ပှၤပၢဆှၢတၢ်ကမံးတံာ် အသီတဂၤ

ဖဲ မုၢ်သၢနံၤဂီၤခီ, လါယနူၤအါရံၤ ၂၄, ၂၀၁၈ န့ၣ်​ ကီၢ်အမဲရကၤ ဒီးကီၢ်ခဲနဒၣ်​ ဘ့ၤသ့လးဟံၣ်ဖိဃီဖိတဖၣ်​ နၢ်ဟူဘၣ်ဝဲ တၢ်ဘိးဘၣ်သ့ၣ်ညါလၢ အလီၤဆီတခါအဃိ အသးခုဒိၣ်မးလီၤ. တၢ်ကစီၣ်အံၤမ့ၢ်ဝဲ ဒီပုၢ်ဝဲၢ် ခဲနံး ခူၣ်​ ကၠ့ၤအၤ န့ၣ်ကဲထီၣ်ဝဲ ယဟိဝၤပှၤအုၣ်အသးတဖၣ်​ အပှၤပၢဆှၢတၢ်ကမံးတံာ်တဂၤလီၤ.

ဒီပုၢ်ဝဲၢ်ခွါ ခူၣ်န့ၣ်​ အိၣ်ဖျဲၣ်ထီၣ်​ ဒီးဒိၣ်ထီၣ်ဝဲဖဲ စီၣ်​ စဲထြိၤ ဖဲစဲၣ်ဘ့နံယါ, U.S.A လီၤ. တချုးလၢ အဝဲဖျိထီၣ်​ တီၤထီကၠိဒံးဘၣ်န့ၣ်​ အဝဲမၤလိန့ၢ် တၢ်မ့ၢ်တၢ်တီလၢ အတံၤသကိးလၢကၠိတဂၤအအိၣ်​ ဒီးဒိးဘျၢထံဖဲ လါယူၤ ၇, ၁၉၈၀ လီၤ. ဒီးဖဲ လါစဲးပတ့ဘၢၣ် ၁, ၁၉၈၂ န့ၣ်အဝဲစးထီၣ်မၤဝဲ ကစၢ်ယွၤအတၢ်မၤလၢ ဆၢကတီၢ်လၢပှဲၤ ဒ်ပှၤလဲၤလၢညါအသိးလီၤ. ဒီးအဝဲမၤ ပှၤလဲၤလၢညါ ခံနံၣ်ဝံၤအလီၢ်ခံ အဝဲဘၣ်တၢ်ကွဲမုာ်အီၤလၢ ဘ့ၤသ့လးအဃိ အဝဲစးထီၣ်မၤတၢ်လၢ နူယီး, ဝီ(လ်)ခ့ အဘ့ၤသ့လး ဖဲလါအီးကထိဘၢၣ် ၁၂, ၁၉၈၄ လီၤ.

ဒီးလၢခံ ၂၅ နံၣ်အတီၢ်ပူၤန့ၣ်​ ဒီပုၢ်ဝဲၢ်ခူၣ်​ မၤဝဲတၢ်မၤအါမံၤလၢ ဘၣ်ဃးဒီး ပှၤထုးထီၣ်လံာ် ဒီးဘ့ၤသ့လးအရူလီၤ. အဝဲဆီဟံၣ်ဆီဃီဒီးအမါ ကၠ့မံၤ ဖဲ ၁၉၉၆ ဒီးအမါစ့ၢ်ကီး ဟဲမၤတၢ်လၢ ဝီ(လ်)ခ့ အဘ့ၤသ့လးလီၤ. ဖဲ လါဒံၣ်စ့ဘၢၣ် ၂၀၀၉ န့ၣ်အဝဲသ့ၣ်​ ဘၣ်လဲၤသုးဆူ တၢးထီခိးတၢ် တၢ်သိၣ်လိအလီၢ် လၢဖဲထစၢၤ ဒီးမၤတၢ်လၢ တၢ်ကွဲးလံာ်ကွဲးလဲၢ်အဝဲၤကျိၤလီၤ. ဖဲဒီပုၢ်ဝဲၢ်ခွါ ခဲနံး ခူၣ်ဒီးအမါ ဟဲက့ၤတုၤလၢ ဝီ(လ်)ခ့ တယံာ်ဘၣ်​ ဒီးဖဲလါအ့ဖြ့ၣ် ၂၀၁၆ န့ၣ်​ အဝဲသ့ၣ်​ ဘၣ်လဲၤသုးအသးဆူ ဘရိးကလ့ၣ်, နူယီးလီၤ. ဒီးအဝဲသ့ၣ်​ မၤတၢ်ဖဲန့ၣ်​ ယဲၢ်လါဝံၤအလီၢ်ခံ ဘၣ်လဲၤသုးဝဲဆူ ဝဲၤလီၢ်ခိၣ်သ့ၣ်လၢ ဝီဝံး(ခ်), နူယီးလီၤ. ဒီးဖဲ လါယနူၤအါရံၤ ၂၀၁၇ န့ၣ်ဒီပုၢ်ဝဲၢ် ခဲနံး ခူၣ်​ ဘၣ်မၤတၢ်ဒ် ပှၤမၤစၢၤတၢ်လၢ ပှၤပၢဆှၢတၢ်ကမံးတံာ် အတၢ်ကွဲးလံာ်ကွဲးလဲၢ်ကမံးတံာ်လီၤ.