တၢ်မၤလိ ၁၉
တၢ်လၢကမၤလီၤဃံၢ် ပှၤတီပှၤလိၤန့ၣ် တအိၣ်နီတမံၤဘၣ်
“ပှၤလၢအအဲၣ် နတၢ်သိၣ်တၢ်သီတဖၣ်န့ၣ် အိၣ်ဒီးတၢ်ဃူတၢ်ဖိးအါမးလီၤ. ဒီးတၢ်လီၤဃံၤအလီၢ် တအိၣ်ဘၣ်ဒီးအီၤဘၣ်.”—စံးထီၣ်ပတြၢၤ ၁၁၉:၁၆၅.
တၢ်သးဝံၣ် ၁၂၂ အိၣ်စံာ်အိၣ်ကျၢၤ, အိၣ်ဂၢၢ်ဆိးကျၢၤတက့ၢ်
တၢ်မၤလိအံၤ အတၢ်တိာ်ပာ်a
၁-၂. ပှၤကွဲးလံာ်ဖိတဂၤ တဲဝဲဒ်လဲၣ် ဒီးလၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.
မုၢ်မဆါတနံၤအံၤ ပှၤလၢအကကွဲၢ်တဖၣ် တဲဝဲလၢအဝဲသ့ၣ်နာ်ယ့ၣ်ၡူး ဘၣ်ဆၣ် အဝဲသ့ၣ်တအိၣ်မူမၤထွဲ တၢ်လၢယ့ၣ်ၡူးသိၣ်လိဝဲတဖၣ်ဘၣ်. (၂ တံၤမသ့း ၄:၃, ၄) ပှၤကွဲးလံာ်ဖိတဂၤ တဲဝဲလၢ “မုၢ်မဆါတနံၤအံၤ ပှၤလၢအလီၤဂာ်ဒီးယ့ၣ်ၡူး ဒီးတဲတၢ်ဒ်ယ့ၣ်ၡူးအသိးမ့ၢ်အိၣ်န့ၣ် . . . မ့ၢ်ပှၤကတူၢ်လိာ်အီၤဒ် ပှၤတတူၢ်လိာ်တ့ၢ်ယ့ၣ်ၡူးလၢ အပူၤကွံာ်အနံၣ်ခံကထိ န့ၣ်ဧါ. . . . အတၢ်စံးဆၢန့ၣ် မ့ၢ်ပှၤတတူၢ်လိာ်အီၤဘၣ်.”
၂ လၢယ့ၣ်ၡူးအစိၤန့ၣ် ပှၤအါဂၤထံၣ်ဘၣ် ယ့ၣ်ၡူးသိၣ်လိတၢ်ဒီး မၤဝဲတၢ်လီၤလးတဖၣ် ဘၣ်ဆၣ် အဝဲသ့ၣ်တနာ်ယ့ၣ်ၡူးဘၣ်. ဘၣ်မနုၤအဃိလဲၣ်. ဒ်တၢ်မၤလိလၢအပူၤကွံာ်တခါ အသိး ပမၤလိဘၣ် တၢ်ဂ့ၢ်လွံၢ်ထံၣ်လၢ ပှၤတနီၤတတူၢ်လိာ် ယ့ၣ်ၡူးခီဖျိ ယ့ၣ်ၡူးအတၢ်ကတိၤဒီး တၢ်လၢအမၤဝဲတဖၣ်လီၤ. ခဲအံၤ ပကကွၢ်သကိးအါထီၣ် တၢ်ဂ့ၢ်လွံၢ်ထံၣ်လီၤ. ဖဲပမၤလိသကိး တၢ်ဂ့ၢ်အံၤအခါ ပကသ့ၣ်ညါထီၣ်လၢ မုၢ်မဆါတနံၤအံၤ ဘၣ်မနုၤအဃိ ပှၤတနီၤတတူၢ်လိာ်ယ့ၣ်ၡူးအပျဲၢ်အဘီၣ်တဖၣ်လဲၣ် ဒီးပကဟးဆှဲး တၢ်လၢကမၤပတုာ်ပှၤလၢ ပကမၤယဟိဝၤယွၤအတၢ်မၤ ကသ့ဒ်လဲၣ်န့ၣ်လီၤ.
(၁) ယ့ၣ်ၡူးတကွၢ်ဒိၣ်ဆံးအါစှၤတၢ်ဘၣ်
ပှၤအါဂၤတတူၢ်လိာ်ယ့ၣ်ၡူးဘၣ် ခီဖျိလၢ ယ့ၣ်ၡူးအတၢ်ရ့တံၤရ့သကိးတဖၣ်အဃိလီၤ. ဒ်ပှၤတတူၢ်လိာ် ယ့ၣ်ၡူးဘၣ်အသိး မုၢ်မဆါတနံၤအံၤ ပှၤတတူၢ်လိာ် ပတၢ်သးခုကစီၣ် လၢကျဲဒ်လဲၣ်. (ကွၢ်လံာ်အဆၢ ၃)b
၃. ဘၣ်မနုၤဃိ ပှၤတနီၤနီၤတတူၢ်လိာ် ယ့ၣ်ၡူးဘၣ်လဲၣ်.
၃ ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ အဝဲရ့ဒီးပှၤကိးဂၤဒဲးလီၤ. ယ့ၣ်ၡူးအီၣ်သကိးတၢ်ဒီး ပှၤထူးပှၤတီၤ ဒီးပှၤဒိၣ်ပှၤပှၢ်တဖၣ်လီၤ. ဘၣ်ဆၣ် အါဒၣ်တက့ၢ်န့ၣ် ယ့ၣ်ၡူးရ့ဒီး ပှၤဖှီၣ်ဖိယာ်ဖိ ဒီးပှၤလၢအမၤစၢၤလီၤ အနီၢ်ကစၢ်အသးတသ့ဘၣ်တဖၣ်လီၤ. တကးဒံးဘၣ် ယ့ၣ်ၡူးသးကညီၤဘၣ်ဝဲ ပှၤလၢပှၤကိးအီၤလၢ “ပှၤတၢ်ဒဲးဘးဖိတဖၣ်” လီၤ. မ့ၢ်လၢယ့ၣ်ၡူးမၤဝဲဒ်အံၤအဃိ ပှၤလၢအပာ်ထီၣ်ထီအသးတနီၤန့ၣ် တတူၢ်လိာ်အီၤဘၣ်. အဝဲသ့ၣ်သံကွၢ် ယ့ၣ်ၡူးအပျဲၢ်အဘီၣ်တဖၣ်လၢ “ဘၣ်မနုၤအဃိ သုအီၣ်ဃုာ်အီဃုာ်တၢ်ဒီး ပှၤဃ့သွဲဖိ ဒီးပှၤတၢ်ဒဲးဘးဖိတဖၣ်လဲၣ်.” လၢတၢ်ဂ့ၢ်အံၤအဃိ ယ့ၣ်ၡူးစံးဆၢက့ၤအဝဲသ့ၣ်လၢ “ပှၤလၢ အအိၣ်ဆူၣ်အိၣ်ချ့န့ၣ် တလိၣ်ဘၣ် ကသံၣ်သရၣ်ဘၣ်. မ့မ့ၢ် ပှၤလၢအဆိးက့တဖၣ်န့ၣ် လိၣ်ဘၣ်ဝဲလီၤ. ယဟဲဒ်သိး ကကိး ပှၤတီပှၤလိၤ တမ့ၢ်ဘၣ်. ယဟဲဒ်သိး ကကိး ပှၤတၢ်ဒဲးဘးဖိတဖၣ်လၢ ကပီၢ်ယၢ်လီၤက့ၤအသး အဂီၢ်လီၤ.”—လူၤကၣ် ၅:၂၉-၃၂.
