စီၤဧ့စြၤ သိၣ်လိဝဲယွၤ အတၢ်သိၣ်တၢ်သီ

ပှၤအံၣ်စရ့လးဖိအါတက့ၢ် က့ၤကဒါက့ၤဆူ ဝ့ၢ်ယရူၤၡလ့ၣ်အပူၤ အိၣ်လံအနံၣ်​ ၇၀ ဃၣ်ဃၣ်လံ. ဘၣ်ဆၣ်​ ပှၤအံၣ်စရ့လးဖိတနီၤန့ၣ်​ အိၣ်တ့ၢ်ဒံးဝဲလၢ ဖၢၡၢၣ်အဘီမုၢ် အတၢ်ပၢဖီလာ်. ပှၤလၢအိၣ်တ့ၢ် ဖဲန့ၣ်တဖၣ်အကျါ ပၣ်ဃုာ်ဒီး ပှၤလုၢ်တၢ်ဒိၣ်​ စီၤဧ့စြၤလၢ အသိၣ်လိယဟိဝၤယွၤ အတၢ်သိၣ်တၢ်သီ. စီၤဧ့စြၤနၢ်ဟူဘၣ်ဝဲလၢ ပှၤအိၣ်လၢ ဝ့ၢ်ယရူၤၡလ့ၣ်အပူၤန့ၣ်​ အဝဲသ့ၣ်တလူၤပိာ်ထွဲဝဲ ကစၢ်ယွၤ အတၢ်သိၣ်တၢ်သီဘၣ်. လၢတၢ်န့ၣ်အဃိ စီၤဧ့စြၤ အဲၣ်ဒိးက့ၤမၤစၢၤ အဝဲသ့ၣ်. ဖၢၡၢၣ်အစီၤပၤ အၢ်တၤၡါၡတၤ တဲဘၣ်အီၤလၢ ‘ကစၢ်ယွၤဟ့ၣ်လီၤနၤ တၢ်ကူၣ်သ့လၢ နကသိၣ်လိယွၤ အတၢ်သိၣ်တၢ်သီ. ယဟ့ၣ်နၤအခွဲးလၢနကက့ၤ. ဒီးပှၤလၢအအဲၣ်ဒိးက့ၤဒီးနၤန့ၣ်​ နက့ၤကိးအဝဲသ့ၣ်သ့.’ စီၤဧ့စြၤထံၣ်လိာ်သးဒီး ကယဲၢ်ပှၤလၢအအဲၣ်ဒိးက့ၤလၢ ဝ့ၢ်ယရူၤၡလ့ၣ်. အဝဲသ့ၣ်ဃ့ထုကဖၣ်လၢ ယဟိဝၤယွၤအအိၣ်​ ဒ်သိးကဒီသဒၢအဝဲသ့ၣ်​ လၢတၢ်လဲၤတၢ်က့ၤအံၤအဂီၢ်. ဝံၤဒီးအဝဲသ့ၣ်က့ၤဝဲ.

လွံၢ်လါဝံၤအလီၢ်ခံ အဝဲသ့ၣ်က့ၤတုၤဝဲလၢ ဝ့ၢ်ယရူၤၡလ့ၣ်အပူၤ. ပဒိၣ်ဖဲန့ၣ်တဖၣ်​ တဲဘၣ်စီၤဧ့စြၤလၢ ‘ပှၤအံၣ်စရ့လးဖိတဖၣ်​ တဒိကနၣ်ယဟိဝၤယွၤ အကလုၢ်ဘၣ်. အဝဲသ့ၣ်ဟံးန့ၢ်အမါ လၢပိာ်မုၣ်လၢ အဘူၣ်ထီၣ်ဘါထီၣ်ယွၤလၢ အကမၣ်တဖၣ်အကျါ.’ အဃိ စီၤဧ့စြၤ ကမၤဝဲဒ်လဲၣ်. စီၤဧ့စြၤချံးလီၤအခီၣ်လၢ ကမျၢၢ်အမဲာ်ညါ ဒီးဃ့ထုကဖၣ်ဝဲလၢ ‘ယဟိဝၤယွၤဧၢ, နမၤစၢၤတ့ၢ်ပှၤအါမး. ဘၣ်ဆၣ်​ မ့မ့ၢ်ပဝဲတခီ ပမၤကမၣ်ဘၣ်နၤလံ.’ ပှၤဂီၢ်မုၢ်တဖၣ်​ ပီၢ်ယၢ်လီၤက့ၤအသး ဘၣ်ဆၣ်​ အဝဲသ့ၣ်မၤဒံးဝဲ တၢ်လၢအကမၣ်. အဃိ စီၤဧ့စြၤဃုထၢထီၣ်​ ပှၤသူၣ်က့သးပှၢ် ဒီးစံၣ်ညီၣ်ကွီၢ်တဖၣ်လၢ ကဃုသ့ၣ်ညါ တၢ်ဂ့ၢ်တဖၣ်အံၤ. လၢခံသၢလါအတီၢ်ပူၤ ပှၤလၢအတဘူၣ်ထီၣ်ဘါထီၣ်​ ယဟိဝၤယွၤန့ၣ်​ ဘၣ်တၢ်နီဟးထီၣ်ကွံာ်အဝဲသ့ၣ်.

