မၤစၢၤပှၤမဲာ်တထံၣ်တၢ်တဖၣ် လၢကမၤလိယဟိဝၤယွၤအဂ့ၢ်တက့ၢ်

၁. ယ့ၣ်ၡူးပာ်ဖျါထီၣ်ဝဲ တၢ်သးကညီၤလၢ ပှၤမဲာ်တထံၣ်တၢ်တဖၣ် အဖီခိၣ်ဒ်လဲၣ်.

^၁ တချုးလၢ ယ့ၣ်ၡူးသံဒံးဘၣ်စှၤသီန့ၣ် ဖဲအဝဲဟးထီၣ်လၢ ဝ့ၢ်ယရံၤဃိအခါ ပှၤမဲာ်တထံၣ်တၢ်ခံဂၤ ကိးပသူထီၣ်ဝဲလၢ “ကစၢ်ဧၢ, သူၣ်ကညီၤသးကညီၤစၢ်ပှၤတက့ၢ်.” တယံာ်လၢၤဘၣ် ­ယ့ၣ်ၡူးကဘၣ်ကွၢ်ဆၢၣ်မဲာ်ဒီး တၢ်မၤကွၢ်တဖၣ်အဃိ အသူၣ်ကိၢ်သးဂီၤဒိၣ်မး ဘၣ်ဆၣ်ကစၢ်အိၣ်ကတီၢ်ဝဲဒီး ကိးဝဲပှၤမဲာ်တထံၣ်တၢ်ခံဂၤအံၤဆူအအိၣ် ဒီးမၤဘျါအဝဲသ့ၣ်လီၤ. (မး. ၂၀:၂၉-၃၄) ­ယ့ၣ်ၡူးပာ်ဖျါထီၣ်တၢ်သးကညီၤလၢ ပှၤမဲာ်တထံၣ်တၢ်ခံဂၤအံၤအဖီခိၣ်န့ၣ် ပကွၢ်လိမၤဒိးအီၤကသ့ဒ်လဲၣ်.

၂. ပမ့ၢ်ဘၣ်သဂၢၢ်ဒီး ပှၤမဲာ်တထံၣ်တၢ်တဂၤလၢ ကမျၢၢ်အကျါန့ၣ် ပမၤစၢၤအီၤကသ့ဒ်လဲၣ်.

^၂ မၤစၢၤအဝဲသ့ၣ်တက့ၢ်– ပမ့ၢ်ဘၣ်သဂၢၢ်ဒီး ပှၤမဲာ်တထံၣ်တၢ်တဂၤလၢ ကမျၢၢ်အကျါန့ၣ် ဒုးသ့ၣ်ညါအီၤနမံၤ ဒီးသံကွၢ်အီၤလၢ မ့ၢ်ယမၤစၢၤနၤ ကသ့တမံၤမံၤဧါ န့ၣ်တက့ၢ်. ညီနုၢ်အဝဲသ့ၣ်တဖၣ်န့ၣ် ဘၣ်တၢ်လံၣ်အီၣ်အီၤအဃိ ဘၣ်သ့ၣ်သ့ၣ် အဝဲသ့ၣ်တနာ်န့ၢ်နၤဘၣ်. ဘၣ်ဆၣ်သနာ်က့ နမ့ၢ်ပာ်ဖျါထီၣ် ­တၢ်သူၣ်ဂ့ၤသးဝါဒီး တၢ်သးအိၣ်နီၢ်နီၢ်န့ၣ် ဘၣ်သ့ၣ်သ့ၣ်အသးကဆီတလဲဝဲလီၤ. ­သ့ၣ်နီၣ်ထီၣ်လၢ ပှၤမဲာ်တထံၣ်တၢ်တနီၤနီၤန့ၣ် တထံၣ်တၢ်နီတစဲးဘၣ်. တနီၤနီၤန့ၣ် ထံၣ်တၢ်တစဲးတစဲးန့ၣ်လီၤ. ­လၢတၢ်န့ၣ်အဃိ နကဘၣ်မၤစၢၤအီၤဒ်လဲၣ်န့ၣ် ဒိးသန့ၤထီၣ်အသးလၢ ­တၢ်အိၣ်အသးအံၤအဖီခိၣ်လီၤ. နမၤစၢၤအီၤမ့ၢ်ဝံၤန့ၣ် ­တဲဘၣ်အီၤလၢ နမ့ၢ်ပှၤလၢအပၣ်ဃုာ်လၢ တၢ်ဒုးသ့ၣ်ညါနၢ်ပၢၢ်လံာ်စီဆှံအတၢ်မၤတက့ၢ်. ဒီးနဖးန့ၢ်အီၤ စံးထီၣ်ပတြၢၤ ၁၄၆:၈ မ့တမ့ၢ် ယၡါယၤ ၃၅:၅, ၆ ­သ့စ့ၢ်ကီးလီၤ. အဝဲဖးဝဲပှၤမဲာ်တထံၣ်တၢ်အလံာ် မ့ၢ်သ့ဒီးသံကွၢ်အီၤလၢ မ့ၢ်နအဲၣ်ဒိးဖး ပှၤမဲာ်တထံၣ်တၢ်အလံာ်အလဲၢ်လၢ ကမၤစၢၤနၤဒ်သိး နကသ့ၣ်ညါအါထီၣ် လံာ်စီဆှံအဂ့ၢ်စ့ၢ်ကီးဧါ. နမၤစၢၤအီၤလၢ အဝဲကဒိးန့ၢ်ဘၣ်ဝဲ တၢ်ကလုၢ်လၢ jw.org အပူၤသ့န့ၣ်လီၤ. အဝဲအခီၣ်ဖၠူထၢၣ် မ့ၢ်အိၣ်ဒီးတၢ်ရဲၣ်တၢ်ကျဲၤလၢ အဖးသီၣ်လံာ်န့ၣ် နမၤစၢၤအီၤလၢ ကဒီလိးလံာ်လဲၢ်တဖၣ်လၢ RTF (Rich Text Format) သ့စ့ၢ်ကီးလီၤ. —ကွၢ်တၢ်လွံၢ်နၢၣ်လၢအမ့ၢ် “ဖဲနမၤစၢၤ ပှၤမဲာ်တထံၣ်တၢ်တဂၤအခါ နကဘၣ်မၤဒ်လဲၣ်” န့ၣ်တက့ၢ်.

