ယ့ၣ်ၡူးလုၢ်အီၣ်လုၢ်အီ ပှၤလၢအကထိတဖၣ်

ဖဲ ခ.န. ၃၂ နံၣ်​ တချုးလၢ ဘူၣ်လဲၤကပာ် ဘၣ်ဒံးဘၣ်န့ၣ်​ တၢ်မၢဖိတဖၣ်​ ဟဲက့ၤဝဲလၢ အဝဲသ့ၣ်​ အတၢ်စံၣ်တဲၤတဲလီၤတၢ်မၤ. အဝဲသ့ၣ်​ လီၤဘှံးအဃိ ယ့ၣ်ၡူး ကိးထီၣ်အဝဲသ့ၣ်​ လၢကဘီပူၤ ဒီးလဲၤဝဲလၢ ဝ့ၢ်ဘ့ၤသစဲဒၤ ဒ်သိးကအိၣ်ဘှံးဝဲအဂီၢ်. ဘၣ်ဆၣ်​ ဖဲကဘီလဲၤဘူးထီၣ်လၢ ထံကၢၢ်နံၤအခါ ယ့ၣ်ၡူး ထံၣ်ဝဲပှၤဂီၢ်မုၢ်လၢ အကထိတဖၣ်​ ဟဲပိာ်အခံ. ယ့ၣ်ၡူး အဲၣ်ဒိးအိၣ်ဘှံးဒီး အတၢ်မၢဖိတဖၣ်​ သနာ်က့ အတူၢ်လိာ်ဝဲ ပှၤဂီၢ်မုၢ်တဖၣ်​ လၢတၢ်အဲၣ်တၢ်ကွံအပူၤ. ယ့ၣ်ၡူး မၤဘျါက့ၤ ပှၤဆူးပှၤဆါတဖၣ်​ ဒီးသိၣ်လိသီလိ အဝဲသ့ၣ်. ယ့ၣ်ၡူး သိၣ်လိအဝဲသ့ၣ်လၢ ယွၤအဘီအမုၢ်အဂ့ၢ် ဒီတနံၤညါ. ဖဲဟါလီၤခီ အဆၢကတီၢ်န့ၣ်​ ယ့ၣ်ၡူး အတၢ်မၢဖိ ဟဲလၢအအိၣ်​ ဒီးတဲဘၣ်အီၤလၢ ‘ပှၤဂီၢ်မုၢ်တဖၣ်လီၤဘဲလံ. ပျဲက့ၤ အဝဲသ့ၣ်ဒ်သိး ကက့ၤအီၣ်တၢ်မီၤ.’

ယ့ၣ်ၡူး တဲဝဲလၢ ‘အဝဲသ့ၣ်တလိၣ်က့ၤဘၣ်. ဒုးအီၣ်အဝဲသ့ၣ်​ တၢ်အီၣ်ဖဲအံၤ.’ တၢ်မၢဖိတဖၣ်​ သံကွၢ်အီၤလၢ ‘နအဲၣ်ဒိးလၢ ပကလဲၤပှ့ၤ တၢ်အီၣ်တၢ်အီလၢ ပှၤတဖၣ်အံၤ အဂီၢ်ဧါ.’ တၢ်မၢဖိဖံလံးပူး တဲဝဲလၢ ‘ပစ့မ့ၢ်အိၣ်အါ ဘၣ်ဆၣ်​ ပပှ့ၤတၢ်အီၣ်​ လၢပှၤဂီၢ်မုၢ်အံၤအဂီၢ် တယၢဘၣ်.’