တၢ်ဆၢကတီၢ်လဲၤပူၤကွံာ် တဆံခံနံၣ်လံ. ဒီးဖဲတဆံခံနံၣ်အံၤအတီၢ်ပူၤန့ၣ်​ ပှၤဘှီဂ့ၤထီၣ်က့ၤဝဲ ဝ့ၢ်ယရူၤၡလ့ၣ်အဒူၣ်. စီၤဧ့စြၤကိးဖှိၣ်ဝဲ ပှၤဂီၢ်မုၢ်တဖၣ်​ ဒီးအဖးထီၣ်ဝဲ ယွၤအတၢ်သိၣ်တၢ်သီလၢ အဝဲသ့ၣ်အမဲာ်ညါ. ဖဲစီၤဧ့စြၤအိးထီၣ်ဝဲ လံာ်တၢ်သိၣ်တၢ်သီအခါ ပှၤဂီၢ်မုၢ်တဖၣ်ဂဲၤဆၢထၢၣ်ဝဲ. စီၤဧ့စြၤစံးထီၣ်ပတြၢၤ ယဟိဝၤယွၤ ဒီးပှၤဂီၢ်မုၢ်တဖၣ်ယူာ်ထီၣ်အစု ဒီးတူၢ်လိာ်ဝဲ. ဝံၤဒီး စီၤဧ့စြၤဖးထီၣ်ဝဲ လံာ်တၢ်သိၣ်တၢ်သီ ဒီးဖဲတဲဖျါထီၣ်ဝဲ အခီပညီအခါ ပှၤဂီၢ်မုၢ်ဒိကနၣ်ဝဲ လီၤတံၢ်လီၤဆဲး. အဃိ အဝဲသ့ၣ်​ သ့ၣ်ညါလီၤက့ၤအသးလၢ အမၤကမၣ်ဘၣ်​ ယဟိဝၤယွၤဒီး ဟီၣ်ဝဲယၢၤဝဲ. လၢခံတနံၤန့ၣ်​ စီၤဧ့စြၤ ဖးဒီးတဲနၢ်ပၢၢ်အါထီၣ်ဝဲ လံာ်တၢ်သိၣ်တၢ်သီ. ဒီးပှၤဂီၢ်မုၢ်တဖၣ်​ သ့ၣ်ညါဝဲလၢ တယံာ်တမီၢ်န့ၣ်​ အဝဲသ့ၣ်​ ကဘၣ်မၤဝဲဘူၣ်ဒဲ. အဃိ တဘျီဃီန့ၣ်​ အဝဲသ့ၣ်စးထီၣ်​ ကတဲာ်ကတီၤတၢ်လၢ မူးပွဲအဂီၢ်.

လၢမူးပွဲနွံသီအတီၢ်ပူၤန့ၣ်​ ပှၤဂီၢ်မုၢ်တဖၣ်ပှဲၤဒီး တၢ်သူၣ်ဖှံသးညီ ဒီးစံးဘျုးစံးဖှိၣ်ဝဲ ယဟိဝၤယွၤ ခီဖျိလၢအဝဲသ့ၣ်​ တၢ်သူၣ်တၢ်ဖျး မဲထီၣ်ဂ့ၤဂ့ၤအဃိ. စးထီၣ်လၢ စီၤယိၤၡူအစိၤန့ၣ်​ ပှၤယူဒၤဖိတဖၣ်​ တမၤဝဲဘူၣ်ဒဲဒ်အံၤနီတဘျီဘၣ်. ဖဲမၤဝဲဘူၣ်ဒဲအံၤဝံၤအလီၢ်ခံ ပှၤဂီၢ်မုၢ်တဖၣ်​ ပာ်ဖှိၣ်ထီၣ်အသး ဒီးဃ့ထုကဖၣ်ဝဲလၢ ‘ယဟိဝၤယွၤဧၢ, နမၤပူၤဖျဲးပှၤလၢကုၢ်အလီၢ်, လုၢ်အီၣ်လုၢ်အီပှၤလၢ ပှၢ်မုၢ်ကနၢ ဒီးဟ့ၣ်လီၤပှၤလၢထံကီၢ်လၢ အဃံအလၤအံၤ. ဘၣ်ဆၣ်​ တဘျီဝံၤတဘျီန့ၣ်​ ပတဒိကနၣ်နကလုၢ်ဘၣ်. နဆှၢလီၤနဝံတဖၣ်လၢ ကဟဲဟ့ၣ်ပလီၢ်ပှၤ ဘၣ်ဆၣ်​ ပတဒိကနၣ်အဝဲသ့ၣ်​ အကလုၢ်ဘၣ်. နဆဲးပာ်ဖျါထီၣ်ဒံး တၢ်ဝံသးစူၤလၢပဖီခိၣ်. နတီဒီးနတၢ်အၢၣ်လီၤလၢ နအၢၣ်လီၤဒီးစီၤအၤဘြၤဟၣ်လီၤ. ခဲအံၤ ပအၢၣ်လီၤနၤလၢ ပကဒိကနၣ်နကလုၢ်.’ အဝဲသ့ၣ်ကွဲးလီၤ အတၢ်အၢၣ်လီၤဝံၤဒီး ပဒိၣ်ပပှၢ်, ပှၤလ့ၤဝံဖိ ဒီးပှၤလုၢ်တၢ်အဒိၣ်တဖၣ်​ စဲပနီၣ်ဃာ်ဝဲ တၢ်အၢၣ်လီၤအီလီၤအံၤ.