တၢ်မၤလိ ၁၁
တၢ်မၤကွၢ်စီၤအၤဘြၤဟၣ်အတၢ်နာ်
စီၤအၤဘြၤဟၣ် သိၣ်လိအဖိခွါ စီၤအံၤစဲး လၢကအဲၣ်ယဟိဝၤယွၤ ဒီးနာ်န့ၢ်ယဟိဝၤယွၤ အတၢ်အၢၣ်လီၤအီလီၤခဲလၢာ်. ဘၣ်ဆၣ် ဖဲစီၤအံၤစဲးအိၣ် ၂၅ နံၣ်ဃၣ်ဃၣ်အခါ ယဟိဝၤယွၤ မၢစီၤအၤဘြၤဟၣ် မၤတၢ်တမံၤမံၤလၢ အကီလၢအဂီၢ်. စီၤအၤဘြၤဟၣ် ကဘၣ်မၤဝဲ တၢ်မနုၤလဲၣ်.
ကစၢ်ယွၤတဲဘၣ် စီၤအၤဘြၤဟၣ်လၢ ‘လဲၤကိးနဖိခွါစီၤအံၤစဲးဆူ ကီၢ်မိၤရံယၤ အကစၢၢ်ခိၣ် ဒီးလုၢ်ထီၣ်အီၤဖဲန့ၣ်.’ ဘၣ်မနုၤအဃိ ယဟိဝၤယွၤမၢစီၤအၤဘြၤဟၣ် ဟ့ၣ်လုၢ်ထီၣ်အဖိခွါလဲၣ်န့ၣ် စီၤအၤဘြၤဟၣ် တနၢ်ပၢၢ်ဝဲဘၣ်. ဘၣ်ဆၣ် အဝဲဒိကနၣ်ဝဲ ယဟိဝၤယွၤအကလုၢ်.
လၢခံတနံၤ မုၢ်ဝါထီၣ်ဂီၤဂီၤန့ၣ် စီၤအၤဘြၤဟၣ် ကိးထီၣ်စီၤအံၤစဲးဃုာ်ဒီး အခ့အပှၤခံဂၤ ဒီးလဲၤဝဲဆူကီၢ်မိၤရံယၤ. သၢသီဝံၤအလီၢ်ခံန့ၣ် အဝဲသ့ၣ်ထံၣ်စိဝဲကစၢၢ်. စီၤအၤဘြၤဟၣ် တဲဘၣ်အခ့အပှၤလၢ အိၣ်ခိးဖဲအံၤ, မ့မ့ၢ်ယၤဒီးယဖိခွါစီၤအံၤစဲး ကလဲၤလုၢ်ထီၣ်တၢ်. စီၤအၤဘြၤဟၣ် မၢစီၤအံၤစဲး လဲၤစိာ်သ့ၣ်မုၣ်, မ့မ့ၢ်စီၤအၤဘြၤဟၣ်န့ၣ် လဲၤစိာ်ဝဲဒီ. ဒီးစီၤအံၤစဲး သံကွၢ်အပၢ်လၢ ‘ဆၣ်ဖိကီၢ်ဖိလၢ ပကလုၢ်ထီၣ်တၢ်အဂီၢ်န့ၣ် အိၣ်ဖဲလဲၣ်.’ စီၤအၤဘြၤဟၣ် စံးဆၢက့ၤအီၤလၢ ‘ယဖိခွါဧၢ, ယဟိဝၤယွၤ ကကတဲာ်ကတီၤန့ၢ်ပှၤ.’
ဖဲအဝဲသ့ၣ် လဲၤတုၤလၢကစၢၢ်ခိၣ်အခါ တ့ထီၣ်ဝဲတၢ်လုၢ်လီၢ်လီၤ. ဝံၤဒီး စီၤအၤဘြၤဟၣ်စၢထီၣ် စီၤအံၤစဲးအစုဒီးအခီၣ် ဒီးပာ်ထီၣ်အီၤလၢတၢ်လုၢ်လီၢ်အဖီခိၣ်.
ဖဲစီၤအၤဘြၤဟၣ် ဟံးထီၣ်အဒီအဆၢကတီၢ်န့ၣ် ယဟိဝၤယွၤ အမူခိၣ်ကလူး အကလုၢ်သီၣ်ထီၣ် လၢမူခိၣ်. ဒီးစံးဝဲလၢ ‘စီၤအၤဘြၤဟၣ်ဧၢ, မၤဘၣ်ဒိဖိသၣ်တဂ့ၤ. ခဲအံၤ ယသ့ၣ်ညါလၢ နနာ်ကစၢ်ယွၤ, မ့ၢ်လၢနသးအိၣ်ဟ့ၣ်လုၢ်ထီၣ် နဖိခွါအဃိလီၤ.’ ဝံၤဒီး စီၤအၤဘြၤဟၣ်ထံၣ်ဝဲ သိဖါတဒုအနၢၤဘျးထီဒီး တပှီာ်အဒ့. စီၤအၤဘြၤဟၣ် ဃဲၣ်လီၤကွံာ် ပျံၤလၢစီၤအံၤစဲးအစုဒီးအခီၣ်လိၤ ဒီးလုၢ်ထီၣ်ဝဲသိဖါလၢ စီၤအံၤစဲးအလီၢ်.
စးထီၣ်ဖဲနံၤဝဲန့ၣ် ယဟိဝၤယွၤ ကိးစီၤအၤဘြၤဟၣ်လၢ အတံၤသကိး. ဘၣ်မနုၤအဃိလဲၣ်န့ၣ် မ့ၢ်နသ့ၣ်ညါဧါ. ကယဲၢ်တၢ်လၢ ယဟိဝၤယွၤမၢ စီၤအၤဘြၤဟၣ်မၤဝဲန့ၣ် အဝဲမ့ၢ်တနၢ်ပၢၢ်ဝဲ လီၤတံၢ်လီၤဆဲး သနာ်က့ အဝဲမၤဝဲ.
ယဟိဝၤယွၤ တဲဘၣ်ကဒီး စီၤအၤဘြၤဟၣ်လၢ အတၢ်အၢၣ်လီၤအီလီၤ. ကစၢ်ယွၤတဲဝဲလၢ ‘ယကဆိၣ်ဂ့ၤနၤ, ဒီးယကဒုးအါထီၣ်နဖိနလံၤ မ့တမ့ၢ် နချံနသၣ်.’ ကစၢ်ယွၤ အတၢ်ကတိၤအံၤ အဲၣ်ဒိးတဲဝဲ အခီပညီလၢ ယဟိဝၤယွၤ ကဆိၣ်ဂ့ၤ ပှၤလၢအဂ့ၤခဲလၢာ် ခီဖျိလၢစီၤအၤဘြၤဟၣ် အဟံၣ်ဖိဃီဖိ.
“ကစၢ်ယွၤအဲၣ် ပှၤဟီၣ်ခိၣ်ဖိ ဒိၣ်မးတုၤလၢ အဟ့ၣ်လီၤကွံာ်ဝဲ အဖိခွါနီၢ်နီၢ် ထဲတဂၤဧိၤ ဒ်သိး ပှၤလၢ အစူၢ်က့ၤနာ်က့ၤအီၤန့ၣ် အသုတတုၤလၢ တၢ်ဟးဂီၤတဂ့ၤ ဒီးကန့ၢ်ဘၣ် တၢ်မူအထူအယိာ် ကိးဂၤဒဲးအဂီၢ်လီၤ.”—ယိၤဟၣ် ၃:၁၆