၃. လၢပတၢ်စံၣ်တဲၤတဲလီၤတၢ် ဟီၣ်ကဝီၤအပူၤန့ၣ် ပဃုထံၣ်န့ၢ် ပှၤမဲာ်တထံၣ်တၢ်တဖၣ် ကသ့ဒ်လဲၣ်.

^၃ ဃုပှၤမဲာ်တထံၣ်တၢ်တက့ၢ်– ဖဲပလဲၤတဟံၣ်ဘၣ်တဟံၣ်အဆၢကတီၢ် ညီနုၢ်ပတကတိၤတၢ်ဒီး ပှၤမဲာ်တထံၣ်တၢ်တဖၣ်ဘၣ်. မ့ၢ်လၢပှၤတမှံၤမ့ၢ်ဟဲလၢ အဟံၣ်န့ၣ် အဝဲသ့ၣ်တဲတၢ်တဘူၣ်ဘၣ်အဃိလီၤ. လၢတၢ်န့ၣ်အဃိ ပကဘၣ်ဂုာ်ကျဲးစၢး ‘ဃုထံၣ်န့ၢ်’ ­ပှၤသ့ၣ်တဖၣ်အံၤ လၢပကတဲဘၣ်အီၤ တၢ်သးခုကစီၣ်အဂီၢ်လီၤ. (မး. ၁၀:၁၁, ခ့ခါစှီၤကျိာ်) ဖဲနတၢ်မၤအလီၢ် မ့တမ့ၢ် လၢကၠိန့ၣ် ပှၤမဲာ်တထံၣ်တၢ် အိၣ်တဂၤဂၤဧါ. မ့ၢ်အိၣ်န့ၣ် ဟံးန့ၢ်တၢ်ခွဲးတၢ်ယာ်လၢ နကကတိၤတၢ်ဒီးအီၤတက့ၢ်. လၢနတၢ်စံၣ်တဲၤတဲလီၤတၢ် ဟီၣ်ကဝီၤအပူၤ ပှၤမဲာ်တထံၣ်တၢ်အကၠိအိၣ်ဧါ. မ့ၢ်အိၣ်န့ၣ် ­လဲၤဟ့ၣ်လီၤ ပှၤမဲာ်တထံၣ်တၢ်အလံာ်လဲၢ်တဖၣ် လၢကၠိအလံာ်ရိဒၢးအဂီၢ်န့ၣ်တက့ၢ်. ပှၤလၢ အိၣ်ဒီးအဟံၣ်ဖိဃီဖိတဂၤလၢ အမဲာ်တထံၣ်တၢ်န့ၣ် မ့ၢ်နသ့ၣ်ညါတဂၤဂၤဧါ. လၢနတၢ်စံၣ်တဲၤတဲလီၤတၢ် ဟီၣ်ကဝီၤအပူၤ တၢ်ကရၢကရိလၢ အမၤစၢၤပှၤမဲာ်တထံၣ်တၢ်န့ၣ် အိၣ်တခါခါဧါ မ့တမ့ၢ် တၢ်သူၣ်ထီၣ်လၢ အမၤစၢၤပှၤမဲာ်တထံၣ်တၢ်န့ၣ် အိၣ်ဧါ. မ့ၢ်အိၣ်န့ၣ် တဲနၢ်ပၢၢ် ပှၤမဲာ်တထံၣ်တၢ်အဟံၣ်ဖိဃီဖိတဂၤ, ပှၤတူၢ်လိာ်တမှံၤ မ့တမ့ၢ် ပှၤလၢအတီခိၣ်ရိၣ်မဲတၢ်တဂၤလၢ ယဟိဝၤပှၤအုၣ်အသးတဖၣ် အဲၣ်ဒိးမၤစၢၤပှၤမဲာ်တထံၣ်တၢ်ဒီး ဟ့ၣ်လီၤအီၤ ပှၤမဲာ်တထံၣ်တၢ်အလံာ်လဲၢ်တဖၣ် ­ဒီးတၢ်ကလုၢ်လၢ အဝဲသ့ၣ်ကဒိကနၣ်အဂီၢ်တက့ၢ်. ဒုးနဲၣ်စ့ၢ်ကီးအီၤလံာ်စီဆှံအတၢ်စံးပာ်လၢ စံးဝဲဒၣ် တယံာ်လၢၤဘၣ် ကစၢ်ယွၤကမၤဘျါက့ၤ ­ပှၤမဲာ်တထံၣ်တၢ်တဖၣ်န့ၣ်တက့ၢ်. ဘၣ်သ့ၣ်သ့ၣ်နကအဲၣ်ဒိးဒုးနဲၣ်အီၤ တၢ်ဂီၤမူလၢ အခိၣ်တီမ့ၢ်ဝဲ “Without It, I Would Feel Lost,” လၢ jw.org အပူၤလီၤ. တၢ်ဂီၤမူအံၤပာ်ဖျါထီၣ်ဝဲ ပှၤလၢအမဲာ်တထံၣ်တၢ်တဂၤ အတၢ်လဲၤခီဖျိန့ၣ်လီၤ. ခီဖျိလၢအဝဲဒိးန့ၢ်ဘၣ်ဝဲ လံာ်စီဆှံလၢပှၤကွဲးအီၤလၢ ပှၤမဲာ်တထံၣ်တၢ်အဂီၢ်အဃိ ကဲဘျုးလၢအဂီၢ်လီၤ. ပမ့ၢ်တဲနၢ်ပၢၢ်အဝဲသ့ၣ်လၢ ဘၣ်မနုၤအဃိ ပဟဲလၢအအိၣ်လဲၣ်န့ၣ် ဘၣ်သ့ၣ်သ့ၣ် ပကဒိးန့ၢ်ဘၣ်တၢ်ခွဲးတၢ်ယာ်လၢ ပကတဲသကိးဘၣ်တၢ်ဒီး ­ပှၤမဲာ်တထံၣ်တၢ်တဖၣ်န့ၣ်လီၤ.

၄. ကၠဲနဲးအတၢ်လဲၤခီဖျိန့ၣ် သိၣ်လိပှၤတၢ်မနုၤလဲၣ်.

