ပကြၢးပာ်ဒ့ၣ်ပာ်ကမၣ် မတၤတဂၤလဲၣ်

ကစၢ်ယွၤ မ့ၢ်တဒုးအိၣ်ထီၣ်​ တၢ်သၣ်ဝံၤလီၤဒိ, တၢ်ဖှီၣ်တၢ်ယာ်, တၢ်ဒုးတၢ်ယၤ, တၢ်ဆူးတၢ်ဆါ ဒီးန့ဆၢၣ်တၢ်ဘၣ်ဒိဘၣ်ထံးတဖၣ်န့ၣ်​ ဘၣ်မနုၤအဃိ ပထံၣ်ဘၣ်​ တၢ်ကီတၢ်ခဲတဖၣ်အံၤလဲၣ်. ကစၢ်ယွၤအကလုၢ်ကထါ ပာ်ဖျါထီၣ်ဝဲလၢ ပှၤဟီၣ်ခိၣ်ဖိထံၣ်ဘၣ်​ တၢ်ကီတၢ်ခဲတဖၣ်​ ခီဖျိလၢ တၢ်ဂ့ၢ်သၢမံၤအဃိလီၤ.

1. ၁. တၢ်အဲၣ်လီၤဒၣ်ထဲ နီၢ်ကစၢ်အသး, တၢ်သးကွံတၢ် ဒီးတၢ်သူၣ်ဟ့သးဟ့. စံၣ်တဲၤတဲလီၤတၢ် ၈:၉ တဲဝဲလၢ “ပှၤပၢပှၤဂၤလၢအတၢ်အၢအဂီၢ်လီၤ.” ခီဖျိလၢ ပတလၢတပှဲၤဘၣ်, ပှၤအဲၣ်လီၤဒၣ်ထဲ နီၢ်ကစၢ်အသး ဒီးပှၤမၤအၢမၤသီလိာ်သး ကဒဲကဒဲအဃိ ပှၤလၢအဂၤသ့ၣ်တဖၣ်​ တူၢ်ဘၣ်တၢ်ကီတၢ်ခဲအါမးလီၤ.

2. ၂. တၢ်ဆၢကတီၢ်ဒီးတၢ်ဘၣ်အတီၤ. ပှၤဟီၣ်ခိၣ်ဖိထံၣ်ဘၣ်​ တၢ်ကီတၢ်ခဲတဖၣ်န့ၣ်​ မ့ၢ်ဝဲခီဖျိလၢ “တၢ်အဆၢအကတီၢ် ဒီးတၢ်ဘၣ်အတီၤဘၣ်ပှၤခဲလၢာ်” အဃိလီၤ. (စံၣ်တဲၤတဲလီၤတၢ် ၉:၁၁) ဒ်လံာ်စီဆှံတဆၢအံၤတဲဝဲအသိး တဘျီတခီၣ်​ တၢ်ကီတၢ်ခဲဟဲကဲထီၣ်အသး လၢတၢ်တပာ်သူၣ်ပာ်သးအပူၤသ့ မ့တမ့ၢ် ပလဲၤဘၣ်အတီၤလၢ တၢ်ဆၢကတီၢ် ဒီးတၢ်လီၢ်လၢအကဲထီၣ်​ တၢ်ဘၣ်ယိၣ်လၢပဂီၢ် မ့တမ့ၢ် ပထံၣ်ဘၣ်တၢ်ကီတၢ်ခဲလၢ ပှၤဂၤအတၢ်ကမၣ်အဃိလီၤ.