၄. ဒ်ဝံယၡါယၤအတၢ်စံးပာ် အိၣ်ဝဲအသိး ပှၤယူဒၤဖိတဖၣ် ကဘၣ်သ့ၣ်ညါပာ်စၢၤဝဲ ဘၣ်ဃးဒီး မ့းၡံအၤအဂ့ၢ်ဒ်လဲၣ်.
၄ လံာ်စီဆှံတဲဝဲဒ်လဲၣ်. တချုးလၢ မ့းၡံအၤဟဲဒံးဘၣ်န့ၣ် ဝံယၡါယၤ တဲဆိပာ်စၢၤဝဲလၢ ပှၤဟီၣ်ခိၣ်ဖိတဖၣ်တတူၢ်လိာ်အီၤဘၣ်. ဝံအတၢ်စံးပာ် တဲဆိပာ်စၢၤဝဲလၢ “ပှၤကညီမၤတရီတပါ, ဒီးလဲၤသဒၣ်အီၤလီၤ. . . . ဒ်ပှၤတဂၤလၢ ပှၤမၤဘၢအမဲာ်လၢအီၤအသိး, ပှၤမၤအီၤတရီတပါ, ဒီးပတပာ်ဘၣ်အလီၢ်ဘၣ်.” (ယၡါယၤ ၅၃:၃) တကးဒံးဘၣ် မ့းၡံအၤန့ၣ် “ပှၤကညီ” ကသးဟ့အီၤလီၤ. အဃိ ပှၤယူဒၤဖိလၢယ့ၣ်ၡူးအစိၤန့ၣ် ကဘၣ်သ့ၣ်ညါပာ်စၢၤဝဲလၢ ပှၤတတူၢ်လိာ်ယ့ၣ်ၡူးကိးဂၤဒဲးဘၣ်.
၅. မုၢ်မဆါတနံၤအံၤ ပှၤအါဂၤထံၣ်ဝဲ ယ့ၣ်ၡူးအပျဲၢ်အဘီၣ်တဖၣ်ဒ်လဲၣ်.
၅ ပတၢ်အိၣ်သးလီၤဂာ်ဒီး ယ့ၣ်ၡူးအစိၤဒ်လဲၣ်. ဖဲပှၤလၢအအိၣ်ဒီးအလီၢ်အလၤ, ပှၤကဲဒိၣ် ဒီးပှၤကူၣ်ဘၣ်ကူၣ်သ့တဖၣ် မ့ၢ်ကဲထီၣ်ဝဲ တၢ်အိၣ်ဖှိၣ်ဖိအခါန့ၣ် တၢ်ဘူၣ်တၢ်ဘါခိၣ်နၢ်တဖၣ်အံၤ သးခုဒိၣ်မးလီၤ. အဝဲသ့ၣ်အတၢ်အိၣ်မူသကဲာ်ပဝး မ့ၢ်တလီၤပလိာ်ဒီး ကစၢ်ယွၤအတၢ်သိၣ်တၢ်သီတဖၣ်ဒၣ်လဲာ် တၢ်ဘူၣ်တၢ်ဘါခိၣ်နၢ်တဖၣ် တူၢ်လိာ်အဝဲသ့ၣ်လီၤ. ဘၣ်ဆၣ် ယဟိဝၤယွၤအခ့အပှၤလၢ အသးဆူၣ် ဒီးအအိၣ်ဒီးလုၢ်လၢ် သကဲာ်ပဝးလၢအဂ့ၤတဖၣ်န့ၣ် ပှၤအါဂၤထံၣ်ဆံး အဝဲသ့ၣ်အဃိ တၢ်ဘူၣ်တၢ်ဘါ ခိၣ်နၢ်တဖၣ်အံၤ ကွၢ်တလီၤအဝဲသ့ၣ်လီၤ. စီၤပီလူးတဲဝဲလၢ ကစၢ်ယွၤဃုထၢထီၣ်ပှၤလၢအဘၣ်တၢ် “ဆိကမိၣ်ဆံးအီၤတဖၣ်” လီၤ. (၁ ကရံၣ်သူး ၁:၂၆-၂၉) ဘၣ်ဆၣ် ယဟိဝၤယွၤအခ့အပှၤလၢ အသးတီတဖၣ်န့ၣ် မ့ၢ်တၢ်လုၢ်ဒိၣ်ပှ့ၤဒိၣ်လၢ ယဟိဝၤယွၤအဂီၢ်လီၤ.
၆. ဒ် မးသဲ ၁၁:၂၅, ၂၆ ပာ်ဖျါထီၣ်ဝဲအသိး ပကွၢ်လိမၤဒိး ယ့ၣ်ၡူးအတၢ်ပာ်သူၣ်ပာ်သး ကသ့ဒ်လဲၣ်.
၆ ဒ်သိး ပကဆဲးမၤ ယဟိဝၤယွၤအတၢ်မၤအဂီၢ် ပကဘၣ်မၤတၢ်မနုၤလဲၣ်. (ဖး မးသဲ ၁၁:၂၅, ၂၆ တက့ၢ်.) ပတဘၣ်အိၣ်ဒီး တၢ်ထံၣ်ဒ်သိးဒီး ပှၤဟီၣ်ခိၣ်ဖိလၢ အဆိကမိၣ်ဆံး ကစၢ်ယွၤအခ့အပှၤတဖၣ်န့ၣ်ဘၣ်. ပကဘၣ်သ့ၣ်နီၣ်ထီၣ်က့ၤလၢ ယဟိဝၤယွၤသူဝဲထဲ ပှၤလၢအဆီၣ်လီၤသးတဖၣ် လၢကမၤအတၢ်ဘၣ်သးအဂီၢ်လီၤ. (စံးထီၣ်ပတြၢၤ ၁၃၈:၆) ဆိကမိၣ်ထီၣ်က့ၤ ယဟိဝၤယွၤသူဝဲ ပှၤလၢ ပှၤဟီၣ်ခိၣ်ဖိထံၣ်ဝဲလၢ အဝဲသ့ၣ် တၢ်ကူၣ်ဘၣ်ကူၣ်သ့ တအိၣ်ဘၣ် ဒီးအတကျၢတခီဘၣ်တဖၣ်လၢ အမၤလၢထီၣ်ပှဲၤထီၣ် ကစၢ်ယွၤအတၢ်တိာ်ပာ်အါမံၤန့ၣ်တက့ၢ်.
(၂) ယ့ၣ်ၡူးပာ်ဖျါထီၣ် တၢ်သိၣ်လိလၢအကမၣ်တဖၣ်
၇. ဘၣ်မနုၤအဃိ ယ့ၣ်ၡူးကိးပှၤဖၤရံၤၡဲတဖၣ် လၢပှၤပာ်မၤအသးလဲၣ် ဒီးပှၤဖၤရံၤၡဲတဖၣ်မၤဆၢက့ၤဝဲဒ်လဲၣ်.
