တၢ်မၤလိ ၂၀
တၢ်နးတၢ်ဖှီၣ်လၢအဂၤဃုခါ
ကစၢ်ယွၤမၢ စီၤမိၤၡ့ဒီးစီၤအၤဟရိၣ် လဲၤတဲဘၣ်စီၤပၤဖၤရိၤလၢ ‘နမ့ၢ်တပျဲ လဲၤယပှၤဂီၢ်မုၢ်န့ၣ် ယကဒုးလီၤ ပကိာ်ဃၢ်လၢ ကီၢ်အဲၤကူပတူးအပူၤ.’ ပကိာ်ဃၢ်န့ၣ်မ့ၢ်ဝဲ သၣ်ဘုလါတကလုာ်လၢ အအ့ၣ်ပှၤကညီ. ပကိာ်ဃၢ်တဖၣ်အံၤ လဲၤနုာ်လီၤဆူ ပှၤအဲၤကူပတူးဖိလၢ အကဲဒိၣ်မ့ၢ်ဂ့ၤ အဖှီၣ်မ့ၢ်ဂ့ၤ အဟံၣ်ပူၤ. ဒီးအိၣ်ဝဲလၢ ကီၢ်အဲၤကူပတူးဒီကီၢ်ညါ. ဘၣ်ဆၣ် ပကိာ်ဃၢ်တဖၣ်အံၤ တအိၣ်ထီၣ်ဝဲလၢ ကီၢ်ကိၡ့ၣ်လၢ ပှၤအံၣ်စရ့လးဖိ အိၣ်ဝဲအလီၢ်ဘၣ်. စးထီၣ်လၢ တၢ်နးတၢ်ဖှီၣ် လွံၢ်ခါတခါ တုၤလၢတၢ်နးတၢ်ဖှီၣ်အလီၢ်ခံကတၢၢ်တခါန့ၣ် ဘၣ်ဝဲထဲ ပှၤအဲၤကူပတူးဖိတဖၣ်. အဃိ စီၤပၤဖၤရိၤတဲဝဲလၢ ‘ဃ့ကညး ယဟိဝၤယွၤလၢ ကမၤလီၤမၢ်ကွံာ် တၢ်ဖိဃၢ်တဖၣ်အံၤမီၤ. ကစၢ်ယွၤ မ့ၢ်မၤလီၤမၢ်ကွံာ်ဝဲန့ၣ် ယကပျဲလဲၤပှၤအံၣ်စရ့လးဖိ.’ ဘၣ်ဆၣ် ဖဲယဟိဝၤယွၤ မၤလီၤမၢ်ကွံာ် ပကိာ်ဃၢ်တဖၣ်အံၤအခါ စီၤပၤဖၤရိၤ အသးဆီတလဲဝဲ. မ့ၢ်စီၤပၤဖၤရိၤ ကမၤန့ၢ်တၢ်မၤလိ တဘျီဘျီဧါ.
ယဟိဝၤယွၤတဲဘၣ် စီၤမိၤၡ့လၢ ‘စီၤပၤဖၤရိၤ မ့ၢ်တပျဲ ယပှၤဂီၢ်မုၢ်န့ၣ် ပှၤအဲၤကူပတူးဖိ အဆၣ်ဖိကီၢ်ဖိတဖၣ် ကဆိးက့ ဒီးကသံဝဲလီၤ.’ လၢခံတနံၤ ပှၤအဲၤကူပတူးဖိအဆၣ်ဖိကီၢ်ဖိသံဝဲ. ဘၣ်ဆၣ် မ့မ့ၢ်ပှၤအံၣ်စရ့လးဖိတခီ အဆၣ်ဖိကီၢ်ဖိ တသံဝဲဘၣ်. ဘၣ်ဆၣ် စီၤပၤဖၤရိၤ တသးအိၣ်ပျၢ်ကွံာ် ကစၢ်ယွၤ အပှၤဂီၢ်မုၢ်ဒံးဘၣ်.
ဝံၤဒီး ယဟိဝၤယွၤ မၢဝဲစီၤမိၤၡ့ လဲၤကဒီးဆူ စီၤပၤဖၤရိၤအအိၣ် ဒီးဖှံထီၣ် ဖၣ်ဆါကမူၣ်လၢ ကလံၤကျါ. ဖၣ်ဆါကမူၣ်အံၤ ကဲထီၣ်တၢ်ကမူၣ်လၢ ကလံၤကျါ ဒီးလီၤဘၣ်ဝဲလၢ ပှၤအဲၤကူပတူးဖိတဖၣ်အလိၤ. တၢ်ကမူၣ်အံၤ ဒုးအိၣ်ထီၣ်ဝဲ တၢ်ဝ့လၢ ပှၤအဲၤကူပတူးဖိအလိၤ ဒီးလၢအဆၣ်ဖိကီၢ်ဖိအလိၤ. ဘၣ်ဆၣ် စီၤပၤဖၤရိၤ တပျၢ်ကွံာ် ပှၤအံၣ်စရ့လးဖိဒံးဘၣ်.
