယွၤ အကလုၢ် အိၣ်လံအနံၣ်အါမးလံ. စီၤပၤယိၤၡံယၤတဲဘၣ်​ စီၤဃံးလကံယၤလၢ ‘ယဟိဝၤယွၤ သးပှံၢ်ထီၣ်ပှၤဒိၣ်မးလံ. လဲၤသံကွၢ်တၢ်လၢ ကစၢ်ယွၤအအိၣ်​ ဒီးကစၢ်ယွၤ ကတဲဘၣ်ပှၤလၢ တၢ်လၢပကြၢးမၤ.’ ယဟိဝၤယွၤတဲဘၣ်​ အဝံမုၣ်​ နီၢ်ဃူးလဒါလၢ ‘ပှၤယူဒၤဖိတဖၣ်​ ပာ်တ့ၢ်ကွံာ်ယၤလံ. အဝဲသ့ၣ်​ ကဘၣ်တၢ်စံၣ်ညီၣ်. ဘၣ်ဆၣ်​ ခီဖျိလၢ စီၤပၤယိၤၡံယၤ အိၣ်ဒီးတၢ်ဆီၣ်လီၤသး အဃိ တၢ်စံၣ်ညီၣ်တဟဲဘၣ်​ ပှၤဂီၢ်မုၢ်ဖဲ စီၤယိၤၡံယၤ အစိၤဘၣ်.’

ဖဲစီၤယိၤၡံယၤ နၢ်ဟူဝဲ တၢ်ကစီၣ်အံၤအခါ အဝဲလဲၤလၢ တၢ်လုၢ်ဟံၣ်​ ဒီးကိးဖှိၣ်ဝဲ ပှၤယူဒၤဖိခဲလၢာ်. ဝံၤဒီး စီၤယိၤၡံယၤ ဖးထီၣ်ဝဲ ယဟိဝၤယွၤ အတၢ်သိၣ်တၢ်သီလၢ အကလုၢ်ဖးဒိၣ်လၢ ပှၤဂီၢ်မုၢ်တဖၣ်​ အမဲာ်ညါ. စီၤယိၤၡံယၤ ဒီးပှၤဂီၢ်မုၢ်တဖၣ်အံၤ အၢၣ်လီၤအီလီၤဝဲလၢ ကဒိကနၣ်ဝဲ ယဟိဝၤယွၤ အကလုၢ်လၢ အဝဲသ့ၣ်​ အသးဒီဖျၢၣ်ညါ.

ပှၤယူဒၤဖိတဖၣ်အံၤ တမၤဝဲ ဘူၣ်လဲၤကပာ်န့ၣ်​ အိၣ်ဝဲအနံၣ်​ အါမးလံ. ဘၣ်ဆၣ်​ ဖဲစီၤယိၤၡံယၤဖးဝဲ တၢ်သိၣ်တၢ်သီလၢ ပှၤကဘၣ်မၤ ဘူၣ်လဲၤကပာ် ကိးနံၣ်ဒဲးအခါ အဝဲတဲဘၣ်​ ပှၤဂီၢ်မုၢ်လၢ ‘ပကမၤ ဘူၣ်လဲၤကပာ်လၢ ယဟိဝၤယွၤအဂီၢ်.’ ဝံၤဒီး စီၤယိၤၡံယၤ ကတဲာ်ကတီၤဝဲ တၢ်လုၢ်အါမး ဒီးရဲၣ်ကျဲၤဝဲလၢ ပှၤသးဝံၣ်တၢ်ဖိတဖၣ်​ ကဟဲသးဝံၣ်တၢ်လၢ တၢ်လုၢ်ဟံၣ်. ပှၤဂီၢ်မုၢ်တဖၣ်​ မၤဝဲဘူၣ်လဲၤကပာ် ဝံၤဒီးမၤဝဲ ဘူၣ်ကိၣ်တအိၣ်ဘၣ်ဒီး ကိၣ်မံၣ်န့ၣ်​ ယံာ်ဝဲနွံသီ. စီၤယိၤၡံယၤန့ၣ်​ အဲၣ်ယဟိဝၤယွၤ အတၢ်သိၣ်တၢ်သီနီၢ်နီၢ်. မ့ၢ်နသးအိၣ်​ မၤလိအါထီၣ်​ ယဟိဝၤယွၤအဂ့ၢ် စ့ၢ်ကီးဧါ.