၇ ဖဲယ့ၣ်ၡူးအစိၤ တၢ်ဘူၣ်တၢ်ဘါခိၣ်နၢ်တဖၣ် လၢအပာ်မၤအသးန့ၣ် ယ့ၣ်ၡူးတဲဝဲအဝဲသ့ၣ် ဒူဒူလၢတသိၣ်လိပှၤဂၤလၢ ကဘူၣ်ထီၣ်ဘါထီၣ် ယဟိဝၤယွၤလၢ ကျဲလၢအဘၣ်ဘၣ်. အဒိ, ယ့ၣ်ၡူးပာ်ဖျါထီၣ်ဝဲလၢ ပှၤဖၤရံၤၡဲလၢ အပာ်မၤအသးတဖၣ်န့ၣ် အဝဲသ့ၣ် ပလီၢ်သူၣ်ပလီၢ်သး လၢအဘၣ်သ့အစုဒ်လဲၣ် ဒီးတမ့ၢ်လၢ ကဘၣ်ကွၢ်ထွဲအမိၢ်အပၢ်ဒ်လဲၣ်န့ၣ်ဘၣ်. (မးသဲ ၁၅:၁-၁၁) ခီဖျိလၢယ့ၣ်ၡူးအတၢ်ကတိၤအဃိ အပျဲၢ်အဘီၣ်တဖၣ် ကမၢကမၣ်ဝဲဒိၣ်မးလီၤ. အဃိ အဝဲသ့ၣ်သံကွၢ်ယ့ၣ်ၡူးလၢ “တၢ်လၢနတဲတဖၣ် မၤဆါ ပှၤဖၤရံၤၡဲ အသးန့ၣ် မ့ၢ်နသ့ၣ်ညါဧါ.” ယ့ၣ်ၡူးစံးဆၢအဝဲသ့ၣ်လၢ “ကယဲၢ်တၢ်မုၢ်တၢ်ဘိလၢ ယပၢ်အိၣ်လၢမူခိၣ် တသူၣ်လီၤဝဲဘၣ်န့ၣ် ကဘၣ် တၢ်ထဲးထီၣ်ကွံာ်အီၤလီၤ. ကနၣ်ဃုာ် အဝဲသ့ၣ်တဂ့ၤ. အဝဲသ့ၣ်န့ၣ် မ့ၢ်ပှၤမဲာ်တထံၣ်တၢ်လၢ အဟံးစုနဲၣ်ကျဲတၢ်လီၤ. ပှၤလၢ အမဲာ်တထံၣ်တၢ်တဂၤ မ့ၢ်ဆှၢပှၤလၢ အမဲာ်တထံၣ်တၢ်တဂၤန့ၣ် အဝဲသ့ၣ်ခံဂၤလၢာ် ကလီၤတဲာ်လၢ တၢ်ပူၤလီၤ.” (မးသဲ ၁၅:၁၂-၁၄) တၢ်လၢ ယ့ၣ်ၡူးတဲဝဲတဖၣ်န့ၣ် မၤဒိၣ်ထီၣ်တၢ်ဘူၣ်တၢ်ဘါခိၣ်နၢ်တဖၣ်အသး ဘၣ်ဆၣ် ယ့ၣ်ၡူးတပတုာ်ဘၣ် ဒီးဆဲးတဲတၢ်မ့ၢ်တၢ်တီလီၤ.
၈. ဘၣ်မနုၤအဃိ ယ့ၣ်ၡူးတဲဝဲလၢ ကစၢ်ယွၤတတူၢ်လိာ်ဝဲ တၢ်ဘူၣ်တၢ်ဘါခဲလၢာ် အတၢ်စူၢ်တၢ်နာ်ဘၣ်လဲၣ်.
၈ ယ့ၣ်ၡူးတဲဝဲပျီပျီလၢ တၢ်ဘူၣ်တၢ်ဘါတနီၤန့ၣ် သိၣ်လိတၢ်လၢ အကမၣ်တဖၣ်လီၤ. တကးဒံးဘၣ် ယ့ၣ်ၡူးတဲစ့ၢ်ကီးဝဲလၢ ကစၢ်ယွၤတတူၢ်လိာ်ဝဲ တၢ်ဘူၣ်တၢ်ဘါခဲလၢာ် အတၢ်စူၢ်တၢ်နာ်ဘၣ်. ဒီးယ့ၣ်ၡူးၡဲပၠးဝဲလၢ ပှၤအါဂၤကလဲၤလၢ ကျဲလၢအလဲၢ်တဘိ လၢအဆှၢပှၤဆူတၢ်ဟးဂီၤအပူၤ, မ့မ့ၢ်ကျဲအအံၣ်တဘိလၢ အဆှၢပှၤဆူ တၢ်မူအထူအယိာ်န့ၣ် ပှၤကလဲၤဝဲထဲစှၤကိာ်ဂၤလီၤ. (မးသဲ ၇:၁၃, ၁၄) ယ့ၣ်ၡူးအတၢ်ကတိၤန့ၣ် ပာ်ဖျါထီၣ်ဝဲလၢ ပှၤတနီၤတဲဝဲလၢ အဘူၣ်ထီၣ်ဘါထီၣ်ကစၢ်ယွၤ ဘၣ်ဆၣ် အနီၢ်ကီၢ်န့ၣ် အဝဲသ့ၣ်တမၤတၢ်ဘၣ် ကစၢ်ယွၤအသးဘၣ်. ယ့ၣ်ၡူးဟ့ၣ်ပလီၢ်ဝဲလၢ “ပလီၢ်သုသးလၢ ဝံအဘျၣ်တဖၣ်တက့ၢ်. အဝဲသ့ၣ် ကဟဲဆူသုအိၣ် ဒီးသိးဝဲ သိအဘ့ၣ် ဘၣ်ဆၣ် လၢအပူၤန့ၣ် မ့ၢ်ဝဲထွံၣ်မံၤလၢ အအဲၣ်ဒိး အီၣ်တၢ်န့ၣ်လီၤ. သုကသ့ၣ်ညါ အဝဲသ့ၣ် ခီဖျိလၢ အတၢ်မၤတဖၣ်လီၤ.”—မးသဲ ၇:၁၅-၂၀.
ပှၤအါဂၤတတူၢ်လိာ်ယ့ၣ်ၡူးဘၣ် ခီဖျိလၢ အပာ်ဖျါထီၣ် တၢ်ဘူၣ်တၢ်ဘါကမၣ် အတၢ်စူၢ်တၢ်နာ် ဒီးအတၢ်ဖံးတၢ်မၤတဖၣ်အဃိလီၤ. ဒ်ပှၤတတူၢ်လိာ် ယ့ၣ်ၡူးဘၣ်အသိး မုၢ်မဆါတနံၤအံၤ ပှၤတတူၢ်လိာ် ပတၢ်သးခုကစီၣ် လၢကျဲဒ်လဲၣ်. (ကွၢ်လံာ်အဆၢ ၉)c
၉. ယ့ၣ်ၡူး ပာ်ဖျါထီၣ်ဝဲ တၢ်ဘူၣ်တၢ်ဘါကမၣ်တနီၤ အတၢ်သိၣ်လိဒ်လဲၣ်.