3. ၃. ပှၤအၢပှၤသီတဂၤပၢဟီၣ်ခိၣ်. တၢ်ဂ့ၢ်ခိၣ်သ့ၣ်လၢ ဘၣ်မနုၤအဃိ ပှၤဟီၣ်ခိၣ်ဖိတဖၣ်​ ထံၣ်ဘၣ်တၢ်ကီတၢ်ခဲလဲၣ်န့ၣ်​ လံာ်စီဆှံပာ်ဖျါထီၣ်ဝဲ လီၤတံၢ်လီၤဆဲးလီၤ. လံာ်စီဆှံတဲဝဲလၢ “ဟီၣ်ခိၣ်ခဲလၢာ်မံလီၤဝဲလၢ တၢ်အၢတၢ်သီတဂၤန့ၣ်အပူၤလီၤ.” (၁ ယိၤဟၣ်​ ၅:၁၉) “တၢ်အၢတၢ်သီတဂၤ” န့ၣ်မ့ၢ်မုၣ်ကီၤလံၢ် ဒီးလၢအခီၣ်ထံးလံၤလံၤန့ၣ် အဝဲမ့ၢ်မူခိၣ်ကလူးဘၣ်ဆၣ်​ အဝဲ “တဆၢထၢၣ်ဘၣ်လၢ တၢ်မ့ၢ်တၢ်တီအပူၤဘၣ်.” (ယိၤဟၣ်​ ၈:၄၄) မူခိၣ်ကလူးလၢအဂၤတနီၤစ့ၢ်ကီး ဒ်သိးကလူၤမၤထွဲ အတၢ်သူၣ်လီၤသးကွံအဂီၢ် အဝဲသ့ၣ်အိၣ်ဃူမုၣ်ကီၤလံၢ်, ထီဒါကစၢ်ယွၤ ဒီးကဲထီၣ်တၢ်ဝံတၢ်နါတဖၣ်လီၤ. (၁ မိၤၡ့ ၆:၁-၅) စးထီၣ်လၢ မုၣ်ကီၤလံၢ် ဒီးအတၢ်ဝံတၢ်နါတဖၣ်​ ထီဒါကစၢ်ယွၤဝံၤအလီၢ်ခံ ဟီၣ်ခိၣ်ပှဲၤဒီးတၢ်ကီတၢ်ခဲတဖၣ်လီၤ. လီၤဆီဒၣ်တၢ် ဆၢကတီၢ်ခဲအံၤန့ၣ်​ တၢ်ကီတၢ်ခဲအိၣ်အါန့ၢ်ဒံးလၢညါလီၤ. ဒ်လံာ်စီဆှံတဲဝဲအသိး မုၣ်ကီၤလံၢ် အသးဒိၣ်ထီၣ်တၢ်ဒိၣ်မးဒီး “လီန့ၢ်ပှၤဟီၣ်ခိၣ်ဖိခဲလၢာ်” အဃိ “ပှၤအိၣ်လၢဟီၣ်ခိၣ်ချၢ . . . ဘၣ်အဖှီၣ်လီၤ.” (လီၣ်ဖျါ ၁၂:၉, ၁၂) လံာ်စီဆှံပာ်ဖျါထီၣ်ဝဲလၢ မုၣ်ကီၤလံၢ်မ့ၢ် ပှၤပၢတၢ်တဂၤလၢ တအိၣ်ဒီးတၢ်သးကညီၤနီတစဲးဘၣ်​ ဒီးဖဲပှၤဟီၣ်ခိၣ်ဖိတဖၣ်​ ထံၣ်ဘၣ်တၢ်ကီတၢ်ခဲအခါန့ၣ်​ အသးခုဝဲလီၤ. ပှၤဟီၣ်ခိၣ်ဖိတဖၣ်​ ထံၣ်ဘၣ်တၢ်ကီတၢ်ခဲ ဒီးတၢ်နးတၢ်ဖှီၣ်န့ၣ်​ တမ့ၢ်လၢကစၢ်ယွၤအဃိဘၣ်, မ့ၢ်လၢမုၣ်ကီၤလံၢ်အဃိလီၤ.

ဆိကမိၣ်ကွၢ်. ထဲပှၤအၢပှၤသီလၢ အတၢ်သးကညီၤတအိၣ်ဘၣ်န့ၣ်​ အဲၣ်ဒိးထံၣ်ဝဲလၢ ပှၤလၢအတၢ်ကမၣ်တအိၣ်တဖၣ်​ ကဘၣ်နးဘၣ်ဖှီၣ်လီၤ. လံာ်စီဆှံတဲဝဲလၢ “ယွၤမ့ၢ်တၢ်အဲၣ်တၢ်ကွံလီၤ.” (၁ ယိၤဟၣ်​ ၄:၈) ခီဖျိလၢ အဝဲမ့ၢ်တၢ်အဲၣ်တၢ်ကွံကစၢ်အဃိ လံာ်စီဆှံတဲဝဲလၢ “မ်တၢ်တတီတလိၤ အိၣ်ယံၤဒီးယွၤတက့ၢ်, ဒီးမ်တၢ်အၢတၢ်သီအိၣ်ယံၤဒီး တၢ်သ့တၢ်လၢာ်တက့ၢ်.”—ယိၤဘး ၃၄:၁၀.

ဘၣ်ဆၣ်​ နကဆိကမိၣ်ဘၣ်လၢ မ့ၢ်သ့တၢ်လၢာ်ကစၢ် ကဟ့ၣ်မုၣ်ကီၤလံၢ်အခွဲးလၢ ကဆဲးပၢဒံးတၢ်ယံာ်ထဲလဲၣ်န့ၣ်လီၤ. ဒ်ပမၤလိဘၣ်အသိး ကစၢ်ယွၤ သးဟ့တၢ်အၢတၢ်သီ, ဒီးဖဲပတူၢ်ဘၣ်​ တၢ်ကီတၢ်ခဲအခါန့ၣ်​ အသးတမုာ်နီတစဲးဘၣ်. တကးဒံးဘၣ်​ အကလုၢ်ကထါတဲဝဲလၢ “ကယဲၢ်သုတၢ်ဘၣ်ယိၣ်ဘၣ်ဘီန့ၣ်, ပာ်ထီၣ်လၢအဝဲဒၣ်အလိၤခဲလၢာ်တက့ၢ်. အဂ့ၢ်ဒ်အံၤ, အသးအိၣ်သုလီၤ.” (၁ ပ့းတရူး ၅:၇) ကစၢ်ယွၤအဲၣ်ပှၤ ဒီးအဝဲအိၣ်ဒီးတၢ်စိတၢ်ကမီၤလၢ ကမၤလီၤမၢ်ကွံာ် တၢ်ကီတၢ်ခဲ ဒီးတၢ်တတီတလိၤခဲလၢာ်လီၤ. ပကမၤလိအါထီၣ်​ တၢ်ဂ့ၢ်တခါအံၤလၢ တၢ်မၤလိလၢခံတခါအပူၤလီၤ.a