မိၤၡ့ဒီးအၤဟရိၣ် လဲၤထံၣ်ဖၤရိၤ အဂ့ၢ်

ဖဲမိၤၡ့က့ၤတုၤလၢ ကီၢ်အဲၤကူပတူးအခါ တဲဘၣ်က့ၤ ကယဲၢ်တၢ်လီၤလးလၢ အထံၣ်ဘၣ်တ့ၢ်ဝဲ ဆူအဝဲၢ်အၤဟရိၣ်န့ၣ်လီၤ. ဖဲမိၤၡ့ဒီးအၤဟရိၣ် ပာ်ဖျါထီၣ်တၢ်လီၤလးတဖၣ်လၢ အံၣ်စရ့လးဖိအမဲာ်ညါအခါ ပှၤဂီၢ်မုၢ်န့ၣ် နာ်ဝဲသ့ၣ်လၢ ယဟိဝၤအိၣ်ဒီးအဝဲခံဂၤန့ၣ်လီၤ.

လၢတၢ်န့ၣ်အလီၢ်ခံ, မိၤၡ့ဒီးအၤဟရိၣ် လဲၤဆူဖၤရိၤအအိၣ်လီၤ. စံးဝဲသ့ၣ်ဖၤရိၤလၢ, ​‘အံၣ်စရ့လးအယွၤ ယဟိဝၤစံးဝဲဒၣ် ဒ်သိးယပှၤတဖၣ် ကဘူၣ်ထီၣ်ဘါထီၣ်ယၤလၢပှၢ်လၢ်ကျါအဂီၢ် ပျၢ်လီၤအီၤသၢသီတက့ၢ်’ န့ၣ်လီၤ. ဘၣ်ဆၣ်ဖၤရိၤစံး ‘ယတနာ်ယဟိဝၤဘၣ်. ယပျၢ်ပှၤအံၣ်စရ့လးဖိတကဲဘၣ်’ န့ၣ်လီၤ.

အံၤစရ့လးဖိတဖၣ်န့ၣ် လၢကဘူၣ်ထီၣ်ဘါထီၣ်ယဟိဝၤအဂီၢ် အဲၣ်ဒိးအိၣ်ဘှံးဝဲလၢတၢ်မၤအဃိ ဖၤရိၤသးထီၣ်ဝဲသၢၣ်. လၢတၢ်န့ၣ်အဃိ ဒုးမၤဝဲတၢ်မၤဆူၣ်န့ၣ်အလီၢ်န့ၣ်လီၤ. အံၣ်စရ့လးဖိတဖၣ်န့ၣ် တူၢ်ဘၣ်ဝဲသ့ၣ်တၢ်ဒ်အံၤနးမးအဃိ ပာ်တၢ်ကမၣ်လၢမိၤၡ့အလိၤ န့ၣ်လီၤ. မိၤၡ့စ့ၢ်ကီး အသးတမုာ်ဝဲဒိၣ်နးမးန့ၣ်လီၤ. ဘၣ်ဆၣ်, ယဟိဝၤစံးဘၣ်အီၤလၢ အသးသုတကိၣ်တဂ့ၤလီၤ. ယဟိဝၤစံးဝဲလၢ ‘ယကမၤဖၤရိၤတုၤအပျၢ်ယပှၤန့ၣ်လီၤ.’

တုၤနုၤတစု, မိၤၡ့ဒီးအၤဟရိၣ်လဲၤထံၣ်ဖၤရိၤ ကဒီးတဘျီန့ၣ်လီၤ. မ့မ့ၢ်တဘျီညါအံၤ ပာ်ဖျါထီၣ်တၢ်လီၤလးတခါန့ၣ်လီၤ. အၤဟရိၣ်တ့ၢ်လီၤဝဲ အနီၢ်ထိးဘိဆူတၢ်ဖီလာ်အခါ နီၣ်ထိးဘိကဲထီၣ်ဂုၢ်ဖးဒိၣ်လီၤ. ဘၣ်ဆၣ် ဖၤရိၣ်အပှၤကူၣ်ဘၣ်ကူၣ်သ့တဖၣ်စ့ၢ်ကီး တ့ၢ်လီၤအနီၣ်ထိးဘိတဖၣ်ဆူဟီၣ်ခိၣ်ဒီး ကဲထီၣ် ဂုၢ်သ့ၣ်တဖၣ်လီၤ. ဘၣ်ဆၣ်, ကွၢ်တဘီ, အၤဟရိၣ်အဂုၢ်ဖးဒိၣ်န့ၣ် ယူၢ်လီၤကွံာ်ဝဲ ပှၤကူၣ်ဘၣ်ကူၣ်သ့တဖၣ် အဂုၢ်သ့ၣ်တဖၣ်န့ၣ်လီၤ. တၢ်န့ၣ်ဒၣ်လဲာ် ဖၤရိၤတပျၢ်ပှၤအံၣ်စရ့လးဖိသ့ၣ်တဖၣ်ဒံးဘၣ်.

လၢတၢ်န့ၣ်အဃိ တၢ်ဆၢကတီၢ်ဟဲတုၤဝဲလၢ ယဟိဝၤကဘၣ်ဟ့ၣ်ဖၤရိၣ် တၢ်မၤလိန့ၣ်လီၤ. ယဟိဝၤမၤဒ်လဲၣ် နသ့ၣ်ညါဧါ. ဒုးဟဲလီၤဝဲ တၢ်နးတၢ်ဖှီၣ်အခါ ၁၀ လၢအဲၤကူပတူးအဖီခိၣ်န့ၣ်လီၤ.

ဖဲတၢ်နးတၢ်ဖှီၣ်ဖးဒိၣ်တဘျုးခါ ကဲထီၣ်အလီၢ်ခံန့ၣ် ဖၤရိၤကိးမိၤၡ့ ဒီးစံးဘၣ်အီၤလၢ, ‘ဒုးအိၣ်ကတီၢ် တၢ်နးတၢ်ဖှီၣ်န့ၣ်တက့ၢ်. ယကပျၢ်ပှၤအံၣ်စရ့လးဖိတဖၣ်န့ၣ်လီၤ.’ ဘၣ်ဆၣ် တၢ်နးတၢ်ဖှီၣ်အိၣ်ပတုာ်ဒီး ဖၤရိၤအသးဆီတလဲဝဲဒၣ်လီၤ. တပျၢ်ပှၤတဖၣ်ဘၣ်. သနာ်က့ တၢ်နးတၢ်ဖှီၣ်အနီၢ်ဂံၢ်တဆံ ကဲထီၣ်အလီၢ်ခံန့ၣ် ဖၤရိၤဘၣ်ပျၢ် ပှၤအံၣ်စရ့လးဖိတဖၣ်လီၤ.

တၢ်နးတၢ်ဖှီၣ်အခါ ၁၀ မ့ၢ်မနုၤတဖၣ်လဲၣ်နသ့ၣ်ညါဧါ. အိးထီၣ်လၢခံတကဘျံးတက့ၢ်. ပကကွၢ်သကိးဘီၣ်.