တၢ်သံကွၢ်တဖၣ်လၢ အတၢ်စံးဆၢအိၣ်လၢ လံာ်စီဆှံပူၤ

ပတၢ်ဒဲးဘး ပျၢ်ကွံာ်သ့ဧါ.

လံာ်စီဆှံ ပာ်ဖျါထီၣ်ဝဲလၢ ပှၤဟီၣ်ခိၣ်ဖိခဲလၢာ်န့ၣ် မ့ၢ်ဝဲပှၤတၢ်ဒဲးဘးဖိ. ခီဖျိလၢပမ့ၢ် စီၤအၤဒၣ်အဖိအလံၤအဃိ ပအိၣ်ဒီးတၢ်ဒဲးဘးလီၤ. မ့ၢ်လၢပကဲ ပှၤတၢ်ဒဲးဘးဖိအဃိ ပမၤဘၣ်တၢ်ကမၣ် ဒီးပသးဘၣ်ဒိလၢ ပမၤကမၣ်ဘၣ်တၢ်အဃိ. ဘၣ်ဆၣ် ကစၢ်ယွၤအဖိခွါ ယ့ၣ်ၡူးခရံာ်န့ၣ် ပှ့ၤက့ၤပှၤလၢ ပတၢ်ဒဲးဘး ခီဖျိ အတူၢ်သံအသး လၢပဂီၢ်. ခီဖျိလၢ အတၢ်ပှ့ၤက့ၤအဃိ ပတၢ်ဒဲးဘး ပျၢ်ကွံာ်သ့. တၢ်ပှ့ၤက့ၤအံၤ မ့ၢ်ဝဲ ကစၢ်ယွၤ အတၢ်ဟ့ၣ်တခါ.—ဖး ရိမ့ၤ ၃:၂၃, ၂၄.

ပှၤတနီၤနီၤမၤဘၣ်ဝဲ တၢ်ကမၣ်ဖးဒိၣ်အဃိ အဝဲသ့ၣ် ကဆိကမိၣ်ဘၣ်ဝဲလၢ မ့ၢ်ကစၢ်ယွၤပျၢ်ကွံာ် အတၢ်ကမၣ် ဘၣ်ကသ့ဧါ. လံာ်စီဆှံ တဲဝဲလၢ ကစၢ်ယွၤ“အဖိခွါယ့ၣ်ၡူးအသွံၣ်န့ၣ် သ့စီကွံာ်ပှၤလၢပတၢ်ဒဲးဘးခဲလၢာ်လီၤ.” (၁ ယိၤဟၣ် ၁:၇) အဃိ ပတၢ်ကမၣ် မ့ၢ်ဒိၣ်ထဲလဲၣ်ထဲလဲၣ် သနာ်က့ ပမ့ၢ်ပီၢ်ယၢ်လီၤက့ၤပသး နီၢ်ကီၢ်န့ၣ် ယဟိဝၤယွၤ ပျၢ်ကွံာ်ပတၢ်ကမၣ်သ့.—ဖး ယၡါယၤ ၁:၁၈.

ကစၢ်ယွၤ ကပျၢ်ပတၢ်ကမၣ်အဂီၢ် ပကဘၣ်မၤဒ်လဲၣ်

ပမ့ၢ်အဲၣ်ဒိးလၢ ယဟိဝၤယွၤ ကပျၢ်ပတၢ်ကမၣ်န့ၣ် ပကဘၣ် မၤလိအဂ့ၢ်, အတၢ်ဘၣ်သး, အတၢ်ဟ့ၣ်ကူၣ် ဒီးတၢ်လၢ အဝဲအဲၣ်ဒိးလၢ ပကမၤတဖၣ်. (ယိၤဟၣ် ၁၇:၃) ယဟိဝၤယွၤ သးအိၣ်ပျၢ်ကွံာ် ပှၤလၢ အပီၢ်ယၢ်လီၤက့ၤအသး ဒီးပှၤလၢ အသးအိၣ်ဆီတလဲ အတၢ်အိၣ်မူ.—ဖး မၤတၢ် ၃:၁၉.

ပကမၤ တၢ်ဘၣ်ကစၢ်ယွၤသးအဂီၢ် တမ့ၢ်တၢ်လၢ အကီတလၢဘၣ်. ပအိၣ်ဒီး တၢ်ဂံၢ်စၢ်ဘါစၢ်န့ၣ် ယဟိဝၤယွၤသ့ၣ်ညါဝဲ. ကစၢ်ယွၤန့ၣ် အသူၣ်ဂ့ၤသးဝါ ဒီးအသးကညီၤတၢ် သ့မး. မ့ၢ်လၢကစၢ်ယွၤန့ၣ် အိၣ်ဒီးတၢ်အဲၣ်တၢ်ကွံ ထဲထဲအံၤညါအဃိ နတအဲၣ်ဒိး ဃုသ့ၣ်ညါအါထီၣ်အဂ့ၢ် ဒီးမၤအတၢ်ဘၣ်သးဧီၤ.—ဖး စံးထီၣ်ပတြၢၤ ၁၀၃:၁၃, ၁၄.