ယဟိဝၤယွၤဆှၢလီၤ ဝံယံးရမံယၤ လၢကလဲၤစံၣ်တဲၤတဲလီၤတၢ်

ယဟိဝၤယွၤ ဃုထၢထီၣ်​ ယံးရမံယၤ ဒ်ဝံတဂၤလၢ ပှၤယူဒၤဖိတဖၣ်အဂီၢ်. ကစၢ်ယွၤမၢလီၤ ဝံယံးရမံယၤလၢ ကစံၣ်တဲၤတဲလီၤတၢ် ဒီးဟ့ၣ်ပလီၢ် ပှၤယူဒၤဖိတဖၣ်ဒ်သိး အတမၤတၢ်အၢတၢ်သီ လၢၤတဂ့ၤအဂီၢ်. ဝံယံးရမံယၤတဲဝဲလၢ ‘ယဟိဝၤယွၤဧၢ, ယကဲပှၤလၢ အသးစၢ်ဒံးလီၤ, ယတဲတၢ် တဘၣ်ဘၣ်.’ ယဟိဝၤယွၤ တဲဘၣ်က့ၤအီၤလၢ ‘ပျံၤတၢ်တဂ့ၤ. ယကဒုးသ့ၣ်ညါနၤ တၢ်လၢနကဘၣ်တဲ ဒီးယကမၤစၢၤနၤ.’

ယဟိဝၤယွၤတဲဘၣ်​ ဝံယံးရမံယၤလၢ ကိးဖှိၣ်ပှၤသူၣ်က့သးပှၢ်တဖၣ်​ ဒီးမၤသ့ၣ်ဖးသပၢၤလၢ အဝဲသ့ၣ်အမဲာ်ညါ. ဒီးတဲဘၣ်အဝဲသ့ၣ်လၢ ‘ဝ့ၢ်ယရူၤၡလ့ၣ်န့ၣ်​ ကဘၣ်တၢ်မၤဟးဂီၤအီၤဒ် သပၢၤတဖျၢၣ်အံၤအသိး.’ ဖဲဝံယံးရမံယၤမၤဝဲဒ် ယဟိဝၤယွၤမၢအီၤအခါ ပှၤသူၣ်က့သးပှၢ်တဖၣ်အံၤ သးပှံၢ်ထီၣ်အီၤဒိၣ်မး. ပှၤလုၢ်တၢ်အဒိၣ်တဂၤ လၢအမံၤမ့ၢ် စီၤပးၡဃူၢ်န့ၣ်​ တီၢ်ဝဲဝံယံးရမံယၤ ဒီးကျီၤဃာ်အီၤလၢ သ့ၣ်ကျီၤတဖၣ်အပူၤ. ဒီတနၤကျၢၤန့ၣ်​ ဝံယံးရမံယၤဟူးဝဲတန့ၢ်ဘၣ်. လၢခံတဂီၤ ဖဲစီၤပးၡဃူၢ် ပျၢ်ကွံာ်ဝံယံးရမံယၤအခါ အဝဲတဲဘၣ်​ ယဟိဝၤယွၤလၢ ‘ယတူၢ်တပှဲၤလၢၤဘၣ်. ယတစံၣ်တဲၤတဲလီၤတၢ်လၢၤဘၣ်.’ ဘၣ်ဆၣ်​ မ့ၢ်ဝံယံးရမံယၤပတုာ် စံၣ်တဲၤတဲလီၤတၢ် အနီၢ်ကီၢ်ဧါ. အဝဲတပတုာ်ဝဲဘၣ်. ဖဲဝံယံးရမံယၤဆိကမိၣ်ထီၣ်​ တၢ်ကစီၣ်လၢ ယဟိဝၤယွၤမၢ အစံၣ်တဲၤတဲလီၤဝဲအခါ အဝဲတဲဝဲလၢ ‘ယဟိဝၤယွၤအတၢ်ကစီၣ်အံၤ လီၤဂာ်ဒ်မ့ၣ်အူအီၣ်တၢ်လၢ ယပူၤအဃိ ယမ့ၢ်တစံၣ်တဲၤတဲလီၤတၢ်န့ၣ်​ ယအိၣ်တကဲဘၣ်.’ အဃိ ဝံယံးရမံယၤ ဆဲးဟ့ၣ်ပလီၢ်ဝဲပှၤဂီၢ်မုၢ်တဖၣ်.