^၄ ဒီပုၢ်ဝဲၢ်မုၣ်လၢ အမဲာ်တထံၣ်တၢ်တဂၤ လၢအမံၤမ့ၢ်ကၠဲနဲးန့ၣ် လဲၤဝဲဆူတၢ်သူၣ်ထီၣ်လၢ ပှၤမဲာ်တထံၣ်တၢ်တဖၣ် အိၣ်ဝဲအလီၢ်န့ၣ်လီၤ. ဒီးအဝဲစးထီၣ်ကတိၤတၢ်ဒီး သးစၢ်မုၣ်ဖိတဂၤလီၤ. ကၠဲနဲးစံးဘၣ်ပိာ်မုၣ်ဖိတဂၤအံၤလၢ “ယ့ၣ်ၡူးမၤဘျါဝဲ ပှၤမဲာ်တထံၣ်တၢ်တဖၣ် ­ဒ်သိးကပာ်ဖျါထီၣ်ဝဲ တၢ်လၢအကမၤဝဲခါဆူညါ လၢပှၤမဲာ်တထံၣ်တၢ်အဂီၢ်န့ၣ်လီၤ.” အဝဲသ့ၣ်ကတိၤသကိးဝဲ လီၣ်ဖျါ ၂၁:၃, ၄ ဒီးကၠဲနဲးတဲနၢ်ပၢၢ်အီၤလၢ တၢ်စံးပာ်တဖၣ်အံၤ ကဟဲလၢပှဲၤထီၣ် ခီဖျိလၢယွၤအဘီအမုၢ်န့ၣ်လီၤ. ပိာ်မုၣ်ဖိအံၤအိၣ်ဘှီၣ်ကလာ်တစိၢ်ဖိဝံၤဒီးစံးဝဲ “ယတနၢ်ဟူဘၣ် ပှၤမဲာ်တထံၣ်တၢ်တဂၤ တဲတၢ်ဒ်အံၤနီတဘျီဘၣ်. အါတက့ၢ် ပှၤလၢအထံၣ်တၢ်တဖၣ်နာ်ဝဲလၢ ပှၤမဲာ်တထံၣ်တၢ်န့ၣ် ကဲထီၣ်အသးခီဖျိလၢ အမိၢ်ပၢ်ဖံဖုအတၢ်ကမၣ် မ့တမ့ၢ် အနီၢ်ကစၢ်အတၢ်ကမၣ်အဃိလီၤ.” လၢခံကၠဲနဲးဆှၢန့ၢ်အီၤ လံာ်စီဆှံသိၣ်လိတၢ်နီၢ်နီၢ် မ့ၢ်မနုၤလဲၣ်လၢ အံမ့လ်ဒီး အဝဲသ့ၣ်မၤလိလံာ်စီဆှံ တနွံခံဘျီန့ၣ်လီၤ.

၅. ဒ်ယ့ၣ်ၡူးမၤဘျါဝဲ ပှၤမဲာ်တထံၣ်တၢ်အသိး ပမ့ၢ်ပာ်ဖျါထီၣ်တၢ်သူၣ်အိၣ်သးအိၣ် ပှၤမဲာ်တထံၣ်တၢ်တဖၣ်ဒီး မၤစၢၤအဝဲသ့ၣ်န့ၣ် ပကဒိးန့ၢ်ဘၣ် တၢ်ဆိၣ်ဂ့ၤမနုၤလဲၣ်.

^၅ ပမၤဘျါပှၤမဲာ်တထံၣ်တၢ် ဒ်ယ့ၣ်ၡူးမၤဝဲအသိး တသ့ဘၣ်. ဘၣ်ဆၣ် ပှၤလၢဟီၣ်ခိၣ်အကစၢ်မၤခံးအမဲာ် လၢပၣ်ဃုာ်ဒီး ပှၤလၢအမဲာ်တထံၣ်တၢ်တဖၣ်န့ၣ် ဒ်သိးကနၢ်ပၢၢ်ထီၣ်ယွၤအကလုၢ်ကထါ တၢ်မ့ၢ်တၢ်တီအဂီၢ် ပမၤစၢၤအဝဲသ့ၣ်သ့ဝဲလီၤ. (၂ ကရံၣ်. ၄:၄) ­ဖဲယ့ၣ်ၡူး အိၣ်ဘူးဒီးဝ့ၢ်ယရံၤဃိအခါ “သးကညီၤ” ဝဲ ပှၤမဲာ်တထံၣ်တၢ်ခံဂၤအဃိ မၤဘျါက့ၤအဝဲသ့ၣ်လီၤ. (မး. ၂၀:၃၄) ပမ့ၢ်ကွၢ်လိယ့ၣ်ၡူး ဒီးပာ်ဖျါထီၣ် တၢ်သးအိၣ် ပှၤမဲာ်တထံၣ်တၢ်တဖၣ်န့ၣ် ပကဒိးန့ၢ်ဘၣ်တၢ်ခွဲးတၢ်ယာ်လၢ ပကမၤစၢၤအဝဲသ့ၣ်လၢ ကမၤလိ ­ယဟိဝၤယွၤ, ကစၢ်လၢကမၤဘျါက့ၤ ပှၤမဲာ်တထံၣ်တၢ်ကိးဂၤဒဲးအဂ့ၢ်န့ၣ်လီၤ.