ယဟိဝၤယွၤ မၢလီၤကဒီး စီၤမိၤၡ့ ဒ်သိးကလဲၤတဲဘၣ် စီၤပၤဖၤရိၤလၢ တၢ်ကစီၣ်အဂီၢ်. စီၤမိၤၡ့ တဲဘၣ်စီၤပၤဖၤရိၤလၢ ‘ခီဖျိလၢ နတပျၢ် ယပှၤဂီၢ်မုၢ်ဒံးဘၣ် အဃိ ခဲမုၢ်ဆ့ၣ် သူၣ်ကလီၤတဲာ်လၢ ထံကီၢ်အပူၤ.’ လၢခံတနံၤန့ၣ် ယဟိဝၤယွၤ ဒုးလီၤဝဲသူၣ်, လီဖျးတၢ်ဒီးမ့ၣ်အူ. ကလံၤမုၢ်လၢ အဟဲဆူၣ် ထဲအံၤန့ၣ် ပှၤအဲၤကူပတူးဖိတဖၣ် တထံၣ်ဘၣ်ဝဲ နီတဘျီဘၣ်. သ့ၣ်ထူၣ် ဒီးတၢ်မုၢ်တၢ်ဘိတဖၣ် ဟးဂီၤကွံာ်ဝဲခဲလၢာ်. ဘၣ်ဆၣ် လၢကီၢ်ကိၡ့ၣ်အပူၤန့ၣ် သ့ၣ်ထူၣ် ဒီးတၢ်မုၢ်တၢ်ဘိတဖၣ် တဟးဂီၤဝဲဘၣ်. ဒီးစီၤပၤဖၤရိၤတဲစီၤမိၤၡ့လၢ ‘ဃ့ကညး ယဟိဝၤယွၤလၢ ကမၤပတုာ်ကွံာ် တၢ်နးတၢ်ဖှီၣ်တခါအံၤ ဒီးယကပျဲလဲၤသု.’ ဘၣ်ဆၣ် ဖဲသူၣ်ဒီးမူခိၣ်စူၤပတုာ်ကွံာ်ဝဲအခါ စီၤပၤဖၤရိၤအသးဆီတလဲဝဲ.
လၢခံ စီၤမိၤၡ့တဲဘၣ် စီၤပၤဖၤရိၤလၢ ‘တၢ်မုၢ်တၢ်ဘိလၢ အအိၣ်တ့ၢ်ဖဲ ကလံၤမုၢ် လီၤဝံၤအလီၢ်ခံန့ၣ် ဒွဲၣ်တဖၣ် ကအီၣ်ကွံာ်ဝဲ ခဲလၢာ်.’ ဒွဲၣ်လၢ အကကွဲၢ်တဖၣ် အီၣ်ကွံာ်ဝဲသ့ၣ်ထူၣ် ဒီးတၢ်မုၢ်တၢ်ဘိလၢ အအိၣ်တ့ၢ်လၢ စံာ်ပျီအပူၤခဲလၢာ်. ဒီးစီၤပၤဖၤရိၤ တဲဝဲလၢ ‘ဃ့ကညး ယဟိဝၤယွၤလၢ ကမၤလီၤမၢ်ကွံာ် ဒွဲၣ်တဖၣ်အံၤမီၤ.’ ဒီးယဟိဝၤယွၤ မၤလီၤမၢ်ကွံာ် ဒွဲၣ်တဖၣ်အံၤ. ဘၣ်ဆၣ် ဖဲကစၢ်ယွၤ မၤလီၤမၢ်ကွံာ်ဝဲ ဝံၤအလီၢ်ခံန့ၣ် စီၤပၤဖၤရိၤ တပျဲလဲၤ ပှၤအံၣ်စရ့လးဖိဒံးဘၣ်.
ယဟိဝၤယွၤ တဲဘၣ်ကဒီး စီၤမိၤၡ့လၢ ‘ယူာ်ထီၣ်နစု ဆူမူခိၣ်.’ တဘျီဃီန့ၣ် တၢ်ခံးလီၤဝဲလၢ ကီၢ်အဲၤကူပတူးအပူၤ သၢသီ. ဖဲန့ၣ်အခါ ပှၤအဲၤကူပတူးဖိတဖၣ် ကွၢ်တၢ်တဖျါ နီတမံၤလၢၤဘၣ်. မ့မ့ၢ်လၢ ပှၤအံၣ်စရ့လးဖိတဖၣ် အိၣ်တၢ်လီၢ်န့ၣ် တၢ်ကပီၤဝဲ.
စီၤပၤဖၤရိၤတဲဘၣ် စီၤမိၤၡ့လၢ ‘နၤဒီးပှၤအံၣ်စရ့လးဖိတဖၣ် လဲၤသ့လံ. ဘၣ်ဆၣ် ပာ်တ့ၢ် သုဆၣ်ဖိကီၢ်ဖိ.’ စီၤမိၤၡ့ တဲဆၢအီၤလၢ ‘ပကဘၣ်လဲၤစိာ် ပဆၣ်ဖိကီၢ်ဖိတဖၣ် ဒ်သိး ပကလုၢ်ထီၣ်တၢ်လၢ ပကစၢ်ယွၤအအိၣ်လီၤသၢၤ.’ စီၤပၤဖၤရိၤ သးပှံၢ်ထီၣ်တၢ် ဒိၣ်မး. ဒီးအဝဲကိးဃါတၢ် ဒီးတဲဝဲလၢ ‘ဟးထီၣ်ကွံာ်လၢ ယမဲာ်ညါခဲအံၤ. လၢခံတဘျီ ယမ့ၢ်ထံၣ်နၤန့ၣ် ယကမၤသံနၤလီၤ.’
“သုကထံၣ်ဘၣ်ကဒီးလၢ ပှၤတီပှၤလိၤ ဒီးပှၤအၢပှၤသီန့ၣ် လီၤဆီလိာ်သးဒ်လဲၣ် ဒီးပှၤလၢအမၤ ကစၢ်ယွၤအတၢ် ဒီးပှၤလၢအတမၤ ကစၢ်ယွၤအတၢ်ဘၣ်န့ၣ် လီၤဆီလိာ်သးဒ်လဲၣ်န့ၣ်လီၤ.”—မၤလကံ ၃:၁၈