နံၣ်တဖၣ်လဲၤပူၤကွံာ် ဒီးယူဒၤအစီၤပၤ ထီၣ်လၢအသီတဂၤ. ပှၤလုၢ်တၢ်အဒိၣ်​ ဒီးဝံအဘျၣ်တဖၣ်​ သးဟ့ဝဲ ဝံယံးရမံယၤအတၢ်ကစီၣ်. အဝဲသ့ၣ်တဲဘၣ်​ ပဒိၣ်ဖးဒိၣ်တဖၣ်လၢ ‘ပိာ်ခွါတဂၤအံၤ ကြၢးသံဝဲ.’ ဝံယံးရမံယၤ တဲဝဲလၢ ‘နမ့ၢ်မၤသံယၤန့ၣ်​ မ့ၢ်ဒၣ်​ နမၤသံပှၤလၢ အတၢ်ကမၣ်တအိၣ်ဘၣ်တဂၤ. ယတဲဘၣ်သု ယဟိဝၤယွၤ အတၢ်ကစီၣ်​ တမ့ၢ် ယနီၢ်ကစၢ် အတၢ်ကစီၣ်ဘၣ်.’ ဖဲပဒိၣ်ဖးဒိၣ်တဖၣ်နၢ်ဟူ ဝံယံးရမံယၤ အတၢ်ကတိၤအခါ အဝဲသ့ၣ်​ တဲဝဲလၢ ‘ပိာ်ခွါတဂၤအံၤ တကြၢးသံဘၣ်.’

ဝံယံးရမံယၤ ဆဲးစံၣ်တဲၤတဲလီၤတၢ် အဃိပဒိၣ်ဖးဒိၣ်တဖၣ်​ သးပှံၢ်ထီၣ်အီၤဒိၣ်မး. အဝဲသ့ၣ်မၢစီၤပၤမၤသံ ဝံယံးရမံယၤ. စီၤပၤဟ့ၣ်အခွဲးလၢ အဝဲသ့ၣ်ကမၤဝဲ ဝံယံးရမံယၤ ဖဲအဝဲသ့ၣ်အဲၣ်ဒိးမၤဝဲ. အဃိ အဝဲသ့ၣ်ဖီၣ်န့ၢ် ဝံယံးရမံယၤ ဒီးစဲၤလီၤအီၤလၢ တၢ်ပူၤဖးယိာ် လၢအအိၣ်ဒီးကပံာ်. ဒီးအဝဲသ့ၣ်​ မုၢ်လၢ်ဝဲလၢ ဝံယံးရမံယၤ ကသံဝဲဖဲန့ၣ်. ဝံယံးရမံယၤ လီၤဘျၢလၢ ကပံာ်ကျါ.

ဝံၤဒီး ပဒိၣ်တဂၤ လၢအမံၤမ့ၢ် စီၤဧ့ၤဘ့းမ့လ့းန့ၣ်​ အဝဲတဲဘၣ်ဝဲစီၤပၤလၢ ‘ပဒိၣ်ဖးဒိၣ်တဖၣ်​ ထၢနုာ် ဝံယံးရမံယၤ လၢထံကမျၢပူၤ. ပမ့ၢ်တထုးထီၣ်က့ၤအီၤဘၣ်န့ၣ်​ အကသံဝဲဖဲန့ၣ်.’ ဒီးစီၤပၤမၢ စီၤဧ့ၤဘ့းမ့လ့း ကိးထီၣ်ပှၤပိာ်ခွါအဂၤ ၃၀ ဒီးလဲၤထုးထီၣ်ကွံာ် ဝံယံးရမံယၤ လၢထံကမျၢပူၤ. ဝံယံးရမံယၤန့ၣ်​ အတပျဲလၢ ပှၤကပတုာ်အီၤလၢ ကစံၣ်တဲၤတဲလီၤတၢ်ဘၣ်. အဃိ ပကြၢးကွၢ်လိအီၤ.