အိၣ်မူဒ် ခရံာ်ဖိအသိး
ပှၤလၢနဆီဟံၣ်ဆီဃီဒီးအီၤတဂၤန့ၣ် အကဲဝဲနသးသမူတံၤသကိး လၢတစိၤသးအဂီၢ်
ခရံာ်ဖိနီၢ်ဒီမိၢ်ဝၤလၢ အတၢ်ဆီဟံၣ်ဆီဃီ လဲၤသးလၢ အဂ့ၢ်အဝီန့ၣ် ကဲထီၣ်တၢ်လၤကပီၤလၢ ယဟိဝၤယွၤအဂီၢ် ဒီးကမၤသးခု အဝဲသ့ၣ်ခံဂၤစ့ၢ်ကီး. (မၢ်. ၁၀:၉) ခရံာ်ဖိတဂၤန့ၣ် ဒ်သိးအတၢ်ဆီဟံၣ်ဆီဃီ ကဂၢၢ်ကျၢၤ ဒီးကအိၣ်ဒီးတၢ်သးခုအဂီၢ် ဖဲအဃုထၢ အသးသမူတံၤသကိးအခါ အကဘၣ်မၤထွဲ လံာ်စီဆှံ အတၢ်ဟံးစုနဲၣ်ကျဲ.
တချုးလၢန “လဲၤပူၤကွံာ် ပှၤသးစၢ်အတၢ်သးကတၢ အသဟီၣ်ဆူၣ်အကတီၢ်” ဒံးဘၣ်န့ၣ် တဘၣ်ပာ်တၢ်အဲၣ်တီတဂ့ၤ. (၁ ကရံၣ်. ၇:၃၆) ဖဲနအိၣ်သဘျ့အခါ သူနတၢ်ဆၢကတီၢ် လၢအဂ့ၤကတၢၢ် ခီဖျိ မၤဂၢၢ်ကျၢၤထီၣ် နတၢ်ရ့လိာ်သးဒီး ယဟိဝၤယွၤ ဒီးမၤအါထီၣ် ခရံာ်ဖိအတၢ်ဂ့ၤတၢ်ဝါတဖၣ်. နမ့ၢ်မၤဒ်န့ၣ်န့ၣ် လၢခံ ဖဲနဆီဟံၣ်ဆီဃီအခါ ကကဲထီၣ် တၢ်မၤစၢၤလၢ နတၢ်ဆီဟံၣ်ဆီဃီ ကလဲၤသးလၢ အဂ့ၢ်အဝီ.
တချုး နအၢၣ်လီၤလၢ နကဆီဟံၣ်ဆီဃီဒီး ပှၤတဂၤဒံးဘၣ်န့ၣ် ဟံးန့ၢ်တၢ်ဆၢကတီၢ်လၢ နကဃုသ့ၣ်ညါ “တၢ်လၢ အအိၣ်ခူသူၣ်အသး” လၢအ “သူၣ်ကံၢ်သးလဲအပူၤ.” (၁ ပ့း. ၃:၄) နတၢ်သးဒ့ဒီ မ့ၢ်အိၣ်တမံၤမံၤန့ၣ် တဲသကိးတၢ်ဒီး ပှၤလၢနကဆီဟံၣ်ဆီဃီဒီးအီၤတဂၤန့ၣ်. နတကြၢး သးစၢၢ်ဆၢထဲ တၢ်လၢနသးသမူတံၤသကိး ကမၤန့ၢ်နၤတဖၣ်ဘၣ်. နကဘၣ်သးစၢၢ်ဆၢအါလၢ နမၤစၢၤနသးသမူတံၤသကိးကသ့ဒ်လဲၣ်. (ဖံလံး. ၂:၃, ၄) တချုးလၢ နဆီဟံၣ်ဆီဃီဒံးဘၣ်အခါ နမ့ၢ်မၤထွဲ လံာ်စီဆှံ အတၢ်ဟံးစုနဲၣ်ကျဲန့ၣ် ဖဲနဆီဟံၣ်ဆီဃီ ဝံၤအလီၢ်ခံ ကညီလၢ နကမၤထွဲ လံာ်စီဆှံ အတၢ်ဟံးစုနဲၣ်ကျဲ. အဃိ နတၢ်ဆီဟံၣ်ဆီဃီန့ၣ် ကအိၣ်ဒီးတၢ်သးခု.
ကွၢ်တၢ်ဂီၤမူလၢအမ့ၢ် ကတဲာ်ကတီၤပာ်သးလၢ တၢ်ဆီဟံၣ်ဆီဃီအဂီၢ်—အကူာ် ၃– ‘ဒွးဆိတၢ်လၢာ်ဘူၣ်လၢာ်စ့ၤ’ ဒီးစံးဆၢတၢ်သံကွၢ် လၢလာ်တဖၣ်အံၤ–
ဒီပုၢ်ဝဲၢ်မုၣ်တဂၤ ဒီးဒီပုၢ်ဝဲၢ်ခွါၡ့န့ၣ် ဖဲအဒီတၢ်အဲၣ်တီအခါ အဝဲသ့ၣ် ဃုသ့ၣ်ညါလိာ်သးဂ့ၢ်ဒ်လဲၣ်.
ဖဲဒီပုၢ်ဝဲၢ်မုၣ်တဂၤအံၤ ဃုသ့ၣ်ညါအါထီၣ် ဒီပုၢ်ဝဲၢ်ခွါၡ့အဂ့ၢ်အခါ အသ့ၣ်ညါဘၣ်ဝဲ တၢ်မနုၤလဲၣ်.
ဒီပုၢ်ဝဲၢ်မုၣ်တဂၤအံၤ အမိအပါ မၤစၢၤအီၤဒ်လဲၣ် ဒီးအဝဲဆၢတဲာ်တၢ် လၢတၢ်ကူၣ်သ့အပူၤ ဒ်လဲၣ်.