ယ့ၣ်ၡူး သံကွၢ်ဝဲလၢ ‘တၢ်အီၣ်​ အိၣ်ထဲလဲၣ်.’ စီၤအၣ်ဒရ့း တဲဝဲလၢ ‘ပအိၣ်ဒီး ကိၣ်ယဲၢ်လိၣ်​ ဒီးညၣ်ဆံးဆံးဖိခံဘ့ၣ်.’ ယ့ၣ်ၡူး တဲဝဲလၢ ‘ဟဲစိာ် ကိၣ်ဒီးညၣ်အံၤ လၢယအိၣ်.’ ယ့ၣ်ၡူး မၢပှၤဂီၢ်မုၢ်တဖၣ်​ ဆ့ၣ်နီၤလၢ နီၣ်အဖီခိၣ်​ တဒူၣ်န့ၣ်အဂၤ ၅၀ မ့တမ့ၢ် အဂၤ ၁၀၀. ယ့ၣ်ၡူး ဟံးန့ၢ်ကိၣ်ဒီးညၣ်​ ဝံၤအလီၢ်ခံ အကွၢ်ထီၣ်လၢမူခိၣ်​ ဒီးဃ့ထုကဖၣ်တၢ်. လၢခံ ယ့ၣ်ၡူးဟ့ၣ်လီၤ တၢ်အီၣ်လၢ အတၢ်မၢဖိတဖၣ်အအိၣ်​ ဒီးအဝဲသ့ၣ်​ ဟ့ၣ်နီၤလီၤဝဲလၢ ပှၤဂီၢ်မုၢ်တဖၣ်. ပိာ်ခွါအဂၤ ၅,၀၀၀ ဃၣ်ဃၣ်​ ဒီးပိာ်မုၣ်ဒီးဖိသၣ်တဖၣ်န့ၣ်​ အီၣ်ဝဲကိၣ်ဒီးညၣ်​ တုၤလၢအီၣ်ဝဲဘျဲ. ဖဲအဝဲသ့ၣ်​ အီၣ်တၢ်ဝံၤအလီၢ်ခံ တၢ်မၢဖိတဖၣ်​ ထၢဖှိၣ်က့ၤ တၢ်အီၣ်လၢ အအိၣ်တ့ၢ်တဖၣ်​ ဒ်သိးအသုတဟးဂီၤကလီ တဂ့ၤအဂီၢ်. အဝဲသ့ၣ်​ ထၢဖှိၣ်က့ၤဝဲ ပှဲၤကု ၁၂ ဒု. တၢ်လီၤလးတခါအံၤ အလီၤကမၢကမၣ်ဒိၣ်မး.

ပှၤဂီၢ်မုၢ်တဖၣ်​ ဘၣ်သူၣ်ဘၣ်သးဝဲ ယ့ၣ်ၡူး ဒီးအဲၣ်ဒိးပာ်ထီၣ်အီၤလၢ စီၤပၤ. ဘၣ်ဆၣ်​ ယ့ၣ်ၡူး သ့ၣ်ညါဝဲလၢ ယဟိဝၤယွၤ တအဲၣ်ဒိးလၢ အကကဲထီၣ်​ စီၤပၤဒံးဘၣ်. အဃိ ယ့ၣ်ၡူး မၢပှၤဂီၢ်မုၢ်တဖၣ်​ က့ၤဝဲ ဒီးယ့ၣ်ၡူး မၢအတၢ်မၢဖိတဖၣ်​ လဲၤဆူ ပီၣ်လဲၣ်ကၤလံၤလါ အဝၢ်ဘးခီ. အဝဲသ့ၣ်​ ဒိးထီၣ်ကဘီ ဒီးယ့ၣ်ၡူးလဲၤထီၣ်ဝဲလၢ ကစၢၢ်ခိၣ်​ ထဲတဂၤ. ဘၣ်မနုၤအဃိလဲၣ်. မ့ၢ်လၢ ယ့ၣ်ၡူး အဲၣ်ဒိးဟံးန့ၢ် တၢ်ဆၢကတီၢ်လၢ ကဃ့ထုကဖၣ်လၢ အပၢ်အအိၣ်. ယ့ၣ်ၡူး အတၢ်မၤမ့ၢ်အါ သနာ်က့ အဝဲဟံးန့ၢ် တၢ်ဆၢကတီၢ်လၢ ကဃ့ထုကဖၣ်တၢ်အဂီၢ်.