၉ လံာ်စီဆှံတဲဝဲဒ်လဲၣ်. ဝံအတၢ်စံးပာ်တဲဆိပာ်စၢၤဝဲလၢ မ့းၡံအၤ ကသူၣ်ဆူၣ်သးဆူၣ် လၢယဟိဝၤယွၤအဟံၣ်အဂီၢ်လီၤ. (စံးထီၣ်ပတြၢၤ ၆၉:၉; ယိၤဟၣ် ၂:၁၄-၁၇) ယ့ၣ်ၡူးအသူၣ်ဆူၣ်သးဆူၣ်အဃိ အဝဲတဲဖျါထီၣ် တၢ်ဘူၣ်တၢ်ဘါကမၣ် အတၢ်သိၣ်လိ ဒီးအတၢ်ဖံးတၢ်မၤတဖၣ်လီၤ. အဒိ, ပှၤဖၤရံၤၡဲနာ်ဝဲလၢ ပှၤဟီၣ်ခိၣ်ဖိအိၣ်ဒီးသးလၢအသံတသ့ဘၣ်. မ့မ့ၢ်ယ့ၣ်ၡူးန့ၣ် အသိၣ်လိဝဲလၢ ပှၤလၢအသံန့ၣ် မ့ၢ်အမံဝဲလီၤ. (ယိၤဟၣ် ၁၁:၁၁) ဒီးပှၤစးဒူၤကဲတဖၣ်န့ၣ် တနာ်ဝဲ တၢ်ဂဲၤဆၢထၢၣ်သမူထီၣ်က့ၤဘၣ်. ဘၣ်ဆၣ် ယ့ၣ်ၡူးမၤသမူထီၣ်က့ၤ အတံၤသကိး စီၤလါစရူးလီၤ. (ယိၤဟၣ် ၁၁:၄၃, ၄၄; မၤတၢ် ၂၃:၈) ပှၤဖၤရံၤၡဲတဲဝဲလၢ တၢ်လၢပထံၣ်ဘၣ်အီၤတဖၣ်န့ၣ် မ့ၢ်ဝဲပတၢ်ဟဲဝံ ဒီးတၢ်ဘၣ်ကစၢ်ယွၤအသးလီၤ. ဘၣ်ဆၣ် မ့မ့ၢ်ယ့ၣ်ၡူးန့ၣ် အသိၣ်လိဝဲလၢ ပှၤဟီၣ်ခိၣ်ဖိတဖၣ် ကမၤကစၢ်ယွၤအတၢ်မၤဧါ, တမၤဘၣ်ဧါန့ၣ် အဝဲသ့ၣ်ဃုထၢလၢ အနီၢ်ကစၢ်ဒၣ်ဝဲသ့လီၤ.—မးသဲ ၁၁:၂၈.
၁၀. ဘၣ်ဃးဒီးပတၢ်သိၣ်လိန့ၣ် ဘၣ်မနုၤအဃိ ပှၤအါဂၤတတူၢ်လိာ်ဝဲလဲၣ်.
၁၀ ပတၢ်အိၣ်သးလီၤဂာ်ဒီး ယ့ၣ်ၡူးအစိၤဒ်လဲၣ်. ခီဖျိလၢ ပသူလံာ်စီဆှံဒ်သိးကပာ်ဖျါထီၣ် တၢ်ဘူၣ်တၢ်ဘါကမၣ်တဖၣ် အတၢ်သိၣ်လိအဃိ ပှၤအါဂၤတတူၢ်လိာ် ပတၢ်ကစီၣ်ဘၣ်. တၢ်ဘူၣ်တၢ်ဘါခိၣ်နၢ်တဖၣ် သိၣ်လိအတၢ်အိၣ်ဖှိၣ်ဖိလၢ ကစၢ်ယွၤစံၣ်ညီၣ် ပှၤအၢပှၤသီလၢ လရာ်အပူၤလီၤ. ဒ်သိး အတၢ်အိၣ်ဖှိၣ်ဖိတဖၣ် ကဆဲးအိၣ်လၢ အဝဲသ့ၣ်အတၢ်ကရၢကရိအပူၤအဂီၢ် အဝဲသ့ၣ် တဲပျံၤတဲဖုးဝဲဒ်န့ၣ်လီၤ. ဘၣ်ဆၣ် ဒ်ပမ့ၢ်ပှၤလၢအဘူၣ်ထီၣ်ဘါထီၣ် ယဟိဝၤယွၤ လၢအပှဲၤဒီးတၢ်အဲၣ်တၢ်ကွံအသိး ပပာ်ဖျါထီၣ်လၢ တၢ်သိၣ်လိသ့ၣ်တဖၣ်အံၤန့ၣ် အကမၣ်ဝဲလီၤ. တၢ်ဘူၣ်တၢ်ဘါခိၣ်နၢ်တဖၣ် သိၣ်လိစ့ၢ်ကီးဝဲလၢ ပှၤဟီၣ်ခိၣ်အိၣ်ဒီး သးလၢအသံတသ့ဘၣ်. တၢ်သိၣ်လိအံၤ အမ့ၢ်ဘၣ်န့ၣ် ပှၤတလိၣ်ဘၣ် တၢ်ဂဲၤဆၢထၢၣ်သမူထီၣ်က့ၤဘၣ်. အဃိ ဘၣ်ဃးဒီးတၢ်သိၣ်လိအံၤ ပဒုးနဲၣ်ပှၤဂၤလၢ အတအိၣ်လၢ လံာ်စီဆှံအပူၤဘၣ်. တၢ်ဘူၣ်တၢ်ဘါအါတက့ၢ် သိၣ်လိဝဲလၢ ကယဲၢ်တၢ်လၢပမၤန့ၣ် ကစၢ်ယွၤရဲၣ်ကျဲၤပာ်စၢၤဝဲ မ့တမ့ၢ် ခီဖျိလၢ ပတၢ်ဟဲဝံအဃိလီၤ. ဘၣ်ဃးဒီးတၢ်ဂ့ၢ်အံၤ ပတဲဘၣ်အဝဲသ့ၣ်လၢ ပဝဲခဲလၢာ်ပအိၣ်ဒီးတၢ်သဘျ့ ဒီးပဃုထၢလၢ ပကမၤကစၢ်ယွၤအတၢ်ဘၣ်သးသ့ဝဲလီၤ. ဖဲပတဲဖျါထီၣ် အဝဲသ့ၣ်အတၢ်သိၣ်လိလၢ အကမၣ်အခါ အဝဲသ့ၣ်မၤဆၢက့ၤဝဲဒ်လဲၣ်. အဝဲသ့ၣ်သးဒိၣ်ထီၣ်တၢ်ဒိၣ်မးလီၤ.
၁၁. ယ့ၣ်ၡူးအတၢ်ကတိၤဖဲ ယိၤဟၣ် ၈:၄၅-၄၇ န့ၣ် ကစၢ်ယွၤအဲၣ်ဒိးဝဲလၢ အခ့အပှၤတဖၣ် ကမၤတၢ်မနုၤလဲၣ်.
၁၁ ဒ်သိး ပကဆဲးမၤ ယဟိဝၤယွၤအတၢ်မၤအဂီၢ် ပကဘၣ်မၤတၢ်မနုၤလဲၣ်. ပမ့ၢ်နာ်တၢ်မ့ၢ်တၢ်တီန့ၣ် ပကဒိကနၣ်ဒီးမၤထွဲ တၢ်လၢကစၢ်ယွၤတဲဝဲတဖၣ်လီၤ. (ဖး ယိၤဟၣ် ၈:၄၅-၄၇ တက့ၢ်.) မုၣ်ကီၤလံၢ်န့ၣ် တအဲၣ်တၢ်မ့ၢ်တၢ်တီဘၣ်. ပတအဲၣ်ဒိးလီၤဂာ်ဒီး မုၣ်ကီၤလံၢ်ဘၣ် ဒီးပတအဲၣ်ဒိးပာ်တ့ၢ်ကွံာ် တၢ်မ့ၢ်တၢ်တီ နီတဘျီစ့ၢ်ကီးဘၣ်. တကးဒံးဘၣ် ပတမၤတၢ်တမံၤဂ့ၤတမံၤဂ့ၤလၢ ကထီဒါလိာ်အသးဒီး တၢ်လၢပနာ်အီၤတဖၣ်ဘၣ်. (ယိၤဟၣ် ၈:၄၄) ကစၢ်ယွၤအဲၣ်ဒိးဝဲလၢ အခ့အပှၤတဖၣ် “သးဟ့တၢ်အၢ ဒီးဟံးဃာ်တၢ်ဂ့ၤ” ဒ်ယ့ၣ်ၡူးမၤဝဲအသိးလီၤ.—ရိမ့ၤ ၁၂:၉; ဧ့ၤဘြံၤ ၁:၉.
