“တၢ်ကတိၤတဖၣ်န့ၣ် . . . ဘၣ်အိၣ်လၢနသးကံၢ်ပူၤ”

မိၢ်ပၢ်န့ၣ်လီၤဂာ် ဒီးပှၤကွၢ်သိတဖၣ်လီၤ. ဖိသ့ၣ်တဖၣ် မ့ၢ်ပှၤလၢအဟးဖျိးကျဲညီ ဒီးဘၣ်ဒိဘၣ်ထံးညီအဃိ မိၢ်ပၢ်န့ၣ်ကဘၣ်ကွၢ်ထွဲ အဝဲသ့ၣ်ဂ့ၤဂ့ၤလီၤ. (ကတိၤ. ၂၇:၂၃) မိၢ်ပၢ်တဖၣ် မၤလၢပှဲၤအမူဒါကသ့ဒ်လဲၣ်. မိၢ်ပၢ်တဖၣ်န့ၣ် ဒ်သိးကသ့ၣ်ညါအဖိတဖၣ် အတၢ်ဆိကမိၣ် ဒီးအတၢ်ပာ်သူၣ်ပာ်သးအဂီၢ် ကဘၣ်ဟ့ၣ်တၢ်ဆၢကတီၢ်လၢ ကရ့လိာ်သးဒီးအဖိကိးနံၤဒဲးလီၤ. (ကတိၤ. ၂၀:၅) တကးဒံးဘၣ် မိၢ်ပၢ်တဖၣ် ဒ်သိးအဖိတဖၣ် အတၢ်စူၢ်တၢ်နာ်ကဂၢၢ်ကျၢၤထီၣ်အဂီၢ် အဝဲသ့ၣ်ကဘၣ်သူၣ်ထီၣ်တၢ်ဃုာ် ဒီးတၢ်ပီးတၢ်လီလၢ မ့ၣ်အူအီၣ်အီၤတသ့ဘၣ်န့ၣ်လီၤ. (၁ ကရံၣ်. ၃:၁၀–၁၅) တၢ်ဂီၤမူလၢအမ့ၢ် “ဒီစကားတွေကို နှလုံးသွင်းရမယ်။” အံၤဒုးသ့ၣ်ညါပှၤလၢ ဟံၣ်ဖိဃီဖိတၢ်မၤလိလံာ်စီဆှံဘၣ်ဆၢဘၣ်ကတီၢ်န့ၣ် မ့ၢ်တၢ်လၢအရ့ဒိၣ်န့ၣ်လီၤ. ကွၢ်တၢ်ဂီၤမူအံၤဒီး နဟံၣ်ဖိဃီဖိ ဒီးတဲသကိးတၢ်သံကွၢ်လၢ လာ်တဖၣ်အံၤတက့ၢ်.

