တၢ်မၤလိ ၂၁
တၢ်နးတၢ်ဖှီၣ်လၢခံကတၢၢ်တခါ
စီၤမိၤၡ့အၢၣ်လီၤဝဲ စီၤပၤဖၤရိၤလၢ အတဟဲ ထံၣ်လိာ်အသးဒီးအီၤလၢၤဘၣ်. ဘၣ်ဆၣ် တချုးလၢ စီၤမိၤၡ့ဟးထီၣ်ကွံာ်န့ၣ် အဝဲတဲဘၣ် စီၤပၤဖၤရိၤလၢ ‘ဖဲဖးဖီမုၢ်န့ၣ် ကယဲၢ်ပှၤအဲၤကူပတူး အဖိဝဲၢ်ကိ စးထီၣ်လၢ စီၤပၤဖၤရိၤ အဖိဝဲၢ်ကိ တုၤလီၤလၢ အကုၢ်အဖိဝဲၢ်ကိန့ၣ် ကသံဝဲခဲလၢာ်.’
ယဟိဝၤယွၤတဲဘၣ် ပှၤအံၣ်စရ့လးဖိတဖၣ်လၢ အဝဲသ့ၣ် ကဘၣ်မၤဝဲ တၢ်အီၣ်လီၤဆီတခါ. ကစၢ်ယွၤ တဲဘၣ်အဝဲသ့ၣ်လၢ ‘မၤသံသိ မ့တမ့ၢ် မဲာ်တဲးလဲးလၢအသးအိၣ်တနံၣ် ဒီးအသွံၣ်န့ၣ် ဖှူအီၤလၢ ကျဲစၢၤအခိၣ်ထိး. မ့မ့ၢ်အညၣ်န့ၣ် ကၣ်မံအီၤ, ဝံၤဒီးအီၣ်အီၤဃုာ်ဒီး ကိၣ်လၢတပၣ်ဃုာ်ဒီးကိၣ်မံၣ်. ဒီးကူထီၣ်သိးထီၣ်ပာ်စၢၤ သုကူသုကၤ, ဒိးထီၣ်ပာ်စၢၤ သုခီၣ်ဖံး ဒီးအိၣ်ကတဲာ်ကတီၤထီၣ်ပာ်စၢၤ သုသးလၢ သုကဟးထီၣ် အဂီၢ်. တနၤအံၤ ယကမၤပူၤဖျဲးသု.’ ပှၤအံၣ်စရ့လးဖိတဖၣ် ကသးခုဝဲထဲလဲၣ်န့ၣ် နဆိကမိၣ်ကွၢ်သ့ဝဲ.
ဖဲဖးဖီမုၢ် အဆၢကတီၢ်န့ၣ် ယဟိဝၤယွၤ အမူခိၣ်ကလူး လဲၤဝဲဆူ ကယဲၢ်ဟံၣ်လၢ အအိၣ်လၢ ကီၢ်အဲၤကူပတူးအပူၤ ကိးဖျၢၣ်ဒဲး. ဟံၣ်လၢအကျဲစၢၤ မ့ၢ်တဖှူအသးဒီး တၢ်သွံၣ်န့ၣ် အဖိခွါဝဲၢ်ကိ ဘၣ်တၢ်မၤသံအီၤ. ဘၣ်ဆၣ် ဟံၣ်လၢအကျဲစၢၤအိၣ်ဒီး တၢ်သွံၣ်န့ၣ် မူခိၣ်ကလူး လဲၤကပာ်ကွံာ်ဝဲ. ကယဲၢ်ပှၤအဲၤကူပတူးဖိလၢ အကဲဒိၣ်မ့ၢ်ဂ့ၤ အဖှီၣ်မ့ၢ်ဂ့ၤ အဖိဝဲၢ်ကိန့ၣ် ဘၣ်တၢ်မၤသံကွံာ်ဝဲခဲလၢာ်. မ့မ့ၢ်ပှၤအံၣ်စရ့လး အဖိဝဲၢ်ကိန့ၣ် တသံဝဲ နီတဂၤဘၣ်.
စီၤပၤဖၤရိၤ အဖိဝဲၢ်ကိဒၣ်လဲာ် သံဝဲအဃိ အဝဲတူၢ်ဝဲ တပှဲၤလၢၤဘၣ်. အဃိ တဘျီဃီန့ၣ် အဝဲတဲဘၣ် စီၤမိၤၡ့ ဒီးစီၤအၤဟရိၣ်လၢ ‘ဂဲၤဆၢထၢၣ်, ဟးထီၣ်ကွံာ်လၢ ယပှၤဂီၢ်မုၢ်အကျါ, ကိးထီၣ်သုဆၣ်ဖိကီၢ်ဖိ ဒီးလဲၤဘူၣ်ထီၣ်ဘါထီၣ်သုယွၤ.’
ဖဲလါပှဲၤအနၤအံၤ ပှၤအံၣ်စရ့လးဖိတဖၣ် ဟးထီၣ်ကွံာ်လၢ ကီၢ်အဲၤကူပတူးအပူၤ တဒူၣ်ဘၣ်တဒူၣ်. ပှၤအံၣ်စရ့လးဖိလၢ အဟးထီၣ်ကွံာ်န့ၣ် ပၣ်ဃုာ်ဒီးဖိဒံဖိသၣ်တဖၣ်, ပိာ်မုၣ်တဖၣ် ဒီးပိာ်ခွါတဖၣ်. ထဲပှၤပိာ်ခွါတဖၣ်န့ၣ် အနီၣ်ဂံၢ်အိၣ်ဝဲ ၆၀၀,၀၀၀. တကးဒံးဘၣ် ပှၤအါဂၤလၢ အတမ့ၢ် ပှၤအံၣ်စရ့လးဖိတဖၣ်န့ၣ် လဲၤပိာ်ဝဲ ပှၤအံၣ်စရ့လးဖိအခံ ဒ်သိး ကလဲၤဘူၣ်ထီၣ်ဘါထီၣ်ဝဲ ယဟိဝၤယွၤအဂီၢ်. ပှၤအံၣ်စရ့လးဖိတဖၣ်န့ၣ် ပူၤဖျဲးထီၣ်ဝဲလၢ ကုၢ်အလီၢ်လံ.
ပှၤအံၣ်စရ့လးဖိတဖၣ် မၤဝဲတၢ်အီၣ်လီၤဆီ တခါအံၤ တနံၣ်တဘျီ ဒ်သိး ကသ့ၣ်နီၣ်ထီၣ်က့ၤဝဲလၢ ယဟိဝၤယွၤ မၤပူၤဖျဲး အဝဲသ့ၣ်လၢ ကုၢ်အလီၢ်. တၢ်အီၣ်လီၤဆီလၢ ပှၤအံၣ်စရ့လးဖိ မၤဝဲအံၤန့ၣ် အဝဲသ့ၣ် ကိးဝဲလၢ ဘူၣ်လဲၤကပာ်.
“ယပာ်မူနၤန့ၣ် မ့ၢ်ဒ်သိး ယကပာ်ဖျါထီၣ် ယစိယကမီၤ လၢနဃိ ဒီးဒ်သိး ယမံၤကဘၣ်တၢ်စံၣ်တဲၤတဲလီၤအီၤ လၢဟီၣ်ခိၣ်ဒီဘ့ၣ်ညါ အဂီၢ်လီၤ.”—ရိမ့ၤ ၉:၁၇