(၃) ယ့ၣ်ၡူးဘၣ်တၢ်မၤအၢမၤနးအီၤ
ပှၤအါဂၤတတူၢ်လိာ်ယ့ၣ်ၡူးဘၣ် ခီဖျိလၢ ယ့ၣ်ၡူးသံလၢ တၢ်မၤအၢမၤနးအသ့ၣ်တၢၣ်လိၤအဃိလီၤ. ဒ်ပှၤတတူၢ်လိာ် ယ့ၣ်ၡူးဘၣ်အသိး မုၢ်မဆါတနံၤအံၤ ပှၤတတူၢ်လိာ် ပတၢ်သးခုကစီၣ် လၢကျဲဒ်လဲၣ်. (ကွၢ်လံာ်အဆၢ ၁၂)d
၁၂. ယ့ၣ်ၡူးသံလၢ တၢ်မၤအၢမၤနး အသ့ၣ်တၢၣ်လိၤန့ၣ် ဘၣ်မနုၤအဃိ ပှၤယူဒၤဖိတဖၣ် တတူၢ်လိာ်အီၤလဲၣ်.
၁၂ တၢ်ဂ့ၢ်အိၣ်ဒံးအဂၤတခါလၢ ဘၣ်မနုၤအဃိ ပှၤယူဒၤဖိတဖၣ် တတူၢ်လိာ်ယ့ၣ်ၡူးဘၣ်လဲၣ်. စီၤပီလူးတဲဝဲလၢ “ပစံၣ်တဲၤတဲလီၤ ခရံာ်ဘၣ်တၢ်မၤသံအီၤလၢ သ့ၣ်တၢၣ်အလိၤအဂ့ၢ်, လၢအကဲထီၣ်ဝဲ တၢ်လီၤဃံၢ်အလီၢ်လၢ ပှၤယူဒၤဖိအဂီၢ်” လီၤ. (၁ ကရံၣ်သူး ၁:၂၃) ဖဲယ့ၣ်ၡူးသံလၢ တၢ်မၤအၢမၤနးအသ့ၣ်တၢၣ်လိၤအခါ ဘၣ်မနုၤအဃိ ပှၤယူဒၤဖိတဖၣ် တတူၢ်လိာ်အီၤဘၣ်လဲၣ်. ယ့ၣ်ၡူးသံလၢသ့ၣ်တၢၣ်အလိၤဒ် ပှၤလၢအအိၣ်ဒီးတၢ်ကမၣ်ဖးဒိၣ် ဒီးတၢ်ဒဲးဘးတဂၤအသိး အဃိ အဝဲသ့ၣ်တနာ်ဝဲလၢ ယ့ၣ်ၡူးမ့ၢ်မ့းၡံအၤဘၣ်.—၅ မိၤၡ့ ၂၁:၂၂, ၂၃.
၁၃. ပှၤလၢတတူၢ်လိာ်ယ့ၣ်ၡူးဘၣ်တဖၣ်န့ၣ် အဝဲသ့ၣ်တနာ်ဝဲ တၢ်ဂ့ၢ်မနုၤလဲၣ်.
၁၃ ယ့ၣ်ၡူးအတၢ်ကမၣ်တအိၣ်ဘၣ်, ပှၤမၤအီၤတတီတလိၤ ဒီးစံၣ်ညီၣ်အီၤအၢအၢသီသီန့ၣ် ပှၤယူဒၤဖိလၢ တတူၢ်လိာ်အီၤဘၣ်တဖၣ်န့ၣ် တသ့ၣ်ညါဝဲ တၢ်ဂ့ၢ်သ့ၣ်တဖၣ်အံၤဘၣ်. စံၣ်ညီၣ်ကွီၢ် လၢအစံၣ်ညီၣ်ဝဲယ့ၣ်ၡူးအတၢ်မူးတၢ်ရၢ်န့ၣ် တစံၣ်ညီၣ်တၢ် တီတီလိၤလိၤဘၣ်. ပှၤယူဒၤဖိအကွီၢ်ဘျီၣ်ဒိၣ်အဒိၣ်ကတၢၢ်န့ၣ် ကရီစံၣ်ညီၣ်ဝဲ ယ့ၣ်ၡူးဒီး အဝဲသ့ၣ်တမၤထွဲဝဲဒ် တၢ်မူးတၢ်ရၢ်အတၢ်သိၣ်တၢ်သီ အိၣ်ဝဲအသိးဘၣ်. (လူၤကၣ် ၂၂:၅၄; ယိၤဟၣ် ၁၈:၂၄) လၢအဝဲသ့ၣ်ကဒိကနၣ်ဝဲ တၢ်ဂ့ၢ်တၢ်ကျိၤလီၤတံၢ်လီၤဆဲး ဒီးတၢ်လၢပှၤပာ်ဒ့ၣ်ပာ်ကမၣ် ယ့ၣ်ၡူးအလီၢ်န့ၣ် အဝဲသ့ၣ် “ဃုဝဲတၢ်အုၣ်အသးလၢ အတမ့ၢ်တတီဒ်သိး ကမၤသံယ့ၣ်ၡူးအဂီၢ်” လီၤ. ဖဲအဝဲသ့ၣ်ဃုယ့ၣ်ၡူး အတၢ်ကမၣ်တဘၣ်ဘၣ်အခါ ပှၤလုၢ်တၢ်အဒိၣ်မၤဝဲဒ်သိး ယ့ၣ်ၡူးကတဲကမၣ်ကစၢ်ယွၤ အဃိ အဝဲသ့ၣ်တဲဝဲလၢ ယ့ၣ်ၡူးကတိၤထီဒါကစၢ်ယွၤလီၤ. အဝဲသ့ၣ်မၤဝဲဒ်အံၤန့ၣ် ထီဒါလိာ်အသးဒီး ကစၢ်ယွၤတၢ်သိၣ်တၢ်သီလီၤ. (မးသဲ ၂၆:၅၉; မၢ်ကူး ၁၄:၅၅-၆၄) ဖဲယ့ၣ်ၡူးဂဲၤဆၢထၢၣ်သမူထီၣ်က့ၤ ဝံၤအလီၢ်ခံ စံၣ်ညီၣ်ကွီၢ်လၢ အတတီတလိၤဘၣ်တဖၣ်န့ၣ် ဟ့ၣ်လီၤဝဲ ပှၤရိမ့ၤအသုးဖိ လၢအိၣ်ခိးဝဲတၢ်သွၣ်ခိၣ်တဖၣ်လၢ “စ့အါမး” ဒ်သိးအဝဲသ့ၣ်ကရၤလီၤ တၢ်ကစီၣ်ကဘျံးကဘျၣ်လၢ ယ့ၣ်ၡူးအပျဲၢ်အဘီၣ်တဖၣ် ဟဲဟုၣ်န့ၢ်အစိၣ်န့ၣ်လီၤ.—မးသဲ ၂၈:၁၁-၁၅.