(၁) ဒီပုၢ်ဝဲၢ်ရိမဲၢ်အဟံၣ်ဖိဃီဖိ အနီၢ်သးအဂံၢ်အဘါလီၤစၢ်လၢ တၢ်ဂ့ၢ်မနုၤအဃိလဲၣ်. (၂) ဒီပုၢ်ဝဲၢ်ရိမဲၢ်အတၢ်ဂုာ်ကျဲးစၢးလၢ ကမၤဟံၣ်ဖိဃီဖိတၢ်မၤလိလံာ်စီဆှံန့ၣ် ဘၣ်မနုၤအဃိတကဲထီၣ်လိၣ်ထီၣ်တဘျီဃီဘၣ်လဲၣ်. (၃) မိၢ်ပၢ်တဖၣ် ဒ်သိးအတၢ်ကွၢ်ဒိၣ်ထီၣ်အဖိ ကကဲထီၣ်လိၣ်ထီၣ်အဂီၢ် လံာ်စီဆှံအဆၢဖဲလဲၣ်တဆၢမၤစၢၤအီၤသ့လဲၣ်. (၅ မိၤ. ၆:၆, ၇) (၄) ဒ်သိးဟံၣ်ဖိဃီဖိ အတၢ်ရ့လိာ်ကဂ့ၤထီၣ်အဂီၢ်တၢ်မနုၤမၤစၢၤပှၤသ့လဲၣ်. (၅) ဖိသ့ၣ်တဖၣ်လိၣ်ဘၣ် တၢ်မနုၤလၢမိၢ်ပၢ်အအိၣ်လဲၣ်. (၆) ဒီပုၢ်ဝဲၢ်မုၣ်ဒီးဒီပုၢ်ဝဲၢ်ခွါ ဘါရိၣ်အဒိအတဲာ်လၢအဂ့ၤန့ၣ် ကဲဘျုးလၢဒီပုၢ်ဝဲၢ်ရိမဲၢ်အဟံၣ်ဖိဃီဖိအဂီၢ်ဒ်လဲၣ်. (ကတိၤ. ၂၇:၁၇) (၇) ဒ်သိးအဟံၣ်ဖိဃီဖိတၢ်မၤလိလံာ်စီဆှံ ကကဲထီၣ်လိၣ်ထီၣ်အဂီၢ် ဟံၣ်ခိၣ်န့ၣ်ကဘၣ်မၤဝဲ တၢ်မနုၤလဲၣ်. (၈) ဒ်သိးအဟံၣ်ဖိဃီဖိတၢ်ဘၣ်လိာ်ဖိးဒ့ ကအိၣ်ထီၣ်အဂီၢ် ဒီပုၢ်ဝဲၢ်ရိမဲၢ်မၤဝဲတၢ်မနုၤလဲၣ်. (၉) ဟံၣ်ဖိဃီဖိတၢ်မၤလိလံာ်စီဆှံန့ၣ် ဘၣ်မနုၤအဃိပကြၢးမၤအီၤထီဘိလဲၣ်. (အ့း. ၆:၄) (၁၀) လၢဟံၣ်ဖိဃီဖိတၢ်မၤလိလံာ်စီဆှံအဂီၢ် တၢ်ဟ့ၣ်ကူၣ်မနုၤအိၣ်လဲၣ်. (၁၁) ဒီပုၢ်ဝဲၢ်ခွါရိမဲၢ်န့ၣ်အိၣ်ဒီးတၢ်သးစူၤ ဘၣ်ဆၣ်ဖဲ အသိၣ်ဝဲအဖိခွါ မါခၢၣ်စ် လၢကမၤတၢ်လၢအဘၣ်အဂီၢ်အခါ ပာ်အသးဂၢၢ်ဂၢၢ်ကျၢၤကျၢၤဒ်လဲၣ်. (ယံး. ၁၇:၉) (၁၂) ဒ်သိးအဖိမုၣ်ရံးဘဲးကၤ ကဆၢတဲာ်တၢ်လၢအဘၣ် ဘၣ်ဃးဒီးအတၢ်ရ့လိာ်သးဒီး ကၠဲးစတၢၢ်န့ၣ် ဒီပုၢ်ဝဲၢ်မုၣ်ဒီးဒီပုၢ်ဝဲၢ်ခွါ ရိမဲၢ်မၤစၢၤဝဲလၢကျဲဒ်လဲၣ်. (မၢ်. ၁၂:၃၀; ၂ တံၤ. ၂:၂၂) (၁၃) ဖဲဒီပုၢ်ဝဲၢ်မုၣ်ဒီး ဒီပုၢ်ဝဲၢ်ခွါရိမဲၢ် ဂုာ်ကျဲးစၢးဆီတလဲအတၢ်အိၣ်မူအခါ အဝဲသ့ၣ်ပာ်ဖျါထီၣ်အတၢ်နာ်ဒ်လဲၣ်. (မး. ၆:၃၃) (၁၄) ဟံၣ်ခိၣ်တဖၣ်န့ၣ် အရ့ဒိၣ်လၢအဝဲသ့ၣ်ကကတဲာ်ကတီၤန့ၢ် နီၢ်သးတၢ်အီၣ်တၢ်အီလၢ အဟံၣ်ဖိဃီဖိအဂီၢ်န့ၣ် တၢ်ဂီၤမူအံၤပာ်ဖျါထီၣ်ဝဲဒ်လဲၣ်. (၁ တံၤ. ၅:၈) (၁၅) ဒ်ဟံၣ်ခိၣ်တဂၤအသိး နပာ်လီၤနသးလၢနကမၤမနုၤလဲၣ်.

တၢ်ဟ့ၣ်ပလီၢ်လၢ ဟံၣ်ခိၣ်တဖၣ်အဂီၢ်–၂၀၁၁ ကီၢ်ရ့ၣ်တၢ်အိၣ်ဖှိၣ်န့ၣ် ပၣ်ဃုာ်ဒီး တၢ်ဂဲၤဒိပူလၢပစိၤခဲအံၤတခါလီၤ. ဖဲန့ၣ်အဆၢကတီၢ် မ့ၢ်နသ့ၣ်ညါလီၤနသးလၢ နဘၣ်မၤဂ့ၤထီၣ် နဟံၣ်ဖိဃီဖိတၢ်မၤလိလံာ်စီဆှံန့ၣ်ဧါ. မ့မ့ၢ်ခဲအံၤန့ၣ် နဟံၣ်ဖိဃီဖိတၢ်မၤလိလံာ်စီဆှံ မၤအသးဒ်လဲၣ်. နမ့ၢ်ဘၣ်မၤဂ့ၤထီၣ်အီၤန့ၣ် ဝံသးစူၤဃ့ဘါထုကဖၣ် လၢနကဆီတလဲနတၢ်အိၣ်အသးဒ်သိး နဟံၣ်ဖိဃီဖိကဒိးန့ၢ်ဘၣ် တၢ်အဘျုးထီဘိန့ၣ်တက့ၢ်.—အ့း. ၅:၁၅–၁၇.