တၢ်မၤလိ ၈၇
ယ့ၣ်ၡူးအီၣ်ဟါတၢ်အီၣ် အလီၢ်ခံကတၢၢ်တဘျီ
ပှၤယူဒၤဖိမၤဝဲ ဘူၣ်လဲၤကပာ်ဖဲ လါနံစၣ် ၁၄ သီကိးနံၣ်ဒဲး. ဘူၣ်လဲၤကပာ်အံၤ ဒုးသ့ၣ်နီၣ်ထီၣ်က့ၤ အဝဲသ့ၣ်လၢ ယဟိဝၤယွၤ မၤပူၤဖျဲး အဝဲသ့ၣ်လၢကုၢ်အလီၢ် လၢကီၢ်အဲၤကူပတူးအပူၤ ဒီးဆှၢအဝဲသ့ၣ်ဆူ ကီၢ်တၢ်စံးပာ်. ဖဲ ခ.န. ၃၃ နံၣ် လၢဝ့ၢ်ယရူၤၡလ့ၣ်အပူၤန့ၣ် ယ့ၣ်ၡူး ဒီးအတၢ်မၢဖိတဖၣ် မၤဝဲဘူၣ်လဲၤကပာ်လၢ ဒၢးတဖျၢၣ် လၢဟံၣ်ဖီခိၣ်. ဖဲအဝဲသ့ၣ် အီၣ်တၢ်ဝံၤအခါ ယ့ၣ်ၡူး တဲဝဲလၢ ‘ပှၤလၢသုကျါတဂၤန့ၣ် ကဟ့ၣ်လီၤကွံာ်ယၤ.’ အဃိ တၢ်မၢဖိတဖၣ် ဖုးဘၣ်အသး ဒီးသံကွၢ်ယ့ၣ်ၡူးလၢ ‘အကမ့ၢ် မတဂၤလဲၣ်.’ ယ့ၣ်ၡူး တဲဝဲလၢ ‘အဝဲကမ့ၢ်ပှၤတဂၤလၢ ယဟ့ၣ်လီၤအီၤလၢကိၣ်.’ ဝံၤဒီး ယ့ၣ်ၡူးဟ့ၣ်လီၤ စီၤယူဒၤအံၣ်စကၤရံၤအိာ် လၢကိၣ်. တဘျီဃီန့ၣ် စီၤယူဒၤအံၣ်စကၤရံၤအိာ် ဟးထီၣ်ကွံာ်ဝဲလၢဒၢးပူၤ.
ဝံၤဒီး ယ့ၣ်ၡူး ဃ့ဘါထုကဖၣ်တၢ်, ဘိးကၢ်ကိၣ်တနီၤ ဒီးဟ့ၣ်လီၤဝဲ အတၢ်မၢဖိ လၢအအိၣ်တ့ၢ်တဖၣ်. ယ့ၣ်ၡူးတဲဝဲလၢ ‘အီၣ်ကိၣ်အံၤ. ကိၣ်အံၤဒိလီၤဝဲ ယနီၢ်ခိလၢ ယကဟ့ၣ်လီၤလၢသုဂီၢ်.’ ဝံၤဒီး ယ့ၣ်ၡူးဃ့ဘါထုကဖၣ်တၢ်လၢ စပံးထံအဂီၢ် ဒီးဟ့ၣ်လီၤဝဲ အတၢ်မၢဖိတဖၣ်. ယ့ၣ်ၡူး တဲဝဲလၢ ‘အီစပံးထံအံၤ. စပံးထံအံၤဒိလီၤဝဲ ယသွံၣ်လၢ ယကဟ့ၣ်လီၤဒ်သိး ပှၤဟီၣ်ခိၣ်ဖိ အတၢ်ဒဲးဘး ကပျၢ်ကွံာ်အဂီၢ်. ယအၢၣ်လီၤသုလၢ သုကကဲထီၣ် စီၤပၤဃုာ်ဒီးယၤလၢမူခိၣ်. ကိးနံၣ်ဒဲးန့ၣ် သုကဘၣ်မၤဒ်အံၤလၢ တၢ်သ့ၣ်နီၣ်ထီၣ်က့ၤယၤအဂီၢ်.’ အဃိ ယ့ၣ်ၡူးအပျဲၢ်အဘီၣ်တဖၣ် မၤဝဲ တၢ်သ့ၣ်နီၣ်ထီၣ်က့ၤအံၤ ကိးနံၣ်ဒဲး. ခဲအံၤ တၢ်သ့ၣ်နီၣ်ထီၣ်က့ၤအံၤ ပကိးအီၤလၢ ကစၢ်ဟါတၢ်အီၣ်.