၁၄. ဘၣ်ဃးဒီး မ့းၡံအၤ ကဘၣ်သံအဂ့ၢ်န့ၣ် ဝံအတၢ်စံးပာ် တဲဆိပာ်စၢၤဝဲဒ်လဲၣ်.
၁၄ လံာ်စီဆှံတဲဝဲဒ်လဲၣ်. ဖဲယ့ၣ်ၡူးအစိၤန့ၣ် ပှၤယူဒၤဖိအါဂၤ တဆိကမိၣ်ဝဲလၢ မ့းၡံအၤန့ၣ် ကဘၣ်သံဝဲဘၣ်. ဘၣ်ဆၣ် ဝံအတၢ်စံးပာ်အိၣ်ပာ်စၢၤလၢ မ့းၡံအၤန့ၣ်က “လူလီၤအသးတုၤအသံ, ဒီးတၢ်ဂံၢ်အီၤလၢ ပှၤမၤကမၣ်တၢ်ဖိအကျါ, ဒီးစိာ်ထီၣ်ကွံာ်ပှၤအါဂၤအတၢ်ဒဲးဘး, ဒီးကဃ့ညးတၢ်လၢ ပှၤမၤကမၣ်တၢ်အဂီၢ်လီၤ.” (ယၡါယၤ ၅၃:၁၂) အဃိ ဖဲယ့ၣ်ၡူးသံဝဲဒ် ပှၤတၢ်ဒဲးဘးဖိအခါ တကြၢးကဲထီၣ်တၢ်လီၤဃံၢ်လၢ ပှၤယူဒၤဖိတဖၣ်အဂီၢ်ဘၣ်.
၁၅. ပှၤတနီၤတတူၢ်လိာ် ယဟိဝၤပှၤအုၣ်အသးတဖၣ်လၢ တၢ်ဂ့ၢ်မနုၤအဖီခိၣ်လဲၣ်.
၁၅ ပတၢ်အိၣ်သးလီၤဂာ်ဒီး ယ့ၣ်ၡူးအစိၤဒ်လဲၣ်. ဒ်ပှၤပာ်ဒ့ၣ်ပာ်ကမၣ်ယ့ၣ်ၡူးဒီး ပှၤမၤအၢမၤသီအီၤအသိး မုၢ်မဆါတနံၤအံၤ ယဟိဝၤပှၤအုၣ်အသးတဖၣ် ပှၤမၤအဝဲသ့ၣ်ဒ်န့ၣ်လီၤ. အဒိ, ဖဲအနံၣ် ၁၉၃၀ ဒီး ၁၉၄၀ အဘၢၣ်စၢၤ လၢကီၢ်အမဲရကၤန့ၣ် စံၣ်ညီၣ်ကွီၢ် ထီဒါပတၢ်ခွဲးတၢ်ယာ်လၢ ပကဘူၣ်ထီၣ်ဘါထီၣ် ကစၢ်ယွၤလၢတၢ်သဘျ့အပူၤလီၤ. စံၣ်ညီၣ်ကွီၢ်တနီၤ ကွၢ်တလီၤပှၤဒီးထီဒါပှၤလီၤ. လၢခွံဘဲၣ်(ခ်), ကီၢ်ခဲနဒၣ်အပူၤန့ၣ် သရိာ်ဒီးကီၢ်စဲၣ် မၤသကိးတၢ်ဒ်သိး ကမၤပတုာ် ပတၢ်စံၣ်တဲၤတဲလီၤတၢ်မၤလီၤ. ခီဖျိလၢ ပှၤစံၣ်တဲၤတဲလီၤတၢ်ဖိအါဂၤ တဲဘၣ်ပှၤဂၤဘၣ်ဃးဒီး ကစၢ်ယွၤအဘီအမုၢ်အဃိ အဝဲသ့ၣ်လီၤဘၣ်လၢဃိာ်ပူၤလီၤ. နးစံၣ် ကၠၢမနံၣ် အပဒိၣ်ပပှၢ်တဖၣ် မၤသံဝဲ ဒီပုၢ်ဝဲၢ်ခွါသးစၢ်လၢ အသးတီအါမးလီၤ. ဒီးတယံာ်ဒံးဘၣ်န့ၣ် ပဒီပုၢ်ဝဲၢ်လၢကီၢ်ရၢၡါတဖၣ် ပှၤစံၣ်ညီၣ်အဝဲသ့ၣ်လၢ အအိၣ်ဒီး အတၢ်ကမၣ်ဒီး ပှၤပၢနုာ်အဝဲသ့ၣ်လၢဃိာ်ပူၤလီၤ. ခီဖျိလၢအဝဲသ့ၣ်ဟးတဲ လံာ်စီဆှံအတၢ်ကစီၣ်အဃိ ပှၤဘၣ်မူပှၤဒါတဖၣ်တဲဝဲလၢ အဝဲသ့ၣ်ကဲဝဲ “ပှၤမၤတၢထီၣ်တၢလီၤတၢ်ဖိတဖၣ်လီၤ.” ဟီၣ်ခိၣ်သီတၢ်ကွဲးကျိာ်ထံ လံာ်စီဆှံ လၢရၢၡါအကျိာ်န့ၣ် အဝဲသ့ၣ်တဟ့ၣ်အခွဲးလၢ ပှၤကရၤလီၤဝဲဘၣ် ဒီးတဲဝဲလၢ လံာ်အံၤမ့ၢ်ဝဲ “တၢ်ဂ့ၢ်တၢ်ကျိၤလၢ အမၤတၢထီၣ်တၢလီၤတၢ်လီၤ.” ခီဖျိလၢ လံာ်အံၤ အိၣ်ဒီးယဟိဝၤယွၤအမံၤအဃိလီၤ.
၁၆. ဒ် ၁ ယိၤဟၣ် ၄:၁ ပာ်ဖျါထီၣ်ဝဲအသိး တၢ်လံၣ်တၢ်လီ ဘၣ်ဃးဒီး ယဟိဝၤယွၤအခ့အပှၤတဖၣ်အဂ့ၢ်န့ၣ် ဘၣ်မနုၤအဃိ ပတဘၣ်နာ်အီၤဘၣ်လဲၣ်.
၁၆ ဒ်သိး ပကဆဲးမၤ ယဟိဝၤယွၤအတၢ်မၤအဂီၢ် ပကဘၣ်မၤတၢ်မနုၤလဲၣ်. ဃုသ့ၣ်ညါ တၢ်မ့ၢ်တၢ်တီတက့ၢ်. ဖဲယ့ၣ်ၡူးစံၣ်တဲၤတဲလီၤတၢ်လၢ ကစၢၢ်ခိၣ်အခါ အဟ့ၣ်ပလီၢ် ပှၤဒိကနၣ်တၢ်ဖိတဖၣ်လၢ ပှၤတနီၤက “တဲအၢတဲသီသု အကလုာ်ကလုာ်” လီၤ. (မးသဲ ၅:၁၁) တၢ်လံၣ်တၢ်လီတဖၣ်န့ၣ် ဟဲလၢမုၣ်ကီၤလံၢ်အအိၣ်လီၤ. မုၣ်ကီၤလံၢ်သူဝဲပှၤလၢ အထီဒါတၢ်တဖၣ်လၢ ကရၤလီၤဝဲ တၢ်လံၣ်တၢ်လီဘၣ်ဃးဒီး ပှၤလၢအအဲၣ်တၢ်မ့ၢ်တၢ်တီတဖၣ် အဂ့ၢ်လီၤ. (လီၣ်ဖျါ ၁၂:၉, ၁၀) ပတဘၣ်ပျဲ ပှၤလၢအထီဒါပှၤတဖၣ် အတၢ်လံၣ်တၢ်လီ ကဒိၣ်စိလၢပဖီခိၣ်ဘၣ်. ဒီးပတဘၣ်ဟ့ၣ်အခွဲးလၢ အဝဲသ့ၣ်အတၢ်လံၣ်တၢ်လီန့ၣ် ကမၤပျံၤမၤဖုးပှၤ ဒ်သိးပတၢ်နာ် ကလီၤစှၤအဂီၢ်န့ၣ်ဘၣ်.—ဖး ၁ ယိၤဟၣ် ၄:၁ တက့ၢ်.
