ဝံယံးရမံယၤတပာ်ကတီၢ် တၢ်တဲယဟိဝၤယွၤအဂ့ၢ်ဘၣ်

ဖဲပတဲဘၣ်ပှၤဂၤ လၢယဟိဝၤယွၤအဂ့ၢ်အခါ, တဘျီတခီၣ် အဝဲသ့ၣ်ကတိၤဆါပှၤ မ့တမ့ၢ်သးထီၣ်ပှၤလီၤ. လၢတၢ်န့ၣ်အဃိ ဘၣ်သ့ၣ်သ့ၣ် ပတအဲၣ်ဒိးတဲဘၣ်ပှၤလၢ ယွၤအဂ့ၢ်လၢၤဘၣ်. တၢ်ကဲထီၣ်အသးဒီးနၤဒ်န့ၣ် တဘျီဘျီဧါ.— လံာ်စီဆှံတဲဘၣ်ပှၤ သးစၢ်တဂၤလၢအအဲၣ် ယဟိဝၤယွၤဘၣ်ဆၣ် တဘျီန့ၣ်အဝဲတအဲၣ်ဒိးတဲ ယဟိဝၤယွၤအဂ့ၢ်လၢၤဘၣ်. အဝဲအမံၤမ့ၢ် စီၤယံးရမံယၤလီၤ. ပကကွၢ်သကိး အဝဲအဂ့ၢ်မီၣ်.

ဖဲစီၤယံးရမံယၤအသးစၢ်အခါ ယဟိဝၤယွၤတဲဘၣ်အီၤလၢ ကဘၣ်ဟ့ၣ်ပလီၢ်ပှၤကညီ ဒ်သိးအသုတမၤ တၢ်အၢတၢ်သီလၢၤတဂ့ၤန့ၣ်လီၤ. တၢ်အံၤကီဒိၣ်မးလၢ စီၤယံးရမံယၤအဂီၢ် ဒီးအဝဲပျံၤတၢ်စ့ၢ်ကီးလီၤ. အဝဲတဲဝဲယဟိဝၤယွၤလၢ ‘ယကတိၤတၢ်တသ့ဘၣ်. ယမ့ၢ်ဖိသၣ်တဂၤလီၤ.’ ဘၣ်ဆၣ်ယဟိဝၤယွၤ စံးအီၤလၢ ‘ပျံၤတၢ်တဂ့ၤ. ယကမၤစၢၤနၤလီၤ.’

လၢတၢ်န့ၣ်အဃိစီၤယံးရမံယၤ စးထီၣ်ဟ့ၣ်ပလီၢ်ပှၤလၢ အဝဲသ့ၣ်မ့ၢ်တဆီတလဲအသးန့ၣ် ကဘၣ်တၢ်စံၣ်ညီၣ်လီၤ. နဆိကမိၣ်လၢပှၤသ့ၣ်တဖၣ်န့ၣ် ကဒိကနၣ်စီၤယံးရမံယၤ အကလုၢ်ဧါ.— တဒိကနၣ်ဝဲဘၣ်. အဝဲသ့ၣ်ကတိၤဆါအီၤ ဒီးသးထီၣ်အီၤဒိၣ်မးလီၤ. အဝဲသ့ၣ်တနီၤန့ၣ် အဲၣ်ဒိးမၤသံအီၤလီၤ. နဆိကမိၣ်လၢ စီၤယံးရမံယၤ အသးကမၤသးဒ်လဲၣ်.— အဝဲပျံၤတၢ်ဒီးတဲဝဲလၢ ‘ယတတဲ ယဟိဝၤယွၤအဂ့ၢ်လၢၤဘၣ်.’ ဘၣ်ဆၣ်ဒီး အဝဲတတဲလၢၤဝဲ နီၢ်ကီၢ်ဧါ.— တမ့ၢ်ဘၣ်. အဝဲတဲဒံးဝဲလီၤ. အဝဲအဲၣ်ယဟိဝၤယွၤဒိၣ်မးအဃိ တပာ်ကတီၢ်တၢ်တဲ ယဟိဝၤယွၤအဂ့ၢ်ဘၣ်. လၢတၢ်န့ၣ်အဃိ ယဟိဝၤယွၤမၤပူၤဖျဲးအီၤလီၤ.

အဒိ, တဘျီန့ၣ်ပှၤအၢပှၤသီတနီၤတ့ၢ်နုာ် စီၤယံးရမံယၤဆူတၢ်ပူၤတပူၤလၢ အအိၣ်ဒီးကပံာ်လီၤ. အဝဲတအီၣ်ဘၣ်တၢ်အီၣ် ဒီးတအီဘၣ်ထံဘၣ်. ပှၤတဖၣ်န့ၣ်အဲၣ်ဒိးလၢ စီၤယံးရမံယၤကသံကွံာ်ဖဲန့ၣ်လီၤ. ဘၣ်ဆၣ်လၢယဟိဝၤယွၤ အတၢ်မၤစၢၤအဃိ အဝဲပူၤဖျဲးကွံာ်လီၤ.

နမၤလိန့ၢ် တၢ်မနုၤလၢ စီၤယံးရမံယၤအအိၣ်လဲၣ်.— ဘၣ်တဘျီဘျီ အဝဲပျံၤတၢ်သနာ်က့ တပာ်ကတီၢ်တၢ်တဲ ယဟိဝၤယွၤအဂ့ၢ်ဘၣ်. ဖဲနတဲယဟိဝၤယွၤအဂ့ၢ်အခါ ပှၤကတဲဆါနၤမ့တမ့ၢ် ကသးထီၣ်နၤလီၤ. နကမဲာ်ဆှးဒီးပျံၤတၢ်လီၤ. ဘၣ်ဆၣ်တဘၣ်ပာ်ကတီၢ်တၢ်တဲ ယဟိဝၤယွၤအဂ့ၢ်တဂ့ၤ. အဝဲကမၤစၢၤနၤထီဘိ ဒ်အမၤစၢၤ စီၤယံးရမံယၤအသိးန့ၣ်လီၤ.