ဖဲကစၢ်ဟါတၢ်အီၣ် ဝံၤအလီၢ်ခံ တၢ်မၢဖိတဖၣ် တဲအါလိာ်အသး ဘၣ်ဃးဒီး မ့ၢ်မတဂၤ ကဲပှၤလၢ အဒိၣ်ကတၢၢ် တဂၤလဲၣ်. ဘၣ်ဆၣ် ယ့ၣ်ၡူး တဲဘၣ်အဝဲသ့ၣ်လၢ ‘ပှၤလၢအပာ်လီၤအသးလၢ အဆံးကတၢၢ်တဂၤန့ၣ် ကမ့ၢ်ပှၤလၢ အဒိၣ်ကတၢၢ်တဂၤ.’
‘သုမ့ၢ်ယတံၤသကိးတဖၣ်. ကယဲၢ်တၢ်လၢ ယပၢ်အဲၣ်ဒိးလၢ ယတဲဘၣ်သုန့ၣ် ယတဲဘၣ်သုခဲလၢာ်. တယံာ်လၢၤဘၣ်န့ၣ် ယကက့ၤထီၣ်ဆူ ယပၢ်အအိၣ်လၢမူခိၣ်. ဘၣ်ဆၣ် သုကအိၣ်ဒံးဖဲအံၤ. ဒီးသုမ့ၢ်အဲၣ်လိာ်သုသး တဂၤဒီးတဂၤန့ၣ် ပှၤကသ့ၣ်ညါဝဲလၢ သုမ့ၢ်ယပျဲၢ်ယဘီၣ်. အဃိ သုကဘၣ်အဲၣ်လိာ် သုသးတဂၤဒီးတဂၤ ဒ်ယအဲၣ်သုအသိး.’
ဒီးယ့ၣ်ၡူး ဃ့ဘါထုကဖၣ်လၢ ယဟိဝၤယွၤ ကဒီသဒၢ အပျဲၢ်အဘီၣ်ခဲလၢာ် ဒီးကမၤစၢၤအဝဲသ့ၣ် ဒ်သိး ကမၤသကိးတၢ် ဃူဃူဖိးဖိး. ယ့ၣ်ၡူး ဃ့စ့ၢ်ကီးဝဲလၢ ယဟိဝၤယွၤအမံၤ ကဘၣ်တၢ်ပာ်စီဆှံအီၤ. ဝံၤဒီး ယ့ၣ်ၡူးဒီးအပျဲၢ်အဘီၣ်တဖၣ် သးဝံၣ်စံးထီၣ်ပတြၢၤ ယဟိဝၤယွၤ ဒီးဟးထီၣ်ဝဲလၢ တၢ်ချၢ. တၢ်ဆၢကတီၢ်လၢ ပှၤကဟဲဖီၣ် ယ့ၣ်ၡူးန့ၣ် ဘူးထီၣ်ဝဲလံ.
“သိလၢအစှၤတဖုဧၢ, မ့ၢ်လၢ သုပၢ်ဘၣ်အသးလၢ ကဟ့ၣ်လီၤသုလၢ ဘီမုၢ်အဃိ ပျံၤတၢ်တဂ့ၤ.”—လူၤကၣ် ၁၂:၃၂