(၄) ယ့ၣ်ၡူးကဘၣ်တၢ်ဟ့ၣ်လီၤအီၤဒီး တၢ်ပာ်ကွံာ်တ့ၢ်အီၤ
ပှၤအါဂၤတတူၢ်လိာ်ယ့ၣ်ၡူးဘၣ် ခီဖျိလၢ စီၤယူဒၤ ဟ့ၣ်လီၤကွံာ်အီၤအဃိလီၤ. ဒ်ပှၤတတူၢ်လိာ် ယ့ၣ်ၡူးဘၣ်အသိး မုၢ်မဆါတနံၤအံၤ ပှၤတတူၢ်လိာ် ပတၢ်သးခုကစီၣ် လၢကျဲဒ်လဲၣ်. (ကွၢ်လံာ်အဆၢ ၁၇-၁၈)e
၁၇. တၢ်ကဲထီၣ်အသးဒီးယ့ၣ်ၡူး တချုးဖဲအကသံအနၤန့ၣ် ဘၣ်မနုၤအဃိ ကဲထီၣ်တၢ်လီၤဃံၢ်လၢ ပှၤအါဂၤအဂီၢ်လဲၣ်.
၁၇ တချုးဖဲယ့ၣ်ၡူးကသံန့ၣ် အတၢ်မၢဖိတဆံခံဂၤ အကျါတဂၤန့ၣ် ဟ့ၣ်လီၤကွံာ်အီၤလီၤ. ဒီးအတၢ်မၢဖိလၢ အဂၤတဂၤန့ၣ် ဂ့ၢ်လိာ်ကွံာ်အီၤသၢဘျီလီၤ. ဒီးတၢ်မၢဖိလၢ အဂၤတဖၣ်န့ၣ် ပာ်တ့ၢ်ကွံာ်အီၤတချုးဖဲ အကသံအနၤန့ၣ်လီၤ. (မးသဲ ၂၆:၁၄-၁၆, ၄၇, ၅၆, ၇၅) ဘၣ်ဆၣ် ယ့ၣ်ၡူးသ့ၣ်ညါပာ်စၢၤလၢ တၢ်သ့ၣ်တဖၣ်အံၤ ကကဲထီၣ်အသး အဃိ အဝဲတကမၢကမၣ်ဘၣ်. (ယိၤဟၣ် ၆:၆၄; ၁၃:၂၁, ၂၆, ၃၈; ၁၆:၃၂) ပှၤလၢအထံၣ်ဘၣ် တၢ်ကဲထီၣ်အသးတဖၣ်အံၤန့ၣ် အဝဲသ့ၣ်ကဆိကမိၣ်ဘၣ်လၢ ‘ယ့ၣ်ၡူးအတၢ်မၢဖိတဖၣ် မ့ၢ်မၤဝဲဒ်အံၤန့ၣ် ယတအဲၣ်ဒိးကဲထီၣ် ဒ်အဝဲသ့ၣ်အသိးဘၣ်.’
၁၈. တချုးဖဲယ့ၣ်ၡူးသံဒံးဘၣ်န့ၣ် ဝံအတၢ်စံးပာ်တဖၣ် ဟဲလၢထီၣ်ပှဲၤထီၣ်ဝဲဒ်လဲၣ်.
၁၈ လံာ်စီဆှံတဲဝဲဒ်လဲၣ်. ပူၤကွံာ်အနံၣ်လၢအကယၤတဖၣ် တချုးလၢ ယ့ၣ်ၡူးဟဲလီၤလၢ ဟီၣ်ခိၣ်ချၢဒံးဘၣ်န့ၣ် ယဟိဝၤယွၤပာ်ဖျါထီၣ်ဝဲဒၣ်လၢ မ့းၡံအၤကဘၣ်တၢ်ဆါလီၤအီၤလၢ စ့အဘ့ၣ် ၃၀ လီၤ. (စကၤရယၤ ၁၁:၁၂, ၁၃) ပှၤလၢကဆါလီၤအီၤတဂၤန့ၣ် မ့ၢ်ဝဲအတံၤသကိးလၢ အဘူးဒီးအီၤတဂၤလီၤ. (စံးထီၣ်ပတြၢၤ ၄၁:၉) ဝံစကၤရယၤ ကွဲးစ့ၢ်ကီးဝဲလၢ “ကျီကွံာ်ပှၤကွၢ်သိတက့ၢ်, ဒီးသိန့ၣ်ကလီၤပြံလီၤပြါလီၤ.” (စကၤရယၤ ၁၃:၇) ဝံအတၢ်စံးပာ်အိၣ်ဒ်အံၤ သနာ်က့ ပှၤလၢအသူၣ်ဘျၢသးဘျၢတဖၣ် တလီၤဃံၢ်ဝဲဘၣ်. လၢတၢ်န့ၣ်အလီၢ် ဖဲအဝဲသ့ၣ်ထံၣ်ဘၣ်ဝဲ ယ့ၣ်ၡူးမၤလၢထီၣ်ပှဲၤထီၣ် ဝံအတၢ်စံးပာ်တဖၣ်အံၤအခါ အဝဲသ့ၣ်တၢ်နာ် ဟဲဂၢၢ်ကျၢၤထီၣ်ဝဲလီၤ.
၁၉. ပှၤလၢအသူၣ်ဘျၢသးဘျၢတဖၣ် သ့ၣ်ညါဝဲ တၢ်ဂ့ၢ်မနုၤလဲၣ်.
၁၉ ပတၢ်အိၣ်သးလီၤဂာ်ဒီး ယ့ၣ်ၡူးအစိၤဒ်လဲၣ်. ပစိၤခဲအံၤစ့ၢ်ကီး ယဟိဝၤပှၤအုၣ်အသးစှၤဂၤ ပတုာ်မၤ ယဟိဝၤယွၤအတၢ်မၤ, ကဲထီၣ်ပှၤလၢအစူၢ်ကွံာ်ညိကွံာ်တၢ်နာ်လီၤ. တကးဒံးဘၣ် အဝဲသ့ၣ်မၤဝဲဒ်သိး ပှၤဂၤတဖၣ်ကပာ်တ့ၢ်ကွံာ် တၢ်မ့ၢ်တၢ်တီအဂီၢ်စ့ၢ်ကီးလီၤ. အဝဲသ့ၣ်ရၤလီၤ တၢ်ကစီၣ်လၢ အတဂ့ၤဘၣ်တဖၣ်, အတမ့ၢ်တတီဘၣ် ဒီးတဲလံၣ်တဲလီဘၣ်ဃးဒီး ယဟိဝၤပှၤအုၣ်အသးတဖၣ်အဂ့ၢ်လၢ မံဒံယါတၢ်ကစီၣ်ဒီး အ့ထၢၣ်နဲးအပူၤလီၤ. ဘၣ်ဆၣ် ပှၤလၢအသူၣ်ဘျၢသးဘျၢတဖၣ်န့ၣ် တလီၤဃံၢ်ဝဲလၢ တၢ်ဂ့ၢ်သ့ၣ်တဖၣ်အံၤဘၣ်. လၢတၢ်န့ၣ်အလီၢ် အဝဲသ့ၣ်သ့ၣ်ညါဝဲလၢ လံာ်စီဆှံတဲဆိပာ်စၢၤဝဲလၢ တၢ်သ့ၣ်တဖၣ်အံၤ ကကဲထီၣ်အသးအဃိလီၤ.—မးသဲ ၂၄:၂၄; ၂ ပ့းတရူး ၂:၁၈-၂၂.
