သိၣ်လိတၢ်မ့ၢ်တၢ်တီတက့ၢ်

စးထီၣ်လၢလါစဲးပတ့ဘၢၣ်န့ၣ် ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ ကပၣ်ဃုာ်ဒီးတၢ်အဒိအသီလၢ တၢ်နီၤလီၤလံာ်လဲၢ်အဂီၢ် လၢအမ့ၢ် “သိၣ်လိတၢ်မ့ၢ်တၢ်တီတက့ၢ်” န့ၣ်လီၤ. ပတၢ်တိာ်ပာ်န့ၣ်မ့ၢ်ဝဲ ပကသူတၢ်သံကွၢ် ဒီးလံာ်စီဆှံအဆၢလၢ ပကပာ်ဖျါထီၣ် လံာ်စီဆှံတၢ်မ့ၢ်တၢ်တီ အခီၣ်ထံးခီၣ်ဘိအဂီၢ်လီၤ.

ပှၤမ့ၢ်သးအိၣ်တၢ်မ့ၢ်တၢ်တီန့ၣ် ဟ့ၣ်လီၤအီၤလံာ်ဖိ မ့တမ့ၢ် လံာ်လဲၢ်အဂၤတဘ့ၣ် မ့တမ့ၢ် အိးထီၣ်ပၠးတၢ်ဂီၤမူလၢ jw.org ဒီးဒုးအိၣ်ထီၣ်တၢ်ခွဲးတၢ်ယာ်လၢ ကက့ၤအိၣ်သကိးဟံၣ်ကစၢ် လၢခံတဘျီအဂီၢ်တက့ၢ်. ပတဲသကိးတၢ်ဝံၤ စှၤသီအတီၢ်ပူၤန့ၣ် ပကြၢးဂုာ်ကျဲးစၢးဒ်သိး ပကက့ၤအိၣ်သကိးက့ၤအီၤလီၤ. တၢ်အဒိအသီလၢ တၢ်နီၤလီၤလံာ်အဂီၢ် ဒီးကၠိဖိမူဒါတဖၣ်အံၤန့ၣ် ဘၣ်တၢ်ဒိးသန့ၤထီၣ်အီၤလၢ လံာ်လၢအမ့ၢ် “လံာ်စီဆှံကသိၣ်လိပှၤ တၢ်ဂ့ၢ်မနုၤလဲၣ်” တၢ်ကွၢ်ကဒါက့ၤအပူၤလီၤ. ဖဲန့ၣ်န့ၣ် ပကထံၣ်ဘၣ် တၢ်သံကွၢ်တဖၣ်ဒီး လံာ်စီဆှံအဆၢတဖၣ်လၢ ကမၤစၢၤပှၤဒ်သိး ပကက့ၤအိၣ်သကိးဟံၣ်ကစၢ်အဂီၢ် ဒီးကမၤစၢၤပှၤဒ်သိး ပသူထဲလံာ်စီဆှံတဘ့ၣ်ဒီး ပစးထီၣ်မၤတၢ်မၤလိလံာ်စီဆှံဒီး ပှၤဂၤကသ့အဂီၢ်လီၤ.

ကျဲလၢကဆှၢပှၤဆူတၢ်မူန့ၣ် အိၣ်ထဲတဘိလီၤ. (မး. ၇:၁၃, ၁၄) ပထံၣ်ဘၣ်ပှၤလၢတၢ်ဘူၣ်တၢ်ဘါ ဒီးတၢ်အိၣ်သးအိၣ်ဝဲ အကလုာ်ကလုာ်အဃိ ပကဘၣ်တဲလံာ်စီဆှံတၢ်မ့ၢ်တၢ်တီလၢ အဝဲသ့ၣ်တဂၤစုာ်စုာ် ကသးစၢၢ်ဆၢဝဲဒၣ်န့ၣ်လီၤ. (၁ တံၤ. ၂:၄) ပမ့ၢ်မၤဒ်န့ၣ်န့ၣ် ပကသ့ၣ်ညါအါထီၣ် လံာ်စီဆှံတၢ်ဂ့ၢ်တၢ်ကျိၤတဖၣ် ဒီးပတၢ်သ့တၢ်ဘၣ်လၢတၢ် “နီၤဖးတၢ်မ့ၢ်တၢ်တီ” န့ၣ်ကလဲၤထီၣ်လဲၤထီဝဲ ဒီးပတၢ်သးခုကအါထီၣ်ဝဲလီၤ. ဒီးပကလဲၤထီၣ်လဲၤထီစ့ၢ်ကီးလၢ တၢ်သိၣ်လိပှၤဂၤတၢ်မ့ၢ်တၢ်တီလီၤ.—၂ တံၤ. ၂:၁၅.