တၢ်မၤလိ ၉
ဖိခွါတဂၤအိၣ်ဖျဲၣ်ထီၣ်လံ
စီၤအၤဘြၤဟၣ် ဒီးနီၢ်စၤရါ ဖျီအသး အိၣ်လံအနံၣ်ဖးယံာ်လံ. အဝဲသ့ၣ်ပာ်တ့ၢ်ကွံာ် အဟံၣ်လၢ ဝ့ၢ်အူၢ်အပူၤ ဒီးဘၣ်အိၣ်ဝဲလၢဒဲပူၤ. ဘၣ်ဆၣ် မ့ၢ်လၢနီၢ်စၤရါနာ်န့ၢ် ယဟိဝၤယွၤအဃိ အဝဲ တကဒူးကဒ့ၣ်တၢ်ဘၣ်.
နီၢ်စၤရါ သးလီဝဲအဖိအဃိ အဝဲတဲဘၣ် စီၤအၤဘြၤဟၣ်လၢ ‘ယကုၢ်မုၣ်နီၢ်ဟၤကၢ် မ့ၢ်အိၣ်ဖျဲၣ်ထီၣ်အဖိတဂၤန့ၣ် ကလီၤဂာ်ဒ် ယဖိအိၣ်ဝဲအသိးလီၤ.’ လၢခံန့ၣ် နီၢ်ဟၤကၢ်အိၣ်ဖျဲၣ်ထီၣ်ဝဲ အဖိခွါတဂၤ. ဒီးဖိသၣ်အံၤ အမံၤမ့ၢ်ဝဲ စီၤယံးၡမၤဧ့လး.
တၢ်ဆၢကတီၢ်ပူၤကွံာ် အါနံၣ်ဝံၤအလီၢ်ခံ ဖဲစီၤအၤဘြၤဟၣ် အသးအိၣ်ဝဲ ၉၉ နံၣ် ဒီးနီၢ်စၤရါ အသးနံၣ်အိၣ်ဝဲ ၈၉ နံၣ်အခါ ပှၤတမှံၤသၢဂၤ ဟဲအိၣ်သကိးအဝဲသ့ၣ်. စီၤအၤဘြၤဟၣ် တူၢ်လိာ်မုာ် ပှၤတမှံၤသၢဂၤအံၤလၢ ကအိၣ်ဘှံးလၢ သ့ၣ်ဖီလာ် ဒီးဒုးအီၣ်အဝဲသ့ၣ် တၢ်အီၣ်. ပှၤတမှံၤသၢဂၤအံၤ မ့ၢ်မတၤတဖၣ်လဲၣ်, မ့ၢ်နသ့ၣ်ညါဧါ. အဝဲသ့ၣ် မ့ၢ်မူခိၣ်ကလူးတဖၣ်. အဝဲသ့ၣ် တဲဘၣ်စီၤအၤဘြၤဟၣ်လၢ ‘လၢခံတနံၣ် ဖဲတၢ်ဆၢကတီၢ် အဝဲအံၤန့ၣ် နမါကအိၣ်ဖျဲၣ်ထီၣ်ဝဲ ဖိခွါတဂၤ.’ နီၢ်စၤရါအိၣ်လၢ ဒဲပူၤဒီး နၢ်ဟူဝဲတၢ်ကတိၤအံၤ. ဖဲန့ၣ်အခါ နီၢ်စၤရါနံၤထီၣ်ဝဲလၢ အသးပူၤ ဒီးဆိကမိၣ်ဝဲလၢ– ‘ယသးပှၢ်ဖးဒိၣ်လံအဃိ ယအိၣ်ဖျဲၣ်ထီၣ်ဖိ ကသ့ဒံးဧါ.’
လၢခံတနံၣ်န့ၣ် နီၢ်စၤရါ အိၣ်ဖျဲၣ်ထီၣ်ဝဲ အဖိခွါတဂၤ ဒ်ယဟိဝၤယွၤ အမူခိၣ်ကလူး အၢၣ်လီၤအီလီၤတ့ၢ်ဝဲအသိး. စီၤအၤဘြၤဟၣ် ယုၢ်န့ၢ်ဝဲ အဖိခွါအမံၤလၢ စီၤအံၤစဲးလီၤ. အမံၤအခီပညီမ့ၢ်ဝဲ “တၢ်နံၤ.”
ဖဲစီၤအံၤစဲး အိၣ်ဝဲယဲၢ်နံၣ်ဃၣ်ဃၣ်အခါ နီၢ်စၤရါထံၣ်ဘၣ်ဝဲလၢ စီၤယံးၡမၤဧ့လး ဒုၣ်ဒွဲၣ် စီၤအံၤစဲး. မ့ၢ်လၢနီၢ်စၤရါအဲၣ်ဒိး ဒီသဒၢအဖိခွါအဃိ အဝဲမၢစီၤအၤဘြၤဟၣ် နီဟးထီၣ်ကွံာ် နီၢ်ဟၤကၢ် ဒီးစီၤယံးၡမၤဧ့လး. အဆိကတၢၢ်န့ၣ် စီၤအၤဘြၤဟၣ်တအဲၣ်ဒိး မၤဝဲဒ်နီၢ်စၤရါ တဲအီၤအသိးဘၣ်. ဘၣ်ဆၣ် ယဟိဝၤယွၤတဲဘၣ်စီၤအၤဘြၤဟၣ်လၢ ‘မၤဒ်သိး နီၢ်စၤရါ တဲဘၣ်နၤ. ယကကွၢ်ထွဲ စီၤယံးၡမၤဧ့လးလီၤ. မ့မ့ၢ် ယတၢ်အၢၣ်လီၤအီလီၤဒီးနၤန့ၣ် ကဟဲလၢထီၣ်ပှဲၤထီၣ်ခီဖျိလၢ နဖိခွါစီၤအံၤစဲးလီၤ.’
“နီၢ်စၤရါ . . . နာ်ဝဲလၢ ပှၤလၢ အအၢၣ်လီၤအီလီၤတၢ်တဂၤန့ၣ် မ့ၢ်ပှၤလၢအတီအဃိ အဒိးန့ၢ်ဘၣ် တၢ်စိတၢ်ကမီၤလၢ အကဒၢထီၣ်လီၤ.”—ဧ့ၤဘြံၤ ၁၁:၁၁