၂၀. ဖဲပှၤဂၤပာ်တ့ၢ်ကွံာ် တၢ်မ့ၢ်တၢ်တီအခါ ဒ်သိးပတလီၤဃံၢ်တဂ့ၤအဂီၢ် ပကဘၣ်မၤတၢ်မနုၤလဲၣ်. (၂ တံၤမသ့း ၄:၄, ၅)
၂၀ ဒ်သိးပကဆဲးမၤ ယဟိဝၤယွၤအတၢ်မၤအဂီၢ် ပကဘၣ်မၤတၢ်မနုၤလဲၣ်. ပကဘၣ်မၤဂၢၢ်ကျၢၤထီၣ် ပတၢ်နာ်ခီဖျိ မၤလိလံာ်စီဆှံ, ဃ့ဘါထုကဖၣ်ထီဘိ ဒီးမၤယဟိဝၤယွၤအတၢ်မၤဆူၣ်ဆူၣ်လီၤ. (ဖး ၂ တံၤမသ့း ၄:၄, ၅ တက့ၢ်.) ပမ့ၢ်မၤဂၢၢ်ကျၢၤထီၣ် ပတၢ်နာ်န့ၣ် ဖဲပနၢ်ဟူဘၣ်တၢ်ကစီၣ်တမ့ၢ်တတီ ဘၣ်ဃးဒီး ယဟိဝၤပှၤအုၣ်အသးတဖၣ်အဂ့ၢ်အခါ ပပာ်ပသးမုာ်မုာ်ခုၣ်ခုၣ်သ့ဝဲလီၤ. (ယၡါယၤ ၂၈:၁၆) ပတၢ်အဲၣ်ယဟိဝၤယွၤ, အကလုၢ်ကထါ ဒီးပဒီပုၢ်ဝဲၢ်မုၣ်ခွါတဖၣ်န့ၣ် ကမၤစၢၤပှၤလၢ ပကဆဲးသးတီဒီး ယဟိဝၤယွၤဖဲ ပှၤဂၤပာ်တ့ၢ်ကွံာ် တၢ်မ့ၢ်တၢ်တီအခါလီၤ.
၂၁. မုၢ်မဆါတနံၤအံၤ ပှၤအါတက့ၢ်တတူၢ်လိာ် ပတၢ်ကစီၣ် သနာ်က့ ပနာ်န့ၢ်တၢ်မနုၤသ့လဲၣ်.
၂၁ ဖဲတၢ်မၢဖိအစိၤန့ၣ် ပှၤအါဂၤတတူၢ်လိာ်ယ့ၣ်ၡူးဘၣ်. ဘၣ်ဆၣ် ပှၤလၢအတူၢ်လိာ်ယ့ၣ်ၡူးန့ၣ် အိၣ်စ့ၢ်ကီးအါဂၤလီၤ. ဖဲန့ၣ်အကျါ ပၣ်ဃုာ်ဒီးပှၤယူဒၤဖိ အကွီၢ်ဘျီၣ်ဒိၣ်အဒိၣ်ကတၢၢ်တဂၤဒီး “ပှၤလုၢ်တၢ်ဒိၣ်တဖၣ် အါဂၤ” လီၤ. (မၤတၢ် ၆:၇; မးသဲ ၂၇:၅၇-၆၀; မၢ်ကူး ၁၅:၄၃) ဒ်န့ၣ်အသိး မုၢ်မဆါတနံၤအံၤ ပှၤလၢအကကွဲၢ်တဖၣ် တူၢ်လိာ်ယ့ၣ်ၡူးလီၤ. ဘၣ်မနုၤအဃိလဲၣ်. မ့ၢ်လၢအဝဲသ့ၣ် သ့ၣ်ညါတၢ်မ့ၢ်တၢ်တီ ဒီးအဲၣ်တၢ်မ့ၢ်တၢ်တီ လၢလံာ်စီဆှံအပူၤအဃိလီၤ. ကစၢ်ယွၤအကလုၢ်ကထါတဲဝဲလၢ “ပှၤလၢအအဲၣ် နတၢ်သိၣ်တၢ်သီတဖၣ်န့ၣ် အိၣ်ဒီးတၢ်ဃူတၢ်ဖိးအါမးလီၤ. ဒီးတၢ်လီၤဃံၤအလီၢ် တအိၣ်ဘၣ်ဒီးအီၤဘၣ်.”—စံးထီၣ်ပတြၢၤ ၁၁၉:၁၆၅.
တၢ်သးဝံၣ် ၁၂၄ တီထီဘိ
a တၢ်မၤလိလၢအပူၤကွံာ်တခါန့ၣ် ပတဲသကိးဘၣ်တၢ်ဂ့ၢ်လွံၢ်ထံၣ် လၢဘၣ်မနုၤအဃိ ပှၤတတူၢ်လိာ် ယ့ၣ်ၡူးဘၣ်လဲၣ်ဒီး မုၢ်မဆါတနံၤအံၤ ဘၣ်မနုၤအဃိ ပှၤတတူၢ်လိာ် ပတၢ်ကစီၣ်ဘၣ်လဲၣ်န့ၣ်လီၤ. လၢတၢ်မၤလိအံၤအပူၤ ပကတဲသကိးအါထီၣ် တၢ်ဂ့ၢ်လွံၢ်ထံၣ်လီၤ. တကးဒံးဘၣ် ပကတဲသကိး ဘၣ်မနုၤအဃိ ပှၤလၢအအဲၣ် ယဟိဝၤယွၤတဖၣ် တပျဲဝဲလၢ တၢ်တမံၤဂ့ၤတမံၤဂ့ၤ ကမၤလီၤဃံၢ် အဝဲသ့ၣ်ဘၣ်လဲၣ်န့ၣ်လီၤ.
b တၢ်တဲဖျါထီၣ်တၢ်ဂီၤ အခီပညီ– ယ့ၣ်ၡူးအီၣ်သကိးတၢ်ဒီး စီၤမးသဲဒီးပှၤဃ့သွဲဖိတဖၣ်လီၤ.
c တၢ်တဲဖျါထီၣ်တၢ်ဂီၤ အခီပညီ– ယ့ၣ်ၡူးနီဟးထီၣ်ကွံာ် ပှၤဆါတၢ်ပှ့ၤတၢ်လၢ တၢ်လုၢ်ဟံၣ်အပူၤလီၤ.
d တၢ်တဲဖျါထီၣ်တၢ်ဂီၤ အခီပညီ– ယ့ၣ်ၡူးယိးဝဲ တၢ်မၤအၢမၤနးအသ့ၣ်တၢၣ်လီၤ.
e တၢ်တဲဖျါထီၣ်တၢ်ဂီၤ အခီပညီ– စီၤယူဒၤဟ့ၣ်လီၤကွံာ်ယ့ၣ်ၡူး ခီဖျိလၢတၢ်နၢမူတထံၣ်လီၤ.